Editor: H.

Malsawmtluanga
Ph: 9615425400 / 9436784572 sawma6970@gmail.com

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9862217691 Lalbiaktluanga : 9612322711 Ramngaizuala : 9862386148 ramngaiahmar@gmail.com

Thingsulthliah Sub - Town Weekly Newspaper

VOL. VII

No. 33 THINGSULTHLIAH

Ni 31 August 2013

(INRINNI)

VAWIIN RAMTHAR NI Vawiin August ni 31, 2013 hi Ramthar Ni a ni a. Presbyterian kohhran hrang hrang ten he Ni pual programme siamin an hmang hlawm ang. Thingsulthliah kohhran-ah chuan Rev Lalchhuanmawia, Secretary, Synod Mission Board lokalin vawiin nileng leh naktuk Pathianni nileng leh zan thleng hun a hmang ang. Hospital Veng kohhran-ah chuan Rev R.Lalhmingthanga, Director, Synod Family Guidance & Counselling Centre lokalin vawiin nileng leh naktuk Pathianni zan thleng hun a hmang dawn bawk a ni. Tlangnuam leh Seling kohhran chuan chhun lamah hun hmang lovin zanin hian Ramthar Ni pual programme an hmang ang a, Tlangnuam kohhranah Upa Rothangan thusawina neiin Ramthar pual thilpek lakkhawm a ni ang; Seling kohhran-ah Upa Vanramlawma, Ramthar Committee Chairman-in hun a hmang dawn bawk a ni.
Thingsulthliah High School

LUNGNGAIH DAR RI Ni 25.8.2013(Sunday) Dar 1:30 pm khan Pu K. Biakzauva(47) S/o K. Neihthangchhunga, D/A chu Cancer vangin Aizawl Saron Veng-ah a boral a, a ruang hi Thingsulthliah-ah phurh chhoh niin tlaivarpui a ni a. A tuk ni 26.8.2013 Dar 11:00-am ah Pastor R. Lallianparan a vui. SELING H/S HEAD THAR Seling Govt. High School chuan Headmistress thar an nei a, nimin ni 30/8/2013 khan a hna thar hi a rawn zawm niin kan lo hria. Headmistress thar hi Pi Lalremruati a ni a, amah hi Republic High School atanga rawn awm niin Chhinga Veng, Aizawl-a khawsa a ni. MAHILA HNENAH NUAI 1 PE Bialtu MLA Pu R.Lalzirliana chuan a Fund atangin Thingsulthliah Mahila Congress hnenah Cheng Nuai khat a pe. He sum hmang hian Tst CHC Sub-Centre hnungah Zunin, mipa leh hmeichhe hman tur changkang tak siam tur a ni a, tunkar ningani khan a hmun tur leh a sak dan tur te hi BDO Pu Zothanmawia Khiangte leh Medical Officer Dr. Saithanliana te nen enho a ni. SANITATION MOTOR THAR Tlangnuam Sanitation Committee chuan Sanitaion Motor tur tunkar khan Bolero Pik-up an lei thar a, tun atanga rei vak lovah motor hi a service tan ang. RSBY CARD Thingsulthliah CHC Doctor hnen atanga kan lo dawn danin damlo inentir turte chuan RSBY Card an neih chuan ken tel zel tur a ni. CAMPING NEI DAWN Ni 3 15 September chhung hian Tst Prtesbyterian Kohhran chuan an Kohhran Hall-ah Ruihhlo avanga harsatna neite pualin Camping buatsaih a tum a. Speaker atan Upa C. Sangkhuma a ni ang. Camp a lut tur ten Mutbu, Bible, Note bu, pen, ken a ngai ang.

GOLDEN JUBILEE LAWM HUN TUR SAWN HLA DAWRH Thingsulthliah High School Golden Jubilee lawm hun atana ruat October ni 16 & 17 chu YMA Gen. Conference nen a rual avangin a hun tur hi ngaihtuah that leh a ni a. A tirah chuan October kar tir emaw September chawlhkar tawp lamah emaw lawm mai nise tih a ni zet a. Mahse, a hma lam hi chuan an inpeih hman dawn lova hriat anih avangin kar kalta zirtawp zan khan Organising Committee thukhawm chuan a hun tur chungchang an ngaihtuah tha leh a. Kumin hi MLA Inthlan kum te a lo ni bawk nen, Inthlan zawh lam December ni 11 & 12, 2013-ah Jubilee hi lawm mai nise tiin an rel. ZU CHECK BEIHPUI THLAK Ni 28/8/2013 khan Zawlbuk Group YMA chuan Zu check beihpui an thlak a, Tuikhurhlu, Tuirial leh Air-Field-ah Zu an dap. Thu kan lo dawn danin Tuikhurhlu leh Tuirial-ah te zu man an nei lova, AirField-ah zu leh a siamna hmanrua thahnem tak an man thung. AirField-ah hian Rakzu Litres 500 vel an man a, Zu siamna Factory-ah zem 10 an tichhia a, Rakzu dahna Plastic bur chi hrang hrang a vaiin 20, Bel lian 2, Bel laihawl 6, Bel mawngpawp 12 an man bakah Ganza KG 3 vel leh China Dawidim pocket 8 an man bawk. An zu man te hi tlai dar 4:00 velah an leih baw nghal vek a, bungbel an man te chu a duh leh mamawh te hnenah tihral nghal a ni bawk. Zawlbuk Group huam chhunga Branch YMA hrang hrang te pawh an kal tha hle a, Branch 3 tih loh chu an kalkim a, member thawkchhuak tge hi an vaiin 150 vel an ni. Hnatlang ei leh in tur hi Seling Branch YMA ten an tum a, an chungah Group hruaitute pawh an lawm hle a ni. BIALTU MLA-IN PE Bialtu MLA & Home Minister ni bawk Pu R.Lalzirliana chuan Seling Branch KTP hnenah Portable Mike thar a pe a, tin, heng lai tlangdung mipui/damlo a mamawh apiang te hman turin Electric Current hmang Oxygen Seling Branch YMA hnenah a pe bawk. Bialtu MLA hian Tlangnuam Youth Adventure Club hnenah an mamawh-a hman atan Rs. 10000/- a pek bakah Tlangnuam GSA hnenah Jersey thar tha tak a pe bawk. Thilpek dawngtute Bialtu MLA Pu Zira chungah an lawm hle a ni. GENERATOR LEI THAR Tunkar Ningani khan Tst Catholic Kohhran chuan Generator thar Rs. 54600/- man, Bajaj Company siam 2.5 KV an lei thar.