NHA KARTERA

By Dr. Azágua

N ben stranjeru

Pa-n ben ranja dinheru

N ben djobe bida

N’es terra xei di bida.

(asim es ta fra...)

Es nha kartera

Dja bira xuxadera;

El sta intxidu di papel

Sima tropa na kuartel.

Es nha kartera

Sta sima baradja karta;

El sta sima kabra na ladera

Ta djobe padja p’el pode farta;

Ta da di-li,

Ta da di-la

Ka munga li,

Ta munga la.

Ka li, ka la
 Ka nhos po-m kala;

Nhos dexa-m fala.

Es nha kartera e fetu na Xina

Bendedu na txon di Merka;

Má k’es pensa ma-n sta di faxina

Pa-n tra bota, pa-n po alberka.

Nau, nãu,

y nãu!

Isu nãu!

Ka ngana-m nãu!

K’obriga-m nãu,

Si kre kau sta mau!

Es nha kartera sta intxidu

d’inderesu i telefoni;

Di gentis di biznis

Ritratu ku denti kaskadu

Sima Don Dinis;

Sima na tenpu di Renadu.

 Es nha kartera

Sta sima lenha frera;

Sima tronku papaera

Sima ramu purgera.

Sen ninhun dola

Falta só pidi zimola;

Sen ninhun tiston

N sta sima karru sen piston.

Es nha kartera

Sta seku rasekadu;

Ai si-n mandadu,

N ka ta fika dizanimadu!

Kabu sta margós

Ki falta é só po korda na piskós;

Mizeria sta pa tudu banda

Rikeza é so pa ken ki ta manda.

Es nha kartera

Ka ten era

Ka ten bera;

N pode furria-l la na rubera.

 Es nha kartera

Sta sima kel brajera

Ki ba kel partera

Na altu Kalabasera.

Fra-l p’el troka manera

P’el dexa d’asnera;

P’el kaba ku brinkadera

Sinãu el ta fika ta txera.

Es nha kartera

Pindradu na ladera

Ku korda txapalati

Sta sima binbirin di karapati.

Es nha kartera

Dja pasa nterra na rubera;

N ten ki ba pa norti

Pa-n ba djobe nha sorti;

Ma-n ten ki ba nogera

Duranti seti sesta-fera.

 Es nha kartera

Sta sima kel brajeru;

Sen dinheru

Konvensidu pioneru

Konxedu pa mund’interu;

Ora esa!

Ka meste presa!

Nhos xa-m sirbi meza,

Meza quatu,

Undi sta buatu

Ku tudu fineza

I tudu dilikadeza

N’es anbienti morabeza

Xei d’amor i beleza!

Nãu sinhor

Meu sinhor!

Di-nho e meza un

Undi sta zunzun;

Un mais un,

Menus un!