Вы находитесь на странице: 1из 3

Champions League 2013 Teitu Bayern Le Arjen Robben

by Si Bawi Mang Lian (28 may 2013)

UEFA Champions League hi a tawinak bikin chim ahcun Europe ram vialte chung in a hawngbik timi club pawl an izuamnak a si. England, France, Spain, Germany le Italy ti bantuk ram hi minthang le a hawnghami an si caah club 3 in 4 cio an itel tawn. A dang cu Club 2 cio hrawng lawng an itel kho. Cu hmanhah cheukhat ram cu qualify an chuihter hmasa hna. Champions League kong cu hi vial si rih sehlaw, tutan Champions League kong tlawmpal in kan von ial hmasa lai. Champions League final ah ram pakhat chung i club pahnih iton ti hi ai bengbai taktakmi a si i an rak thawk kum 1955/56 in voi thum lawng a rak um i tu kum Bayern le Dortmund an iton hi avoi linak a si. Semifinal kai ding a rak fian bak khan cun hi hna pahnih final kai ding cu aho nih zumh a rak si lo. Aruang cu Spain in Barcelona le Champions League voi kua teitu Real Madrid kha Bayern le Dortmund nih an ton hna caah a rak si. Barcelona FC cu Europe ah teitu an um theng ti lai lo tiah ruahmi an si i Bayern he semifinal an kai tikah zumhdeuh an rak si. Asinain ruah lo piin Barcelona cu an milu rel zah deng in an rak tei hna ai. Cu ve bantuk in vawleicung manager ah minthang Mourinho hruaimi Ronaldo umnak club Real Madrid cu naite lawng in a min langmi Dortmund nih fiang tuk in an rak tei hna. Mah cu nih bawlung vawleipi cu a rak hninh. Bayern FC le Dortmund tuanbia chim ti lo in 2013 Champions League final kong ah lut usih. Final cu Wembley stadium ah an rak chuih i nan zoh, nan rak theih cia dih cang, hi ca nan rel tikah hin cun. Asinain na theih lomi tete ka von ial lai. Final kai ding a rak ifian tikah chim cang bang in mi zapi an khuaruah a har. Dortmund caah an voi khatnak final kai a si. Tu tan tluk in an thiam le an irual caan hi a tlawm, cucaah mi tampi nih 2012 final lio i Chelsea an rak zumh hna lo buin pakhatnak an rak lak bantuk kha a si kho tiah an rak ruah cio. Chelsea cu voi hnih final an rak kai i a voi hnihnak ah pakhatnak an rak lak kha a si. Asinain Dortmund caah Chelsea bantuk van a rak um kho lo.

Hi final kong ah zumhnak a rak idang cio, asinain rak chimchung le ruahchung ning bantuk a rak si lo deng. Acheu nih Bayern nih tamtuk in a tei lai an ti, i acheu nih Dortmund nih a tei lai an rak ti ve. An chuih tak tikah kap hnih leiin lam tampi an rak onh, kol an rak sut veve. An rak itluk ngaingai i zoh zong an rak nuam, nain Arjen Robben nih teinak kol a sut in cun zumh deuh mi Bayern cu 2013 Europe siangpahrang ah an cang. Liverpool he UEFA champion an tei an i tluk, voi 5 veve an tei. Arjen Robben nih a kol hlan ah Mandzuki nih Bayern caah kol a sut hmasa. Cu hnu ah Dortmund nih penalty in an rak cham hna hnu ah teinak kol a simi cu Bayern alaikal nih minute a dih laite taktak ah a sut caah amah cu hero taktak a si. Cucaah amah kong hi tlawmpal in ka von ial. Bawlung a chuih i a tlik ah, nu a lo an ti heo. Amah hi Netherlands a si i 1984 ah a rak chuak. Bayern i a chuih hlan ah FC Groningen, PSV Eindhoven, Chelsea le Real Madrid ah a rak chuih. Netherlands aiawh in ram caah a chuih fawn. A chan chung ah teinak tampi a hmu nain a biapi tukmi caan pawl ah tampi a rak tla. Ahlei in a luancia kum thum hrawng ah a rak tla tuk. 2010 World Cup final le Champions League final ah a rak sung. 2010 World Cup ah khan Netherlands cu an rak zumh tuk hna bantuk in Final ah Spain he an rak itong. Robben nih hmai ah bawlung itlik pi in Spain kolbawh he lawng an si ko nain a rak kol lo. Cu tan ah voi tam nawn caan rem cu a rak ngei hiam ko. Asinain minute 116 a si ah an sung. Ni kum Champions League final ah a rak chuih balnak Chelsea le Bayern final an kai i penalty a nganh. Mah cun Chelsea nih an voi khatnak Champions League an rak tei i ahlei in Bayern ah hmunhma a rak ngei lo tuk i a chuih caan a rak tlawm hlei i penalty nganh cu a poi tuk. Mah cu lawng a si lo, 2007 lio Chelsea ah a um lio ah Champions League semifinal an rak kai han. Penalty chuih a rak si i Robben nih a rak nganh, i Chelsea cu an rak tla beh. Cu hnu ah Real Madrid ah an rak zuar kha a si. Cu a si caah tutan teinak ahhin amah Robben nakin ai lawm le a aumi an um lai lo, tiah ruah a si. Kum tampi ka zatlaknak vialte mah hi kol sinah an liam dih, tiah a chim ve. Puai chung vialte Dortmund hnukham pawl a tuaitam khawh hna. Caan a dih lai minute 2 ai duh ah a kol kha a si fawn tikah a mak ko. Asinain Robben caah Bayern ah hmun um ti dawh a si ti lo. Bayern manager thar Pep Guardiola nih Robben cu zuar a duh kong a fiang cang. Robben hi Chelsea ah kir han ding a fiang bik, nain amah caah club minthang tampi nih innka an on ko.

Bayern cu an thiamdeuh bantuk in teitu an si i lawmhpi cio an si. Asinain Dortmund cu an thiam ve taktak ko. Bayern nih final kai hlan ah Dortmund hmaikal a simi Mario Gotez kha rak caw hna hlah sehlaw Dortmund caah tampi lam a um kho. Aruang cu Mario tello in an chuihmi puai 9 ah 7 cu an sung. Bayern nih an cawk hnu in Dortmund thinlung tamtuk a rak zor. Ai khawn caah a chuih kho lo nain a chuih khawh lo hmanh ah Dortmund thinlung rak hawng sehlaw a zoh nuam chinchin hnga, ti hi mi tampi ruahnak a rak si. Dortmund cu 2008 le 2009 ah Germany champion an rak si. An irual, an no i club minthang ichuah khawhnak a lam a rak ttha tuk nain phaisa thazaang a hawng tukmi Bayern nih thlahlawh tampi pek ding in le man tampi in cawk ding an hal hna tikah sipuazi lawngte a simi hrat cu an ihial cuahmah hna. An hmaikal Lewandowski zong Bayern nih an cawk te lai ti a si rih. Dortmund Manager le a chuihtu dang cu an tutan an sunghmi nakin an hawile nih club lian dang ah an hial tak hna ruang ah an itimhmi a tlau tikah an ngaih a chia khun. Dortmund cu umchuk in an tla thluahmah kho. An kolbawh le an hnukham pahnih zong Premier League club nih an hal cuahmah hna tikah a thar in ihrim han ding an har ko cang. Sihmanhsehlaw Bayern cu hawng chinchin in Pep Guardiola hruainak tang ah um an itim. Zei cu maw an lawh te? 2000 kum hnu in Champions League teitu hna cu a tanglei bantuk hi an si: * 2013: Bayern Mnchen (Germany) * 2012: Chelsea (England) * 2011: Barcelona (Spain) * 2010: Inter (Italy) * 2009: Barcelona (Spain) * 2008: Manchester United (England) * 2007: AC Milan (Italy) * 2006: Barcelona (Spain) * 2005: Liverpool (England) * 2004: Porto (Portugal). * 2003: AC Milan (Italy) * 2002: Real Madrid (Spain) * 2001: Bayern Munchen (Germany) * 2000: Real Madrid (Spain) Champions League tambik teitu hna cu: * 9: Real Madrid * 7: Milan * 5: Bayern Mnchen, Liverpool * 4: Ajax, Barcelona * 3: Inter, Manchester United * 2: Benfica, Nottingham Forest, Juventus, Porto.

Ref: Wikipedia, Sky Sport, TV2, VG