Вы находитесь на странице: 1из 4

MIZO PA IN

By C. Valbuanga

Mizo Pa In chhung la hmu ngai lo i nih chuan i pute khuaah zinin i pute chu han tlawh la, an in chu Mizo in dik tak a nih avangin chiang takin i hmuin i hre thei mai awm e. I pute awmna khuaa zin tura i chhuah ni chuan zanriah chaw chhum hun velah khua chu i thleng a ni thei e. Khaw daiah chuan thlanmual i han hmu phawt ang a, thlan \henkhat bulah hmawng emaw, bung emaw an phun te, chhe te tea an lo hung te pawh i hmu ang. Khaw chhung i lut thla zel a, nu \henkhat feh ve lovin vawkchaw tur bal an lo deng laite, pitar \henkhat nau awm, an nute hmuah paha lo inawi lawp lawpte pawh i hmu ang. Mual zawl i thleng ang a, mual zawl bula Lal In lian lawr lup mai, a chung di chih pawh chhah bik, vamurte lawi hut hutna chu i hmu thei tawh ang a; a bul velah chuan tu lungphun nge tih pawh hriat theih tawh loh lung sang pui pui inphunte pawh a awm mai thei e. Lal In bul zawlah tlangval hahchawl in awmte n lung an lo dengte pawh i hmu ang a. Zanriah banphaklo naupang ril\amin khawlaia chaw tlang kenga chi nena an ei lawrh lawrh leh an chaw mal thlauh changa arpui lo hnai tur an pet \ak \akte pawh i hmu zel ang a. Chu ng mite chuan mikhual i nih avangin an en duh hle ang che. Tlangval lung deng laite pawh chuan chawl meuhin an en mai thei che a ni. I pute In chu, i han zawt a, a piah muala Lal In lam rawn hawi, leikapui sang taka sanghar vun khai na chu a ni tih an han hrilh ang che a, i hlim \an tawh viau ang. Mahse khawlaia vawk ek leh bawng ekte chu rah pherh hlauhawm tak an nia!

I pute kawtah chuan vawk thleng berh tak alo let ngat anga, a bulah chuan lungtat nghet taka phun a awm bawk. An kai\en chu a mawih deuh tawh avangin fimkhur taka lawn tur a ni. An sumhmun dap kawngkharah chuan sava chi hrang hrang thla leh chepa mei intar \hatte chu i hmu ang a, chumi chhung chiah chu sumhmun a ni. Sumhmun chu zing tina an buh denna leh thleina hmun a ni. Sumhmun chhak lamah chuan thingkhawn a awm a, a bul velah chuan ar tui mek leh ar awp lai bawm a inthiat fur ang a, thlang lam dithlifarfem hnuai ve thungah chuan, archhiar, ar lian deuh tawh an dah \hinna chu a awm bawk a. Buh an denna ber sum chu arin an ek khum bawlhhlawh a hlauhawm avangin, nikum hmasaa an Kumthar lawmna bawng vun ro khing tak khan an khuh ang a, mahse a chungah ar chu an e lui tho vang! Kawngka bula tlu lek leka suk an tunte chu i rah nghawr nat vak chuan a tlu ang a, a vaw mai thei che a ni, fimkhur a ngai ang. Kawngka luchungah chuan chakai kawmkawraw leh artui heng thil tlar inkhai i hmu ang a, mahse hlauh tur a ni lo. Sa lu rote pawh a inkhai ang a, hlauh tur a ni hek lo. Kawngkhar chu phelsep tah phui \hat a ni a, nam hawn emaw, pawh hawn emaw a ni lova, kut bawr leng leka zenna kuaah chuan kut zen luha a sir zawnga tawlh tleng tira hawn tur a ni. I luh dawnah \henawmte nau ek ei tura chiu-hiah tia an koh thawm chu i pute uipui Dumi a lo hriat vaih chuan kawngka hnuai, a kawngka vea a lo tlan chhuak chuan i ngal a su chawrh mai thei bawk a ni. In chhung i han lut ta a, i pi leh pu an lo awm ni tak, i puin thinglukham (meilukham) a lo pu thleng hlim hlawt a ni a, i vannei hle mai. Ni dang chu nise, an feh vek ang a, kawngkate chu vawkbasukin an do ang a, i hrilhhai viau ang. In han inchibai a, chanchin in han inzawh tawn vel lai chuan in hlim \an ngawt ang le. I ipte ah kha bang thlang lam banah,sazuk ki an tarah khan i bang ang a, mahse thlang lam chhuara sahriak um an hun kha, a pir chhuahna hmawlh lawr i zuk khak tir vaih chuan i ti tla keh palh hlauh ang tih a hlauhawm, an sahriak thih ve ber a ni si a! Tapchhakah, khum-ai lam, sut nghengin, i pi thingpui \hing lo chhuanlum chu in han in dun ang a; i hnung chiah chu buhzem a nih avangin i nghawng chu buhphuin a rawn zar \hin ang a, i inphiat vat vat mai thei bawk a ni. I pute in chu i han enkual vel ang a, \hehlan chungah thingzai phek \ha fahran pahnih chiah, chang tawh miahlo tur inkham chu i han hmu ang a, a dang pawh zawng la, i pu chuan a nei miah lovang. A chung vela hruikhau puah fel lem lova awm hnawk nuai chu i hmu bawk ang. |hehlan hmawr filawra sathau tlang, a pang lehlam dum thap mai, lachhuma an khai nal nal chu a hek nuan avangin sazu seh emaw ti lo la, naupangin an tawlailir ke hnawih nal atana \hutthleng dawh sanga pha leh pha lova an han piaithlak ruk \hin a ni zawk. I han ding a, rapchunga buh an h^k leh a sira thlai chi fun hrang hrang, ung pui puite, tulthir hman loh an rawlh tak mai mai te i hmu ang a; buh chunga kurtai fun \hat loh, nichina i puin a hmeh tir che kha i han hmu chiang ang a, naupangin tuma awmloh hlana an seh thlak rukna an ha hnu te pawh la lang nuan kha i lo ei ve a lo ni a, i ten leh hnuhnawh mai thei a ni.

Rapchung aia sangah chuan rappui-chung-sang a la awm leh a, chutah chuan bawma thil inbilh erh urh an dahte chu i han hmu bawk ang a, a \hente chu vaihlo parengte an ni maithei. Tin, thlanglam chhuarah chuan hmui leh lachawn tel an dah te, a bula ladin leh an \hiahte pawh i zuk hmu thei bawk ang. Chumi zawhah chuan i hmai i han phih dawn ang a, kawngka thlang lam kila tuium hunna pan tur a ni a, fenthlirin tui i bun anga, a bula vawkchaw bel lian pui chungah emaw, thirbel lian deuh mai tuichhe khawlna atana an dah chungah emaw khan phih mai tur a ni. Chaw eikham kam \huah pawhin, kun deuh chungin chutah bawk chuan pik mai tur, vawkchaw chhum lehna tui tur a ni. I hmai hrukna tur chu zemzova puanchhia an ban kha a ni a; a nih loh leh khumpui zawn thlang lama tlangbana puan zarah khan hruk mai tur a ni. I pute khum hnuaiah chuan thir tlawn rit fe mai tur hi a let reng ringawt a, eng atana hman tur nge tih i pu pawhin a hre bik hauh lo! An khum luah lal\in ung tak an khai te, an khum phulraw bana thil dah theihna atana an reh kuak tungchaw an tihte chu i hmu ang a, an zen zing teh a sin. A kaw chung ber chu i pu tuibur dahna a ni maithei a, a hniam ber chu naupangho pual a ni maithei. Han zen chhin ve mah la, kawi pahnih leh sephung bung leh lahlum i zen chhuak mai thei a ni. Kawmchar lam i va thleng phei a, i luh tirh laia tle var i hmuh kha, banga an darthlalang thiah a lo ni a; a bula samkhuih an thiah bawk chuan i han inkhuih vel ang a. Chhak lama i pute khum, khumpui nena in pindan chiah, banglai leh kawmchar bang inkara khum inhung i han hmuh chu a khan i ti hlein ka ring. Khum tlanga puan dum an zar chunga nula thawmhnaw inbang lawr leh khumlu thingrema an chawlhni kawr an khar chilh lo langte a\ang chuan chu khum chu nulaho mutna a ni tih i hre maiin ka ring. Kawmchar thlang lam ve thungah chuan an in chu khum leng leka zuk hawlhpen hi a awm a, tah chuan an tlangval khum a awm. Chu khum dap chu a faiin a tliang nalh em em mai a. Puanthuah chu a mawng lamah buaraa tuamin, mum fel taka intel nalh i hmu ang a, zin chhuah tum puanthuah ken tur emaw i ti mai ang, mahse a ni lo. In leng apiang an \hut a, an bawh zal theih na n an tlangval chuan a mut leh hma chu tuk tin chutiang chuan a tel fel ziah \hin a ni zawk. Chu khum leh a bul vela thingrem in hungte chu tlangval nula rimho \hutna ber te a ni a; thingremah \huin bang hrula puanbu inzial ngheng ang er awra, tlangvalin Hawaiin Guitar an han tum a, saidawium te ruaka Tuifinriat ang khawngaihna hi tih te, Jerusalem keima in nuam tih hlate puam \alh maia an han nawt hlerh hlerh \hinte chu a ngaihnawm teh \hin asin. Kar khat vel han cham la chu, an nun dan awlsam leh hlimawm tak chu i hriat belh \euh mai ang.

Mizopa in

http://www.4shared.com/file/158571848/8664c218/mizopa_in.html