Mendaro Ikastolako ikasleen guraso agurgarriok:
OOGrako hauteskundeak 2010
Zer da OOG edo Eskola Kontseilua?
Mendaro Ikastolako eskola elkartea osatzen dugun sektore
ezberdinen Ordezkaritza eta parte hartzerako Organo
Gorena da. Beraz, familiok gure ikastetxeari dagozkien
gaien gain erabakitzeko daukagun gunea da OOG .
Mendaro Ikastolako erabaki garrantzitsu guztiak OOGn
eztabaidatu eta bozkatu behar dira (Ikastetxeko
Hezkuntza Proiektua, Urteko Plana, Antolaketa eta
Jarduera Araudia, Egutegia, Jangela, etab.).
Nortzuk osatzen dute Mendaro Ikastolako OOG?
▪ Zuzendariak.
▪ Ikasketa buruak.
▪ Ikastetxeko idazkariak, hitzarekin baina botorik gabe.
▪ 10 irakaslek.
▪ Irakaskuntzaz kanpoko langileriaren ordezkari batek.
▪ 15 gurasok.
▪ Udalaren ordezkari batek.
OOGn gehiengoa gara (29 bototatik 15), eta Mendaro
Ikastolako jardueran eragiteko ahalmen handia
daukagu.
Nola funtzionatzen du OOGk?
OOG ohiko bilkuratan (hiruhilabetean behin) edota ez-ohiko
bilkuratan (premiazko gai bat dela eta, kideen heren batek
hala eskatuta) elkartzen da, parte hartzea guztientzat
derrigorrezkoa delarik.
OOGko ordezkariak lau urtetarako hautatzen dira, eta bi
urtean behin kideen erdia berriztatzen da (hauei, hutsik
utzitako plazen berritzea gehitzen zaie).
Noiz eta nola burutuko dira hauteskundeak?
Azaroak 15 eta 18 artean, ikastetxean bertan edo posta
bidez (ezin da botoa delegatu). 8 ordezkari hautatuko
ditugu, eta boto-txartelean agertuko diren hautagaien
artetik, gehienez 5en aldeko botoa eman dezake hautesle
bakoitzak.
Hautagai izan nahi duten gurasoek Urriaren 28a baino
lehen eman beharko dute bere izena ikastetxean.
Baina ez da hau guztia…
… izan ere, duela zenbait urte Mendaron honako erabakia
hartu baitzen: OOGko ordezkariek osatuko dutela, hain
zuzen, ARNOko direktiba.
Ez-ohiko egoera honek baditu bere abantailak (eta baita
eragozpenak ere, gero ikusiko dugun bezalaxe).
ARNO Guraso Elkartea
Mendaro Ikastolako Ikasleen Gurasoen Elkartea (IGE) da.
Gaur egun, bere direktiba honako hauetaz arduratzen da:
▪ Ikastetxeko irteeren ordainketan bitarteko egiteaz.
▪ Eskola kirola antolatzeaz.
▪ Mendiko irteerak antolatzeaz (urtean 6 inguru).
▪ Gurasoentzako ikastaroak kontratatzeaz (urtean 2 edo).
▪ Zaintza zerbitzua antolatu eta kontratatzeaz.
▪ Ikasturte amaierako jaia antolatzeaz.
▪ Herriko 3 ekintza antolatzeaz:
a) Erregeen kabalgata.
b) Ihauterietako larunbateko jaialdia.
c) Haur danborrada.
▪ Ikastetxeko 3 jaialdietan parte hartzeaz:
a) Euskararen Eguna.
b) Santo Tomas / Olentzero.
c) Ihauteriak.
Patxi Galarraga naiz, Miren Vivesen bikotea eta Añes (2006)
eta Ingeren (2008) aita. Gure ikastetxeko OOGren parte bat
berritzeko egingo diren hauteskundeak direla eta idatzi dut
ohar hau. Hautagaiak aurkezteko garaia iritsi delarik, ez
dakit neure burua aurkeztu ala ez…
Zergatik hartu parte? Mendaro Ikastola gure
alabentzako ahalik eta eskolarik onena izatea nahi
dudalako. Baina bada arazo bat, ez baitugu lortzen
geure Ikastolak gurasoon beharrak kontutan hartzerik.
Honen erakusgarri, Mendaro Ikastolako OOGk 2010-2011
ikasturterako onartu duen Eskola Egutegia: 175 eskola egun
ditugu, hauetatik 36 egun-erdiak direlarik. Kuriosoa:
Hezkuntza Sailak ez du 175 egun baino gutxiago onartzen,
eta ezta 36 egun-erdi baino gehiago.
Ez naiz esaten ari Eskola Egutegia denik arazorik larriena,
baizik eta, urtea joan eta urtea etorri, benetazko arazoaren
zantzu garbia dela.
Uste dut OOGn dugun ordezkaritzak ez dituela gure
interesak defendatzen, baina ez dut uste oraingo
ordezkariek eragindako arazoa denik. Eta zergatik ez
dute egoera hau konpontzen? Bada, nire eritzian:
▪ … ARNOren zeregin propioetan lanpetuta daudelako, OOGko
karguen erantzukizuna bigarren maila batetan utziz.
▪ … ordezkatzen dituzten gurasoen ardurak bildu ahal izateko
bide eraginkorrak falta zaizkielako.
▪ … gurasoen eritzia OOGn erabakiorra dela, hortaz erabat
jabetu ez direlako.
▪ … ez diotelako zentruko zuzendaritzari aurre egin nahi.
Eta orduan, ze erronka dauzkagu gure aurrean?
▪ Mendaro Ikastola hobetu asmoz lan egitea, gure ikuspuntua
eskainiz, OOGn daukagun ordezkaritza era arduratsuan betez
eta gure eritzi eta beharrak tinko defendatuz.
▪ Horretarako, ARNOko direktibak gaur egun bere gain
hartuak dituen bigarren mailako hainbat lan beste gurasoen
artean banatu beharko litzateke. Honela, beraiei bakarrik
dagozkien lanetan konzentratu ahal izango lirateke
direktibako kideak.
▪ Komunikazioa hobetzea eta gurasoon partehartzea
sustatzea: eskolako gurasoen asanblada bultzatuz,
ikasgelako ordezkaria sortuz, webgunea hobetuz (zentruko
agiriak edota OOG eta ARNOko aktak argitaratuz,
informazioa zabalduz, eritziak bilduz…), etab.
Eta zera jakin nahi nuke nik: ea badagoen guraso
gehiago bere burua hautagai aurkezteko prest, honako
bi helburu hauekin: alde batetik, OOGn daukagun
posizioa indartzea, eta bestetik, ARNO hobetzea.
Denoi gertatzen zaigun bezalaxe, egunak dituen 24 orduak
ez dira nahikoak niretzat… Horregatik, horrela pentsatzen
duen ordezkari bakarra izan nintekela iruditzen bazait,
hauteskunde hauek pasatzen utzi eta hemendik 2 urtetara
saiatuko naiz berriro.
Agur bero bat,
Patxi Galarraga
669 496 171
patxigalarraga@gmail.com
Testu honen ale bat Morroskilon utzi dut.
Edo bestela hemen jaitsi dezakezue:
http://mendaronguraso.wordpress.com/
Irakurketa errazteko eta leku falta medio, “guraso” hitza
erabili dut ikasle baten guraso edo tutorea aipatu behar izan
dudan bakoitzean.