Zomi Innkuan USA (Zomi Community USA)

Thukhunpi (Puahphatna)
(Constitution) Revision) Asung a om thute Thubulphuh (Preamble) Thukhun-I : Kipawlna Min leh Ciaptehna (Article-I : Name, Logo and Seal) Thukhun-II : Ngimna Bulpite (Article-II : Purposes) Thukhun-III : Thumeilette (Article-III : Policy & Principles) Thukhun-IV : Pawlmite (Article-IV : Members) A. Pawlhuamte (Constituent) B. Pawllut Kipawlnate (Member Organizations) C. Pawllut Pawlmite (Individual Members) Thukhun-V : Kivaipuakzia (Article-V : Organization Structure) A. Makaipi Pawl (Executive Committee) B. Innpi Vaihawm Pawl (Board of Directors) C. Tanupi Pawlte (Committees and Departments) Thukhun-VI : Thukikupnate (Article-VI : Meetings) A. Khawmpi (General Convention) B. Makaipi Pawl Thukikupna (Committee Meeting) C. Innpi Vaihawm Pawl Thukikupna (Board Meeting) Thukhun -VII : Kiteelna (Article-VII : Election) A. Makaipi Pawl (Executive Committee) Kiteelna B. Innpi Vaihawm Pawl (Board of Directors) Kiteelna Thukhun-VIII : Puahphat Dan (Article-VIII : Amendment Procedure) Thukhun-IX : Puahphatnate (Article-IX : Amendments) Thubulphuh (Preamble) United States of America gam sung a om, ei Zomi-te in minam khat, sanggam unau laizom khat, Innkuan khat ihhi hi. Ei Zomi-te in anungta Pasian it in, muan leh suan in ih nei hi. United States of America gam sung a om, ei Zomi-te in kipawlkhawm in ih zuih ding in hih Thukhunpi ih khung hi.

Thukhun-I : Kipawlna Min leh Ciaptehna (Article-I : Name, Logo and Seal) 1. United States of America gam sung a om Zomi taangpi taangtate khua leh tui kipawlna (Civil Society) min pen Zomi Innkuan USA kici ding hi. (hih mun a kipan Zomi Innkuan USA pen Kipawlna kammal zangin kikhum thei ding hi) 2. Zomi Innkuan USA kipawlna pen atom in ZIUSA kici ding hi. 3. Zomi Innkuan USA kipawlna min pen English in Zomi Community USA kici ding hi. 4. Vaphual nupa kop khat kimaingat in Ngeisok hiangtung ah a tuangkhawm leh Ngeisok paak thum lim pen Kipawlna ciaptehna (Emblem) hiding hi.

5. Khau kual nih sung ah Kipawlna ciaptehna kisuang in, a kual kikaal, a tung lam ah Zomi Innkuan USA leh anuai lam ah Zomi Community USA a kici lim pen Kipawlna zum ciaptehna (Seal) hiding hi. Thukhun-II : Ngimna Bulpite (Article-II : Purposes) 1. United States of America gam sung a om Zomi-te sung ah kikhualna, kipumkhatna leh kipanpihna akhan semsem theihna ding in Zomi Innkuan USA kipawlna kiphut hi. 2. United States of America gam sung a om Zomi-te khua leh tui tawh kisai khantohna ding vaite leh Zomi taanggpi taangta buppi tawh kisai phattuamna ding vaite pankhop theihna ding in Zomi Innkuan USA kipawlna kiphut hi. 3. Zomi-te in minam kician, minam picing semsem dinmun khat atun zawhna dingin kipawlkhawm in vaihawmkhop theihna ding in Zomi Innkuan USA kipawlna kiphut hi. Thukhun-III : Thumeilette (Article-III : Policy & Principles) 1. Kipawlna in Zomi-te minam khat, sanggam unau laizom khat, innkuan khat hihna bulphuh ding hi. 2. Kipawlna pen United States of America gam sung a, amunmun a om Zomi Innkuan kipawlnate kigawmkhopna bulpi hiding hi. 3. Kipawlna in United States of America gam, a kumpi leh a Thukhunte zahtak in kemcing ding hi. 4. Kipawlna sung a thukhensatna leh vaihawmna khempeuh ah Thukhunpi tawh kituakin atamzaw thukimna kimang ding a, atawmzawte deihna kizahtaksak ding hi. 5. Kipawlna in thagum hatna suanglo (non-violence) ding hi. 6. Kipawlna pen kumpi ki-ukna tawh kisai kipawlna (political party) hilo ding hi. 7. Kipawlna pen biakna kipawlna (religious organization) hilo ding hi. 8. Kipawlna sung ah biakna leh upna siksan in kideidanna leh thu khenna om theilo ding hi. 9. Kipawlna min tawh biakna leh upna khat peuhpeuh siksan in thu kivaihawm theilo ding hi. 10. Kipawlna min, neih leh lam, taangsumte pawl khatpeuh, mimal khatpeuh min leh hamphatna dingin kizang theilo ding hi. 11. Kipawlna sung ah beh leh phung, numei naupang, akhang aham, alian aneu, azawng ahau, innteek pemta kideidanna omlo ding hi. 12. Kipawlna in leitungbup a om Zomi-te tawh lung kituak in kalsuankhop theihna ding hanciam tawntung ding hi. Thukhun-IV : Pawlmite (Article-IV : Members) A. Pawlhuamte (Constituent) 1. Kipawlna in United States of America gam sung a om Zomi Innkuan kipawlna (Zomi Community organization) khempeuh huam ding hi. 2. Kipawlna in United States of America gam sung a om Zomi-te khua leh tui buppi huam in a kiphut, khua leh tui kipawlna (Civil Society) khempeuh huam ding hi. 3. Kipawlna in United States of America gam sung a om Zomi-te khua leh tui buppi huam in a kiphut Zomi minam kipawlna (Zomi National organization) khempeuh huam ding hi. 4. Kipawlna in United States of America gam sung, Zomi Innkuan kipawlna a omlohna munte a om Zomi-te, a mimal in huam ding hi.

B. Pawllut Kipawlnate (Member Organizations) 1. Kipawlna Thukhunpi leh Ngeina Dante a sang thei Pawlhuam kipawlna khat peuhpeuh, amau utna tungtawn in Pawllut Kipawlna dinmun tawh kisang thei ding hi. 2. Pawllut Kipawlna khempeuh in Ngeina Dante leh Innpi Vaihawm Pawl (Board of Directors) in a ciangtan Pawllutna sumte (Membership Fees) leh Pawlsumpite (Member Dues) khia ding hi. C. Pawllut Pawlmite (Individual Members) 1. Pawllut Kipawlna khat peuh sung a Pawlmi khempeuh mimal dinmun tawh Pawllut Pawlmi (Member) in kiciamteh ding hi. 2. Pawllut Kipawlna ahilo Pawlhuam kipawlna khatpeuh sung a pawlmi khat peuhpeuh in, Thukhunpi leh hih Ngeina Dante sang thei in, Ngeina Dante leh Innpi Vaihawm Pawl in a ciangtan Pawllutna sumte leh Pawlsumpite akhiat a leh mimal dinmun tawh Pawllut Pawlmi in kiciamteh ding hi. 3. United States gam sung, Zomi Innkuan kipawlna a omlohna munte a om Zomi khatpeuh in Thukhunpi leh hih Ngeina Dante sang thei in, Ngeina Dante leh Innpi Vaihawm Pawl in a ciangtan Pawllutna sumte leh Pawlsumpite akhiat a leh mimal dinmun tawh Pawllut Pawlmi in kiciamteh ding hi. Thukhun-V : Kivaipuakzia (Article-V : Organization Structure) A. Makaipi Pawl (Executive Committee) 1. Kipawlna maban khempeuh ah ma apang dingin Makaipi Pawl (Exectuive Committee) khat om ding hi. 2. Makaipi Pawl (Executive Committee) pen Kipawlna maban kalsuanna sung ah Kipawlna lutang hiding a, Thukhunpi leh Ngeina Dante zui-in Kipawlna makaih ding hi. 3. Khawmpi sung a Kiteelpi ah Makaipi Pawl sung a panmunte alen dingin Makaite (Executive Officers) kiteel ding hi. 4. Makaipi Pawl (Executive Committee) in Kipawlna Mabante kalsuanna, vaihawmna leh sepna bawlna khempeuh ah, Kipawlna leh InnpiVaihawm Pawl (Board of Directors) tangin makai/mawhpua (lead/responsible) ding hi. 5. Thukhunpi leh Ngeina Dante sung a Kipawlna Mabante, Khawmpi leh Innpi Vaihawm Pawl (Board of Directors) in Kipawlna min tawh a vaihawm Mabante khempeuh atangtun theihna dingin Makaipi Pawl (Executive Committee) in sem/ma pang/tanu ding hi. 6. Makaipi Pawl (Executive Committee) in Kipawlna min tawh vaihawm ding, zeek ding, sep ding bawl ding khat peuhpeuh a om leh Innpi Vaihawm Pawl (Board of Directors) tung ah thu sungin thukimpihna la ding hi. B. Innpi Vaihawm Pawl (Board of Directors) 1. Kipawlna Pawllut Pawlmi buppite tangin Kipawlna tung ah thu anei ding in Innpi Vaihawm Pawl (Board of Directors) khat om ding hi. 2. Innpi Vaihawm Pawl (Board of Directors) pen Pawllut Kipawlnate (Member Organizations) panin a kipuak Tangmite (Representatives), Zomi Innkuan kipawlna a omlohna munte a om Zomi-te Tangmite/Palaite (Envoy) leh teelcing Makaipite (Executive Officers) tawh kilam (form) ding hi. 3. Kipawlna tawh kisai thu leh la khempeuh Innpi Vaihawm Pawl (Board of Directors) tung ah kinga (vest) ding hi.

4. Innpi Vaihawm Pawl (Board of Directors) in, Kipawlna tawh kisai thu leh la khempeuh ah Thukhunpi tawh kituak in thu khensat thei (make decision), thu khung (legislate) thei, thu vaihawm (plan) thei ding hi. 5. Kipawlna min tawh thu leh la vai hawmna khempeuh ah Innpi Vaihawm Pawl (Board of Directors) in thu nei thei ding hi. 6. Innpi Vaihawm Pawl (Board of Directors) in Kipawlna min tawh vai ahawmna khempeuh a tangtun theihna dingin ma apang ding, asem abawl ding, a tanu ding in Makaipi Pawl (Executive Committee) thu pia thei ding hi. C. Tanupi Pawlte (Committees and Departments) 1. Makaipi Pawl (Executive Committee) in Kipawlna Maban kalsuanna leh sepna bawlnate ah a kisapna zui-in Tanupi Pawl tuamtuamte (Committees/Departments), Innpi Vaihawm Pawl (Board of Directors) thukimpihna tawh phut thei, lam thei phiat thei ding hi. 2. Makaipi Pawl in Tanupi Pawl tuamtuam sung ah ma a pang dingin Kipawlna Thukhunpi leh Ngeina Dante a sang thei Pawllut Pawlmi khat peuhpeuh cial thei, seh thei, thu pia thei ding hi. 3. Makaipi leh Thuvaanpi panmunlente in Tanupi Pawl tuamtuamte sung ah zum nasem (Ex-officio) dinmun tawh panmunlen ding hi. Thukhun-VI : Thukikupnate (Article-VI : Meetings) A. Khawmpi (General Convention) 1. Kum khat in a tawm pen khat vei, Kipawlna Khawmpi kibawl ding hi. 2. Makaipi Pawl panmun septan kum a cinsim in Kumcin Khawmpi kibawl ding hi. 3. Innpi Vaihawm Pawl (Board of Directors) panmunlen seh (3) suah seh (2) thukimna tawh Thukin Khawmpi kisam thei ding hi. 4. Khawmpi sung ah US gam sung a om Zomi a ut khempeuh kah thei ding hi. 5. Kipawlna sung a Pawllut Kipawlna khempeuh lak pan a tamzaw in Khawmpi a kah dingin Tangmi/Palai apuak leh Khawmpi a lawhcing in kisim ding hi. 6. Khawmpi in Kipawlna tawh kisai thu leh la khempeuh ah thuneihna a sangpen nei ding hi. 7. Khawmpi sung ah Khawmpi akah Mipi atam zaw thukimna tawh thu kikhensat ding hi. 8. Khawmpi akah Pawllut Pawlmi khempeuh in, Kipawlna tawh kisai thu leh la khat peuhpeuh khensatna ah hih Thukhunpi leh Ngeina Dante zui-in thukhensat theihna vote khatciat nei ding hi. 9. Khawmpi sung a thukhensatna khempeuh Khawmpi bekin kipsak thei ding a, Khawmpi bekin phel thei ding hi. B. Makaipi Pawl Thukikupna (Committee Meeting) 1. Kipawlna Maban leh a thu a la tawh kizui in, Makaipi Pawl thukikupna (Committee Meeting) kibawl thei ding hi. 2. Makaipi Pawl thukikupna ah Makai panmunlen a tamzaw a kah leh thukikupna a lawhcing in kisim ding hi. 3. Makaipi Pawl thukikupna (Committee Meeting) pen maitang kimu in ahi zongin, Teleconference tawh ahi zongin, Internet kizopna tawh ahi zongin, kibawl thei ding hi. 4. Makaipi Pawl (Executive Committee) sung a thukikupna khempeuh ah thukikupna akah panmunlen atamzaw thukimna tawh thu kikhensat ding hi. 5. Makaipi Pawl (Executive Committee) thukikupna sung ah Makaipi (President) ahihkei leh Makaipihuh (Vice President) kihello in thukhensatna kibawl theilo ding hi.

C. Innpi Vaihawm Pawl Thukikupna (Board Meeting) 1. Innpi Vaihawm Pawl panmunlen khempeuh maitang kimu a Thukikupna, kum khat in atawm pen (1) vei kibawl ding hi. 2. Innpi Vaihawm Pawl thukikupna (Board Meeting) pen Teleconference/Video-conference tawh ahizong in, Internet pan kizopna tawh ahi zongin, kha (6) ciangin atawm pen khat vei kibawl ding hi. 3. Makaipi Pawl thukhensatna ahihkei leh Innpi Upa panmunlen a tamzaw thukimna tawh a thu leh a hun zui-in, Innpi Vaihawm Pawl thukikupna kisam thei ding hi. 4. Innpi Vaihawm Pawl thukikupna sung ah Innpi Upa panmunlen a tamzaw akah leh thukikupna a lawhcing in kisim ding hi. 5. Innpi Vaihawm Pawl thukikupna sung ah, thukikupna akah Innpi Vaihawm Pawl panmunlen atam zaw thukimna tawh thu kikhensat ding hi. 6. Innpi Vaihawm Pawl thukikupna sung ah Innpi Upa panmunlen khempeuh in thukhensat theihna vote khatciat nei ding hi. Thukhun -VII : Kiteelna (Article-VII : Election) A. Makaipi Pawl (Executive Committee) Kiteelna 1. Kumcin Khawmpi sung ah Makaite (Executive Officers) kiteelna kibawl ding a, hih kiteelna pen Kiteelpi kici ding hi. 2. Kiteelpi ah asimthaam a me/vote piakna (secret ballot system) dan kizang ding hi. 3. Kiteelpi sung ah me/vote tam angah pen Pawlmite teelcing hiding hi. B. Innpi Vaihawm Pawl (Board of Directors) Kiteelna 1. Innpi Vaihawm Pawl (Board of Directors) sung ah panmun alen dingin Pawllut Kipawlna khempeuh in Ngeina Dante sung a kiciangtan panmunlen phazah tawh a kituak Tangmite (Representatives) minte, Makaipi Pawl (Executive Committee) tung ah kumsim in puak ding hi. 2. Makaipi Pawl in US gam sung, Zomi Innkuan kipawlna a omlohna munte panin Zomi-te tangin Innpi Vaihawm Pawl sung ah panmun alen dingin Tangmite/Palaite seh thei ding hi. 3. Tangmi kiteelna pen Pawllut Kipawlna khatciat sung a thukimna bangbang kisang ding hi. 4. Khawmpi bawl ding hun kha (1) ma in Pawllut Kipawlna khempeuh in Makaipi Pawl tung ah Tangmite minte puak ding hi. Thukhun-VIII : Puahphat Dan (Article-VIII : Amendment Procedure) 1. Hih Thukhunpi sung a thukhun khempeuh Khawmpi sungbek ah kipuahpha thei ding hi. 2. Khawmpi akah mipi seh (3) suah seh (2) a thukimna tawh, Thukhunpi sung a om thukhunte kipuahpha thei, kiphiat thei, kibehlap thei ding hi. 3. Thukhunpi puahphatna khempeuh Thukhun-IX : Puahphatnate sung ah kikhung ding hi. Thukhun-IX : Puahphatnate (Article-IX : Amendments)