SIMEIKHU KARTIN CHHUAK THINGSULTHLIAH

Dt. 7 September 2013 (INRINNI) PHEK- 3

BIALTU MLA-IN PE Bialtu MLA & Home Minister chuan Tlangnuam Branch YMA hnenah Thlanmual bungrua heng Bawngtuthlawh 2, Suahdur 2, Lungral leh Thirtiang 1 ve ve a pe a. Thingsulthliah Govt. High School hnenah Football team Jersey set khat a pek bakah Thingsulthliah khawchhunga Football Club ding thar FIFA-13 hnenah Jersey set khat a pe bawk. Thilpek dawngtute Bialtu MLA & Home Minister ni bawk chungah an lawm hle tih kan lo dawng. Tunlai hian Bialtu MLA hnenah kan sub-town chhung atanga thil chi hrang hrang dil an awm nual ni awmin kan lo hria a; Thilpek diltu ten an thil dil an hmuh avanga lawmthu sawi nana min rawn hriattir ang ang chu kan rawn tichhuak zel a ni. CAMPING CHHAWNG HNIHNA NEI Salvation Army, Thingsulthliah Corps chuan tunkar chhung khan Chhandamna Camping chhawng hnihna an nei leh a, tukin zing chawei kham khan an chhuak. Camping Follow-up hi zanin atangin naktuk Pathianni zan thleng Biakin-ah neih a ni ang. Follow-up ah hian Mizo Idol 2007 Runner-up Lalhnenthlenga chuan zaia rawngbawlna a nei thin a, tun tumah pawh hian inkhawm apiangin a zai ngaihthlak a ni ang. Camping-ah hian mipa 19 leh hmeichhia 24(Total-43) an lut a, Camping a lutte hi Presbyterian Kohhran 7, Catholic 1 leh SDA 1 niin a bak 34 chu Salvation Army an ni. CAMPING NEI Thingsulthliah Presbyterian Kohhran chuan ni 3 - 15 Sept. 2013 chhung hian an Kohhran Sunday School Hall-ah Camping an nei mek a. He Camping-ah hian 14 lutin mipa vek an ni. Mi 2 hi Salvation Army niin a bak chu Presbyterian Kohhran vek an ni a, Speaker Upa C. Sangkhuma, Ralvengtu Team a ni. SUNDAY SCHOOL KHAWMPUI Vawiin Inrinni atanga naktuk Pathianni zan thleng awh tur UPC(NEI) Thingsulthliah Pastor Bial Sunday School khawmpui chu Thingsulthliah Kohhran-ah neih mek a ni. Vawiin Inrinni hian Khawmpui hawnna Bialtu Pastor, Rev. C. Lalmalsawman neiin Rorel inkhawm neih a ni ang a, Zanah Bial chhung Kohhran hrang hrang Puitling ten kumin 2013 Sunday School zirlai(tuna zir tawh chin)-ah Quiz Competition an nei ang. Naktu Pathianni chawhma leh chawhnuah naupang ten thu leh hla hmangin intihsiakna an nei bawk ang. NAUPANG SS KHAWMPUI Naktuk Pathianni hian Presbyterian Kohhran Thingsulthliah Pastor Bial Naupang khawmpui neih a ni dawn a, an khawmpui hmanna hmun tur chu hetiang hi a ni. 1. Beginner Department Thingsulthliah Kohhran-ah 2. Primary Department Seling Kohhran-ah 3. Junior Department Hospital Veng Kohhran-ah 4. Inter & Sacrament Dept Tlangnuam Kohhran-ah BANK ACCOUNT Tunkar ningani khan SBI Chief Manager Dipankar Chakraborty chu Aizawl atangin a lokal a. Thingsulthliah NREGA Building-ah VC leh kalkhawmte hnenah thusawina a nei. Bank Account la nei lo, Puitling tawh phawt chuan Bank A/C hawn a tul thu a sawi a, chhungkaw member puitling zawng zawngin Bank account an hawng thei lo a nih pawhin member pakhat tal(Chhungkaw lu ber hmingin) hawn ngei ngei tur a ni a ti. India Sawrkar ruahman dan chuan ni 30.9.2013 hma ngeiin Bank account hi hawn vek tur a ni a, Hei hi a tulna chhan chu Sawrkar sum mipui hnena thleng tur hi Direct a mipui kuta a luh theihna tur atana sawrkar policy thar a ni, a ti. TST GSA LAWMTHU Kar kalta Zirtawpni chawhnu khan Thingsulthliah HSS, H/S leh RHS naupangten GSA ngenna angin Playground hnim samfaiin an hnatlang a, School zirtirtute leh naupangte chungah GSA chuan lawmthu a sawi tak meuh meuh a ni.

A LO NIH TAK CHU AN TI - Tui sem a han nih hian a dawngtute zingah a semtu thunun tum a intithu tak an awm thin an ti. - Pianthar duh tak tak leh duh vak lo chu an luh tirh zana an awm danah a hriat theih an ti. - Office Printer hi NGO, Political Party, Kohhran te hian an hman hian a man chawi ve thin se an ti. - Gas hi a thleng leh khat tawh, thleng thuai thuai se an ti. - Khawlai kawnga luang tura lirthei sil leh insuk hi a mawi lo an ti. - Dan ang taka chawlh la lova Sawrkar hnathawk khawmpui kal an awm fur ang an ti. - Ration chini tihtawp an sawi hi tak tak a nih chuan a buaithlak khawp ang an ti. - MLA thlan a hnaih hian kan beisei phak loh Development a awm thar ang em an ti. - Pandal ruhrel(Structure) siamsa hmang lova Field a Pandal siama khawmpui dawn hi thing leh mau suatna tha tak a ni an ti. O.B. RUAT BELH Thingsulthliah Group Congress chuan a hnuai ami ang hian O.B. a ruat belh a, chungte chu Vice Pre : Pu PC Lallawma, D/A Sr. Adviser : Pu F. Rokhuma, D/A Joint Secys: Pu C. Biakenga, D/A
Pu Thinlaihnema,D/A Pu Chhuansanga, H/A Pu R. Zatanga, H/A, Pu C. Lalngiloneia, D/A Pu F. Lalngaihawma, C/A, Pu Zosailova, D/A

TLANGNUAM YMA HRIATTIRNA YMA Gen. Conference, Khawbunga kal tum te chuan ni 15/9/2013 ral hmain Secretary K.Lalmuansanga hnenah inhriattir vek turin an hriattir. Hemi hnu ami chu pawm a ni lovang. Khawbung kal nan hian Rs. 1000/- a ngai dawn a, member kal turte chu Branch-in kal man zatve Rs. 500/- a tum sak dawn a ni. DIAKKAWN YMA HRIATTIRNA Kumin YMA Gen. Conference, Khawbung-a kal tum te chuan September 2013 ral hmain Secretary Pu PC Lalhmachhuana hnenah in-report vek tur a ni e. Inreport tam dan azirin a kal dan tur Branch Comt-in a ngaihtuah ang. SOUND SYSTEM LEI THAR Kar kalta Nilaini khan Thingsulthliah Teachers Association chuan nikum lam atanga an lo tuak tawh Sound system Rs.33530/- in an lei thar.