Mihring hmanga sumdawnna leh Hmarchhak ram tunhnai thilthleng

(Human Trafficking and recent events in Northeast India)

C. Lalremruata
25th September 2008
Kum zabi 21 na kan chuankai hnu, computer leh khawl thluak nei te hmanga miin hna an
thawh tawh lai leh Thla mai nilo Sikeisena-ah te inkahkai an tum tawh lai pawh a kan
khawvel hmun tina Sal neihna (modern day slavery) la awm reng hi thil zahthlak tak
tawpkhawk a ni a, chuvangin he sal neihna hi do turin mitin kan tanrual a, kan rilru
zawng zawnga kan invent a ngai em em a ni.
Tunlai huna sal neihna (modern day slavery) hi ngun taka ngaihtuah chuan hmanlai sal
neihna aia a rapthlak lohna reng reng a awm lo a, a rapthlak mah mah zawk a ni, chu sal
neihna chu bumna leh tihluihna hmanga inawpbehna a ni a, mahni taksa chungah thu an
neilo a, hlau leh khurin an awm a, taksa nat leh nat loh pawh sawi theiloa in awpbehna
tunlai huna sal neihna kan tih chu Human Trafficking hi a ni.
Human Trafficking hi United Nations chuan a Protocol to Prevent, Suppress and Punish
Trafficking in Person Especially Women and Children, Supplementing United Nations
Convention against Transnational Organised Crime hmangin hetiang hian a hrilhfiah :
“Trafficking in Person chuan midangte mi thuhnuaia dah tura - hnathawk tura lak te,
an awmna sawn leh chakna/tharum hmanga rukbo emaw bum emaw; thuneihna
hmanga hnehchhiah leh an mimal zalenna laksak te a huam a. Midang thuhnuaia dah
/hnehchhiah chuan a lo berah tihluihna hmanga hursualna lama hman te, hnarim
thawhtir te, Sal leh chhiahhlawh anga enkawl leh an taksa bung tihkhawloh te a huam
a ni”.

Northeast State ah hian tunhnai atang khan hmeichhia leh naupang tihluihnaa hnathawk
tur a lak (force labour), nupuia neih lem (fake marriage) leh nawhchizawhna a hman
(Commercial Sex Work)atana trafficked a lar hle a niin sawi a ni a, a chhan hrang hrang
nia lang te chu; ramri kan awlsam lutuk (porous border), hnathawhtur awmloh vang (lack
of employment opportunities), retheihna (poverty) leh a chhan dang tam tak a awm ang.
Nitin hian heng hmarchhak state atang hian mi pakhat chu bum chhuah (trafficked) ziah
ang an nia sawi a ni.

Hmarchhak ramah hian Bangladesh, Burma leh Nepal ram atang tein mi tam tak kum
tinin rawn tawlhluh ruk thin an ni a, hmun dangah an thawnchhuak leh bakw thin a,
chuvang chuan mithiam chuan transit point an ti a, heng te avang hian Human
Trafficking ah hian hmarchhak ram te hi kan himlo lehzual a, Migration leh Human
Trafficking hi thil inzawm taka ni tlat a ni.

North East States te hi tunhnai atangin human traffickers ten an chetlakna atana an
duhthlan hmun hmun (hot spot) a ni a, heng trafficker te hian an rawn hmalak nasatna leh
tan an lak mek na a ni a, mipui ten enge traffickin gi hi tih kan la hreloin heti lamah hian
kan la ngawng em em a, chuvangin kan fimkhur a ngai em em a ni. Hmeichhia leh
naupang engmah hrelo rilru fim tak te chu hmun danga hna pek tiamin an hruaichhuak
mek a ni.

Hmarchhak ram tlangmite hi a tlangpuii kan vun a nalh a, chubakah kan hmel a tha a,
Korean lam kan an deuh avang hian hmun tama takah nawhchizawrhna tan an duh em em
a, chu mai bakah mirethei tak tak kan tam a, hnathawhtur a vang em em bawk a, kan
economics dinhmun a hniam in ram buai leh helpawl chet tlatna hmun a ni a, sawi tawh
angina mipuiin Human Trafficking chungchang hi kan ka hreloin kan la bengkhawn lo
em em a, Dan kan hriatloh avangin mi tam takin an tuar tawh a ni.
Mizoramah tunlaiin he Human Trafficking chungchang hi a rawn hluar chho mek a; hman
kum lawk pawh khan Delhi-ah Mizo hnamdang pasal nei chu a mizo hmeichhiatpui te
hnamdang hnena zuar thina puhin man a lo ni tawh a, Vairengte naupang chu Sipai
officer pakhat chuan awmpui tura laina a bo tawh bawk a, Aizawl a hnamdang taxi driver
pakhat chuan hnamdang kawppui tur nula te a lo zawnpui thin tah nia sawi a ni a, man a
ni a (mahse tunah hian bail in a chhuak leh tawh a, a duh duhin a khawsa leh tawh niin an
sawi). Tin, Malaysia leh Bangalore-ah hna hmuhsak nia insawiin thalaite an hruai a,
mahse an sawi ang a lo ni leh silo ni awm a ni a, 2006 kum mai pawh khan Mumbai Mizo
Association chuan thuchhuah siamin mizo tamtak Mumbai leh a chhehvelah receptionist
tura lak, an thlen hnua an hna thlak sak leh hlawh hmu mumallo an awm a, chuvangin
fimkhur a ngai an tih thu te an chhuah a, hetiang tuar hi kan lo awm nual tawh a ni. A bik
takin Assam leh Meghalaya, Nagaland te hi hmarchhak state ho zingah chuan a tuar nasa
zual an ni a, keini mizo te pawhin kan tuar mek a. Dan lam kan hriatloh avang leh he
Human Trafficking hi inhriattirna tha kan la neihloh em avangin kan la hmelhriat vaklo
mai niin alang a, kan zingah he sual tenawm tak hi a cheng mek a, kan inven a ngai tak
meuh meuh a ni.
Hna kan zawnna kawngah hian kan fimkhur a ngai tak meuh meuh a ni, heng trafficker te
hian hmeichhia leh naupang te an tum bik thin tih kan hriat ngei ngei a tul hle a ni.
Hetiang hian website misual.com ah chuan tar a ni.

Mizoram pawna hnazawngte tan fimkhur a tha :

Hman ni deuh pawh khan Serena Spa, Mangalore a thawk turin Mizo nula tleirawl an
rawn thlem vak mai a, mi tam takin zawm an lo tum nghal mai pek a. Fimkhur thilah lo
thlithlai anih angin belh tlak loh, hmingchhe tak (reputation tha lo tak) an ni tih
hmuhchhuah a ni hman hlauh a. Kan tleirawl lungmawl tak takte chu an rin lawk lohna
nawhchizawrhna khurah an lo zuang lut hman thelh a lo ni. Hetiang deuh chi hi Mumbai-
ah pawh thil a awm tawh a. Mizo thalai an tang nual hman tawh nghe nghe a ni.
(http://misual.com/2008/05/09/mizoram-pawna-hnazawngte-tan-fimkhur-a-tha/)

Tunlaiin mi thenkhatin foreign leh phaiah hna hmuhsak thei angin chanchinbu-ah
Advertisement hmang tein an inzuar mek a, tin, phai lam atanga rawn kal hnathawk tur
zawng an awm zeuh zeuh bak a (heng mite hi an ti hle) mipa tan thawhtur a van em em
laiin hmeichhia erawh chu an duh em em reng si a, hna tha tak tak leh hlawh tam tak tak
te an ni hlawm a, mahse heng company leh hna latu te hi kan hriat ngai lemloh leh larlo
tak tak te an ni hlawm, heng recruiter te hi trafficker an ni kherlo mai thei, mahse an
hnathawhna hmunah an tawk thei a, an la tuar thei chauh a ni, amaherawhchu kan tuar
thei a ni tih hriain kan inven thiam a ngai hle a, hna awm apiang bawh mai hi a himlo thei
a ni. Registration mumal tak an nei em tihte en hmasak atha khawp mai.

Chumai a nilo tunlaiin Mizoramah chhungah mi tam takin ramdang leh hmun dangah hna
inhmuhsak thei nia insawi tam tak an awm chungchangah mizo mipuite kan fimkhur a
ngai tak meuh meuh a ni, thalai tam tak mahni ke a din tumin an theihna zawn zawnah
hna an zawng mek a, kan ramah hna a tlem avangin hmundang pan a hna zawn a ngai a,
thalai vengva chin te chuan ram dang leh state dangah hna zawn an intihhmuh mek a, hei
hi a lawmawm tak tak a ni, amaherawhchu heng thalai rilru thianghlim tak te rilru
thianghlimna leh hna duhna avanga tuihal mek te bum a hma la an awm tan mek niin a
lang, a hetiang thil a awm hi a thalo tak meuh meuh a ni.

India ram state tam takah hetianga hna inhmuhsak thei nia insawi hi an awm tawh thin a,
mi tam takin an nunna an chan phah a, an chhungkua in a chhiatphaha a, leiba neiin mi
tamtak an awm phah tawh a, tin, an duhloh chungchung hnarim thawhluihtir leh nawhchi
zawrhtir te an awm tawh a ni.

Mihring hmanga sumdawntu te tihdan hmasaber chu an mi bum turte rin theih turin an
awm a, engemaw an tiam phawt thin, chung an tiamtu ni thin te chu

• Hmeichhia (trafficking victims lo ni tawh te chang chuan an ni thin)

• Employees of false employment (employment Agency mi leh sa lem/(zirna),
study/(zin khawthawnna) travel/leh modeling Agencies.
• Thenawm khawveng, anmahni hrechingtu.
• Thiante emaw, mipa thiante emaw chhungkaw chhunga mi ngei te pawh
• School a thiante

Hetianga bumtu te hi an tumah hian an chian em avangin an thusawi pawh a awihawm

em em a, hna tha tak tak an tiam a, tin ram danga hna thawk tur ang zirna sang leh tha
zawk bei tur ang emaw ram chhungah pawh chutiang tho chuan an ti thin. Pawisa an
harsatpawn tanpui thei tur ang leh travel documents (Visa, passport etc) thlengin an tihpui
theih thu te an sawi thin, aching phei chuan chanchinbu leh media-ah te Advertisement
chhuahin an Agency lem emaw company lem emaw chuan hlawkna tha tak an pe thei tiin
mi rilru lak tumin an ti thin. tam tak chuan hmeichhia hna hniam zawk thawk te be kualin
ram dangah pawisa hlawk ta hmuh theihna a ni tiin an bei thin, chunga beitu lar deuh te
chu

Mimal thiante Private connections (chhung leh khat, thiante, thian char thar
te relationship, friendship, new friends)

Agencies lem ten Advertisements newspapers atangin

Internet Advertisements atangin

Traffickers te chuan an victim te chu hna emaw zirna emaw zinna angah te an bum thin a,
chung an bumna thang lian deuh deuh te chu :

• Inchhungkhura hnathawk turin (Domestic work)

• Hospitality industry hrang hrangah waitress emaw barmaid angina
• Au Pair/Care work
• Modeling
• Entertainment work hrang hrang lamna hmun (dancing) leh hostess
• Insakna hmun kian (Construction/Factory) leh Agricultural work
• Zirna hmunah (Study courses)
• Inneihna atan (Marriage)
• Tourism Industry
• Sex industry hrang hrang-ah

Tin, Ministry of Women & Child Development chuan hmeichhia kum 30 hnuailam chu
heng ram hrang hrang heng Middle East ram hrang hrang (Saudi Arabia, Bahrain, UAE,
Kuwait, Qatar, Oman) leh Syria, Jordan, Malaysia, Afghanistan, Thailand, Indonesia,
Iraq, Brunei, Nigeria, Sudan, Libya hian Domestic worker anga kal a khap ta bawk, tin,
Ministry of Overseas Indian Affairs chuan dan tam tak ram dang hnathawkte himna tur
atana duang chhuak bawk a, ramdanga hnathawk te tirchhuaktu te khuahkhirhna dan
Emigration Act pawh tunah hian siamthat mek a ni bawk.

Human Trafficking dona lama hmala tu ber pakhat United Nations Office on Drugs and
Crime (UNODC) leh Northeast Chapter of ATSEC (Action against Trafficking and
Sexual Exploitation of Children) ten September 19 a 'Building Public Private Partnership
for Anti Human Trafficking' tih an buatsaih hnu lawkah India hmarchhak chu Human
Trafficking thil duhawmlo tak mai chuan a rawn thawng leh ta thut mai le, chu thil chu
engdang niloin mahni mihringpui te hmanga sumdawnna (Human Trafficking) chuan
Manipur nula ho Singapore a hnapek tiama hruaichhuak a Malaysia Night Club-a
nawhchizuar tura hralh an tum vang a ni.

Tamenglong Districts Child Welfare Committee ten 22 September 2008-a First

Information report (FIR) an thehluh bawhzuiin Tamenglong Police te chuan Philip
Gangmei, Imphal-a Manipur Public Service Commission exam beia awm mek chu
September 23 khan an man a, Police te chuan Vicky Kungo, Tibetan Refugee, tuna
Arunachal Pradesh-a khawsa mek pawh he thilah hiana a inhnamhnawih niin an sawi.
Police te chuan Phillip Gonmei of Sibilong hian Manipur Tamenglong District lam
hmeichhe pali leh Assam a awm, Zeliangrong hnam pakhat chu Singapore-ah kumin
kumtir lam khan hnapek tiam in hna thawk turin an hruaichhuak niin an sawi, mahse
Malaysia a Night Club-ah hralh an tum avangin an duhlo an tlanchhuak a, he thil hi a
thleng ta a ni.

Heng an mi thawnchhuah te hi (Recruiting Agency) Abel & Leo Private Ltd, India
hmarchhaka nasa taka inzarpharh te kaltlanga lak an ni a, heng mite hi local recruiting
agent, Philip Gangmei-a lak te niin an sawi a, ramdangah hruaichhuakin Singapore-ah an
kal phawt a, chumi hnuah Malaysia-ah kal an tum niin an sawi.Heng mite nilo pawh hi
January 2008 khan Singapore-ah hna hmuhsak leh hlawh tha tak pek tura insawiin an
hruai tawh a, heng mite pawh hi an ngaihtuahawm hle niin an ring.

He thil lo irh chhuah dan chu Hmeichhe pakhat rawn tlanchhuak ta, tuna Indian High
Commission in Kuala Lampur-a inhumhimna zawng mek chuan hetiang hian a sawi – A
tirah chuan mi awmpui (domestic helper) ah awmin Oriya chhungkua (Indian) in
Singapore-ah reilote chu a awm a, amaherawhchu an Agency mi leh sate rawn kalin Oriya
chhungkua chu medical thil avanga hmun danga min dah an ngaih thu in an rawn hmin a,
an la chhuak leh ta a, amaherawhchu ama hnenah thung chuan hna thazawk an hmuhsak
leh tak avangin Malaysia-ah an kalpui dawn tih a sawi a, mahse Singapore chhuaksan chu
a duhlo a, tihluihnain a thiante pathum nen an hruai lui ta a ni.

7 August, 2008 (Sunday) zing dar 9.30 pm (Indian Standard Time) vel khan heng mite
hian Achungmei Kamei, Manipur-a Social Worker chu Public telephone boot atanga
rawn bia in, Kuala Lumpur-a an hruai dan leh nasa taka kut an thlak thu te, a kut ke nasa
taka an vuak avanga na a tih thu te an sawi a, Manipur-a him taka rawn hawn leh a duh
thu a hrilh bawk a.

A sawidan chuan Kuala Lumpur an thlen chuan hall/room tawp deuhah an dah a, an
passports zawng zawng an laksak vek bawk a, an thiltihdan chu a duhloh thu a
sawichhuak a, chumi avang chuan a thiante bulah pawh dah lovin room hrangah an dah ta
niin a sawi a, a hnuah mipa thenkhat a roomah chuan va kalin sex hmanpui an tum a, nasa
takin lo beilet mahse ani hmeichhe awmnem leh chaklo tan chuan hanhnehrual an nilova,
an duhtawk an ngah hnu chuan chhuaksanin amahnin an dah hrang leh ta a, chumi tlailam
chuan a tlanchhuak ta a ni.

Taxi lain Indian High Commission office a pan rawih a, High Commission office staff te
chuan Pastor Jeyabal David a bia in a bulah chuan a awm ta a, a thiante pawh va be lehin
an dahkhawmna hmun ngaiha an lo la awm a, an agecy-te pawh chuan a mobile phone ah
rawn bia in kir leh tur leh hna tha tak an pek tur thu an sawi in an thlem a, chumi hnu
reiloteah chuan a thiante zinga mi pahnih pawh rawn tlanchhuak veleh in an ni pawh
passport te pawh an laksak vek an ni a.

Kinderson Pamei, chairperson, Child Welfare Committee, Tamenglong District sawi dan
chuan an District atang hian he Agency hian mi 150 vel hnathawk turin Singapore a
hnathawk turin an hruaichhak tawh a, a tam ber chu Zeliangrong Naga hnam an ni a, an
ngaituahawm hle a ni a ti.

Singapore based Agency Abel and Leo Private Ltd. hi Ricky Ho ta niin an mi leh sate hi
India ram mai nilo Singapore, Malaysia leh Philippines ah te an inzarpharh nasa hle a,
India ramah chuan Nagaland, Manipur, Meghalaya, Assam leh West Bengal ah te
thingtlang khaw kilkhawr tak thlengin an inzarpharh niin a sawi.
Hemi chungchangah hian Union Minister of Overseas Indian Affairs (OIA) Vayalar Ravi
chuan order chhuahin North East mi te Malaysia a Night Club-a hralh tum chungchang hi
Inquiry lak vat tur a nih thu sawiin, Minister chuan “Thil awmzia ngun takin kan en a,
kan embassy hrang hrang Singapore leh Malaysia a mite pawh inralring turin kan hrtiattir
tawha ni” a ti. Minister chuan Protectorate of Emigrants (PoE) Officer chu he thil awmzia
chhui tur hian a hriattir tawh bawk.

Naga Peoples Movement for Human Rights (NPMHR) leh Shakti Vahini te chuan Union
Minister for Overseas Indian Affairs hnenah he Human Trafficking chungchang hi
complaint an thehlut a, thil chhuichiang tur leh heng mite chhamdawlna ngaihtuah turin
an phut tawh a ni, minister chuan hma an lak tur thu a lo hrilh a ni.

Shakti Vahini Executive Director Ravi Kant chuan, "He thilthleng hian Human
Trafficking-ah India hmarchhak ram te kan himlohzia leh network tha tak a awmtih a
tilang a ni” a ti. NGO te chuan he Singapore-based group te hian Manipur atang mai nilo
Guwahati, Kolkata, Dimapur leh Shillong atang pawhin hnathawk tur an la thin niin an
sawi.

Heng harsatna hi kan lo tuar a, tanpui kan ngai a nih pawhin zak loin inzawh hreh loh hi a
tha hle a, a hria leh helam buaipuitu ten an lo tanpui thin dawn che a ni.

Kan thenawm ram leh state ah te pawh nasa takin an tur tawh a, mizoramah pawh a tuar
sawi tur kan awm tan mek avang hian mitin te kan fimkhur a, kan inven a pawimawh em
em a ni, a chinchang kan hrelo a nih pawhin a hriate zawh hreh lo ila a tha.

(The writer is Secretary cum Coordinator, Coordination Committee on Human

Trafficking, Mizoram and The Coordinator, Human Trafficking, Human Rights &
Law Network, Mizoram. Send your feedback or any comments at e-mail:
remamizo@gmail.com or www.zoindigenous.blogspot.com)