Since 18th Nov 2007 An official weekly newspaper for the Hyderabad Mizo Association Vol.14 Issue-1 Dt.

15th July,2012(p-1)

GOD PARTICLE
-Lalrinthara Pachuau M.Sc(phy),Asst Prof. PUC

Tun hnai maiah Scientist-ten God particle an hmuhchhuah thu media lamah te kan hmu chamchi a. Engnge a nih chiah tih he article-ah hian tawite, mawl thei ang berin tarlan kan tum dawn a ni. Large Hadron Collider (LHC) : Engkim mai hi thil te tak te te, atom ai pawha te lehzualin an siam a; chutiang chu particle an ti. Heng particle te hi chak taka chettir chuan thahrui tam tak an nei thei a, chu thahrui an neih chu thil zirbingna atan te leh thil dang dangah te hman tangkai theih a ni. Chutianga particle te thahrui tam tak an lo neih theihna tura chak taka chettirna khawl chu Accelerator an ti a ni. Ram hrang hrang tangrualin France-Switzerland ramriah chutiang accelerator pakhat chu kum 20 kalta atang khan an buatsaih mup mup mai a, chu accelerator hming chu Large Hadron Collider (LHC) an ti a ni. He project atan hian ram hrang hrang atangin scientist 8000 zet an thawkho mup mup a, a khawl siamna atan hian India pawisa Rs 500,000,000,000 (tluklehdingawn zanga) vel zet senral a ni a, mihringten experiment pakhat atana sum leh pai kan senna nasa ber a ni. Chu khawl chu a lian hle a; a kualin a awm a. Lei hnuai 300ft. velah a awm a, a tlang teh kualin 27km vel zeta sei a ni bawk. A chhungah chuan particle chi khat proton te chu a inhmatawnin chak em emin eng tluk deuhthaw (99.9999991% of light speed)-in an kaltir a, an insu ta a. Chuta tang chuan thahrui tam namen lova tam a rawn chhuak a. Chu thahrui chu universe intan tir Big bang zawhhlim hlawla thahrui zat deuh thuak a ni a. Chutianga tamah chuan tuna kan thupui God particle pawh hi a insiam thei ngeiin a theory atang chuan a lang a. Chu chu he khawl hian lo teh/hmuhchhuah a tum ta a ni. Elementary particle : Kan bula vela hmuh theih thil zawng zawngte leh kan hmuh phak loh atom leh molecule te zawng zawng hi particle te reuh te tein a siam vek a. A zavai phei chuan tam tak a awm a ni. Chutiang particle te chu hlawm hnih lian pui puiah an then leh phawk a, hlawm khat chu Scientist Enrico Fermi hming chawiin Fermion an ti a, spin , 3/2, 5/2, etc an nei zel a. Hetah hian proton, neutron, electron te bakah muon, tau, hyperon, etc te an awm a. Hlawm khat dang chu Indian physicist S.N.Bose-a hming chawiin Boson an ti a, hengte hi chuan spin 0, 1, 2, etc an nei ve thung. Hengho zingah hian taksa neite inkara force thlentu particle te leh meson te an awm ve leh thung a ni. Kan hmuh theih thil zawng zawngte hi particle te hian an siam vek a, atom pawh hi a aia te leh chhawng particle ten an siam a ni. Boson atanga particle hlawm khat Meson te leh Fermion atangin Baryon an tihhote hi a hlawmin Hadron tih mai an ni a. Proton pawh hi Baryon zing ami a ni a, chuvangin a hming pawh hi Large Hadron Collider a ni.

Standard model (elementary particle chungchang zirna chi khat) chuan tunah hian avaiin particle chi 60 a awm niin a sawi a. Chung zingah chuan taksa nei thil te inkara force thlentu 12 (an antiparticle nen chuan 24) an awm a, a dang 36 chu taksa nei tawh phawtte siamtu Quark an ni thung. Avai chuan quark te hi 18 an awm a, an antiparticle theuh nen 36 an ni. He model-ah pawh hian God particle hi tel ve tur a ni a, hmuhchhuah a la nih rih loh avanga la tel lo mai chauh a ni. Hei hi standard model chuan hun rei tak atang tawh khan a lo sawilawk daih tawh a ni Mass sawi hmasa ila: Mass hi taksa nei thilten taksa/tisa an neih tam zawng a ni. Kan inbuk pawh hian 60kg-a rit ka ni kan tih te hian a technical tak chuan kan weight ni lovin mass a ni zawk. Chini 5kg ai chuan 10 kg-ah hian mass a tam zawk avangin chini a tam zawk kan ti a. Gravity (lei hipna ang hi) tam tak nei, khawvel aia a let 3 vela hipna ngah zawkah 5kg hi awm ta sela, 10kg hi khawvelah hian awm thung se, an weight ve ve atang chuan 5kg hi a tam zawk tawh dawn a, an mass erawh kha chu a la ngai reng anga, chini 10kg kha a la tam zawk tho ang. Chu chu mass awmzia chu a ni. Kan thupuiah lut leh tawh ila; particle tam berten mass an neih laiin thenkhat chuan an nei lo thung a. Hei hi eng vang nge ni ang tiin kum tam tak scientist ten an lo chhui tawh a. Chubakah mass hi eng vanga lo awm nge ni tih te nen lam scientist-te rilru tibuaitu a lo ni tawh thin a ni. Kum 1964 khan British physicist pakhat Peter Higgs chuan (a la dam) Big bang zawh hlimah khan universe-ah hian field chi khat Higgs field a awm a, chu field-ah chuan particle chi khat Higgs boson a awm a (chu chu tuna God particle kan tih tak hi a ni). Chu field kaltlang tawh phawt particle te chuan Higgs boson te nena an intawh (interact) avangin mass hi an lo nei ta a ni tih a theory-in a chhut chhuak a (Magnet pawh hi a bula thir kan dah hnaih chuan a hip thei tih kan hria a, khatia magnet-in a hip theih chin huam chhung kha magnetic field a ni; chu chu field chi khat tho a ni. Chutiang deuh chu Higgs field chu a ni). Higgs boson te mass tur pawh hi 114 153GeV vel tur niin a chhut chhuak bawk. God particle te hi mass nei tawh phawt chuan mass an neih nachhan, universe-a thil awm zawng zawng deuhthawte tobul tihna a nih chu. Higgs field kaltlang ve lote chuan mass an nei lo hlen ta a ni. Chu a theory chu a dik ngei em tih fiah an tum ta a, LHC hi an buatsaih ta mup mup mai a ni. Mahse kan hriat tur chu LHC hi God particle hmuhchhuah nan chauh ni lovin thil dang tam tak zirna atan pawh a ni nghal a.Chutiang particle chu thahrui tam elkhen ah lo chuan a awm thei lo a. A awm theih hun-Universe insiam hun laia thahrui ang chu Lab ah siam an tum ta a ni.

Published and Edited for and on the behalf of Hyderabad Mizo Association by JNTU Hyderabad Mizo

An official weekly newspaper for the Hyderabad Mizo Association Vol.14 Issue-1 Dt.15th July,2012(p-2) EDITORIAL BOARD Editor:Nehemia Lalramdina
Jt Editor:Anthony Zothansanga

KAN CHHUNGKUA ##Summer Vacation chawlh hmanga haw te

an rawn thleng mek zel a.hriatchian theih chinah Nl.Elizabeth R. Lalrochami Tv.Lalruatkima,Tv.Vanlalvenpuia,Tv. Joel Lalropuia,Nl.Ramdinpuii,Nl.Teresi Lalmuanawmi,Nl.Wendy Lalhminghluii,Nl.Lalhriatrengi(All UoH).Anni rual hian leh Tv.Christopher Ramnunmawia,Tv.Anthony Zothansanga (JNTU)ten tluang takin Hyderabad an rawn thleng.

phek hma chhunzawmna

News Editor:Laltlankima (Email:puarak@gmail.com) Phone no:7893428032 8790692860 EDITORIAL

Pathian kaihhruiana zarah hei Puarak enkawltu tharten kan han Puahchhuak ve leh thei hram a.Mahse,a chhuah tur thu leh hla hi Hyderabad mi leh sa ten kan thawh khawm a nih loh chuan kan hlawkpui dan tur ang ai hian hlawkpui thin lovang tih a hlauhawm hle in ka hria. Hyderabad-a kan chhungte leh kan thiante chanchin bengvarthlak leh midangte hriat tur pawimawh te hi he chanchinbu kaltlanga in hrilhhriat tawn tum thin ila, kan hlawkpui lehzual ang. Vawina article GOD PARTICLE tih hi chhiar ngei turin ka duh che u a. Mihring finna sang chho zel leh Hriatna duha kan tlan nasat zia pawh chiang takin a hriat theih bawk awm e. A tawp berah chuan Hyderabad-a Mizo awm kan tam telh telh anga inpumkhat telh telh turin Pathianin mal min sawm rawh se.

##Hyderabad Mizo Group lamah kan hmuh angin Mizoram Civil Services
(Combined Competitive) Preliminary Examinations result chhuak a Hyderabad a lo awm tawh leh awm mek te zing a hming lang kan hriat theih te te:Andy Lalfakzuala ,Benjamin Lalfakzuala Khiangte,Rebecca Hrahsel,Malz Zualla,Lalengmawia, Sawmi Ralte,Lalthanpuia Vangchhia,Zorami Zote,Pachuau Lalringliana, Nancy Rokhum, Samuel Lalrinawma, F.Lallawmkima, TT Beikhazi.R.Lalmuanpuii.(Hmingpuma dah
theih loh kan nei nual a,hriatthiamna kan ngen nghal e.)

##Architect(JNAFAU) 2nd year te pawn karleh

atang hian External exam an nei dawn. ## Nl.R Lalmuanpuii (Ex JNTU) pawn a hnathawhna avangin Ameerpet lamah in a luah thar.

LAWRKHAWM @@ July ni 11 zinga a hnathawhna Jalandhar, Punjab-a thi Capt. Melody Lalengmawii d/o Dr. K. Lalbiakzuala, Babutlang chu nimin july ni 14 khan sipai invuidan famkim nen vui a ni. @@mizoram Premiere League(football) Playoff chu 13th July, 2012 atangin an khel ta. @@Bhubaneswar:Nuclear missile,700 Km a hlaa a tum kap fuh thei surface to surface Agni-I chu zirtawpni khan India chuan Military base,Odisha-ah enchhinna hlawhtling takin a nei. @@Nimin khan Abids ah RTC bus in bike a sut hnuah Auto rickshaw a su zui leh a.Mi pakhat thiin midang paruk erawh an inthiar fihlim hman. @@ Japan chhim-thlang lama ruah sur nasat avangin tui nasa takin a lian mek a.mi 250,000 lai mai an in leh lo chhuahsan tura thupek an ni. Khawchin(16th july 12 Monday) Max.Temp:-31C/Min.Temp:-24C (ruah tlak beisei a ni)

HMCF INKHAWM PROGRAMME (karleh i.e.,22nd July 2012)

Chairman: Dr.C Dothanga Tantu: Lalpekhlui(Luka bial) Bible chhiar: Malsawmtluangi(HCU) Lalruatsanga Sailo(Johana bial) Thawhlawm khawn:Lalnunpuii(Luka bial) Hmingthansanga(johana bial) Sermon: Vanthlanthangi

SAIRAWKHERH && Thil thar ka nei a,Kukatpally ho kha zanin chu chaw rawn ei ru :P ..sawm sawmi(Masab) && Nizanah kan roomah Mickey mouse cute tawk a rawn lut a,kan vaw hlum daih :D ....Christina Hida(St.Pious)

Engati nge God particle? Atirah chuan God-damn particle tih a ni a. Scientist ten a awm ngeiin an hre si, an hmuchhuak thei bawk si lova chuvanga a hming hi hetia pek hi a ni a. Mahse kum 1996-ah journalist pakhat chuan God particle tiin a ziak a, chuta tang chuan a hming hi a lar chho ta a ni. God particle chu eng thil pawh mass nei reng rengte mass awm nachhan a ni kan tih tawh kha. Universe pum puia kan thil hmuh theih zawng zawng deuhthaw hi mass nei an ni a; thil zawng zawng mai hi mass nei thilten an siam a nih ber mai chu. Chutiangte siam lehchhawngtu/an nih dan ang tak nihtirtu chu God particle hi a nih avangin engkim siamtu, universe bulthut tak tak anga ngaiin a hming hi a pu chho ta zel a ni. Pathian thu zawngin : Mi thenkhat chuan God particle hi a awm tak tak chuan Pathian a awm lohzia tihchiannaah an ngai a. Universe-a thil awm awm zawng zawng kan hmuh theih leh khawih theih thil te hi mass neite siam vek an ni a, chu mass pawh chu God particle vang chauha lo awm a nih si avangin Pathian awm kher a tul lo an ti a ni. God particle vang hian engkim hi a lo awm zawk an ti a nih ber chu. Thenkhat erawh chuan Van boruak khawi hmunah pawh Pathian awmzia tichiangtuah an ngai thung. Tin, kan vela thil awm kan hmuh theihte reng reng hi mass nei vek an ni a, chu mass chu God particle vanga lo awm tho a nih si avangin thenkhat chuan elementary particle te atanga hmuh theih awm chhun an lo ti ve bawk. Technology atan eng nge a tangkaina? Tun dinhmun atan chuan tangkaina a nei miah lo! Mahse mihring rilru hi thil inthup haichhuah tuma tuihal reng a ni a; kan tobul tak tak hriat chakna hian kan rilru hi a luah khat reng a ni. God particle hriat chhuah pawh hian kan tobul universe intan dan leh tun thlenga a lo awm zel dan hriat chianna kawngah nasa takin min pui thei thung dawn a ni. Kum za tam a ral hnuah chuan mihringte hi film-a kan hmuh thin angin arsi dangahte zinin kan la kal vel lovang tih kan sawi thei lova, chutiang hunah chuan a la tangkai khawp ang chu.

Published and Edited for and on the behalf of Hyderabad Mizo Association by JNTU Hyderabad Mizo