Livro de Daniel

Captulo 3
Caji Pacun nein ouro.
V1-Tomi ac ca taramaxicon Nabudonosor: Ara jein cote ne pacun nein
ouro ta ac tococwa na co taramaja to ho nonon ma. Ma vinte sete metro
tara ca mao nein pawin. Ma dois metro e setenta centmetro tara pain
ximijain quem. Awiri pin tara pahu ne. An pe ac hwein tara pain tapaxi
pain cacarain Babilnia pain Dur cain. V2-Tomi ma ac ca na taramaxicon
Nabudonosor: Harahap je jujun oro win taramaxicon ac tococwa na co
taramaja pe ho nonon ma. Maqui ac ca tara co governador nana, co
prefeito nana, co juiz nana, co querec wet nanain dinheiro, wiricoco co
taxi tamana nana cocon co hu taxi nana, wiricoco oro xucucun
taramaxicon quen ca tara. V3-Maqui maqui pi pin ac caca na. Tequi
coco ho ac cacain na cote pacun nein ouro ca querec te je tococwa ma.
V4,5-Tomi ho ac ca na tarama co tomi nain ca querec te xin nain ma:
Merem mip ac ca na: Wahu pain ca maqui hein oro xijein macan pain ca
tomi hein xijein topac ma quem. Taraju iri jein ca tao nein oro xijein ca
tao xine oro caji taracon ma je oro caji violo ma quem ne. Pe torotop
querec te mi ac hein tara caji pacun nein oro ca ara caca con taramaxicon
Nabudonosor cwa ac tcocwa na. V6-Tomi ma ac ca na: Wari co om pe
torotop querec te mi nain, xin mi ac tocwa pain xe ca wiran pain fornalha
ma ac ca na. V7-taraju iri nanain ca tao xine oro mam tao wa ne. Pe
torotop mi ac cacain na oro wari co coco ho nanain ma.
Ca om pe torotop mi cacain caji pacun nein ouro oro win ma ca Daniel.
V8-Pain ca pe torotop mi cacain ma. Ma nanain i ma co noro taxipa
nonon oro pijo quem. Co noro taxipa nonon oro pijo ma, tomi napat ac
cocon na oro judeu ma. V9-Tomi ho nonon taramaxicon
Nabucodonosor: Momon e e cara tara taramaxicon Nabucodonosor ta
nonon. V10,11-Tomi ma ac cocon na: Ca na ca tomi nem ta
taramaxicon: Taraju iri jein ca tao nein oro ca mam tao wa ne, pep
torotop qurec te mi ac hein tara. Wari co om pe torotop querec te mi
nain, xin mi ac tocwa tara pain xe ca wiram pain fornalha ma. Ac i ma na
ca tomi nem ne ira. V12-Tomi tomi tiquin ac cocon na: Governador to
jein pain Babilnia ca momon oro judeu pane. Ca na co governador je
momon pane: Wirico Sadraque, Mesaque con Abede-Nego quem.
Wiricoco co om tomi ha nanain ca tomi nem ta. Om ca querec te camain
ca iri jam ne ma ma. Om ca pe torotop mi cacain caji pacun nein ouro ca
ara je nonon oro wari ma quem ac cocon na. V13-Taraju iri nain i ma
pain ca tomi nucucun ma ne. Mana tamana pin ac ca na Nabudonosor
ma. O qui jujun ta nonon. Moo ac tococwa na, cut mi ac tococwa na
cocon taramaxicon. V14-Tomi ac tococwa na: Irio na ca taraju xuhu pain
ca om pe torotop querec te mi hein ca iri jam ne ta ma je pain ca om pe
torotop querec te mi hein caji pacun nein ouro ca ara jein ta pane? V15-
Cain cain xihe quem ac tococwa na. Mo ta taraju ma hein ca tao xine
oro ca mam tao wa ma. Pe torotop querec te mi pin ac hein xira caji
pacun nein ouro ca ra? Na ca tomi tococwa ma. Mo ta om tomi ha he
wixicaracao mi ac xihe tara pain xe ca wiran pain fornalha ma ac cocon
na. V16-Tomi ac cocon na Nabudosor Sadraque, Mesaque con Abede-
Nego ma: On ca narain ho panac xuxujut ta taramaxicon, na ca tomi
cocon ma. V17-Mo ta to witan xuhu caparut Iri Jam co howa urut cwa.
To witan ac caparut tara. To witan ca ac caparut tara pain ca hwara opa
nein ca tomi nem quem ta taramaxicon nonon. V18-Tomi tomi tiquin ac
cocon na: Mo ta om narain ho caparut pain xe. Om ac ne tara ca pe
torotop querec te mi camain urut pain ca iri jam ne ma ma je caji pacun
nein ouro ca ara caca pum ta taramaxicon ac cocon na. V19-Taraju iri nain
ca tomi nucucun ma ne. Mana tamana ac cocon na co trs nana
Nabucodonosor ma. Wa! Paca tamana na tocon pain mixitacon quem.
Tomi ac cocon na co caraho nanain xe ma: Caraho mit tamana jein xe
pain fornalha ma, sete tara c aca caraho mip hein ma. V20-Tomi ho ac
cocon na oro soldado co hwara opa nana ma quem. Quep jujun
Sadraque, mesaque con Abede-Nego ma, wixicaracao mi ac huhun pain
tara fornalha ma, ac cocon na. V21-Tucu jc mam mi ac tococwa na con
womicocon co to caca je caji waji nucucun quem. Wixicaracao mi ac
tococwa na pain xe ca wiran pain fornalha ma. V22-Tomi ha tomi ha pi
pin ac cacain na c aca tomi nucun taramaxicon pain xe pain fonalha ma.
Xain mip tamana na cocon. Oro soldado co wixicaracao mi xuxun pain xe
nonon ma. Wa!Cono pin hap ac caca na pain ca weo mip nein ma. Xi om
ne ca xain mip tamana ara ne xe pain fornalha ma cocon. V23-Ac i ma na
ca tucu tococwa Sadraque, Mesaque con Abede-Nego pain wixicaracao
tococwa pain xe pain fornalha ma. V24-Tequi pe hap ac ca na
Nabudonosor ma. Xiom ne ca jaxicao pin ara con ca querec ca pain xe
ma. Tomi querec ho ac cocon na co hu taxipa nonon ma: Om ca trs
caca co tucu wawa co wixicaracao mi wawa pain xe ne ra? Irio na ta
taramaxicon, ma trs caca ne ira ac cocon na. V25-Para querec quatro
toton pain xe ma quem ac cocon na. Xuruxut in xuruxut in nana pain xe
ma. Om ca tucu tococwa. Ac ca xuruxut in waraju caca na pain xe pain
fornalha ma. Co to quatro nonon ma, ac iri jam nucun Iri Jam na. V26-
Xut hwet ac cain na mamain fornalha taramaxicon ma. Merem mip ac na:
Sadraque, mesaque con Abede-Nego, wahu pin ca iri wari nucun Iri Jam
he ma. Harahap je, herehet ca jein fornalha ma ac cocon na. Herehet ca
ac cacain na formalha co trs nana ma. V27-Oro taramaxicon co to nanain
ma, xuruxut het ac cocon na. Querec ac tococwa na pain ca om
wiranamain cacain xe, om nain tenenecucun con awomicocon. Om ca hu
tain camain caca quem. V28-Merem ac ca na taramaxicon: In ac tamana
jun Iri nucucun Sadraque, Mesaque con Abede-Nego cwa ac tococwa na.
Wirico co mi nonon con jam nucun co to witan pan nonon nonon ta. Xi
om ne ca howa ara cocon ta. Om ca tomi ha cacapa pain ca pe torotop
querec te mi jein caji pacun nein ouro ta paxi toton. Ane om pe torotop
querec mi cacain ne. Cono ma xurut neac caca na. V29-Je ca para tomi
xuhu ca. Tomi xim inuhu ca maqui hein xijein macan je pain ca tomi
hein xijein topac ma quem. Wari co tomi xirac nain wixicon Iri Jam
nucucun Sadraque, Mesaque con Abede-Nego ma, ton tapiripit pi pin ac
xine tara curucun. To pahorot pi pin ac xine tara xiricon quem. Xi ma ca
xucun co an xiho non pain ca to witan taxi ca mana ca tomi nucun ma.
V30-Taramaxicon Nabuconosor ma, mi ac cocon na pain ca taramaxicon
tiquin ca cacain ca governador wa pain Babilnia ma.





Captulo 4
Ca tehein ma nucun taramaxicon Nabucodonosor.
V1-Xirao miac cocon na oro wari Nabucodonosor ma. Xirao mi ac
cocon na co to nanain xijein macan cocon co tomi nanain xijein topac ma
quem. Ca na ca xirao m cocon ma: Param inuhu pain ca querec te mip
wa ma. Param mi tococwa ma. V2-Param inuhu pain ca taxi hein oro ca
an het pe mi capa ca hwara opa nucun Iri Jam ma. An hwet mi napa
oro ca om ara taxi ne ca wari wa ma. Awi tamana na con pata. V3-Awi
tamana na ca an hwet pe mi capa . Wa! Wa! Tamana ac tocwa na pain ca
an het pe cain ca hwara opa nucun ma. Xi om ne ca Taramaxicon hwara
opa ara ca ta. Taramaxicon cara pan tara ta. V4-Tomi tomi tiquin ac ca
na Nabucodosor ma: Om ca toron camain capa xumu pain ca pe tain
xuru, mon pe wet e napa xumu quem. V5-Mon pe wet paxi napa xumu
ira. Ane ma ne xec ca piam tehein ta ne. Toron pin napa xumu pain.
Coromicat ximao e pin ina pain. Ac ca quep capa na. ac ca querec tain na
carawa ca om awi ma quem. V6-Je ca para harahap je jujun co taxi
tamana nana pain Babilnia ta toton co taramaja to ho nanapa ma. Ma
ta tomi het xo mi cacapa pain ca piam tehein ne ca na ca tomi
tococwa ma. V7-Maqui ac caca na co taxi tamana nana cocon co taxi
ximama nanain oro carawa ma, maqui ac caca co noro taxi nonon oro
pijo ma cocon co tucuninim nana quem. Tomi het paxi nonon pain ca
piam tehein ne. Ane om tomi het xo mi cacapa pain ne. V8-Ane maqui
ho ca Daniel ne, co o ma mi ta pain wixinain caji pacun ca iri jam ne ta
ma. Je ca para Beltessazar cocon ma. Pe ho mip non ca hwara opa
nucun Iri Jam. Je para tomi het mi ton pain ca piam tehein ne quem.
V9-Tomi ac ton na: Beltessazar, taramxicon nucucun co taxi tamana
nana, taxi ina pain ca pe ho mip quem ca hwara opa nucun Iri Jam ma
je pain ca om iina quem oro ca jc xim wa quem. Tomi het mi ho xim ca
piam tehein ne. Tomi het xo mi ac mapa tara pain oro ca tomi mao
nein quem, na ca tomi ton ma. V10-Ca na ca piam tehein ne ta Daniel:
terem iri nain pain tapit ne ne. Ac ca piam tehein ta na ira. Querec ac
tain na cote ne pana, ac ca oin pe xine pain ximijain macanna. V11-Hara
hara mao ac nein na iri pawin, ac ca het nein na nanawin. Querec querec
xam nanain oro wari co to nanain oro xijein macan quem. V12-Querec
awi tamana na tenenein, mi tamana na quem. Ac ca na pi pin cocon na
oro wari pain oro xijein macan pain ca xac xine ma. Toco to nain
xiquijinain oro carawa ca to mi ma. To ac nein na xirinain me pain oro
taparain ma. Xac xac pi pin nain winain oro carawa ma con oro me ma
cocon oro wari ma quem. V13-Piam tehein piam tehein wet ina, querec
ho inon jam co taramaja mi non Iri Jam co quiji qui nain pawin ma.
V14-Merem mip ac ca na: Tacat jein cote ne pana ma, ton tapiripit pi pin
jein oro taparain, wixicaracao jein oro tenenein, wixicaracao jein ac hein
tara winain ma quem. We pin jein oro carawa ca toco to nain xiquijinain
con oro me co to nain oro taparain ma quem. V15-To wet tara nomojinain
pahu, tucu ac hein tara pain arain too nein ferro je arain too nein bronze
ma quem. Ja ac nein tara murucucu nomojinain ma. Tomi mi paxi nain
nomojinain pana ma. Ane tomi con tarama ma. Cao pin ac cain tara
tononoin. V16-Om ta coromicat xo ma ca quem. Coromicat an xiho e
tarain ca coromicat nein carawa ma. Sete tara cawaxi nucun ca ac i ma
ca, ca na ca merem mip nucun co taramaja mi non Iri Jam ma. V17-Ac i
ma na ca tomi caca pain ca main ma toron tarama ma co taramaja mi
nonon Iri Jam co to ho nonon pain pawin Ma ta taxi cocon Iri Jam co
hwara opa tamana na pain ca taramaxicon pe ca pain ca taramaxicon to
caca co taramaxicon nana pain oro macan. Mi pan non pain ca
taramaxicon wa wari co param pan ca quem. Om paxi na hwara opa ca.
Ane mi con pain ne. V18-Tomi ac ca na Nabucodosor ma: Ac i ma na ca
tehein ne ta na. Tomi het paxi inonom oro co taxi tamana nana co
taramaja to ho nanapa ma. Ane om tomi het mi cacapa pain ne. Wum
iri tara ne Beltessazar, tomi het xo mi ac mapa tara pain ca tomi mao
ne ca piam tehein ne ca. Xi om ne ca pe ho ara quem ca hwara opa
nucucun Iri Jam ma non.
Ca tomi het mi con pain ca tehein nucun Nabudonosor Daniel.
V19-Taraju iri non pain i ma Daniel ma co Beltessazar xijein wixicon ma
quem ne. Xat ac ca na. Wa Wa tamana ac ca na. i iina ac ne na ca
coromicat nucun. Tomi ac ca na Nabudonosor: Daniel, ta toron ne xumum
pain ca tehein ne je ca tomi mao nein quem non. Tomi ho ac ca na
Daniel: Taramaxicon, om xi tomi mi ac xim pain ca tehein nem je pain ca
tomi mao nein quem. Tomi e xiririm co noc nenem pain ta non. V20,21-
tomi ma ac con na: querec main cote ne pana ca hara hara het nain
nanawin ca querec querec xam caca oro wari pain oro xijein macan.
Querec main tenenein ca awi tamana je pain ca wina tamana nein quem.
Ca ac ca ha ha pi pin cocon ne pain ca xac xac pi pin cacain oro wari
pain oro xijein macan quem ac con na. V22-tomi tomi tiquin ac con na:
Pana ca querec ma ma. Wum pan ta taramaxicon ac con na. Win ma pain
ca taramaxicon hara opa tamana ma ma, ac ca het nein na pawin ca hara
opa tamana nem ma.Taramaxicon taramaxicon pi pin ma pain oro xijein
macan quem. V23-Querec ac mon na jam co taramaja mi non Iri jam co
quiji qui nain pawin ma. Taraju ac main na ca tomi nucun quem. Ca na
ca merem mip nucun: tacat jein pana, ton tapairipit pin jein oro taparain,
to wet tara nomojinain pain oro carapitain pahu ta. Tucu ac hein tara pain
arain too nein ferro je arain too nein bronze ma quem. To wet ac nein
tara pain ximijain tononoin ca om awi. Ja ac nein tara murucu tarama
ma. Cao ac cain tara oro ca cao ne carawa ma quem. Sete tara cawaxi
ca ac i ma ca, na ca tomi con taramaxicon Daniel ma. V24-Tomi ho xim
pain ca tomi mao nein ca piam tehein nem ta taramaxicon ac con na.
Wirico pan na Iri Jam co awi tamana co mi nem pain ca piam tehein nem
ma, Ma ta taxi main oro ca main ma ton nem ta taramaxicon.V25-Mon
het ca ac main tara ximijacocon oro wari ma. Pe ho ac main tara oro
carawa ca mana tamana pain mi. An xiho ac main tara boi pain ca cao e
nein tononoin. Terem ximao ac ma tara, xo ac maintara murucucu. Sete
tara cawaxi nem pain ca ac i ma ma. Querec pi pin ac mon tara iri Jam
co hara opa tamana co iri co taramaxicon pe nain ca taramaxiconto caca
oro taramaxicon pain oro xijein macan je pain ca mi con pain ca
taramaxicon wari co param pan ca quem. V26-Ca tomi nucun jam co
taramaja mi non Iri Jam ma pain ca to wet tara nomojinain pain
carapitain ta ca ma, ca na ca tomi mao nein quem. Main taramaxicon
ma ac ma tara ta ac con na. Mo ta tomi het pan mon pain iri pajam pain
ca wum ta iri Jam co Raramaxicon hara opa pe pe xam main oro macan
ta mon ma. Taramaxicon ac ma con tara, na ca tomi con ma. V27-hu ho
xim ta taramaxicon ac con na Daniel. An pe r aca nem tai nem. Ara ra rain
ca awi wa. An pe rain oro om awi w aca ara ma ma quem. Quep xiho
roron co tomin nana co om nonon caraway quem. Ma ta querec te cara
ma. Ma ta om toron ximao ne xumum quem. Ac i ma ca hu xim ca
taramaxicon ac ca na. V28-Irio na i ma con, ara ara pi pin non
Nabucodonor. V29-Mon pe wet ac ca na. Doze pin iri na panawo nucun
ne. Xutin xut in ac cain na cacarain xiricon pain pawin pain Babilnia ma.
V30-Tomi ho ac ca na: Wa! Iri cote ne cidade0 na Babilnia ca ac ca na.
Ca mam quep ta pain ca hara opa tamana ne. Ca pe pan ne panaju ca xao
pe pe ta pain ca taramaxicon ta ca. Quep inain ma ta an het pe mi
toton pain oro wari ca hara opa ne je pain ca awi tamana ne quem na.
V31-Tomi tomi wet nain i ma taramaxicon ma. Taraju ho ac cain na ca
ca paja w aca maqui nain pawin. Ca na ca tomi nein: Taraju cwet ne e
taramaxicon nein Babilnia ma ac ne na. V32-Wum ma taramaxicon, mon
het ca ac main tara ximijacocon oro wari ma. Pe ho ac main tara carawa
ca mana tamana pain mi. An xiho ac main tara boi pain ca cao e nein
tononoin. Sete pin tara cawaxi nem pain ca ac i ma ma. Querec pin pin
ac mon tara Iri Jam co hara opa tamana co iri co Taramaxicon pe nain ca
taramaxicon to caca oro co taramaxicon pain oro xijein macan, je pain ca
mi con pain ca taramaxicon wa wari co param pan ca quem. V33-Ane Ane
ma hap ac con na Nabucodonozor ma. Het ca ac cocon na oro wari. An
xiho pin nain boi pain ca cao pin cain tononoin. Terem ximao e na, ja pin
ac cain na murucucu. Horon pin ac ne na tenenecun. An xiho nain
tapaxicon cote ca caxicon wio wio tenenecun ma. Horon pin ac ne na
tiquinacon quem. An xiho pin nain tiquinacon cote ca wio wio.
Ca in ac tamana pin con Iri Jam Nabucodonosor.
V34-Tomi ac ca na taramaxicon ma: Sete pin iri na cawaxi ca ac i ma ta
ne. Noro piri ac tain na pawin. In het ac capa na ca coromicat xoo ne.
Querec te ho ac ton na Iri Jam co awi tamana, in ac tamana ac ton na
quem. Xi om ne ca e cara ara ca ta. Om ca pi ra camain ne ca e nucun ta.
Tomi tomi tiquin ac ta na: Om ca pi ra ha ne ca hara opa nucun Iri Jam
co awi tamana. Taramaxicon cara ac ca tara quem. V35-Pain ca querec con
wari iri Jam ma. Querec e non pain ca om pe ho camain con ca hara
opa wa. Xi om ne ca hara opa tamana pan ara ca ta. Iri Taramaxicon
nucucun oro jam co taramaja pe ho nonon pain pawin na. Iri Taramxicon
nucucun oro wari pain oro xijein macan na quem. Om ca ma camain ca
wari co tac caho non pain oro ca ara ta ca quem. Om om na wari co
tomi xo ne e ca pain ca ara ta ca quem. V36-Tomi tomi tiquin ac ca na
Nabucodonosor ma: Pain ca in het ma capa ca coromicat xo ne ma,
coromicat coromicat ca wari pin ma ac ta na.In het ma ac tain na ca
taramaxicon ne je oro carawa ca awi quem.Querec te ma ac cacapa na
oro co hu taxipa nanapa cocon or co taramaxicon nana ma pain
Babilnia ma. Taramxicon tiquin pin ac ta na quem. V37-Je ca para tomi
querec te tamana ton Iri Jam co Taramaxicon pe nain pawin cain. In ac
tamana ac ton pain na ca awi tamana nucun quem. Xi om ne ca ara xo
tamana ara ca ta. Om ca ara pan tem camain ca quem. Ha non pain ca to
quiji con wari co hara opa ina ximao ma cocon co xec xec nana ma
quem.
Captulo 5
Ca cao querec te xi cocon win taramaxicon ca taramaxicon Belssazar.
V1-Pain Pain na. Ma ho ac ne xec ca tomi ca taramaxicon nein Babilnia
ma Beltessazar ma. Ca na ca tomi nucun: Harahap jein jujun oro win
taramaxicon ta pain macaraxi ca nonon. Maqui mil tatara. Cao querec te
xi tara pain xim cocon nonon co taramaja mi nonon ma. Nama. Maqui
ac caca na. Tototoc wi ho ac cacain na ca mana nein com uva ma. V2-
Toc tamana iri nain Bltessazar ma ne. Tomi ac ca na: Cut qui jein oro too
mam toc wa nein ouro je prata ca cut qui ca ca pain cote ne xiricon Iri
Jam pain Jereusalm ate Nabudonosor pain cara pane nonon. Cut qui jein
nonon ma ta mam toc ta pain ca mana nein comi uva cocon oro win ma
ne co querec te tata cwa. Toc ac cacamain tara manacocon cacam oro
xequequequem co narima nucucun quem, na ca tomi nucun. V3,4-Cut
qui ac cacain na, mam totoc ac caca pain na. Querec te ac cacain na oro
caji acun ca iri jam ne caca ma, je ouro, prata bronze, ferro, pan je pacun
quem. V5-Querec te querec te iri nanain caji pacun ne. Querec ho ac xine
na ca ac micon wari ma ca xirao pe nain ca towo pe ne ca tao caho nein
ca cao querec te to cacama pain ca toha pe ne naran ma. V6-Querec iri
nain ca ac micon wari taramaxicon ma ne. Tamanain pin ac ne na
winacon. Om ca coromicat xo ma ca. Hotic tamana pin ac ne na tocon
pain Ca ajin tamana nucun. Cocoroc tamana pin ho na winacon pain oro
cwerecun quem. V7-Merem mip tamana ac ca na:Harahap je jujun co taxi
ximao nanain oro carawa ma cocon co taxi tamana nana ma cocon co co
noro taxipa nonon oro pijo ma quem nonon. Maqui iri nana ne. Tomi
ho na Beltessazar: Wari co querec pin nain ca xirao nein ma, tomi het
mi ac capa tara ca tomi mao nein ma quem. Mi ac ton tara pain ca pe
con wom co paca awi tamana. Mi ac con pain tara pe pe parama wa nein
ouro ma. Mi ac con tara pain ca taramaxicon hara opa ca cocon oro win
taramaxicon pain ca taramaxicon pe ta ca, na catomi cocon ma. V8-
Maqui ac caca na co taxi tamana nana ma, corom mama ac cacain na ca
cao querec te to caca ma. Corom paxi nana, ane om querec pin cacain
ne. Om ca ha cocon pain ca tomi het mi co con oain taramaxicon ca
tomi mao nein quem.V9-Wa! Ajin tamana ac ca na taramaxicon. Hotic
mip tamana ac ne na tocon quem. Xat ac caca na oro win taramaxicon ca
co to nanain ma. Om ca meo camain caca, ca na to e nana quem. V10-
Taraju ac camain na ca merem mip nucun taramaxicon cocom oro win
taramaxicon co jao jao querec te nonon ma co jeo ca taramaxicon. Je ca
para corom qui cama pain ca cao querec te to caca ma. Tomi ca cama
na: Param inem pain ca momon e cara ma ta taramaxicon ac con na.
Tomi ma ac con na: ta ajin ma me ta, ta hotic ma ma pain c aca ajin
tamana nem me ta ac con na. V11-Tomi tomi tiquin ac con na: Ma nain
ca pain ca taramaxicon p ema ca tarama co pe ho non ca hara opa
nucun Iri Jam. Pain ca taramaxicon wet ca cote ma Nabudonosor pane.
Tarama ma an het pe mi non pain ca ma ne ximicon pain ca taxi tamana
nucun quem. Je para mi con pain ca taramaxicon nucun co taxi tamana
nana cocon c o tucuninim nana cocon co noro taxipa nonon oro pijo ma
quem. V12-Daniel ma co Beltessazar pin ca taramaxicon pane. Om ca iina
camain con oro carawa jemao, coromicat xo ma, ara xo na quem. Xi om
ne ca taxi tamana ara ca ta. Ha non pain tomi het cain ca piam tohein
nucun wari je pain ca taxi cain oro ca jc xim wa ma. Na non pain ca hu
xo wa pain oro ca iina wa quem. O qui ho ron e ac con na. Tomi het mi
ac quem pain tara ca xiraoo pe nein ca tao caho nain ca cao querec to
he ca, na ca tomi cama ma.
Ca tomi het cain ca xirao pe nein ca tao caho nain ca cao querec te pe
wa Daniel.
V13-O mi ac cocon con na taramaxicon Daniel ma. Tomi querec ac con
na: Wum co Daniel co maqui cocon oro judeu co pao to wawa pain Jud
con taramaxicon Nabudonosor pane ra? Na ca tomi querec con ma. V14-
Tomi ma ac con na: Wara tomi het nanapa pum pain ca pe ho quem ca
hara opa nucun Iri Jam . Om ca iina camain con oro carawa jemao,
coromicat xo na, ara xo na, taxi tamana na nanapa pum quem. V15-
Tomi tomi tiquin ac con na: Xo het nanapa co taxi ximama nanain oro
caraw ajemao cocon co noro taxipa nonon oro pijo ma quem. Wata co
maqui je nonon. Noro jein ca xirao nein ca tao caho nain ca cao querec
te to iri ca. Tomi het mi xine pain ca tomi mao nein paxi iononon. Ane
om querec pin camain cacain neje pain ca om taxi camain ca tomi mao
nein quem, na ca tomi con ma. V16-Ane ma ca co tomi nanapa pum ne.
Ha non pain ca tomi het cain oro ca jc xim wa je ca hu taxi cain oro ca
iina wa quem nanapa pum. Mo ta ha quem pain ca querec pin main ca
xirao nein ma. Mo ta tomi mapa pain ca tomi mao nein quem. Pe ac
xim con tara awom co paca awi tamana, mi ac pain tara pe p eca parama
wa nein ouro je pain ca taramaxicon hara opa tiquin ca momon or win
taramaxicon ma pain ca taramaxicon ta ca ac con na quem. V17-Tomi ac
ca Daniel: Om na ta. Pe ho cara terem oro ca mi1 xim mapa ta. Mo ta mi
ton pain xucun ma, mi ac mon pain tara ta. Ane noro tain ta ne ca xirao
pe nein ca tao caho nain ca cao querec te to he ca. Tomi het mi ac xim
pain ca tomi mao nein quem, na tomi con taramaxicon Daniel ma.
V18-Tomi ma ac con na: Taraju ne e Taramaxicon ac con na. Wirico pan
na Iri Jam co mi non pain ca taramaxicon wa cote ma Nabucodonosor
pane. Mi ac con pain na ca taramaxicon hara opa wa ma je oro carawa ca
awi tamana pain ca taramaxicon ca quem non. V19-Tomi tomi tiquin ac
con na: Pain ca mi con pain ca taramaxicon hara opa wa pane. Iri cote ne
ca taramaxicon nucun. Hara opa tamana na con. Je ca para ajin tamana
cocon oro wari pain oro xijein macan, cocorooc tamana nana pain ca
coco ja pan cocon quem. Mo ta to pa ton wari ca, to pa ac con tara.
Mo ta e tara wari ca, e ac ca con tara. Mo ta param con wari pain ca
taramaxicon wa, taramaxicon con tara. Mo ta noc con wari pain ca
taramaxicon wa. Om ac ne tara ca taramaxicon ca con quem ac con na.
V20-Tomi tomi tiquin ac con na: Ane tomi xec xec tamana ca ne. Wata
co awi tamana ta cwa. Wata co taxi tamana ta cwa quem. Om na
xucun co taramaxicon hara opa an xiho napa quem, na ca tomi xec xec
nucun pane. Je ca para het ca cain ca taramaxicon wa je pain oro carawa
ca awi tamana pain ca taramaxicon nucun ma quem. V21-Het ca ac cocon
na pain ximijacocon oro wari. Om ca coromicat xo ma ca. An xiho e pin
ac cain na ca corimicat nein carawa ma. Pe ho pin ac cain na oro caji
tacawac nein mi ma je pain ca an xihoximao cain boi pain ca cao cain
tononoin. Terem e pin na, xo pin ac cain na murucucu. Momon ac i ma
ac ca na. Querec pi pin ho ac con na Iri Jam co hara opa tamana co iri co
taramxicon pe nain ca taramaxicon to caca oro co taramaxicon pain oro
xijein macan je pain ca mi con pain ca taramaxicon wari co param pan ca
quem. V22-Wum ma taramaxicon manxica Nabucodonosor, taxi paxi
maim oro i ma con pane. Ane xec xec cara ma ne. Coromicat mi e xijem
pain ca taxi tamana wa ne. V23-Om respeita camain mon Iri Jam co iri
Taramaxicon hara opa pe nain pawin. Cut jein oro too mam toc wa nein
ouro ca cut qui wa pain cote ne xiricon Iri Jam pane, ac cocon na. Ma t
amam toc ta pain ca mana nein comi uva cocon or win taramaxicon ta co
querec te ta cwa cacam manacocon cacam oro xequequem narima ne
caca quem. Querec te ac main na oro caji pacun nein ouro, prata, bronze,
ferro, pana je pacun, ca om ne tocwi, ca om taraju, ca om taxi camain
quem. Ane om querec te camain mon Iri Jam co hara opa tamana co to
pa taxi pan non wari ne. Mo ta era con, e ac ca na con quem. Wirico Iri
Jam co ara pan na oro ca param pan nucun pum ta taramaxicon ac con na.
V24-Je para maqui ne ca ac ne micon wari ca xirao pe nein ca tao caho
nain ca cao querec te to he ca quem. V25-Ca na ca xirao nein ma:
MEME, MEME, TEQUEL e PARSIM. V26-Tomi ac ca na Daniel: Tomi het
mi ho xim pain ca tomi mao nein ma. Ca na tomi mao nein ca MEME
ca: Taxi xo pi pin nain oro xec ca taramaxicon nem Iri Jam ta. Om pin ac
ne tara ca taramaxicn ma ma con quem. V27-Ca ca tomi mao nein ca
TEQUEL ma quem ac con na. Ac ca anpiri tac quequem pain paxi na ca
mam querec xine ca hate wa ma. Ane om hate camain ma ne. Hate
wijimain e ma ac con na. V28-Ca na ca tomi mao nein ca PARSIM ma
quemac con na. On ta taramaxicon ma ma. Taramaxicon to ac cacain tara
maxum co maqui nanain Mdia ma cocon co maqui nanain Prsia ma
quem ac con na. V29-tomi ho ac ca taramaxicon Belssazar: Pe jun con
awom co paca awi tamana Daniel cwa ac cocon na. An wa ac hun pain
tara paramacon pe p eca parama wa nein ouro ma quem. Tomi ac huhun
tara oro wari co pain ca Wirico ca co taramaxicon hara opa tiquin ca
nonon co taramaxicon to nanain pain ca taramaxicon pe ta pain Babilnia
ca na ca tomi cocon ma. V30-Je ma xim con. To pa pin ac con na
taramaxicon nein Babilnia Belssazar ma. V31-Xao pe ho pin ac cain na
maxicon taramaxicon nein Mdia ma. Dario na wixicon. Ma sessenta dois
na cawaxi nucun pain ca xao pe pin cain maxicon Belssazar ma.











tar