Conference Dinmunh Ngetna Tangthu, Part I

Kong it, Zomi SDA pawlpi mi a kua maciat:

January 6, 1987, tu maa kum 24 laai iin Mandalay khuapi ah Far Eastern Division president ahi Dr. Otis Edward
leh Myanmar Union Mission officers thum te tawh Upper Myanmar Mission of Seventh-day Adventist makai pi te
in Conference deihna tawh kisai iin kimuh khawm ding hong geel uh ciang iin nuamtak iin kikhoppi kinei khawm
aa lammaan tawh Conference ngetna kinei hi. Zaan, January ni 6 ni, peen lammaan tawh Conference ih nget
zawh kum 24 a cin ni lian ahihmanin Upper Myanmar Mission sung aa SDA pawlpi mi khempeuh te ading iin
Conference maan ih nget zawh kum 24 a phakna ih phawkna iin tu maa kum 24 laai aa thu piiang tangthu a
bucing iin tu laai khangno leh khang thak te ading deihsakna tawh Conference dinmunh ngetna tangthu gelh iin
hong khah khia ingh. Tu maa kum khat laai pek, January 25, 2010 aa "Zomi sung ah conference kici bang hun
pan kipan hiam? cih a tom, kim, cing in nong sut theih na ding" ci aa hong kingetna peen tu aa lammaan tawh
Conference maan ih nget zawh kum 24 a cinna ni bulphuh iin hong gelh khia zo pan ingh.

Tu laai tak aa SDA pawlpi mi khangno khang haam tampi te in email pan ahizongh’n khat leh khat kikupna te
pan ahizongh’n Mission leh Conference thu ci iin ih pawlpi sung thu na sim na zak uh thu tampi om ding hi. Tua
bang neunau te lak ah tampi tak a maan a om hang iin deih kaih vive tawh phuaktawm zongh tam mahmah
mawk hi. Khangno tampi te ading iin na nu leh pa te nangawn uh kiteng nai lo mai thei iin na suah maa khawng
uh ahih kei leh na neu laai mahmah uh thu khawng hi ding ahihmanin tua hun laai aa thupiiang te a maan tak
aa na tel leh na theih ding uh thupi mahmah hi. Hih Conference ih nget peen leitung bup SDA Pawlpi thu tawh
kisai ahihmanin SDA Pawlpi ii Church Manual leh ih omna Division leh Union Working Policy dung zui iin kikup
ding bek hi aa mimal khat peuh ii hoih sak tawm peuh suutsuut ding hi lo hi. Tua ban ah ih kiim ih paam aa EBC
pawlpi te, AG pawlpi te, Tuiphuum pawlpi te ii tat zia peuh enn ding hi lo hi. SDA pawlpi ii kalsuan zia leh pawlpi
dang te' kalsuan zia kibang het lo aa tua model zui iin ih kalsuan khak leh SDA pawlpi sung ah tangtung ngei lo
ding hi.
Tua ahihmanin thumaan a lunggulh te in thumaan na theih ding uh deihsakna tawh a guui cing, a bu cing deuh
iin Upper Myanmar Mission (Upper Burma Section) sung ah Conference hong kipatkhiatna tangthu hong gelh
ingh.

Conference Vai Phu Ding Committee Thak Phut:

1984 leh 1985 pawl iin Sia Kai Dal leh Sia Paupu te sumbawl, paaibawl, khualzin, gamvak iin sak leh khang
kawm iin a kithuah khawm laai tak un SDA pawlpi sung ah khasum saang nasem iin a om loh uh hang iin ih
Pawlpi, Seventh-day Adventist Church, a khantoh ding deihsak iin lunggulh mahmah uh hi. Tua hun iin Zomi te
lak (Sagaing Division leh Chin State) ah ih pawlpi, Seventh-day Adventist Mission, a hong lut zawh kum 30 vaal
deuh bang a pha hi ta aa 1984, 1985, 1986, leh 1987 kum te iin Upper Burma Section bup ah pawlpi mi peen
(2,557), (2,919), (2,960) leh (3,107) khawng ding iin Adventist Yearbook sung ah kiciamteh hi. Tua hi aa 1984-
85, 1985-86, leh 1986-87 kum sung iin kum khat iin 362, 51, leh 147 cih bang iin pawlpi mi khantohna kinei aa
kum 3 sung iin a kigawm iin pawlpi mi 560 kibeh lap hi. Hih sung ah siate leh pawlpi mi a hi sa te ii tanu tapa tui
kiphum te zongh kihel uh hi.

Ih pawlpi a khantoh ding lunggulh mahmah uh aa evangelist (thuhilhsia), pastor (pawlpi kem sia), leh sang sia
(lai hilhsia) te in kumpi sung ah na sem bang iin khasum ngak bek iin a om te hi lo iin khaa itna takpi tawh a
hanciam nading uh lunggulhna leh pawlpi mi te zongh pawlpi mi ci in kaalsim iin kikhawm lingling bek hi lo iin
thuhilhsia, pawlpi kemsia leh lai hilhsia te tawh kikop iin Pasian’ pawlpi’ khantohna ding lawp tak iin hanciam
khawm leh maa pangkhawm ding deihna tawh Conference Status nget ding ngaihsutna nei uh hi. Tua hun laai
tak iin ih pawlpi khanton ding a vei mahmah, Mandalay General Hospital aa nasem Sia Khan Cin Zam Vungh
tawh Mandalay ah a kimuh khak sim uh iin ih pawlpi a khantoh theih nading kikum vaihawm khawm den uh hi.
Amau sep zawh zah ciat un sum leh paai tawh a hi aa amau pumpi mahmah uh tawh ahizong’n Pasian thu
taangkona (effort or evangelistic campaign or evangelistic crusade) bawl ding vaihawm uh aa, sang inn lamna
ding, biak inn lamna ding, cih te ah zongh amau hanciam zawh zah ciat iin pia khia iin hanciam uh hi. Tua bang
iin pawlpi’ ading a deihsak luat man un Conference vai phu ding iin Committee khat hong phuan khia uh aa Sia
Khan Zam Vungh, President, Sia Kai Za Dal, Secretary, leh Sia Pau Za Khan, Treasurer, ci iin Upper Burma
Section peen Mission din mun pan Conference din mun dong a tun theih nading vaihawm ding iin hong kipia
khia uh hi. Tua ban ah Pu Khuppi (Pu Khup Za Lian, Singunaau) leh Pu Lal Thanga (Tahan) te zongh
committee member iin seh uh aa a hi thei bang iin ki thuza zel uh hi.
Pawpimi Makaite’ Tupna leh Ngimna:

Hih makai thum te:Sia Vungh, Sia Dal, leh Sia Paupu te ii ngimna leh tupna te in Upper Burma Section in
Upper Burma Union Conference cih din mun ngah theih nading tupna ahi hi. Upper Burma Union Mission
zongh hi nai lo pi aa bang hang iin Upper Burma Union Conference din mun lungtup iin nei mawk uh hiam cih
huai hi. Upper Burma peen Kawlgam bup ii a lang sang iin lian zaw ahihmanin section 2 leh 3 iin kikhen thei
ding cih mu khol uh hi. Pawlpi sia te leh pawlpi mi te kipum khat iin nakpi tak iin hanciam khawm lengg Pasian
in thupha hong pia ding aa Chin State, Kachin State, Magwai Division, Mandalay Division, Sagaing Division, leh
Shan State te ah pawlpi mi hong khang to diamdiam hi leh Section kinei kawikawi iin Union khat kisuak thei
ding cih saupi et kholhna tawh a nageel khol uh a hi hi. Ih pawlpi, siate leh pawlpi mi te, ki it diamdiam iin
lammaan tawh ngeina bang iin Conference ngen iin Pasian pawlpi sung ah khantoh ding bek lungtup iin kinei
hi.

Itna leh deihsakna tawh,

Mungno Gualnam
Friday, January 7, 2011

ØZop beh ding

*Thumaan leh lammaan thei bek lo iin lammaan zui aa ih nuntakpih ding thupi peen hi.*