Вы находитесь на странице: 1из 5

Mango time

Published Mar 21, 2004


Mi nuh drink coffee tea mango time
Care how nice it may be mango time
In the heat of the mango crop
When di fruit dem a ripe an drop
Wash your pot turn dem down mango time
De terpentine large an fine, mango time
Robin mango so sweet, mango time
Number eleven an hairy skin
Pack di bankra an ram dem in
For di bankra mus' full, mango time
Mek wi go a mango walk, mango time
For is only di talk mango time
Mek wi jump pon di big jackass
Ride im dung an no tap a pass
Mek di best a di crop, mango time

Dutty Tough
Poems | Comments Off
Sun a shine but tings no bright;
Doah pot a bwile, bickle no nuff;
River flood but water scarce, yawl
Rain a fall but dutty tough.
Tings so bad dat nowadays when
Yuh ask smaddy how dem do
Dem fraid yuh tek it tell dem back,
So dem no answer yuh.
No care omuch we dah work fa
Hard-time still een we shut;
We dah fight, Hard-time a beat we,
Dem might raise we wages, but
One poun gawn awn pon we pay, an
We no feel no merriment
For ten poun gawn pon we food
An ten pound pon we rent!

Saltfish gawn up, mackerel gawn up.


Pork en beef gawn up,
An when rice and butter ready
Dem just go pon holiday!
Claht, boot, pin an needle gawn up
Ice, bread, taxes, water-rate
Kersene ile, gasolene, gawn up;
An de poun devaluate.
De price of bread gawn up so high
Dat we haffi agree
Fi cut we yeye pon bred an all
Tun dumplin refugee
An all dem marga smaddy weh
Dah gwan like fat is sin
All dem-deh weh dah fas wid me
Ah lef dem to dumpling!
Sun a shine an pot a bwile, but
Things no bright, bickle no nuff
Rain a fall, river dah flood, but,
Water scarce and dutty tough

Mout-amassi
Poems | Comments Of
Mout-amassi Liza, yuh no
Hear yuh mumma dah call yuh?
Meck yuh mout so galang plang?
Hear yuh mumma duh call yuh!
Yuh mout so fly, yuh mils tell lie.

So member seh me dah warn yuh:


Liza, kibba yuh mout!
De way people wash dem mout pon yuh
Yuh naw go strive, missis;
Far everywhe yuh tun yuh hear
Seh Liza do dat an dis.
Yuh hear dat Liza chat to much,
Yuh hear dat Liza seh,
Yuh hear seh dat is Liza meck
Mass Tom black puss run weh.
Liza, kibba yuh mout!
Yuh meck Miss Hattie husban put
Har sinting outa door,
Yuh meck Sam do fi purpose
An hat up Jem sore toe.
Yuh can gwan chat, but doan figat
Yuh gwine reap what yuh sow.
Liza, kibba yuh mout!
Counta yuh, Dan set him grampa
Duppy pon Sta Rose,
An counta yuh Jane teck grudgeful.
An pwile up Fan new clothes;
De way yuh chat yuh meck Jinat
Go obeah Laura nose.
Liza, kibba yuh mout!
Yuh meck dem lock up Tayma fi
So sen her bwoy a school;
Yuh meck dem lock up Geral,
an It tun him mumma fool!
Yuh meck dem bring up Dora, seh
She overwork her mule.
Liza, kibba yuh mout!
Dem mussa put yuh so, missis Is weh yuh dah go do?
From me bawn me never see

Nobody chat lacka yuh.


Me hear Miss Della she dah swear
Fi tun yuh mout backa yuh.
Liza, kibba yuh mout!

Bun an Cheese
Poems | Comments Of
Bun an Cheese by Louise Bennett Coverley
Excerpt from Laugh with Louise
Dem Bwoy dah jeer Miss Matty,
An a mock her an a tease,
Dem a kill demself wid laugh mah
An a call her Bun an Cheese.
Dem sey from Good Friday mawnin
Her jawbone no get no ease
Mawnin noon an night an bedtime
She was nyamin bun an cheese.
Fe breakfuss lunch an dinna
She got soso bun an cheese
She kea it go a church an
Movin pictures if you please.
She no count salfish an ackee
Cut her yeye pon rice an peas
Hear her me put pot pon fire
When me got me bun an cheese!

Easter time gwine come an go weh


Days an moment fly like breeze
But as long as Matty live dem bwoy
Gwine call her bun an cheese!

Rainy Day
If yuh want it an no need it
Curb yuh wanti-wanti ways,
Pudung wanti-wanti money
Fi de needy rainy days.
No might-be bout de rainy day,
No few a we, no some;
But eena everybody life
It must an boun fi come.
Tedeh, tomorrow, nex week,
Dis yah mont or tarra ear,
De rainy day deh pon de way
Fi ketch yuh unaware.
Sometime him creep up sofly like
A puss an stir up strife;
Sometime him drop like atom-bomb
An worries up yuh life.
But me gwine fi trick de bugger:
Day by day me dah prepare,
Dah save up lickle money an
Me ready fi him, me dear.
When rainy day strike me, ah gwine
Fi bring him to disgrace,
Jus wave me bank-book an bus out
A laugh eena him face!

Вам также может понравиться