####################################################

#
# zaktisaGgamatantram |
# tRtIyo bhAgaH |
# kAlIkhaNDaH |
#
# zaktisaGgamatantra
#
# edited benoytosh bhattacharyya,
#
# In three Volumes
# Vol. III
#
# kAlIkhaNDa
#
#gaekwads oriental series volume 104
#
# 1947
#
#
#data entered by the staff of muktabodha under the direction of
#mark s. g. dyczkowski
#
#licenced for non-commercial use under the creative commons licence
#
#
#############################################################

zaktisaGgamatantram |

tRtIyo bhAgaH |

sundarIkhaNDaH

|| zrIgurubhyo namaH ||

|| zrIzaktisaGgamatantram ||

sundarIkhaNDaH || 3 ||

prathamaH paTalaH |

zrIdevyuvAca |
devadeva mahAdeva bhaktAnugrahakAraka |
anAdyanta parAkAza tamIDe nirguNaM vibhum || 1-1 ||

yatprasAdAnmayA nAtha jJAtamAgamazAsanam |

kAlAntare samAyAte punaH pRSTaM mayA vibho || 1-2 ||

pUrNAbhiSekadIkSA tu kathaM bhedatvamAgatA |

zrIziva uvAca |

Adau bAlA mahAdevi sarvAdyA parikIrttitA || 1-3 ||

yAM vinA paJcadazyAM vai nAdhikAraH kathaJcana |

akSare kUTatritayaM kaliyogyaparaM priye || 1-4 ||

anyoccArAdadharmatvAdbhraSTatvAnna hi sidhyati |
bAlayA mukhazuddhitvaM tato vidyAdhikAritA || 1-5 ||

vidyAdhikAre saMpanne SoDazyAmadhikAritA |

SoDazyadhikRtAyAM tu sarvatrApyadhikAritA || 1-6 ||

paMcadazyAM tato nyAsaH paMcadazyA vidhau zive |

dazadhA mAtRkAM nyasya vidyAnyAsaM tathaiva ca || 1-7 ||

laghuSoDhAM mahASoDhAM SoDhAM bAhyAMtare tathA |

cakranyAsaM punaH kRtvA zaktinyAsaM samAcaret || 1-8 ||

p. 2) zaktinyAsaparo maMtrI devarUpo na saMzayaH |

tataH parAdhikArI syAttannyAsAttadanantaram || 1-9 ||

parAprAsAdike nyAse adhikArastaduttaram |

prAsAdaparayA cAtha tatazcaraNadIkSaNam || 1-10 ||

nirvANacaraNAdyAM vai tataH zAmbhava eva tu |

nirvANacaraNAkhyaM vai zAmbhavottaramIritam || 1-11 ||

bAlAyAmadhikArI cedbAloktAnvinyasedbudhaH |
paMcadazyadhikArI cetpaMcadazyadhikaM caret || 1-12 ||

vidyAnyAsottaraM devi utkIlanamathAcaret |

dIpinInyasanaM kRtvA tataH kullukacintanam || 1-13 ||

SoDazIdIkSAyuktazcet mahASoDhAdikaM caret |

parAdIkSaNayuktazcet SaDadhArAdikAn nyaset || 1-14 ||

parAprAsAdayuktazcettattannyAsAn samAcaret |
prAsAdaparAyuktazcettAneva vinyasedbudhaH || 1-15 ||

catuzcaraNadIkSA tu parAprAsAdagocarA |
ubhayornahi bhedo'sti kiMcidbhedo'sti pArvati || 1-16 ||

tataH zAmbhavadIkSA syAt pUjA zrIcakragocarA |

sarveSAM pUjanaM kAryyaM nyasanaM vA vidhIyate || 1-17 ||

prathamaM nyasanaM proktaM tataH pUjA prakIrttitA |

zrIcakre pUjanaM kAryyaM sarveSAM priyavAdini || 1-18 ||

SaDAmnAyasthale devi SaTzAmbhavamathAcaret |

SaNNAM sthAnaM vidhAyAtha saMvartezamathArcayet || 1-19 ||

sarveSAM pUjanaM kRtvA cAtha vai kalazaM tathA |

pUjayedyatnato devi sarvasiddhimabhIpsubhiH || 1-20 ||

sarvadIkSAsamAyuktaH sarvanyAsAn samAcaret |

SoDazIM tu vinA devi nAnyatra hyadhi kAritA || 1-21 ||

parAprAsAdadIkSAdyAH SoDazyuttaragAH kiyAH |

tattattantroktavidhinA tattaddIkSAdibhiryutaH || 1-22 ||

tattatkarma prakurvIta nAnyathA zAMkaraM vacaH |

yA caraNadIkSA saMproktA parA saiva prakIrttitA || 1-23 ||

p. 3) zrIvidyAM tu vihAyAtha nAdhikAratvamiSyate |

zrIvidyAyAM tuM saMpUrNaH sarvamArgI bhavet priye || 1-24 ||

zrIcakralekhanaM kRtvA trikoNaM bindumadhyagam |

tato vRttaM samAlikhya caturdalamanantaram || 1-25 ||

catuHpaMcAramAlikhya caturasrAtmakaM tataH |

SaTtriMzattattvarUpaM tu vigrahaM vilikhettataH || 1-26 ||

evaM tu vigrahaM bhAvyaM bhAvanaiva tu lekhanam |

prAsAdapUrvA tu parA proktA zrItattvavigrahA || 1-27 ||

zrImahASoDazI vidyA maMtravigraharUpiNI |

vRttasya parito devi pAraMparyyakramaM yajet || 1-28 ||

parAprAsAdavidyAyAH kramaH prokto mahezvari |

mukhyaM kramaM pravakSyAmi zRNu yatnena sAMpratam || 1-29 ||
bindUpari vibhAvyAtha tato hyaSTadalaM zubham |
SaTtriMzaddalasaMkhyAkaM kamalaM tu tato likhet || 1-30 ||

aSTatriMzaddalaM caiva tadbahirvilikhecchive |

kamalaM bhuvanAkhyaM tu tadbahirvilikhecchive || 1-31 ||

paMcAzaddalasaMkhyAkaM candrasaMkhyAsamanvitam |
evaM vilikhya vidhivat tatra dhyAyet parAmbikAm || 1-32 ||

evaM pUrvaM vibhAvyA'tha SaTtriMzattattvavigrahAm |

parAprAsAdavidyAM tu saTtriMzattattvavigrahAm || 1-33 ||

zAmbhave lekhanaM yaMtraM tatra vai bhAvanA matA |

bAhyataH pUjanaM kRtvA tato dhyAtvA parAmbikAm || 1-34 ||

adhikAre samApanne parApUjAdike vidhau |

SaTzAmbhave mahezAni hyadhikArastato bhavet || 1-35 ||

SaTzAmbhavo mahezAni sarvottara itIritaH |

SoDazyuttaragA dIkSA kAryyA vA tviyameva vA || 1-36 ||

evaM dIkSAdibhiryuktaiH kiM japyaM paramezvari |

bhaktiryasya yatra bhavettena japyaM tadeva tu || 1-37 ||

saMpradAyAnusAreNa bhaktiyogavazena tu |
SoDazI zaktidIkSA syAddvitIyamucyate zRNu || 1-38 ||

p. 4) parAprAsAdavidyA tu zivazaktimayI parA |

arddhanArIzvaraH proktaH sarvatantreSu gopitaH || 1-39 ||

ityetaduktaM devezi kimanyat zrotumicchasi |

zrIziva uvAca |

kiM japyamiti zaMkA te yA jAtA paramezvari || 1-40 ||

saivocyate mahezAni zRNu yatnena sAMpratam |

zrIcakre sarvadevAnAM nivezanamudIritam || 1-41 ||

mahAzrIcakrarAjJIyaM mahAzrISoDazI parA |

parAprAsAdavidyA tu mahAzrIcakranAyikA || 1-42 ||

UrdhvAmnAyAdidIkSA tu parAprAsAdagocarA |
parAprAsAdavidyAyAH zrIcakre vinivezanam || 1-43 ||

SaTzAmbhavezavidyAyAH zrIcakre vinivezanam |

binducakre mahezAni pUjanaM zRNu sAdaram || 1-44 ||

binducakre tu nair-RtyAM mAnasaM pUjayecchive |

binduvAyavyato devi nAtra sampUjayecchive || 1-45 ||

binducakrasya pUrve vai mArutaM pUjayet priye |

binducakrasya cAgneyyAM taijasaM pUjayecchive || 1-46 ||

binducakrasya vAruNyAmApyaM zAmbhavamarcayet |

binducakrasya caizAnyAM pArthivaM pUjayettataH || 1-47 ||

sarazmikAn samabhyarcya yathoktena tu vartmanA |

SaTtriMzaccakrage dehe nyasanaM kArayet priye || 1-48 ||

ityetat kathitaM devi hyathavA navamaNDale |

navAtmakaM maMDalaM vai mukhyameva prakIrttitam || 1-49 ||

navacakrAtmakaM devi mahAsaMvarttakezvaram |

pUjayedyatnato devi proktaM saMkSepataH priye || 1-50 ||

prAtaHkRtyAdi sadhyAnapUjanAdi kriyAdikam |

zrImatpaJcakataMtreSu vistareNa prakAzitam || 1-51 ||

SaTzAmbhavAkhyaM yaMtraM tu navAtmakamitIritam |

tasmin yaMtre mukhyapUjA kathitA paramezvari || 1-52 ||

paMcapretAstu zrIcakre SaTpretAH zAmbhave matAH |

saptapretA guhyakAlyAM kathyante zRNu sAMpratam || 1-53 ||

p. 5) hiraNyagarbha ityAkhyaH zAmbhave parikIrttitaH |

indrabhairavanAmAnau guhyakAlyAmitIritau || 1-54 ||

saMghaTTanAkhyA mudrA vai trividhA parikIrttitA |

karadvayaM tu saMyojya hyadhovaktraM sulakSaNam || 1-55 ||

nakhe nakhAn susaMyojya paMcAMgulyo hyadho bhavet |

karAvitthaM susaMyojya mudrA saMghaTTanAbhidhA || 1-56 ||

pUrvamudrAM susaMyojya kaniSThe viralIkRte |

saMghaTTanAkhyA mudrA tu dvitIyA parikIrttitA || 1-57 ||

atrApi pakSadvitayaM kaniSThe bhinnayojite |

tRtIyA jAyate mudrA caturthI sarvatottamA || 1-58 ||
aMguSThAnAmikAmadhye yonyAkAreNa yojayet |
kRtvA karadvayasyaivaM hyadhovaktraM suzobhanam || 1-59 ||

tarjjanyAM tarjjanI yojyA kaniSThAyAM kaniSThikA |

tarjanI dve kaniSThe dve cAgratorddhvaM niyojayet || 1-60 ||

saMghaTTanAkhyA mudreyaM japAnte sarvasiddhidA |

catuzcaraNavidyAyAM SaTzAmbhavavidhAvapi || 1-61 ||

mukhyA proktA mahAdevi darzayet yatnataH zive |

ityetadgaditaM devi kimanyat zrotumicchasi || 1-62 ||

zrIziva uvAca |

athAtaH saMpravakSyAmi pAraMparyyakramaM zive |

pUrNadIkSAparatvena vivicya kathayAmi te || 1-63 ||

sAkSAt parazivenAdau zaMkarastu prabodhitaH |

caturbhiH saha ziSyaistu zaGkaro'vatariSyati || 1-64 ||

zivena bodhitA devI devyA sarve prabodhitAH |

brahmaviSNuzivAzcaiva IzvareNa prabodhitAH || 1-65 ||

zivapAraMparyyagato guruH zivaparaMparA |

devIparaMparA devi kAlyupadezavartmanA || 1-66 ||

atrApi zaktibAhulyaM matasaMkhyA na vidyate |

athAnandabhairavAttu devImataparaMparA || 1-67 ||

p. 6) pUrvoktaM tritayaM devi kAmarAje tu bhinnataH |

Anandabhairavamate paMcAzItimatakramaH || 1-68 ||

zivapAraMparyyadIkSA dakSiNAmUrttitaH priye |

sarvatra pAraMparyyatvaM tvatha madhyAM zRNu priye || 1-69 ||

divyAdyaughatrayodyuktAH zaive gANapacoditAH |

atrApi matabAhulyaM mayA vaktuM na zakyate || 1-70 ||

taMtre ca divyasiddhaughau mAnavaughastRtIyakaH |

sundaryyAM zrImahAkAlyAM tArAyAM kAlikAmanau || 1-71 ||

paMcadazyAM lopikAyAM manvagastikamaMtrake |

parAyAM zaivayuktAyAmAdyantavyutkramAdike || 1-72 ||
SaTzAmbhave mahezAni aughatrayamudIritam |
sarvamaughatrayaM proktaM kimitaH zrotumicchasi || 1-73 ||

aughAtparaMparA proktA divyasiddhAtmakA priye |

zivAdaughAH samudbhUtAstvaughapUjAparaMparA || 1-74 ||

dakSamUrtyA gANapikaM tathaiva [baTukAdikam] |

athAnandabhairavAdi tatsarvamaughamadhyagam || 1-75 ||

prababhUvuH saMpradAyaH hyete ca parikIrttitAH |

Anandabhairave devi koTibhedAH prakIrttitAH || 1-76 ||

AnandabhairavAdyA vai hAdye cAntargatAH priye |

mArgapravartakatvAttu mukhyatvaM parikIrttitam || 1-77 ||

tasmAdRSitvatAM prAptA virUpAkSAdayaH priye |

sarasvatI lekhanI tu gaNezo lekhako mataH || 1-78 ||

mataM parazivasyedaM vaktA devo mahezvaraH |

pRthvI patrI mahAdevi nAthAH zAstrasya bandhakAH || 1-79 ||

brahmAstrAdyAH zAstrapAzca zarabhAdyAstu rakSakAH |

aughAH pravarttakA loke te pUjyAH sarvathaiva tu || 1-80 ||

pAraMparyyAtkramagatA bhinnabhinnAH prakIrttitAH |

divyA devAntike nityaM siddhA bhUmAvihAvapi || 1-81 ||

mAnavaughA manuSyeSu aughatrayamudIritam |

zivAt svaguruparyaMtaM jJAnaM pUjAmanuttamAm || 1-82 ||

p. 7) devItaH svasvagurvantaM jJAnaM pUjA parA matA |

athAnandabhairavAkhyaM svagurvaMtagataM priye || 1-83 ||

iyamekA mahAdevi dakSiNAmUrttisaMmatA |

zRNu yatnena devezi tattvaM svagurvantaM priye || 1-84 ||

pUjA proktA tUttamA tu tvaughAt gurvantakaM zRNu |

aughAd gurvantakaM devi jJAnaM pUjA prakIrttitA || 1-85 ||

mukhyaM jJAnamidaM proktaM kalau kutrApi tiSThati |

devi pUrvacatuSkaM tu tretAsatyayuge matam || 1-86 ||

sarvAbhAve mahezAni parameSThyantakaM matam |

catuSkaM tvathavA jJeyaM nAnyathA siddhirodhakRt || 1-87 ||
devyAH svaguruparyyantamupadezaparaMparA |
tathA devezi sarvatra bhairavAdyaM prakIrttitam || 1-88 ||

dakSiNAmUrttipAde tu svagurvaMtaM prapUjayet |

ekaviMzattamaM jJAnaM gurvAkhyaM kriyatAM laghu || 1-89 ||

gurubAhulyabhedAstu tvAnaMdabhairave bahu |

etajjJAnaM vinA devi pApabhAgI bhavennaraH || 1-90 ||

strINAM dIkSA kathaM deyA tatra strItvaM kathaM bhavet |

devIparaMparoddiSTastUpadezo yadA bhavet || 1-91 ||

tadA svakIyAM sandIkSya puNyabhAgI naro bhavet |

sannyAsInAM tu dIkSA tu dakSiNAmUrttisaMmate || 1-92 ||

zive cAnandadeveSu sarvatra dIkSaNaM caret |

zaive zivAntakaM nAma viSNave tu tadantakam || 1-93 ||

zAkte tu zaktiguravastatra bhedA bhavanti hi |

saure sauraM gANapatye bauddhe dharmAntikaM bhavet || 1-94 ||

evaM pAzupatAdyeSu tatra dIkSoktanAma tu |

kAryaM tu yatnato devi ityevaM kAlikA'bravIt || 1-95 ||

athavA dakSiNAmUrttiM pUjayitvA mahezvari |

tatsakAzAtpradeyA syAt strINAM dIkSA tu sA matA || 1-96 ||

yadi strINAM bAdhikA tu karmaNaH syAttadA katham |

putradvArA poSaNIyaH putro nAsti yadA zive || 1-97 ||

p. 8) pUrvaM kAryA sAkSare vai tataH sandIkSayettu tAm |

athAnyat saMpravakSyAmi pUrvoktaM tacchRNu priye || 1-98 ||

kalau yuge tu saMprApte kariSyanti na kecana |

upavidyAM samAsAdya japiSyaMti narAdhamAH || 1-99 ||

na te siddhiM prApnuvaMti te sarve duHkhabhAginaH |

teSAM nindA kalau devi bhaviSyati na saMzayaH || 1-100 ||

kAlI tArA chinnamastA sundarI bagalAmukhI |

mAtaMgI bhuvanA lakSmIrdhUmrA tripurabhairavI || 1-10 1 ||

etA eva mahAvidyA siddhavidyA yugAntarAt |

vidyAtvaM tu mahAdevi tattadyugavazena tu || 1-102 ||

gurusaMtatihInatvAdupavidyAprayojanAt |
durAcArAnnindanAcca na te vai siddhibhAginaH || 1-103 ||

kAlI tArA chinnamastAsundarI tvekarUpiNI |

anyA'pi ca mahAdevi ekarUpA na saMzayaH || 1-104 ||

upavidyAdikaM caiva dazavidyAmupAcaret |

sarvasvaharaNaM kRtvA yoginyo bhakSayanti tam || 1-105 ||

athAnyatsaMpravakSyAmi matabhedAdivarNanam |
kAlIM tArAM mahAvidyAM dIpinIM kulasundarIm || 1-106 ||

sarvakAlaM japedvidvAn yadi siddhimabhipsati |

pAzupatatrizUlyAdyA vIrakaulAdayaH priye || 1-107 ||

atraivAntarbhaviSyanti mahAvidyAvidhau zive |

vIrazaivA vIrapUrvavaiSNavA ye prakIrttitAH || 1-108 ||

atraivAntarbhaviSyanti kAlItArAdike manau |

cArvAkAdiprabhedAstu cInabhedA amI smRtAH || 1-109 ||

cArvAkA ArhatA bauddhA cIna jainAdayaH zive |

zAkyasiMhAdi devezi devIputrAdikAH priye || 1-110 ||

atraivAntarbhaviSyanti mahAtArAmanau zive |

athAtaH saMpravakSyAmi pUrNadIkSAvivecanam || 1-111 ||

pUrNAbhiSekadIkSAyAM bhedA vai bahavo matAH |

parAprAsAdavidyA ca prAsAdaparayA'thavA || 1-112 ||

p. 9) binduyukto bhavecchaive sargI kAmakalAtmikA |

prAsAdapararUpAyAM bindusargAtmikaM tathA || 1-113 ||

parA dIkSA tathAnyA vai tattvAdibindusargataH |

atha saTzAmbhavI dIkSA bahudhA parikIrttitA || 1-114 ||

garbhazAmbhavakaM cApi kerala zAmbhavaM ca vA |

kerale bahavo bhedAstAMzcAtra kathyate'dhunA || 1-115 ||

SaDanvayaH paMca vApi caturanvayameva vA |

tritayaM vApi devezi hyabhAve ekameva vA || 1-116 ||

zivarazmiH zaktirazmiH zivazaktyAtmakA yadA |

tripurA dazapaMcAkhyamAloktA razmayaH parA || 1-116 ||

kiM vA SaDanvayAkhyeSu proktA vai razmayaH parAH |

kiM vA caraNadIkSA syAccatuzcaraNarUpuNI || 1-118 ||
raktazuklamizrarUpaM nirvANaM tu turIyakam |
caraNatrayadIkSA syAnnirvANaM sarvatottamam || 1-119 ||

nirvANAttu paraM devi nAsti jJAnaM tu mAmake |

SoDazyAM pUrNadIkSA tu saMpradAyaparo caret || 1-120 ||

saMpradAyAnusAreNa tattanmMtreSu pazyatAm |

SaDanvayastu devezi guhyakAlyAmapi smRtaH || 1-121 ||

pUrNAbhiSekadIkSA tu kAlyAM ca parikIrttitA |

evaM sarvAsu vidyAsu pUrNadIkSA prakIrttitA || 1-122 ||

zrIsuMdaryAM tathA kAlyAM mukhyA tu parikIrttitA |

saMpradAyAnusAreNa tattadarcanamAcaret || 1-123 ||

paMcadazyAmapi zive pUrNadIkSA prakIrttitA |

manvagastalopikAyAM nAmadAnaM tu bhinnataH || 1-124 ||

saMpradAyAnusAreNa nAma deyaM mahezvari |

zrImaddakSiNakAlyAM tu kAlI gurUktavartmanA || 1-125 ||

tArAyAmapi devezi tArA gurUktavartmanA |

yathA kAlI tathA tArA yA tArA saiva kAlikA || 1-126 ||

ityuktatvAnmahezAni tArAyAmapi dIkSaNam |

guhyakAlyAM mahAdevi SaDrazmikramataH zive || 1-127 ||

p. 10) daza paMca mAlikA'tra gaditA priyavAdini |

tadrazmikramayogena nAmapUjAdikaM matam || 1-128 ||

SaTzAmbhavakrameNaiva nAma deyaM mahezvari |

mahAkAmakalA kAlI rAjarAjezvarI matA || 1-129 ||

asyAM tu dIkSA saMproktA pUrNadIkSA zubhA zive |

etadgurUktamArgeNa mAnavaughakrameNa tu || 1-130 ||

gurubhaktasya ziSyasya AjJAnAma pradApayet |

yA sA kAmakalA kAlI yogapaTTezvarI matA || 1-131 ||

yogadIkSeti sA proktA mahAnirvANarUpiNI |

haMsakAlyAmapi tathA AjJAnAma pradApayet || 1-132 ||

yA sA kAmakalA kAlI yogapaTTezvarI matA |

parAprAsAdarUpA syAt mahAkAmakalA parA || 1-133 ||
caraNadIkSA haMsakAlyAM catuzcaraNarUpiNI |
haMsadIkSAtparaM nAsti dIkSA pUrNAbhiSekikA || 1-134 ||

atha haMsakrameNaiva AjJAnAma pradApayet |

atrApi devadevezi zivadevIparaMparA || 1-135 ||

bhairavasyAdinAthasya devate kathite zive |

sarveSAM tu mahAdevi aughaparaMparA matA || 1-136 ||

aughaparaMparAjJAnAt aughe mukhyatvameva tat |

zivAdyA devadevezi virUpAkSaparaMparA || 1-137 ||

AdinAthAd gurujJAnaM svagurvantaM mahezvari |

Adau sarvatra devezi mantradaH prathamo guruH || 1-138 ||

paramparAdikA devi mahezA eva nAnyathA |

AnandanAtha saMjJAntA guravaH parikIrttitAH || 1-139 ||

striyo'pi gururUpAzca ambAntAH parikIrttitAH |

Adau zrIsvaguruM pUjya zivAntaM pUjayecchive || 1-140 ||

evaM devi dIkSaNAdau pUrvavat parikIrttitam |

AnandabhairavAdyeSu hyevameva prakIrttitam || 1-141 ||

svagurvAdi samArabhya divyAntaM pUjayecchive |

atha kAlIdIkSaNAdau AjJAnAma pradApayet || 1-142 ||

p. 11) prakArAntarato devi gadyate zRNu sAmpratam |

prahlAdAnandamArabhya bodhAnandAntikaM priye || 1-143 ||

etad guruktamArgeNa cAjJAnAma pradApayet |

tArAyAmapi saMproktaH saMkSepeNa mayA tava || 1-144 ||

zrIziva uvAca |

athAnyat saMpravakSyAmi sampradAyasvarUpakam |

Adau hi vaidikaH proktastato hi vaiSNavaH paraH || 1-145 ||

tato gANapataM proktaM tataH sauraM prakIrttitam |

saurAcchreSThaM zaivazAstraM zaivAcchAktaM mahezvari || 1-146 ||

zAktAdvAmaM mahezAni zreSTheti parikIrttitam |

vAmAttu dakSiNaH zreSTho dakSiNAdvIra eva tu || 1-147 ||
atha vIrAccAvadhUtaH kaulapUrvaM prakIrttitaH |
avadhUtAddivyamArgo divyAcchreSTho na vidyate || 1-148 ||

zaive cAntarbhaviSyanti zrImatpAzupatAdayaH |

pAJcarAtrAdayo devi vaiSNave sambhavanti hi || 1-149 ||

zAkte cAntarbhaviSyanti pASaNDacInasammatAH |

kApAlike rudrabhedAH kaule cASTau prakIrttitAH || 1-150 ||

vIre paMcamataM devi cIne zatadvayaM matam |

bauddhAnAM zatabhedAH syuH sapta pAzupate matAH 151 ||

divye bhedadvayaM devi pazavastrividhA matAH |

avadhUte saptabhedAH sampradAyakrameNa tu || 1-152 ||

AnandaH prathamaH prokto dvitIyo nAtha eva tu |

mukhyastvAnandanAthaH syAt prakAzastadanantaram || 1-153 ||

svarUpastu tataH prAktazcaitanyastu taduttaram |

ArAdhyAcAryakazcaiva vidyAdhikyAt prakIrttitaH || 1-154 ||

SaTzAmbhavAdizAstrajJastvArAdhyaH parikIrttitaH |
guzabdastvandhakAratvAd ruzabdastasya bodhakaH || 1-155 ||

dvAbhyAM guruzca samproktaH sa eva hi prakAzakaH |

nAthaH siddhyAdibhiryuktastvAnandaH zambhuzaktimAn || 1-156 ||

p. 12) AnandanAthazabdastu parazaivasya vAcakaH |

mahAvIrastu yaH proktaH sa mAhezvara itIritaH || 1-157 ||

vIrastUddhatavat prAyaH kalau tiSThati kutracit |

vilAsasampradAyastu tadbhedaH keralo mataH || 1-158 ||

tadbhedo draviDaH prokta AcAryatvapradAyakaH |

svArAjye niyataH proktazcaitanyAkhyaH sa eva tu || 1-159 ||

draviDe'ntarbhaviSyanti svAmisampradAyavAcakAH |
gauDaH svarUpa ityuktastvAnandAkhyaH sa eva tu || 1-160 ||

kerale bahavo bhedAstAnahaM vacmi saMzRNu |

bhavasiddho harAkhyastu siddhAkhyaH parikIrttitaH || 1-161 ||

dezaparyAyabhedena kalahaTTacatuSTayam |
maMtraparyyAyabhedena vidhisiddhistataH kramaH || 1-162 ||

kAlaparyyAyabhedena siddhAnandamatakramaH |
kalahaTTo gomukhazca vijJAnI tadanaMtaram || 1-163 ||

draviDarAjo mahezAni utpAdAkhyastataH param |

kAlaparyyAyabhedena saMpradAyakramo mataH || 1-164 ||

pUrvakeralamAdau syAt dvitIyaM tUttaraM bhavet |

atrApi nAmabAhulyaM sampradAyAnusArataH || 1-165 ||

divyaH siddhastataH satyazcaitanyazcidghanaH param |

sarvajJAkhyo brahmaviSNurudrasaMjJAdharaH zive || 1-166 ||

AdisaMjJA tato devi yojanIyA sarasvatI |

Adau divyAdayaH zabdAstato devI sarasvatI || 1-167 ||

Adau kramAstu vijJeyAH sampradAyastaduttaram |

tato nAmAdikaM jJAtvA cAjJApadaM mahezvari || 1-168 ||

atha draviDabhedAn hi zRNu vakSye yathAkramam |

advaitAkhyaH pUrNanAthazcidambAkhyastatIyakaH || 1-169 ||

advaitAkhyaH saMpradAyastvavadhUtamate'pi ca |
sarasvatyantago vApi cAnandAnto'pi vA priye || 1-170 ||

nAthAnto vA mahezAni tritayaM tritayaM triSu |

IzAkhyastu mahezAni keralAntargato bhavet || 1-171 ||

p. 13) mAhezvaraH sa bhavati vizvarUpAbhidhaH priye |

ete'pi kerale devi hyantarbhUtA bhavanti vai || 1-172 ||

evaM jJAnena sampannaH kuNDalIjJAnapUrvakam |

pUjanaM tu prakartavyaM nAnyathA sidhyati dhravam || 1-173 ||

etadajJAnato devi na vidyA siddhimApnuyAt |

vidyAsiddhimabhipsurvai jJAnapUrvaM samAcaret || 1-174 ||

ajJAnAt yatkRtaM devi tat sarvaM niSphalaM bhavet |

iti saMkSepataH proktamavazyaM kriyatAM priye || 1-175 ||

balidAnavidhau devi pAtrAsAdanakarmmaNi |

viniyogavidhau sarvaM spaSTaM bhavati nAnyathA || 1-176 ||

zrIziva uvAca |

atha kiM pRcchasi zive kAzmIraM brUhi satvaram |

sarvadivyastu yaH proktaH sa kAzmIrati kIrtitaH || 1-177 ||

bhAvanAthaH kriyAnAtho jJAnanAthastathaiva ca |

citparaH cetanezazca siddhanAthAkhya eva ca || 1-178 ||

RddhinAthastatazcaiva ityaSTau kIrtitA mayA |

pUjanAdau mahezAni pAtrAsAdanakarmmaNi || 1-179 ||

bheda eSa mahezAni sarvamekaM prakIrttitam |

gauDAkhyamArgo devezi tathA kAzmIrasammatam || 1-180 ||

kerale'ntargataM devi nAnyathA zAMkaraM vacaH |

kvacit kadAcit bhedo vai sampradAyAtprakIrttitaH || 1-181 ||

trijaTaikajaTA cobhe trizUlo bindubhUSitaH |

caturbhedA mahezAni zaive'trAntargatA bhavet || 1-182 ||

zaive cAntargatA devi zrImatpAzupatAdayaH |

teSAM tu saptabhedA vai tAnahaM vacmi saMzRNu || 1-183 ||

Adau zikhI tato muNDI jaTI caiva tRtIyakaH |

dvidaNDI tvekadaNDI ca tridaNDI ca tataH smRtaH || 1-184 ||

vIrazaivaH saptamastu saptapAzupatAH smRtAH |

vaiSNave tvaSTabhedAH syustvAdau vaikhAnasaH smRtaH || 1-185 ||

zrIrAdhAvallabho devi gokulezastRtIyakaH |

vRMdAkhyastu caturthaH syAt pAMcarAtrastu paMcamam || 1-186 ||

p. 14) vIravaiSNavanAmAkhyastataH parikIrttitaH |

rAmAnandI harivyAsI nimbArkazcASTamaH smRtaH || 1-187 ||

smArtA bhAgavatA devi ete mArgapravarttakAH |

zAkte cAntargatA devi cInAH kApAlikAH zive || 1-188 ||

bauddhA jainAstato devi divyAH kaulAstathA zive |

vIraH pazustataH proktasteSAM lakSaNamucyate || 1-189 ||

cInAnAM dvizataM bhedAstArAcchinnAvidhau sa tu |

tArAdhIzaH parAdhIzaH kSemAkhyaH prematArakaH || 1-190 ||

sAgarAkhyaH parApannastathA jIvadayAparaH |

cirajIvI siddhanAmA saMkSepAnnAvakIrttitaH || 1-191 ||

kApAlike paMcabhedAstAnaho brUmahe zive |

iMdrajAlI devajAlI rudrajAlI tRtIyakaH || 1-192 ||
vidyAjAlI turyasaMkhyaH paMcamaH siddhijAlikaH |
paMcakApAlikAH proktA bauddhAn saMzRNu yatnataH || 1-193 ||

kezacchedI vRkSacchedI madyAzI kalmaSastathA |

icchAbhedI paMcamastu evaM bahuvidhA matAH || 1-194 ||

jaine bhedadvayaM devi kathyate yatnataH zRNu |

pArzvanAthaH kalAnAthaH padmAbhogavatIrataH || 1-195 ||

AdidivyastUpadivyo divyabhedadvayaM zive |

pazavastrividhA devi jJAtAjJAtavinindakAH || 1-196 ||

paMcadhA vAra ityuktastadbhedaM zRNu pArvati |

zrIcakravIro devezi UrmilAkhyo dvitIyakaH || 1-197 ||

cUDAcakraM tRtIyaM syAtpuSpacakraM caturthakam |

jIvacakraM paMcamaM syAtpaMcabhedAH prakIrttitAH || 1-198 ||

bhAvayogo jIvacakre puSpacakre kriyAbhidhaH |

zrIcakre jJAnayogastu layayogastu [Urmile] || 1-199 ||

cUDAcakre rAjayogo kimanyacchrotumicchasi |

zrIdevyuvAca |

deveza zrotumicchAmi pUrvoktaM cAtiguptakam || 1-200 ||

zrIziva uvAca |

kITAt brahmANDaparyyantaM sarvazaktimayaM jagat |

zaktisaMpUjanAddevi brahmANDaM pUjitaM bhavet || 1-201 ||

p. 15) zaktyA zivasya vai dehe bhuvanAni caturdaza |

lokatrayaM kalAsthAne devalokAdikaM zive || 1-202 ||

parvatA dhAtavo vApI samudrAH saritastathA |

brahmANDagolake yacca yat kiMcijjagatItale || 1-203 ||

tatsamastaM zaktidehe sphuTaM tiSThati pArvati |

brahmA viSNuzca rudrazca zaktidehasamudbhavAH |
iti saMkSepataH proktaM kimanyacchrotumicchasi || 1-204 ||
iti zrIzaktisaGgamamahAtantrarAje uttarabhAge tRtIyakhaNDe
zrimadakSobhyamahogratArAsaMvAde zrIcakrayogAdikathanaM nAma
prathamaH paTalaH || 1 ||

dvitIyaH paTalaH |

zrIdevyuvAca |

pUrvoktaM vada deveza yadyahaM tava vallabhA |

zrIziva uvAca |

dhanakAme gaNapatimArogye ca divAkaram || 2-1 ||

tArApati ca zrIkAme muktikAme janArddanam |

nArAyaNaM sarvakAme zrIkAme puruSottamam || 2-2 ||

mantrI mantraprasiddhyai zrIM vidyArthIM kAlikAM yajet |

mAtaGgIM dhanakAmastu vArAhIM sarvakAmayA || 2-3 ||

bhuvanezIM rAjyakAmaH tathA nIlasarasvatIm |

tathA tripuramevaM ca kUTe kUTavibhAvinIm || 2-4 ||

sarvakAmaM kaliyuge kRte ca puruSottamam |

dvApare zivabhedaM ca tretAyAM vAmanaM harim || 2-5 ||

atha kaliyuge zastA yA bAleti nigadyate |

tretAyAM lalitA zastA dvApare paMcakUTagA || 2-6 ||

SaTkUTA ca kalau zastA sarvatantreSu gopitA |

sarvakAmaM kaliyuge sundarI paramezvari || 2-7 ||

bagalA sarvasiddhyarthaM staMbhanArthaM vizeSataH |

dhUmAvatI mAraNArthe zarabho nigrahe mataH || 2-8 ||

pratyaGgirA agnyastrAdinigrahArthaM prakIrttitA |

zrIziva uvAca |

anyatte'haM pravakSyAmi yadyajAnAmi devate || 2-9 ||

bhUtikAmastu satataM pUjayettripurAM kalau |

kAlikAM ca mahAmAyAM vANIkAmastu cArcayet || 2-10 ||
bhuvanezIM tathA tArAM svargakAmastu cArcayet |
brahmavarcasakAmazca brahmANaM paripUjayet || 2-11 ||

ArogyakAmo'tha raviM dhanakAmo hutAzanam |

kamalAM siddhikAmastu vidyAkAmaH sarasvatIm || 2-12 ||

p. 17) kalau nIlapatAkAM ca tathA nIlasarasvatIm |

vAksiddhirjAyate zIghraM kAmasiddhirna saMzayaH || 2-13 ||

karmaNAM siddhikAmastu pUjayedvai vinAyakam |

bhogakAmastu zazinaM balakAmaH samIraNam || 2-14 ||

vimuktayai sarvasaMsArAt prayatnenArcayecchivam |

dhyAnayogaM tathA mokSaM yadIcchedjJAnamavyayam || 2-15 ||

so'rcayecca virUpAkSaM sarvasattvamayaM haram |

chinnamastAM rAjapUrvAM mAtaMgIM kAmakAlikAm || 2-16 ||

zmazAnakAlikA devi sarvasiddhipradAM yajet |

azvArUDhAM kukkuTIM ca tathA bhogavatIM zive || 2-17 ||

nityaklinnAM ca bheruNDAM strIvazyArthaM yajet priye |

sarvAkarSaNakAmastu kAlikaikAkSarIM yajet || 2-18 ||

tathA madhumatIM vidyAM sarvAkRSTau yajetpriye |

parAprAsAdavidyAM ca tathA SaTzAmbhavezvarIm || 2-19 ||

sarvakAmaprasiddhyarthaM yajedyatnena sundarIm |

dhanadA RddhikAmena siddhikAmena kAminI || 2-20 ||

bhairavI rUpakAmena hayagrIvastu vAkpradaH |

zrIziva uvAca |

dIkSAparaMparAmAha yena devImayo bhavet || 2-21 ||

gauDakAzmIradraviDe kaule vAme ca dakSiNe |

sarvatra yojanIyA hi yathAmArgeNa sundarI || 2-22 ||

adhikAravazAddevi kalau pApasamanvite |

kalau yuge ca saMprApte sarve bhraSTA bhavanti hi || 2-23 ||

paraMparAvinAzastu bhaviSyati na saMzayaH |

gurukSobhaM vimukhyaM ca nAtaH siddhiH pravartate || 2-24 ||

ajJAnavazato devi bhramanti hi itastataH |

mArgabhraSTAstathA jAtA zAkhAraNDA yathA matAH || 2-25 ||

koTisaMkhyayugairvApi na te vai siddhibhAginaH |

dIkSAparaMparAM vakSye zrIvidyAyAM mahezvari || 2-26 ||

p. 18) kAlikAyAmapi tathA gauDakAzmIrabhedataH |

athAtaH saMpravakSyAmi zrIvidyAbhedadIkSaNam || 2-27 ||

labdhAdhikAribhirdevi bAlopAsyA mahezvari |

pUrNAdhikAribhirdevi kAmasaMpUjitA parA || 2-28 ||

taduttaraM SoDazI syAtparAvidyA taduttaram |

parAprAsAdavidyA syAtprAsAdapararUpiNI || 2-29 ||

saMpradAyAnusAreNa dIkSaNaM kArayet priye |

SaTzAmbhavaM tataH proktaM saMpradAyAnusArataH || 2-30 ||

caraNadIkSA tataH proktA tvito dIkSA na vidyate |

nirvANadIkSA devezi sarvatazcottamA matA || 2-31 ||

nirvANadIkSAparato nAnyadIkSA tu vidyate |

nirvANadIkSayA yuktaH paraM brahma na saMzayaH || 2-32 ||

caraNatrayadIkSA tu kvacit kAryyA mahezvari |

bAlAmaMtrAdikA maMtrA vidyAmaMtraiva kIrttitA || 2-33 ||

yA sA paMcadazI devi SoDazI saiva kIrttitA |

SoDhAnyAsAdikaM caiva aSTAdaza sahasrakam || 2-34 ||

nyAsA yatnena karttavyA nAmaparAyaNaM tathA |

parAprAsAdavidyAyAM sarvameva prakIrttitam || 2-35 ||

kAlanityAdikaM caiva yugaparyyAyanityakAH |

maMtrapArAyaNaM karma nADIpArAyaNaM tathA || 2-36 ||

SoDazIvidyayA yuktastvadhikArI hi sarvataH |

SaDanvayakrame dIkSA nyAsapUjAdikaM zive || 2-37 ||

bhinnameva purA proktaM vizeSaH kathyate punaH |

catuzcaraNadIkSAyAM bhinnaM nyAsAdikaM matam || 2-38 ||

parAprAsAdavidyAyAM vizeSaH kutracitpriye |

sarveSAM pUjanaM devi zrIcakre parikIrttitam || 2-39 ||

adhikArAnusAreNa yojanIyaM mahezvari |

sarvadIkSAdibhiryukto mahAdevo na saMzayaH || 2-40 ||
uttarottarametaddhi zreSThaM viddhi mahezvari |
etajjJAnavazAddevi sAkSAdbrahmamayo bhavet || 2-41 ||

p. 19) AdAvekAkSarI proktA bAlAvat parikIrttitA |

siddhakAlI paMcadazI vidyAvat parikIrttitA || 2-42 ||

atha vai dakSiNAkAlI SoDazI saiva kIrttitA |

tataH kAmakalA kAlI parAprAsAdavanmatA || 2-43 ||

caraNadIkSA yathA proktA tathaiva haMsakAlikA |

tatasu guhyakAkAlI SaTzAmbhavaparezvari || 2-44 ||

SaTzAmbhave guhyakAlyAM bhinna eva prakIrttitaH |

atrApi kAlanityAdi jJAnaM proktaM mayA tava || 2-45 ||

maMtrapArAyaNaM devi nAmapArAyaNaM tathA |

nADIpArAyaNaM caiva yuganityAdikaM zive || 2-46 ||

kAlanityAdikaM caiva dinanityAdikaM tathA |

sarvaM vistarato devi mayA pUrvaM niveditam || 2-47 ||

kAlyAM tu yuganityAdi kAlanityAnusArataH |

viMzatsAhasrakaM cASTazatI SaTtriMzadIritA || 2-48 ||

kAlanityAvidhAnAdi sAdhanaM kathyate punaH |

ityetatkathitaM devi saMkSepeNa mayA tava || 2-49 ||

etadvidhAnavA/lloke siddhirUpo na saMzayaH |

pUrNAbhiSekadIkSAyAM nAmapArAyaNaM caret || 2-50 ||

zaive zaivAntagaM nAma vaiSNave tu tadantamam |

sauragANapabauddhAdau tattacchAstroktanAmataH || 2-51 ||

zAkte zaktyantagaM nAma zAkte bAhulyamIritam |

zrImacchAmbhavadIkSAdau zAmbhavo hyatra sammataH || 2-52 ||

tadrazmigaM ca vA nAma gurumadhyasthitaM ca vA |

RtudvauvedhyagaM vApi yathAmnAyakrameNa tu || 2-53 ||

zivazaktiyugmabhedAnmAlAmantrasthameva tu |
SoDazyAM paJcadazyAM ca lopAmanvagastike zive || 2-54 ||

etadguruproktanAma deyaM yatnena dIkSaNe |

parAprAsAdamadhye tu prAsAdaparayA'tha vA || 2-55 ||
zivazaktyantagaM nAma zaivazaktyantagaM ca vA |
nirvANAdyaMtagaM nAma caraNe tadgurusthitam || 2-56 ||

p. 20) medhAyAM tadgurusthaM ca proktametanmahezvari |

athAnyat saMpravakSyAmi sArAtsArataraM param || 2-57 ||

zrIdevyuvAca |

zApoddhArotkIlane tu tatra bhedaH kiyAn bhavet |

tanme vada mahAdeva yadyahaM tava vallabhA || 2-58 ||

zrIziva uvAca |

utkIlanaM bandhanaM syAt zApastejonirodhakaH |

kIlane tu mahAdevi na gatAgatamIritam || 2-59 ||

gatAgataM mahAdevi zApoddhAre tu varttate |

bhaktAnugrahakAmyatvAddevIsAdhakasannidhau || 2-60 ||

gatvA datto varo devi sa mRSA jAta eva hi |

maMtracaitanyarodhatvAnmRSA jAto mahezvari || 2-61 ||

ayaM zApo nigaditastathotkIlanamucyate |

bhaktAnugrahakAmyatvAddAtavyo hi varaH zive || 2-62 ||

bandhanasya yadA muktistadaiva tu gatAgatam |

zaktistu vartate devyA varadAne mahezvari || 2-63 ||

yathA Urjatare vatse dhenuprItistu vartate |

baMdhanasya yadA muktistanapAnaM tadaiva hi || 2-64 ||

kAlI tArA tathA chinnA tejaHpuMjanibhA matA |

trayANAM tejaHsaMrodhaM ko hi kartuM kSamo bhavet || 2-65 ||

tasmAcchApAdikaM nAsti kAlikAyAM mahezvari |

kAlikA tAriNI vidyA utkIlanavimocanI || 2-66 ||

dAmasaMtroTanaM kRtvA dhenuryAti yathA sutam |

bhaktAnugrahakAmyatvAttatheyaM kAlikA parA || 2-67 ||

tArA chinnA staMbhanezI sarvabaMdhavimocanI |

zApe tu prasravo nAsti kIlane prasravo'sti hi || 2-68 ||

kAlikAyAM mahAdevi sarvadA prasravo'sti hi |

zApoddhAraniruktistu zRNu yatnena sAMpratam || 2-69 ||
vatso nikaTavartI syAddhenurnikaTavartinI |
dugdhAbhAvAnmahAdevi naikaTye kiM phalaM bhavet || 2-70 ||

p. 21) kAlAMtare samAyAte punardugdhaM yathA bhavet |

zApanirmocanAdeva punastejaH pravartate || 2-71 ||

vatsabaMdhanamuktitvAtphalaM siddhaM hi vartate |

utkIlane baMdhanaM hi phalasiddhipradA priye || 2-72 ||

tasmAdutkIlanaM bhinnaM zApo bhinnaH prakIrttitaH |

akSaravyatyayo devi utkIlanavidhau smRtaH || 2-73 ||

maMtrazcaitanyarUpatvAt caitanyavyatyayo na ca |
caitanyavyatyayaM tyaktvA pApabhAgI naro bhavet || 2-74 ||

tatpApasya nivRtyarthaM prANAyAmaH prakIrttitaH |

dehAvayavarUpatvaM hyakSare vartate zive || 2-75 ||

akSaravyatyayAddevi hInAMgatvaM prajAyate |

zApahIne mahAdevi sarvAMgaM siddhameva hi || 2-76 ||

vatsabaMdhanakaM karma punaH siddhaM yathA bhavet |

yathotkIlanakaM karma punaH siddhaM mahezvari || 2-77 ||

zApadAne mahAdevi caitanyAbhAva eva hi |

vidyamAnA yathA gaurvai dugdhaM nAsti mahezvari || 2-78 ||

zApadAne mahezAni caitanyaM nAsti zAMbhavi |

utkIlane mahAdevi caitanyaM siddhameva hi || 2-79 ||

iti bhedena gadito kimanyacchrotumicchasi |

zrIdevyuvAca |

dIparekhAdikaM karma pUrvaM yatsUcitaM tvayA || 2-80 ||

kimaparAddhaM mayA deva na tanmahyaM prakaTIkRtam |

zrIziva uvAca |

dIparekhAdikaM jJAnaM sArAtsArataraM matam || 2-81 ||

dIpinyanyoktisiddhyarthaM dIparekhA prakIrttitA |

Arabhya bhAnorudayAtSaSTirvighaTikAMtaram || 2-82 ||

sRSTisaMhArayogena dIparekhAvidhirmatA |
bindumArabhya horAntaM dIpinI samudeti hi || 2-83 ||

sarvamaMtrANi devezi dIpinI samudeti hi |

ghaTikrameNa devezi tatra maMtrodayo bhavet || 2-84 ||

p. 22) mantramAtre tvidaM proktaM mayA saMketakaM zive |

ekAkSaraM samArabhya sahasrAMtaM mahezvari || 2-85 ||

akSare codayaM devi ghaTikAkramayogataH |

tatrAkSaraM sadodeti tajjJAnAtphalamApnuyAt || 2-86 ||

haMsacAro mahAdevi yathA calati sarvadA |

ajapA saiva gaditA saMkalpAttu phalapradA || 2-87 ||

yugAdyAraMbhadivasaM jJAtvA cAhargaNaM zive |

maMtrAkSarodayaM devi viddhi yatra sunizcitam || 2-88 ||

ekaikaghaTikAyogAdbindurekhodayAkSaram |
horAtaM yatnato devi jJAtavyaM zubhamicchatA || 2-89 ||

dvAramArabhya bindvantaM punarekodayAkSaram |

evaM vyAptena devezi virADrUpatvatAM vrajet || 2-90 ||

vyApakatvaM vinA devi na virADrUpatA matA |

vizvarUpatvabhAvo hi virADrUpe prakIrttitaH || 2-91 ||

dIparekhAM vinA devi na hi vai dIpinI matA |

dIparekhAmadhyabhAge dIpinI samudeti hi || 2-92 ||

tatraiva dIpinIM pUjya tatraiva codayAkSaram |

udayAkSarayogena saMjIvaM maMtrameva hi || 2-93 ||

vinodayAkSaraM devi maMtraM niHzaptakaM na hi |

maMtrazApanivRttyarthaM udayAkSaracintanam || 2-94 ||

maMtrodayAkSaraM devi tathA rekhodayo bhavet |

udayAkSarayogena kiM na sidhyati bhUtale || 2-95 ||

mantrodayo yathA devi tathA rekhodayo bhavet |

rekhodayo mantramAtre syAdudayo'pi hi varttate || 2-96 ||

iti proktaM mayA devi kimanyacchrotumicchasi |

zrIdevyuvAca |

pUrvaM saMsUcitaM nAtha yantradhyAnaM tvayA prabho || 2-97 ||

p. 23) kathaM dhyeyaM kiM viziSTaM ki dhyeyAdhyeyameva hi |
vRttaM bhittisvarUpaM vA mekhalAvatsvarUpakam || 2-98 ||

kiM vA rekhAmayaM dhyeyaM kiM vA merusvarUpakam |

vizvarUpaM smaredvApi tatsarvaM mayi kathyatAm || 2-99 ||

zrIziva uvAca |

dhyAnaM tu trividhaM proktaM yantramAtre mahezvari |

Adau virATsvarUpaM syAdvizvacakSuHsvarUpiNam || 2-100 ||

yantraM sambhAvayeddevi sarvatra kathitaM tvidam |

zrIcakrAdau mahAdevi virADrUpe tu sAmyatA || 2-101 ||

dvitIyantu kathaM dhyeyaM tanme vada mahezvari |

tejaHpuJjanibhA rekhA sarvacaitanyarUpiNI || 2-102 ||

sarvaM darpaNavadbhAvyaM svaprakAzasvarUpiNam |

caitanyaM bhAvayet sarvaM vindvAdibhUpurAntakam || 2-103 ||

mUle tejaHprakAzena nAbhinnaM bhAvayetpriye |

tRtIyaM zRNu devezi meru rUpaM sanAtanam || 2-104 ||

uttarottarabIjaM ca bindvArabhya vibhAvayet |

bindvadho bhAvayeddevi caikaikottarataH zive || 2-105 ||

navottarakrameNaiva bhAvayedvA mahezvari |

kAlIvidyAvidhau devi navaratnasvarUpiNI || 2-106 ||

rekhAH saMbhAvayeddevi meruprastAravacca vA |

zrIcakraM bIjasaMyuktaM niHzaptaM paramezvari || 2-107 ||

bIjahInaM tu yaccakraM taccakraM siddhidaM na ca |

sRSTicakraM bhavedAdau sthiticakraM dvitIyakam || 2-108 ||

layacakraM tRtIyaM syAttridhA cakraM niveditam |

bIjasaMlekhanaM devi trividhaM gaditaM mayA || 2-109 ||

bIjaM vinA tu nirjIvaM zavavatparikIrttitam |

bIjayuktaM bhavedyaMtraM niHzaptaM siddhidAyakam || 2-110 ||

bIjAbhAve mAtRkArNAn saMlikhedbindubhUSitAn |

yaMtramadhye tu saMlikhya tadyaMtraM pUjayecchive || 2-111 ||

p. 24) dalAkAraM tu yadyaMtraM tadyaMtraM siddhidAyakam |

dalAkAraM kalau pUjyaM nAnyathA siddhidaM zive || 2-112 ||

maMtracaitanyakaM devi yaMtracaitanyakaM tathA |

gurucaitanyakaM devi svasmiMstritayabhAvanA || 2-113 ||

na tatra dhyAnarUpAdi tejaHpuMjavibhAvanA |

saprapaJce tu niHsAre durAcAravrate zive || 2-114 ||

bhAvanaiva tu saMproktA bhAvanA siddhidA matA |

bhAvanA yadi siddhA na tadetantu kathaM bhavet || 2-115 ||

bhAvanApreraNaM devi daivena kriyate zive |

pratyayaM zRNu devezi yatsarvaiH kriyate sadA || 2-116 ||

kuNDalI bhinnarUpA syAttalliMgaM bhinnarUpiNam |

svayambhuliGgamityuktaM svataHsiddhaM mahezvari || 2-117 ||

mUlavidyAmayI devi kuNDalI zaktirUpiNI |

kuNDalI sarparUpA syAddevatA bhinnarUpiNI || 2-118 ||

zivasyAbhinnarUpatvAttridhA rUpaM prakIrttitam |

mUlAdhAraM tu kuNDalyAH sthAnaM proktaM mahezvari || 2-119 ||

zrIdevatAyAH sthAnaM tu hRdayaM parikIrttitam |

zivasthAnaM mahezAni sahasrAraM prakIrttitam || 2-120 ||

sthAnabhedAnnAmabhedAdrUpabhedAnmahezvari |
kathamaikyaM mahAdevi tasmAttu bhAvanA matA || 2-121 ||

sthAnabhede rUpabhede nAmabhede na vai mama |

tAtparyaM vidyate devi kiM tu caitanyabhAvanA || 2-122 ||

gurumukhyAH kriyAH sarvA nirvANaM gururUpakam |

nirvANaM paramaM brahma nirvANaM tu guroH padam || 2-123 ||

guruH zaktirgururvidyA gururdevo mahezvaraH |

gururbrahmA gururviSNurgururvirATsvarUpavAn || 2-124 ||

gururmaMtro hi caitanyaM kiM bahu brahma kevalam |

caitanyameva tAtparyaM dhyAnaM tu bhAvanaiva hi || 2-125 ||

kena dRSTaM dhyAnarUpaM bhAvanAmAtragocaram |

dRDhabhAvanayA yukte pratyakSaM darzanaM bhavet || 2-126 ||

p. 25) caitanyaM sarvadA bhAvyaM gurau devi na saMzayaH |

guruM vinA na vidyAptirna ca maMtrAptireva ca || 2-127 ||
gurusthAnaM zreSThabhUtaM gurau sarvasya bhAvanA |
gurudaivatamaMtrANAmaikyaM saMbhAvayan dhiyA || 2-128 ||

maMtrArthaM hRdi nizcitya gururUpaM parAmRzan |

sarvaM gurau vilInaM vai jJAtvA tu prajapetpriye || 2-129 ||

svAbhinnatvena saMbhAvya tritayaM tritayaM triSu |

sarvacakSuH sarvamukhaM sarvasyaiva svarUpiNam || 2-130 ||

gurumeva vijAnIyAdguruM dhyAyanjapaM caret |

mayA pUrvaM nigaditaM bhAvatritayakaM zive || 2-131 ||

pazuvIradivyabhAvAddivye kiM vai nirUpitam |

tejaHpuJjaM vibhAvyA'tha sarvamekasvarUpakam || 2-132 ||

caitanyaM ca vibhAvyA'tha mahAtejaH smarecchive |

gurukRpA bhaveddevi deva rUpo guruH smRtaH || 2-133 ||

gururUpo bhavedAtmA AtmarUpo manurbhavet |

maMtrarUpaM tu sakalaM vibhAvya mUrttikalpanA || 2-134 ||

dhyAnoktAM devatAM dhyAtvA sarvaM saMsAdhayet kSaNAt |

evaM bhAvanayA devi tAdrUpyatvaM prajAyate || 2-135 ||

tAdrUpye tu samApanne parazaktitvatAM vrajet |

parazaktisvarUpo'hamiti saMbhAvyamavyayam || 2-136 ||

caitanyamUrttiM saMcintya kiM na sidhyati bhUtale |

trayANAmekagaM tejastatra mUrtiprakalpanA || 2-137 ||

dhyAnoktadevatAM dhyAtvA svasvarUpAM vibhAvayet |

tritayaM triSu saMbhAvya tatreSTamUrttikalpanA || 2-138 ||

manaHsthairya yathA devi yathA kAryaM mahezvari |

tasyAH samarasaM devi tejaH puMjanibhaM smaret || 2-139 ||

ardhanArIzvaramapi maMtracaitanyavigraham |
na dehe maMtravarNAn sve vyAptAnvai bhAvayetsudhIH || 2-140 ||

p. 26) vanamAlAsamAM bhAvya tejaHpuMjanibhAM zive |

iti saMkSepataH proktaM yathA kuNDalIrUpakam || 2-141 ||

kuNDalItritaye devi yathA saMbhAvyate zive |

tathA'tra bhAvanA proktA kimanyacchrotumicchasi || 2-142 ||
iti zrIzaktisaGgamamahAtantrarAje uttarabhAge tRtIyakhaNDe
zrImadakSobhyamahogratArAsaMvAde udayAkSaranirUpaNaM nAma dvitIyaH
paTalaH || 2 ||

tRtIyaH paTalaH |

zrIdevyuvAca |

devAdhideva sarvajJa sarvazAstrapravartaka |

maMtrodayAdikaM jJAnaM dIparekhAdikaM priye || 3-1 ||

bhAvanAntaM ca kathitaM pUrvoktaM na prakAzitam |

zrIziva uvAca |

tadeva kathyatedAnIM zRNu yatnena sAmpratam || 3-2 ||

keralAkhyamataM caikaM kAzmIraM tu dvitIyakam |

gauDasaMjJaM tRtIyaM syAnmataM tu bhAvanAvidhau || 3-3 ||

Adau tu keralaM devi zuddhaM sarveSu sammatam |

gurudaivatamaMtrANAmaikyaM saMbhAvayan dhiyA || 3-4 ||

caitanyaM tu trayANAM ca tejaH puMjaM vibhAvayet |

upadeSTA gururdevi maMtre caitanyabodhanam || 3-5 ||

caitanyasya svarUpaM vai gururUpaM vibhAvayet |

navaratnaprabhA devi yathA caikatra yojyate || 3-6 ||

ekatra yojanAdeva jvalanmerusamaprabhAm |

ekatra yojanAddevi koTisUryasamaprabhAm || 3-7 ||

tatprabhAyAM mahAdevi guruM zambhusvarUpiNam |

varAbhayakaraM zAnte dvinetraM dvibhujaM gurum || 3-8 ||

tattejasA vilInaM hi jagatsthAvarajaMgamam |

keralAkhye sampradAye evaM saMbhAvayedgurum || 3-9 ||

gurumukhyAH kriyAH sarvAstasmAtsarvottamo guruH |

kAzmIrAkhyaM zRNu prAjJe yena tanmayatAM vrajet || 3-10 ||

maMtradevagurUNAM hi tvaikyaM saMbhAvayan dhiyA |

tejaHpuMjanibhaM sarvaM hyakSarasya svarUpakam || 3-11 ||
tejaHpuMjAkSarANi ca sarvaM caikatra bhAvayet |
sarvaM lInaM hyakSare vai caitanyatritayaM zive || 3-12 ||

sarvaM caitanyajaM tejaH koTisUryasamaprabhAm |

tejaHpuMjAkSarANyeva ratnakUTasamUhavat || 3-13 ||

p. 28) saMbhAvya prajapenmaMtramiSTasiddhipradAyakam |

kAzmIrAkhyakramaH prokto gauDakramamataH zRNu || 3-14 ||

devatAgurumaMtrANAmaikyaM saMbhAvayan dhiyA |

sarvaM tejomayaM bhAvyaM jagatsthAvarajaMgamam || 3-15 ||

trayANAM devi caitanyaM tejaHpuMjanibhaM zive |

tejaHkUTamabhUdekaM meruparvatasaMnibham || 3-16 ||

tattejasi mahAdevIM sAyudhAM paricintayet |

dhyAnoktavidhinA dhyAtvA sarvarUpAM vibhAvayet || 3-17 ||

evaM bhAvayatastasya devatA varadA bhavet |

iyaM vai bhAvanA proktA kimanyacchrotumicchasi || 3-18 ||

zrIdevyuvAca |

sampradAyatrayeNaiva saMkalpo yastu sUcitaH |

sa ca vai kathyatAM deva yadyahaM tava vallabhA || 3-19 ||

zrIziva uvAca |

keralAkhye sampradAye saMkalpaM zRNu sAdaram |

prItyarthaM devatAyAstu saMkalpaH parikIrttitaH || 3-20 ||

devatAyA yadA prItirjAtA tatkSaNameva tu |

prasannatA bhavedAdau tataH prItiH pravartate || 3-21 ||

prItirjAtA yadA devi prasannatve na saMzayaH |

prItyarthe viniyogastu mukhyo'yaM parikIrttitaH || 3-22 ||

kAzmIrAkhye krame devi viniyogaM zRNu priye |

pratyakSadarzanArthaM hi devatAyA mahezvari || 3-23 ||

gauDakrame mahezAni sarvasidhyarthameva tu |

devatAyA yadA prItistadA sarvaM pravartate || 3-24 ||

pratyakSadarzanaM devi prItau lInaM hi vartate |

tathA vAkyAdisaMsiddhiH prItau lInA hi vartate || 3-25 ||
tasmAtprItirmukhyabhUtA prItyarthaM viniyogatA |
iti proktaM mahAdevi kimanyacchrotumicchasi || 3-26 ||

zrIdevyuvAca |

deveza zrotumicchAmi nityA paMcavidhA katham |

zrIziva uvAca |

zRNu devi pravakSyAmi kAlanityAsu nirNayam || 3-27 ||

p. 29) tithinityA bhavedAdau [dina] nityA taduttaram |

yuganityA tataH proktA kAlanityA matA tataH || 3-28 ||

tataH paryAyanityA syAdevaM paMcavidhA matA |

zuklakRSNakrameNaiva dvidhA nityArcanaM matam || 3-29 ||

Adau kAmezvarI zukle citrAdyA kRSNapakSake |

tithinityAM samabhyarcya dvAbhyAmAdyAM tataH priye || 3-30 ||

punarAdyantamAcarya dakSiNAmUrttisaMmatam |
Anandabhairavamate prathame dinanityakAm || 3-31 ||

zuklakRSNakrameNaiva tadante sakalAM yajet |

tithinityA tu kathitA [dina] nityApuraHsaram || 3-32 ||

yuganityA tu kathitA kAlanityA ca pUrvavat || 3-33 ||

paryAyanityA devezi kAlanityApuraHsaram |

kathyate zRNu devezi sAvadhAnamanAH zRNu || 3-34 ||

zUnyasargau samuddhRtya tataH kAmakalAM vadet |

haMsaH so'haM samuddhRtya paryyayaH kathyate zRNu || 3-35 ||

akArAdikSakArAntau u a i pallavAnvitaiH |
parasparAnvitairdevi dvitrikramagataiH zubhaiH || 3-36 ||

svarAdibhirathopAttaistaizca taizca svarAnvitaiH |

parasparaM pallavitairnAmapArAyaNAbhidhA || 3-37 ||

paryAyanityA kathitA kAlanityAnvitA zubhA |

paryAyasvajanirdevi kAlanityAprakAzataH || 3-38 ||

tattatpArAyaNaM nAma kIrttitaM devadurlabham |

kAlikAyAM mahezAni nityAparyAyanAmataH || 3-39 ||
kAlI paryAyanityA vai saMkSepeNa prakAzitA |
viMzatsAhastrakaM bhAgazataSaTtriMzadIritA || 3-40 ||

atretyaM kecidicchanti nAge saptazatIti ca |

akSarodayakaM yatte'nekameva prakIrttitam || 3-41 ||

SaSTipArAyaNaM nAma pUrvameva prakIrttitam |

nAmapArAyaNaM bhinnaM maMtrapArAyaNaM tathA || 3-42 ||

p. 30) maMtrapArAyaNaM nAma bhinnameva prakIrttitam |

akSarodayaH SASTatamastveka eva prakIrttitaH || 3-43 ||

kAlIpArAyaNaM nAma kIrttitaM tava suvrate |

sundaryo bhinnamevoktaM tacchRuNu tvaM mahezvari || 3-44 ||

A I pallavasaMyuktaiH parasparayutaiH zive |

dvitrikramAkSaraiH kAdyaiH kSAntavarNagataiH zive || 3-45 ||

svarAdibhiratha kSAntaistaizca taiH sasvaraiH zive |

nAmAni tripure te hi gaNitaiH saMbhavaMti hi || 3-46 ||

viMzatsAhasrakaM sASTazataM SaTtriMzadeva hi |

guhyAtiguhyaM kathitaM yanna kutra prakAzitam || 3-47 ||

akAraH prathamo vA hi AkAraH prathamo'ya vA |

akAraH prathamo devi hyAkArastadanantaram || 3-48 ||

virADrUpaM tu prathamaM tataH sAvayavA matA |

virADrUpaM kAlikAkhyaM sundaraM sundarImukham || 3-49 ||

tasmAdakAro mukhyo hi sa tu kAlIvidhau mataH |

kAdivarNaH kAlikAyAM hAdiH zrIsundarImate || 3-50 ||

varNasvarUpe tadrUpaM na madIyaM tu vidyate |

kAdirvirAT zUnyarUpaH kakAraH parikIrttitaH || 3-51 ||

hAdirhakAraH zrIvidyA citkalA kAmasundarI |

mahAkAmakalA vidyA hakAre tu virAjate || 3-52 ||

virATsvarUpaM sundaryA vidyAmAtre prakIrttitam |

tathApi kAlyAM devezi mukhyatvena vyavasthitam || 3-53 ||

nAmapArAyaNe devi tatsvarUpaM pradRzyate |

akAro bindusaMyukto akAraH sargasaMyutaH || 3-54 ||

aM a zcetyakSaradvandvamanuttarasvarUpakam |
anuttarA dvipaMcAzadvidyAkhyA parikIrttitA || 3-55 ||

evaM kAmakalA vidyA matabhedena darzitA |

IkAraH kevalo devi mahAkAmakalA matA || 3-56 ||

p. 31) ata eva kAmarAje kakAratve tu mukhyatA |

lopAyAM tu hakAro hi tvAkAratvena kIrttitaH || 3-57 ||

kRtvA harArddhaM devezi yo dhyAyet jagadambikAm |

maMtradvayena puTitaM sarvAbhinnatvabhAvanA || 3-58 ||

nAmapArAyaNaM proktaM kAlIvidyAvidhau zive |

ata eva tu samproktaM citsvarUpaM mahezvari || 3-59 ||

akAraH prathamo devi hyakArastu dvitIyakaH |

AkAro vyApakatvena sarvavyApaka IritaH || 3-60 ||

hakArA'rdhakalA devi IkAraH parikIrttitaH |

evaM militvA devezi mahArAjezvarI parA || 3-61 ||

mahArAjezvarIvidyApallavaH paramo mataH |

zrIvidyAyAM mahezAni proktaM saMkSepataH zive || 3-62 ||

virADuttarezvarI vidyA kAlikAyAM prakIrttitA |

akArastu kakAre'pi hakAre'pi prakIrttitaH || 3-63 ||

akAroccAraNaM devi na kAdau hAdisammatam |

ubhayoryatra cetkUTaM kUTArthe parikIrttitam || 3-64 ||

kUToccAraNakaM karma kalau kasya bhaviSyati |

tasmAduccAraNArthaM hi hyakAraH parikIrttitaH || 3-65 ||

kakArastvAdivarNo hi hakArazcaramo mataH |

atrArthe pratyayo devi varNoddhAre bhaviSyati || 3-66 ||

kahetyevaM mahAmantro yasya vAci pravatata |

sa dhanyaH sa ca vijJAnI sa hi vai devapUjitaH || 3-67 ||

praNAmaM kuryAttaM dRSTvA jJAnAtphalamavApnuyAt |

ajJAnAtphalanAzaH syAtkimanyacchrotumicchasi || 3-68 ||

zrIdevyuvAca |

SaSThIjapaprakAro'pi nAmapArAyaNaM tathA |

maMtrapArAyaNaM deva hyakSarodayakaM tathA || 3-69 ||
dIparekhAdivijJAnaM maMtrArNasyodayaM tathA |
kasyAdhikAro deveza kena kAryaM sa ko bhavet || 3-70 ||

p. 32) tanme vada mahAdeva yadyahaM tava vallabhA |

zrIziva uvAca |

pUrNAbhiSekI zuddhAnto gurUbhakto dRDhavrataH || 3-71 ||

anityakarmasantyAgI nityAnuSThAnatatparaH |
pAramparyakramAsaktaH SaTzAMbhavAntameva hi || 3-72 ||

sandhyAcatuSTaye devi hyadhikAro hi yasya vai |

AcAryatve mahAdevi adhikAro hi yasya vai || 3-73 ||

bhaviSyajJAnatraikAlyajJAnavijJAnadarzane |
bAlA paMcadazIkAdi SoDhAvidyA parA tataH || 3-74 ||

parAprAsAdanirvANau SaDanvayakramastataH |
evaM paramparAyukte nAmasaMjJAdisaMyute || 3-75 ||

tasyAdhikAro devezi nAmapArAyaNAdike |

SaSTIjapaM samArabhya nAmamantrAntike zive || 3-76 ||

evaM pArAyaNaM karma yaH karoti mahezvari |

sa ca kiM mAnuSo devi sa sAkSAcchiva eva hi || 3-77 ||

SaSThIpArAyaNaM nAma nAmapArAyaNaM tathA |

maMtrapArAyaNaM jJAnaM dIparekhAdikaM tathA || 3-78 ||

nAmadAnAdisaMketo nAlpasya karmaNaH phalam |

yena koTiyugaM devi sundarI samyagarcitA || 3-79 ||

aSTAdazasahasraM hi nyAsAnyena svadehake |

purazcaryAdisaMyuktairnyastA devezavanditA || 3-80 ||

tenedaM labhyate devi hyathavA nahi labhyate |

etattattvaM mahezAni kiMcijjAnAmi yatnataH || 3-81 ||

pUrNavettA mahAdevi sa sAkSAtkAlikAmbikA |

saiva vai sundarIrUpA tAruNyAmRtavigrahA || 3-82 ||

jAnAti sundarI devi sA tvameva mahezvari |

sarvaM gopayasi prAjJe mama bhAgyaM mahattaram || 3-83 ||

zrIdevyuvAca |
dhanyo'si ziva vizveza sarvapArapradarzaka |
zaktau zivaM vinA zambho sAmarasyaM na dRzyate || 3-84 ||

zrIziva uvAca |

bhedo nAsti mahAdevi yathA bIjAGkuro bhavet |

saivAhaM puMsvarUpeNa strIrUpeNAhameva hi || 3-85 ||

p. 33) AvAbhyAM na hi bhedo'sti bhedastvajJAnasambhavaH |

upadiSTo'smi devezi hyanuttaraguNArNave || 3-86 ||

tvatprAsAdAdidaM sarvaM na vai vismRtameva hi |

iti saMkSepataH proktaM kimanyacchrotumicchasi || 3-87 ||

zrIdevyuvAca |

pUrvaM saMsUcitaM nAtha svapnamantravivecanam |

na mahyaM kathitaM nAtha mama vA yogyatA na hi || 3-88 ||

sarvaM me kathyatAM deva yadyahaM tava vallabhA |

zrIziva uvAca |

etAvatkAlaparyantaM na kutrApi prakAzitam || 3-89 ||

tava prItyA mahezAni kathyate zRNu sAmpratam |

paJcAzadvai mahApadmA hyAgamagranthA IritAH || 3-90 ||

tatra mantrA mahAdevi sarveSu ca pratiSThitAH |

triMzannikharvaSaDvRndanavatyarbudakoTayaH || 3-91 ||

mantrAH proktA mahezAni hyAgamaM kutra kiM sthitam |

tat zRNu tvaM mahezAni yadyahaM tava vallabhaH || 3-92 ||

mahatpaMcAzatpadme tu SaTviMzati bhuvi sthitam |

caturdaza sthitaM svarge daza pAtAlagocaram || 3-93 ||

evaM krameNa devezi hyAgamaH kathito mayA |

svapnamaMtrA mahAdevi tridhA vai pariniSThitAH || 3-94 ||

pAtAle tu virATcakraM svarge tANDavacakrakam |

svarge cakradvayaM devi tripurAkhyaM dvitIyakam || 3-95 ||

Adau virAT tato devi zivatANDavameva ca |

tRtIyaM tripurAkhyaM tu svapnamaMtrAstridhA sthitAH || 3-96 ||
tatraiva tu hRdantA ye te virATcakragocarAH |
astrAntAstu mahezAni zivatANDavagocarAH || 3-97 ||

tripurAcakramadhyasthA vahnijAyAntikA matAH |

ete maMtrAH tvautsukyena bhuvi svapnena gocarAH || 3-98 ||

svapnamArgeNa devezi upadiSTAH zivena tu |

teSAM tu lakSaNaM devi zRNu yatnena sAmpratam || 3-99 ||

p. 34) pAtAlacakramaMtrANAM lakSaNaM zRNu sAmpratam |

aJjanaM guTikA guptizcAjJAsiddhistathaiva ca || 3-100 ||

zivAtANDavacakrasya lakSaNaM zRNu sAmpratam |

khadgavetAlasiddhizca parakAyapravezanam || 3-101 ||

carAcaragatitvaM ca hyaNimAdyaSTakaM tathA |

tripurAcakramaMtrANAM lakSaNaM zRNu pArvati || 3-102 ||

manorathasya cAklezastripurAcakramaNDale |
SaSTisiddhIzvaro bhUtvA bhuvi svarge ca bhUtale || 3-103 ||

trizaGkarasthA ye mantrAste ca kutra pratiSThitAH |

ardhanArIzacakre tu te ca tiSThanti pArvati || 3-104 ||

tridhA zaGkaratAM yAtAste vai parazivasya ca |

maNDale saMsthitA devi sundarIva tu lakSaNam || 3-105 ||

parAprAsAdamaMtro hi prAsAdaparayA'thavA |
yathA dvidhAtvamApannastatrApi ca mahezvari || 3-106 ||

AdyaM yattu bhaveddevi tadAdyazaGkaro mataH |

sa zaGkaraH parAvatsyAtkimanyacchrotumicchasi || 3-107 ||

zrIdevyuvAca |

svapnalabdhe mahAdevi RSicchandAdikaM katham |

RSicchandAdikaM yanna svapne proktaM mahezvara || 3-108 ||

tathA pIThAdikaM dhyAnaM yanna proktaM mahezvara |

yatra noktaM mahAdeva tatra kiM ca kathaM bhavet || 3-109 ||

zrIziva uvAca |

RSiH ziva iti prokto gAyatrIcchanda Iritam |

cidrUpA devatA devi kIlakAdyaM na vidyate || 3-110 ||
draviDAkhyaM mataM proktaM kAzmIraM zRNu yatnataH |
RSicchandAdyanukte tu RSirbrahmA mahezvari || 3-111 ||

gAyatrIcchaMda AdiSTaM ko vijAnAti pArvati |

svarAH zaktaya ityuktAstvavyaktaM kIlakaM matam || 3-112 ||

p. 35) pIThaM tu mAtRkApIThaM dhyAnAdi mAtRkoktavat |

gauDakrame mahezAni siddhamaMtratayA zive || 3-113 ||

na RSicchaMdasI devi na pUjAniyamaH zive |

japamAtreNa siddhiH syAnnAtra kAryA vicAraNA || 3-114 ||

na cakrazodhanAdIni siddhamantre mahezvari |

siddhamaMtre vikalpazcetsiddhatvaM tasya gacchati || 3-115 ||

na RNaM na dhanaM vApi japamAtreNa siddhidaH |

purazcaryAdikaM devi pUrvavatparikIrttitam || 3-116 ||

na SaDaGgaM mahezAni caitanyezI tu devatA |

prANapratiSThAdhyAnaM tu dhyAnamAtraM prakIrttitam || 3-117 ||

tejaHpuMjaM maMtravarNadhyAnaM sarvArthasiddhidam |

mUlamaMtraSaDAvRtyA SaDaGgaM nyAsamAcaret || 3-118 ||

padaM yatra bhaveddevi tena vA nyasanaM caret |

yatra proktaM SaDaGgAdyaM tatra vai tatsamAcaret || 3-119 ||

pIThe'nukte zaktipIThaM dhyAne'nukte tu mAtRkA |

pUrazcaryAdyanukte tu diksahasraM japet priye || 3-120 ||

dvAviMzAkSaraparyanta diksahasraM prakIrttitam |

taduttaraM mahAdevi gajAntakasahasrakam || 3-121 ||

svapnalabdhe sriyA datte hyantaraM tu kiyadbhavet |

saMskAre sAmyatA devi ghaTasaMskAramAtrake || 3-122 ||

siddhAricakraM devezi nAmamAtraM tu zodhayet |

RNacakraM vicintyAtha rudracakrANi saMnyaset || 3-123 ||

RNadhanAkhyacakraM hi sarvatra kIrttitaM mayA |

RNacakraM vihAyAtha dazArbudamitaM japet || 3-124 ||

na tasya siddhirdevezi devatAzApamApnuyAt |

svasya nAsti RNitvaM hi deve doSo hi dIyate || 3-125 ||
diSo na dadyAddeveSu cottamarNaM japetsadA |
RNimatraM samAzritya yo maMtrAnvividhAnjapet || 3-126 ||

iha siddhIzvaro bhUtvA pare zivasamo bhavet |

maMtre saMzodhyamAne tu RNaM hi dRzyate priye || 3-127 ||

zrIdevyuvAca |

siddhiH svAnubhavAdeva tatra kiM vartate prabho |

p. 36) zrIziva uvAca |

pUrvaM saMsAdhito maMtraH sa RNItyabhidhIyate || 3-128 ||

tadyugasthAnanAmnA tu sa RNI pariniSThitaH |

tatprabhAvAnmahezAni sa maMtraH siddhidAyakaH || 3-129 ||

svapnamadhye tu saMprAptazcamatkAro na vidyate |

zodhyamAne mahAcakre na RNI dRzyate sphuTam || 3-130 ||

sa maMtrastu dhanI devi ziSyebhyazcopadezayet |

zrIdevyuvAca |

pUrvaM proktaM tvayA deva svapnalabdhAdayaH prabho || 3-131 ||

svapnalabdhA striyA dattA mAlAmaMtrAdikAH priya |

siddhamaMtrA iti proktAstvanyathA pratipAditam || 3-132 ||

tatra me saMzayo jAtastanme vad mahezvara |

zrIziva uvAca |

satyametanmahezAni siddhatvaM vartate sphuTam || 3-133 ||

yatrAsti pratyayo devi sa siddhaH parikIrttitaH |

pratyayo nAsti devezi sa dhanI parikIrttitaH || 3-134 ||

siddhatvaM pratyaye devi na sarve siddhatAM gatAH |

pUrvasaMskAravazatastvanye mantrAH prakIrttitAH || 3-135 ||

pAraMparyeNa saMprAptAH saMskAravazataH zive |

tasmAdRNadhanaM zodhya maMtro japyaH zubhecchunA || 3-136 ||

pUrvanAmnA RNitvaM hi tathaiva vidyamAnatA |

IdRzastu mahezAni mahAbhAgyena labhyate || 3-137 ||
saMskAreNa tu samprAptastvadhunA RNatAM gataH |
so'pi vai tAdRzo devi na dhanI tAdRzo mataH || 3-138 ||

cakrapaMcakamadhye tu hyetadyojyaM mahezvari |

iti saMkSepataH proktaM sAdhanAntaM prakIrttitam || 3-139 ||

puMstrInapuMsakA devi phaT svAhA hRt kramAtsmRtAH |

iti saMkSepataH proktaM sAdhanaM kathyate zRNu || 3-140 ||

astramadhye tvastramaMtrAH vahnikAMtAntikAH striyAm |

namo'ntAH zivamantreSu hyantarbhUtA itIritAH || 3-141 ||

p. 37) keciddvimAtRkoktaM hi dhyAnamicchanti pArvati |

kecit nazyantu kAzmIrA dvidhA bhedaH prakIrttitaH || 3-142 ||

paMcAyatanayogena mantrArthena mahezvari |

pallavenAtha devezi hyantarbhUtA bhavanti hi || 3-143 ||

bhuvi sthitAstu ye mantrAH pallavaiH saMgatA yadi |

te hi svapneSu samprAptAsteSAM kutra prayojanA || 3-144 ||

kecittu kavace proktAH kecitstotre prakIrttitAH |

pradhAnavattu te sarva saMjapyAH paramezvari || 3-145 ||

pradhAnoktaM tu yatkarma tattatsarvatra kIrttitam |

tatrodAharaNaM devi nIlasArasvate smara || 3-146 ||

gurUpadiSTA devezi purazcaryA prakIrttitA |

tatra mArgakramo devi kathitaH pUrvavatpriye || 3-147 ||

kerale tu purazcaryA dazAGgA parikIrttitA |

aSTAGgA tu purazcaryA kAzmIre kathitA mayA || 3-148 ||

paMcAGgA tu purazcaryA gauDamArge prakIrttitA |

svapnalabdhe mahezAni aGge puraskriyA matA || 3-149 ||

japo homo brAhmaNAnAM bhojanaM tritayaM matam |

svapnalabdhe purazcaryA doSadvayanivAraNam || 3-150 ||

jAtasUtakamAdau syAttadante mRtasUtakam |

sUtakadvayasaMyuktaH sa mantro naiva sidhyati || 3-151 ||

zrIdevyuvAca |

jAtasUtakadoSasya vAraNaM kena vA bhavet |

tanme vada mahAdeva

zrIziva uvAca |

likhedaSTadalaM zubham || 3-152 ||

tanmadhye kalazaM sthApya tatra vai vaTapatrakam |

vaTapatre kuMkumena likhitvA maMtrameva tu || 3-153 ||

kalazaM purataH sthApya guroH prANAnnivezayet |

guroH sakAzAdgrahaNaM jAtasUtakavAraNam || 3-124 ||

zrIdevyuvAca |

mRtasUtakadoSo hi kIdRzaH paramezvara |

zrIziva uvAca |

vinA puraskriyAM devi maMtro mRta itIritaH || 3-155 ||

p. 38) jIvahIno yathA dehaH sarvakarmasu na kSamaH |

purazcaraNahIno hi tathA mantraH prakIrttitaH || 3-156 ||

tasmAtkuryAtpurazcaryAM mRtadoSaprazAntaye |
yo mantrazcetanAyuktaH sa mantraH siddhidAyakaH || 3-157 ||

caitanyaM tu purazcaryA caitanyaM gurureva ca |

yaMtracaitanyakaM devi maMtracaitanyakaM tathA || 3-158 ||

gurucaitanyakaM caiva caitanyatritayaM matam |

caitanyatrayahIno yaH sa maMtraH siddhido na hi || 3-159 ||

svapnalabdho dhanI cetsyAttadA kiM vA vidhIyatAm |

mantrAnusArato devi purazcaryAM samAcaret || 3-160 ||

tattaccakrAnusAreNa homakarma samAcaret |

anuktahomadravye tu tilairhomaH prakIrttitaH || 3-161 ||

ghRtena kathito devi yavenApi tathaiva hi |

kevalaM ghRtahomena varadAH sarvazaktayaH || 3-162 ||

evaM puraskriyAM kRtvA siddhatvaM pravicArya ca |

maNDalAMtaM parIkSyA'tha hyathavA tvayanAntakam || 3-163 ||

vatsarAntaM cAvalokya sahasraM pratyahaM japet |

camatkAro na jAyeta tadA ziSyo vadedgurum || 3-164 ||

RNAdikaM vicAryA'tha ziSyAya pravadecchive |

anyathA vikalo bhUyAcchiSyapAM gurau bhavet || 3-165 ||

tyAgaM na kuryAddevezi mantratyAge daridratA |

iti saMkSepataH proktaM kimanyacchrotumicchasi || 3-166 ||

zrIdevyuvAca |

bhulokastho mahAmantraH svapnamadhye samAgataH |

tatra kiM vA prakartavyaM kiM tatra maNDalaM bhavet || 3-167 ||

zrIziva uvAca |

pUrvaM saMsAdhito mantro dattaH kenApyasAdhitaH |

sa RNI vA dhanI vA'pi vicArya sAdhayetpriye || 3-168 ||

tattatkalpoktarItyA tu purazcaraNamAcaret |
pAramparya vihInatvAtpUrvasaMsAdhanAtpriye || 3-169 ||

svapnadvArA tu samprAptastaM mantra sAdhayetpriye |

arimantraH svapnamadhye prAptazcetkiM vidhIyatAm || 3-170 ||

p. 39) pallavaM yojayedvApi tyAjyo vA yatnataH zive |

pallavaiH saMyuto yo hi mantrAntaramupAgataH || 3-171 ||

mUlaprakRtivaddevi sarvaM proktaM mayA tava |

astraprakaraNAddevi hyastramadhye prayojanA || 3-172 ||

maMtraprakaraNAddevi mantramadhye niyojayet |

mUlaprastAramArgeNa darzanAdikrameNa tu || 3-173 ||

SaDAmnAyakrameNaiva prastAradvArataH zive |

maMtramAtre tathA vidyAmAtre prastArasAdhanA || 3-174 ||

pUrvameva mayA proktA saMkhyAM zRNu mahezvari |

mantravidyAdibhedaistu AmnAyadarzanAdikaiH || 3-175 ||

pAre parArddhasaMkhyAtA maMtrA jAtA mahezvari |

kalau prastArahInatvAdaGgA eva prakIrttitAH || 3-176 ||

prastArarUpaM yajjJAnaM guhyAdguhyataraM zive |

AdinAtho vijAnAti nAhaM jAnAmi pArvati || 3-177 ||

zrImahAsundarI vidyA kAlI kAmakalA tu sA |

AdinAthaparazivau bIjAGkurasamAnakau || 3-178 ||

tathA kAmakalA kAlI zrImahAsundarI priye |

sarvaM saMkSepataH proktaM rahasyaM zRNu pArvati || 3-179 ||

strIlabdhe devadevezi zrImaddevIparaMparA |

svapnalabdhe mahAdevi dakSamUrttiparaMparA || 3-180 ||

pUjayeddakSiNAmUrttiM gurutvena mahezvari |

catuSkaM pUjayedAdau kimanyacchrotumicchasi || 3-181 ||

SaDAmnAyasya maMtrANAM prastAragaNanA zive |

SaDAmnAyasya prastArAstrizadvRndanikharvakAH || 3-182 ||

paMcArbudeti maMtrAH syuH pUrvAmnAye mahezvari |

dakSAmnAye mahezAni navatyarbudakoTikam || 3-183 ||

paMcakharveNa saMyuktA maMtrAH proktA mahezvari |

AmnAye pazcime devi triMzadarbudapadmakAH || 3-184 ||

maMtrAH proktA mahezAni cottaraM zRNu sAdaram |

paMcAzadvai mahApadma SaDarbudatrivRMdakam || 3-185 ||

p. 40) UrdhvAmnAye mahAdevi prastAragaNanAM zRNu |

aSTArbudaM koTivRndaM paMcazaGkheti kIrttitAH || 3-186 ||

pAtAlAmnAyagaNanAM zRNu yatnena sAmpratam |

koTyarbudaM trinavati vRMdaM padmena saMyutAH || 3-187 ||

maMtrAH pAtAlaprasAtaramadhyasthAH paramezvari |

SaDAmnAyasya prastArAH proktA yatnena zAGkari || 3-188 ||

na prakAzyA yatra kutra gaNanAmAtragocarAH |

gaNitaM yo hi jAnAti zivasiddhAntagaM zive || 3-189 ||

aSTAviMzatisiddhAnte yasya jJAnaM bhavet priye |

zrIsiddhAntamate devi prastArajJAnameva hi || 3-190 ||

prastArajJo mahezAni kalau durlabha eva hi |

gaNanA kathitA devi prakAraH kathyate zRNu || 3-191 ||

etatprastAravijJAnI zivarUpo na saMzayaH |

prastArajJasya mukhato yadyanniryAti tatpriye || 3-192 ||

zivavAkyasamaM tattat kimuta phalakatthanam |

iti saMkSepataH proktaM prastAraH kathyate paraH || 3-192 ||
zrIdevyuvAca |

saMsUcitaM tu yatpUrvaM kathyatAmapi sAmpratam |

mantre vRttaM mahAdeva kathaM dhyAyeddhi tadvada || 3-193 ||

homatarpaNakAryANi kathaM kAryANi tadvada |

zrIziva uvAca |

dalamUlaM tu yadvRttaM tadAdhArasthamIritam || 3-195 ||

daloparisthaM vRttaM hi zRNu tvaM prANavallabhe |

candrasUryAgnibhamayaM vyatyayena prakIrttitam || 3-196 ||

ete prasiddhA devezi na hi candrAH prakIrttitAH |

devyAH koTyarbudakalA sadodeti hi yatra vai || 3-197 ||

sa candraH sa ca sUryazca sognirmukhya itIritaH |

SaDanvaye mahezAni te ca proktA mayA tava || 3-198 ||

trirUpaM vRttatritayaM tejorUpaM mahezvari |

virATsvarUpaM yatproktaM tadeva pariniSThitam || 3-199 ||

p. 41) anyatra smaraNIyaM hi savRttidhyA na karmaNi |

tejaH puMjanibhA devi parikhAM saMsmaretsadA || 3-200 ||

uttarottarato devi saguNadhyAnakarmaNi |

uttarottaratoccatve cintyamAne mahezvari || 3-201 ||

sAmmukhyaM caiva sarveSAM vartate priyavAdini |

yathoccanIcasthAneSu sarvA AvRttayo matAH || 3-202 ||

iti kAraNato mukhyo meruprastAra IritaH |

kailAsAkhyastathA devi prastAraH parikIrttitaH || 3-203 ||

ratnagarbhAkhyaprastArastRtIyaH parikIrttitaH |
AdyaprastAre devezi sarveSAM darzanaM samam || 3-204 ||

kailAsAkhye mahezAni keSAMcidaMtarAyitAH |

ratnagarbhAkhyaprastAre mukhyA matAH prakIrttitAH || 3-205 ||

AvRttayastu devezi tridhA bhedatvamAgatAH |

nocettridhAtvaM kimarthaM vizvarUpatvameva tu || 3-206 ||

sarvatra kIrttitaM pUrvaM satyameva mahezvari |

adhikAravazAddevi tattatsthAnasamAzrayaH || 3-207 ||

homakarma zRNu prAjJe pUrvapraznottaraM tava |

home svAhAM prayuJjIta hRnmantrastarpaNe mataH || 3-208 ||

tathAbhiSeke devezi hRnmantraH parikIrttitaH |

home'gnijAyA yA proktA sA home pariniSThitA || 3-209 ||

maMtramadhye yadA vahnijAyA dve vartate prabho |

maMtrAMte caiva hRnmaMtrAstathA vahni priyA vibho || 3-210 ||

maMtreNaiva tu nirvAho dvitIyA kiM prayojyatAm |

maMtrAMte yA vahnijAyA sA tu maMtrasvarUpiNI || 3-211 ||

homAGgatve dvitIyA tu kIrttitA vai mayA tava |

tathaiva tarpaNe viddhi hRnmaMtrastu dvitIyakaH || 3-212 ||

evaM na kurute yastu sa hInAyurbhavecchive |

homakarma tu kAryaM syAnmaMtre siddhe phalaM bhavet || 3-213 ||

saivAgnijAyA ceddhome gRhyate prANavallabhe |

svasya prabhutvamAyAti maMtrAH klinnA bhavetpriye || 3-214 ||

p. 42) klinnadoSanivRtyarthaM home svAhA mayeritA |

svAnandopanivRtyarthaM hRnmantrastarpaNe mataH || 3-215 ||

mantrakSobhe mahezAni huMphaDAdi tu vartate |

tathApi pallavatvena punardeyaM mahezvari || 3-216 ||

hRnmaMtreNa puTIkAre kriyamANe mahezvari |

maMtrakSobhanivRttistu sarvathA jAyate zive || 3-217 ||

maMtramadhye natirdevi vartate yadyapi priye |

tathApi saMpuTatvena punardeyA mahezvari || 3-218 ||

hRdayAdi SaDastrANAM purazcaryocyate zRNu |

iti saMkSepataH proktaM kimanyacchrotumicchasi || 3-219 ||

zrIdevyuvAca |

deveza zrotumicchAmi rahasyaM bhAvanAkrame |

zrIziva uvAca |

svAhAntaH sarvakAryArthaM phaDaMtaH krUrakarmaNi || 3-220 ||

namo'nto mAraNAdau tu maMtrajAteH phalaM smRtam |
zaktau strISu ca maMtreSu rudrAkSaM varjayecchive || 3-221 ||

atha vakSyAmi devezi caturNAmaikyabhAvanAm |

gurudaivatamaMtrANAM svAbhinnatvena bhAvanA || 3-222 ||

gurutejaHsvarUpaM hi kUTamekaM vibhAvayet |

devacaitanyakUTaM hi tejorUpaM vibhAvayet || 3-223 ||

maMtrAkSarANAM caitanyaM jvalatparvatasannibham |

svAtmacaitanyakUTaM hi tathaiva merutulyakam || 3-224 ||

ekIbhUtaM catustejo brahmANDavyApakaM zive |

koTikAlAnalaprakhyaM yamasUryasamaprabham || 3-225 ||

candrArbudasamaM devi virADrUpaM vibhAvayet |

tejaHpuMjaH vibhAvyAtha tatra mUrtiM prakalpayet || 3-226 ||

tatreSTadevatAM ramyAM koTikandarpasannibhAm |

dhyAnoktAM tAM tu sandhyAtvA japaM kuryAt samAhitaH || 3-227 ||

athavA sakalaM dhyAyettejaHpuMjanibhaM zive |

ekIbhUtaM ca tattejaH sadA dhyAyenmahezvari || 3-228 ||

athAMtarmAtRkAM vakSye pAraMparyakramAgatAm |

SaDdalAnAM svarUpaM tu pUrvameva prakIrttitam || 3-229 ||

p. 43) varNoccArAdikaM sarvaM proktaM tubhyaM mayA zive |

nyasanasya kramaM devi vilAsasampradAyake || 3-230 ||

kathyate zRNu devezi rahasyAtirahasyakam |

brahmANDAtkITaparyantaM zivazaktimayaM dhruvam || 3-231 ||

zivazaktimaye mArge parAprAsAdagocare |

zrIprAsAdaparApi syAddhiMdusargAnvitApi sA || 3-232 ||

hasaMzaktimanuyutaM bindunAdAnvitaM zive |

zrIprAsAdaparAmantraH kIrttitaH paramezvari || 3-233 ||

hAdyamAdau samuddhRtya madhyerNaM bindusaMyutam |

sAdyamaMte samuccArya nyasanIyaM krameNa tu || 3-234 ||

pratyarNaM vinyaseddevi yogaM bAhyamupAcaret |

sAdyaM hAdyaM sAdyahAdye varNAdau tu samuccaret || 3-235 ||

tato varNaM samuccArya nyasanIyaM mahezvari |

hAdyena kevalenaiva saMpuTIkRtya maMtravit || 3-236 ||

sAdyena kevalenaiva sampUTIkRtya maMtravit |

sAdyayogaM tato varNaM nyaseddevi yathAkramAt || 3-237 ||

hAdyayogaM tato varNaM nyaseddevi yathAkramAt |

zrIbIjaM tu samuddhRtya zrIprAsAdaparA tataH || 3-238 ||

punaH zrIbIjamuddhRtya tatorNaM tu samuccaret |

anena sampuTIkRtya nyasettattatsthale zive || 3-239 ||

zrI/ srA/ tataH zrI/ vai varNaM tataH zrI/ tu samuddharet |

punaH zrIbIjamuddhRtya hasau/ zrI/ tu samuccaret || 3-240 ||

evaM saMpuTayogena nyasanIyaM mahezvari |

zrIbIjapuTitaM hAdyaM tato varNaM samuccaret || 3-241 ||

Adau bIjaM tato varNaM vyasettattatsthale priye |

zrIbIjaM tu tataH sAdyaM punaH zrIbIjamuccaret || 3-242 ||

anena saMpuTIkRtya nyasedyatnena zAmbhavi |

zrIbIjapuTitaM sAdyaM tato varNaM samuccaret || 3-243 ||

anena kramayogena sundarI suprasIdati |

sAdyaM zrIbIjapuTitaM tato varNaM mahezvari || 3-244 ||

hAdyaM zrIbIjapuTitaM varNAnte tu samuccaret |

evaM vinyasya yatnena sAkSAtsiddhIzvaro bhavet || 3-245 ||

p. 44) zrIbIjapuTitaM hAdyaM sAdyaM zrIpuTitaM tathA |

tato varNaM mahezAni pUrvabIjAni coccaret || 3-246 ||

evaM hi sampuTIkRtya sadyogaM samupAcaret |

sAdyaM zrIbIjapuTitaM hAdyaM zrIpuTitaM tataH || 3-247 ||

tato varNaM punarbIjaM nyasetsAdhakasattamaH |

yogaM kRtvA'thavA devi nyasanIyaM mahezvari || 3-248 ||

zrIbIjapuTitaM hAdyaM sAdyaM ca tatpuTIkRtam |

varNaM tatpuTitaM kRtvA yogaM ca samupAcaret || 3-249 ||

sAdyaM zrIbIjapuTitaM hAdyaM ca tatpuTIkRtam |

etastu puTitaM varNaM yogaM ca samupAcaret || 3-250 ||

hAdyaM zrIpuTitaM devi sAdyaM zrIpuTitaM tathA |

punarhAdyaM zrIpuTitaM tato varNaM samuccaret || 3-251 ||
etaistu sampuTIkRtya punaryogaM samAcaret |
sAdyaM zrIpuTitaM devi hAdyaM zrIpuTitaM tathA || 3-252 ||

punaH sAdyaM zrIpuTitaM tato varNaM tu pUrvavat |

hAdyaM zrIpuTitaM devi sAdyaM zrIyogayuktakam || 3-253 ||

punarhAdyaM zrIpuTitaM varNaM taistu puTIkRtam |

Adau yogaM ca vA kRtA tataH sAdyaM tu hAdyavat || 3-254 ||

hAdyaM zrIpuTitaM devi sAdyaM zrIpuTitaM tathA |

punarhAdyaM zrIpuTitaM hasauntaistu puTIkRtam || 3-255 ||

yogaM kRtvAthavA devi hasau zrIpuTitaM ca vA |

etaistu puTitaM varNaM hasau zrIpuTitaM ca vA || 3-256 ||

zrIhasaumitimadhye vA hasau zrImiti vA zive |

hAdyaM zrIpuTitaM devi sAdyaM zrIpuTitaM tathA || 3-257 ||

punarhAdyaM zrIpuTitaM hasauntaistu puTIkRtam |

yogam kRtvAthavA devi shauM zrIpuTitaM ca vA || 3-258 ||

etaistu puTitaM varNaM yogaM vA pUrvavacchive |

sAdyaM zrIpuTitaM devi hAdyaM zrIpuTitaM tathA || 3-259 ||

punaH sAdyaM zrIpuTitaM shauntaistu puTIkRtam |

etaistu puTitaM varNaM shauM zrIpuTitaM ca vA || 3-260 ||

p. 45) zrI/ shaumiti vA madhye shauM zrImiti vA priye |

bindusargAnvitaM kRtvA nyasanIyaM mahezvari || 3-261 ||

hAdyaM sAdyaM mahezAni zrIyutaM puTitaM ca vA |

pUrvoktaiH puTitaM hyetat yuktaM vA paramezvari || 3-262 ||

uttarottarayogena puTitaM saMyutaM ca vA |

hAdyasAdyakrameNaiva pArAyaNakramaM viduH || 3-263 ||

pArAyaNakramAH sarvAH proktAH pUrvaM mayA sive |

ayaM kramo mahezAni devAnAmapi durlabhaH || 3-264 ||

nAkhyeyo yatra kutrApi tvanyathA tvanyathA zApamApnuyAt |

anantapAdukAkhyo'yaM kramaH prokto mayA zive || 3-265 ||

anyapArAyaNairdevi sUkSmakAlena jAyate |

evaM SaTcakrabhedeSu pArAyaNamudIritam || 3-266 ||
medhAdIkSA yasya bhavettasyAtraivAdhikAritA |
medhAdIkSAM vinA devi cakrapArAyaNaM caret || 3-267 ||

sa ca mRtyumavApnoti rauravaM narakaM vrajet |

parakAyapravezAdi yasya haste virAjate || 3-268 ||

tasya medhAdIkSaNaM hi gaditaM tu mayA zive |

mayA pUrvaM mahezAni SaDvAraM tu kRtaM ca vai || 3-269 ||

ahaM kicittu jAnAmi tavAgre tu prakAzitam |

pUrNa jAnAti devezi sundarI paradevatA || 3-270 ||

nAnyo jAnAti devezi saMkSepAdgaditaM mayA |

pUrNAbhiSekayukto hi nAmapArAyaNaM tathA || 3-271 ||

maMtrapArAyaNaM devi nADIpArAyaNAdikam |

medhAdikSAsamAyuktazcakrapArAyaNaM caret || 3-272 ||

alpAyuSyAdadharmatvAtpAruSyajalpanAt zive |
kalau devezi nAnyeSAmadhikAro mayeritaH || 3-273 ||

bAlAdhikArI yA devi tasya vidyAdhikAritA |

vidyAdhikAre sampanne SoDazyAmadhikAravAn || 3-274 ||

SoDhAvidyAdi sampannaH parAvidyAdhikAravAn |

parAdhikArasaMyuktaH parAprAsAdavAn bhavet || 3-275 ||

p. 46) zrIprAsAdaparAyukto nirvANAdhipatirbhavet |

nirvANadIkSAsaMyuktaH SaDanvayavidhau zive || 3-276 ||

adhikArI bhavet so hi tattvaM zRNu mahezvari |

SaDanvayasamAyukto medhAdIkSAdhikAravAn || 3-277 ||

SaDanvayAntagaM kRtvA medhAdIkSaNamAcaret |

medhAdIkSaNayuktazcet cakrapArAyaNaM caret || 3-278 ||

cakrapArAyaNe saMkhyA sundarIcaraNAntakI |

bahiH pArAyaNe saMkhyA gaditA tRtaye'pi ca || 3-279 ||

tathaiva kAlikAyAstu proktA zrIcaraNAntakI |

yadaiva darzanaM jAtaM tadaiva tu samApanam || 3-280 ||

bahirantarayorbhedastvetAvadvartate zive |
prastAraSoDazAntaM hi kalau pArAyaNaM caret || 3-281 ||

atra pArAyaNaM nAma nyasanaM paramezvari |

haThAttairapazuryastu karoti paramezvari || 3-282 ||

tasya nAzo bhaveddevi devatAzApamApnuyAt |

medhAdikSAsamAyuktaH SoDazottaragaM caret || 3-283 ||

prastArakramayogena jJAtavyaM paramezvari |

bAladIkSAsamAyuktazcandraprastArayuk nyaset || 3-284 ||

vidyAdIkSAsamAyuktaH sAdhanAdyantagaM nyaset |

sampradAyakrameNaiva vinyasetsAdhakottamaH || 3-285 ||

pUrNAbhiSekayukto hi bahniprastArasampuTAn |
parAdIkSaNayukto hi bhUtaprastArasampuTAn || 3-286 ||

zrIprAsAdaparAyukto muniprastArasampuTAn |
nirvANadIkSAsaMyukto nandaprastArasampuTAn || 3-287 ||

SaDanvayasamAyuktaH kalAprastArasampuTAn |
yogaM tvatha prakurvIta hyAdAvante'pi pArvati || 3-288 ||

madhye varNaM tu kRtvA ca varNasampuTitaM nyaset |

pUrNAbhiSekayukto hi SaDanvayasamaH zive || 3-289 ||

SaDanvayAnAM yatkarmaM tadetasyApi kIrttitam |

SaDanvayottaraM devi medhAdIkSAM samAcaret || 3-290 ||

p. 47) medhAdIkSaNasaMyuktaH prastAraSoDazottaram |

nyAsayogena devezi cakrapArAyaNaM caret || 3-291 ||

AkarSaNaM trilokAnAM vazyAjJAsiddhireva ca |

parakAyapravezazca guTikAsiddhireva ca || 3-292 ||

vAyustambhastu vetAlasiddhistaddhastagocarAH |
iti saMkSepataH proktaM kimanyacchrotumicchasi || 3-293 ||

zrIdevyuvAca |

deva deva mahAdeva saMsArasthitikAraka |

pUrvaM saMsUcitaM yanme tanme kathaya zaMkara || 3-294 ||

kimetAvanmahAdeva mamApi gopitaM ca yat |

zrIziva uvAca |

mahAdevi parArAdhye sarvakAraNavigrahe || 3-295 ||

prANAyAmarahasyaM hi kathyate zRNu sAmpratam |
prANAyAmaH paJcadhA syAttatkramaM zRNu yatnataH || 3-296 ||

kalAbhiH pUrakaM kuryAnmahatIbhizca kumbhakam |

recakaM ca tadardhAbhiH punaretattrayaM caret || 3-297 ||

trivAraM tritayaM kuryAtprANAyAmaH prakIrttitaH |

kramotkrameNa devezi dvitIyaH parikIrttitaH || 3-298 ||

kumbhakAnto mahezAni yatInAM vAmacAriNAm |

recakaM vA pUrakaM vA kRtvA dvividha IritaH || 3-299 ||

avAntarAkhyabhedo hi kathitaste mayA tava |

tRtIyastu mahezAni kathyate "qRNu sAmpratam || 3-300 ||

kalAvRddhiM tadarddhaM ca kRtvAdau paramezvari |

anyadAdi samArabhya krameNAnena kArayet || 3-301 ||

pUrvavattu tRtIyaM syAdevaM vAratrayaM caret |

kumbhakAdyaM taddvayAnte prANAyAmadvayaM bhavet || 3-302 ||

pUrvoktakramayogena tadanyaH parikIrttitaH |

dvitIyAkhyakrameNaiva dvitIyaH parikIrttitaH || 3-303 ||

tRtIyAkhyakrameNaiva tRtIyaH pariniSThitaH |

mAlAzRGkhalikAyogAt tRtIyaH parikIrttitaH || 3-304 ||

p. 48) mAlAzRGkhalikAyoganiruktiM zRNu sAdaram |

AdyAdantaM careddevi hyantAdAdyaM samAcaret || 3-305 ||

punarAdyaM tathAntaM ca prANAyAmaH kalApatiH |

atra pUrvatrayaM kRtvA prastAraH parikIrttitaH || 3-306 ||

punarantaM tathAdyaM ca yAvat tRtayakaM bhavet |

kalAzRGkhalikAkhyastu prANAyAmaH prakIrttitaH || 3-307 ||

kalAvasurvedasaMkhyaprANAyAmastathAparaH |
mahAmantravidhau devi kIrttitaste mayA tava || 3-308 ||

aSTau vedadvitayakaM tato'dhikye prakIrttitAH |

tato'dhikye mahezAni vedanetrazazikramAt || 3-309 ||

prastArAH kathitA devi zRNu varNakrameNa tu |

kumbhakAdyaM samArabhya dvividho'yaM prakIrttitaH || 3-310 ||

pUrvoktavahnibhedena bhedabAhulyamIritam |
kalAzRMkhalikAyogAtprastAraH pUrvasUcitAH || 3-311 ||

varNakramo mahezAni kathyate zRNu sAmpratam |

svaraiH pUrakamAcarya varNaiH kumbhakakaM bhavet || 3-312 ||

AdyA tu nAsikA proktA catustriMzatikaM punaH |

kRtvA tu kuMbhakaM devi dvirAvRtyA svaraiH zive || 3-313 ||

recakaM kArayeddevi prANAyAmatrayaM zive |

pUrvoktakramayogena prastArakrama IritaH || 3-314 ||

kevalena svareNaiva kalASaTvedasaMyutam |

atra pUrvoktayogena prastArabhedabhAjanam || 3-315 ||

IDayA karSayedvAyurbAhyaSoDaSamAtrayA |
dhArayetpUrakaM yogI catuHSaSTyA tu mAtrayA || 3-316 ||

suSumNAmadhyagaM samyak dvAtriMzanmAtrayA zanaiH |

nADyA piGgalayA cainaM recayedyogavittamaH || 3-317 ||

prANAyAmamimaM prAhuryAgazAstravizAradAH |
bhUyobhUyaH kramAttasya vyatyAsena samAcaret || 3-318 ||

mAtrAvRddhikrameNaiva samyak dvAdaza SoDaza |

japadhyAnAdibhiryuktaM sagarbhaM taM vidurbudhAH || 3-319 ||

p. 49) tadapetaM vigarbhaM tu prANAyAmaM pare viduH |

kramAdabhyasatAM puMsAM dehe svedabhramodgamaH || 3-320 ||

agarbhaM tu mahezAni etadanyaM zRNu priye |

madhyamaH kampasayuMkto bhUmityAgoH'paro mataH || 3-321 ||

madhyamastu sasandhiH syAtparaH sAdhyAkhyako bhavet |

paMcadhA kathito devi prANAyAmakramo mayA || 3-322 ||

prANAyAmajapAsaktaH siddhayogIzvaro bhavet |

prANAyAmajapenaiva kinna sidhyati bhUtale || 3-323 ||

palanADImuhUrtAkhyaH taddvayaM praharakramAt |

divAhorAtrayogena sAdhayet sthiramAnasaH || 3-324 ||

evaM sAdhayataH puMso yogAH sarve'pi hastagAH |

prANAyAmajapo devi mukhyatvena prakIrttitaH || 3-325 ||

tadabhAve mahezAni prANAyAmaM ca vA caret |

bhUtazuddhividhau yojyaH zoSaNAdividhau zive ||
prANAyAmakrameNaiva triH sakRdvA samAcaret |
naMdasaMkhyA yadA bhUyAtprANAyAmastadA caret ||

keralAkhyakrame devi na ca zoSaNamIritam |

kAzmIrAkhyakrame devi zoSaNAdi samAcaret ||

gauDaH kAzmIratulyaH syAccaitanyastu caturthakaH |

prANAyAmakramo devi bhUtazuddhikramo'pi ca ||

yathAyogaM yojanIyaM kimanyacchrotumicchasi |

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde prANAyAmajapo nAma tRtIyaH paTalaH
|| 3 ||

caturthaH paTalaH |

zrIdevyuvAca |

pUrvaM saMsUcitaM yanme maMtraprastAranirNayam |

tanme kathaya deveza yadyahaM tava vallabhA || 4-1 ||

zrIziva uvAca |

gopyAdgopyataraM devi svayoniriva pArvati |

tarhi tatte vadAmyatra na vaktavyaM tvayA zive || 4-2 ||

catvAri zivacakrANi zakticakrANi paMca ca |

sAmarasyAdbhaveccakraM zrIcakraM sarvarUpakam || 4-3 ||

bindormanvasnaparyantaM zakticakraM prakIrttitam |

taduttaraM mahezAni dvArAntaM zivacakrakam || 4-4 ||

zuddhacakramidaM proktamidameva tridhA bhavet |

bhUH kailAsastathA meruprastAratvena pArvati || 4-5 ||

bhUprastAro dvidhA devi pAtAlordhvakrameNa tu |

kailAsAkhyastu prastAro dvividhaH parikIrttitaH || 4-6 ||

arddhakailAsasaMjJastu pUrNakailAsakastathA |
tathaiva meruprastAraH kIrttitastu mayA tava || 4-7 ||

sRSTisthityupasaMhArakramAdaSTAdazaiva tu |
sRSTisthityupasaMhArabIjalekhakrameNa tu || 4-8 ||

RtvagnisaMkhyAH prastArAstvaMkAnAM vAmato gatiH |

nityAyAzcaiva tAdAtmyaM prastAre merusaMjJake || 4-9 ||

mAtRkAyAzca tAdAtmyaM kailAsAkhyaM prakIrttitam |

vAgdevatAyAstAdAtmyaM bhUprastAre prakIrttitam || 4-10 ||

imaM yantraM tu SoDazyAM kIrttitaM tu mayA tava |

zuddhamaSTAdazAkhyaM hi mAtRkAlekhanakramAt || 4-11 ||

sRSTisthityupasaMhAre bANavedaviparyayaH |
athavA tu dalAkAraM siddhaM yaMtraM tu kArayet || 4-12 ||

prastAraiH pUrvasaMproktaiH sRSTisthitilayAdikaiH |

evaM yaMtraM tu niHzaptaM kIrttitaM tu mayA tava || 4-13 ||

nava saMkhyAvidhairbhedairlalitAyAM mahezvari |

prastArA bahavo devi jAyante tAnahaM bruve || 4-14 ||

p. 51) kAdihAdimatenaiva dvidhAtvaM parikIrttitam |

SaDbhedAH kAdiSaTke tu kAmarAjAdike'pi SaT || 4-15 ||

etadvibodhanaM devi kathyate zRNu satvaram |

caturdazAraM devezi kAmarAje tu bhidyate || 4-16 ||

lopAdiSaTke zuddhe'nye dvitIyaM paribhidyate |

kAdiSaTke tu hAdye ca dazAre bhedabhAjanam || 4-17 ||

lopAdiSaTke netrAkhye dazAre bhedabhAjanam |

evaM militvA devezi prastArA dvAdazeritAH || 4-18 ||

pratyekaM tu mahezAni pUrvaprastArabhedataH |

sRSTisthityupasaMhAralekhanakramataH zive || 4-19 ||

sRSTistityupasaMhArakramayogena pArvati |
dalAkArakrameNaiva pratyekaM bhedabhAjanam || 4-20 ||

ekaikapatre devezi zatamaSTottaraM zive |

trayodazaprabhedaistu prastAraH parikIrttitaH || 4-21 ||

candracandraSaDaGkaM ca muni RtvaGkasaMkhyakam ||

yantrANi coddhRtAnyatra prastArakramayogataH || 4-22 ||

rahasyAtirahasyaM hi tava snehAdihoditam |

yasya smaraNamAtreNa sAkSAdrudro bhaviSyati || 4-23 ||
tvayA saMkathitA devi prastArAH pUrvasUcitaH |
te sarve kathitA devi gopanIyaM svayonivat || 4-24 ||

etadajJAnato devi hyathavA jJAnamohitaH |

yatra kutra vaseddevi yatra kutra prapUjakaH || 4-25 ||

sa daridraH prabhavati nAtra kAryA vicAraNA |

zrIvidyopAsako yo hi devendra iva cAparaH || 4-26 ||

devendrasya mahezAni siddhalakSmIH prakIrttitA |

zrIvidyopAsakasyAtha lakSmInAma zRNu priye || 4-27 ||

sarvasaMbhogasAmrAjyalakSmIH tasya gRhe sthitA |

sa daridraH kathaM devi zrImadbrahmANDanAyakaH || 4-28 ||

p. 52) etadajJAnato devi jJAnato'pi mahezvari |

daridratvaM mahezAni bhavatyeva na saMzayaH || 4-29 ||

sa dAridryamavApnoti nAtra kAryA vicAraNA |

jJAtvA'pi devadevezi yatra kutra vaded yadi || 4-30 ||

sa dAridryamavApyAnte rauravaM narakaM vrajet |

pUrNAbhiSeke na bruvannAmapArAyaNakrame || 4-31 ||

maMtrapArAyaNe devi cakrapArAyaNe tathA |

medhAdIkSAntagA dIkSA yasya haste virAjate || 4-32 ||

tasyAdhikAro devezi yaMtraprastAranirNaye |

adhikAro na cAnyasya yaH kuryAtsa tu nArakI || 4-33 ||

dAridryAnmriyate jaMtuH dAridrye tu nimajjati |

dAridryaharaNaM devi yo'bhivAMcchati sarvadA || 4-34 ||

sa dIkSitaH purA bhUyAtpazcAtprastAradarzakaH |

etajjAnAti yaH samyak sa zivo nAtra saMzayaH || 4-35 ||

zivaH satyaM zivaH satyaM zivaH satyaM na saMzayaH |

ziva eva paro devi sarvathA pUjayecca tam || 4-36 ||

tasya pUjanamAtreNa tulyo lakSmIpatirbhavet |

kiM bahUktena devezi kAdihAdimatAtmakam || 4-37 ||

gopanIyaM mahezAni svayoniraparA yathA |

rAjyaM dadyAt ziro dadyAt striyaM dadyAnmahezvari || 4-38 ||
na tu dadyAdidaM zAstraM sarvarthA'pi pragopayet |
iti saMkSepataH proktaM kimanyacchrotumicchasi || 4-39 ||

yantraprastAranAmAnaM stavaM yaH paThati priye |

sarvasiddhIzvaraH sAkSAnmahAdeva ivAparaH || 4-40 ||

mahendrajAlamindrAdijAlAnAM racanA tathA |

pAtAlakhecarIsiddhirguTikAJjanameva ca || 4-41 ||

yakSiNIkhaDgasiddhistu tasya hastapravezikA |

brahmANDagolake yA ca yA kAcijjagatItale || 4-42 ||

samastAH siddhayastasya bhavantyeva na saMzayaH |

prastAra smaraNAdeva ye ye tasya hi siddhayaH || 4-43 ||

svayamAyAnti purato racanAyAstu kA kathA |

yantrapArAyaNaM nAma stavaM devi prakIrttitam || 4-44 ||

p. 53) nADIpArAyaNaM nAma nAmapArAyaNaM tathA |

maMtrapArAyaNaM nAma cakrapArAyaNaM tathA || 4-45 ||

yaMtrapArAyanaM devi pratyahaM kArayetpriye |

ekAvartanamAtreNa trailokyavijayI bhavet || 4-46 ||

Avartanadvaye zrIzaH trirAvartanamAtrataH |

triguNAtmA bhavatyeva nAtra kAryA vicAraNA || 4-47 ||

paMcAvartanamAtreNa rAjarAjezvaro bhavet |

yAvaddhi darzanaM bhUyAttAvaddhi paramezvari || 4-48 ||

arNavasya ca maryAdA kIrttitA paramezvari |

yaM yaM kAmaM viciMtyAtha stotrametatpaThetsadA || 4-49 ||

taM taM kAmamavApyante tattadrUpo bhavennaraH |

kiM bahUktena devezi rAjarAjezvarI tu sA || 4-50 ||

yathA chinnA tathA kAlI tathaiva sundarI parA |

tathaiva tArA saMdiSTA caturNAM na hi bhinnatA || 4-51 ||

kAlikAyAmapi tathA yantrapArAyaNaM caret |

kAdihAdimatatvena dvidhAtvaM parikIrttitam || 4-52 ||

etajjJAnayutaM dRSTvA daNDavatpraNipatya ca |

devavatpUjanaM kuryAdanyathA na hi sidhyati || 4-53 ||

yantraprastArarAjAnaM yantrapArAyaNaM param |

nAma khyAtaM mahezAni zivazaktyAtmakaM tathA || 4-54 ||

zivazaktyAtmakaM devi yatkiJcijjagatItale |

tasmAcchaktyAtmakaM devi jagatsthAvarajaGgamam || 4-55 ||

sarvasvaM tu mayAkhyAtaM kimito'pi vizeSaNam |

bhedaprastArasidhyarthamaGkAn zRNu mahezvari || 4-56 ||

rAtryaSTakuNapAkhyaM hi zakticihnAbhidhastataH |
viSNuketugajAvartakrameNa parikIrttitaH || 4-57 ||

prathamasya dazArasya prokto rekhAvinirNayaH |

evaM paJca caturbhedAH sarvasiddhipradAyakAH || 4-58 ||

dvitIyasya dazArasya rekhAGkAnAM vinirNayaH |

RtvaSTagaNamArAntyAdarthavIrAdibhistataH || 4-59 ||

p. 54) nAthamArgakrameNaiva dinavedhena sidhyati |

razmidvaMdvaM raso bANI caivaM rekhAM vibhedayet || 4-60 ||

evaM paJca prabhedAH syurmanvasre zRNu sAmpratam |

nityA vANI mAtRkAptiH saMkhyAvartena vai bhavet || 4-61 ||

dvitIyasya mahezAni guNavAkrasacaMdratA |

kalAyojanamArgeNa dvitIyaM parikIrttitam || 4-62 ||

iti saMkSepataH proktaM phalasaMkathanaM zive |

jihvAkoTisahasraistu vaktrakoTizatairapi || 4-63 ||

mahimAM varNituM cAsya na zaknomi mahezvari |

iti saMkSepataH proktaM tattvanyAsakramaM zRNu || 4-64 ||

AtmavidyAzivaistatvaistacvanyAsaM samAcaret |
pAdAdi nAbhiparyantamAtmatattvaM prakIrttitam || 4-65 ||

nAbhyAdi hRdayAntaM hi vidyAtattvaM prakIrttitam |

hRdayAdbinduparyantaM zivatattvaM prakIrttitam || 4-66 ||

sarvamantraM samuccArya sarvAGge vyApanaM zive |

sarvatattvamidaM proktaM sarvadevatvakArakam || 4-67 ||

tithitattvAni devezi Atmatattve bhavanti hi |

paMcaviMzatitattvAni vidyAtattve bhavanti hi || 4-68 ||

SaTtriMzacchaivatattvAni zivatattve bhavanti hi |

atha paMcAzattatvAni sarvatattve bhavanti hi || 4-69 ||
sthApane vedatattvAni zodhane tattvapaMcakam |
bhUtazuddhau triHkrameNa AcAmecca tritattvataH || 4-70 ||

sarvamantre mahezAni AcAmettattvavaidikIm |

bIjamadhyagataM nAma kiM vA kuryAddhi saGkulam || 4-71 ||

kiM vA nAmnA samAkrAnte maMtre tattva prakalpanA |

ekAkSare tryakSarAdau tattvAspadavivarjite || 4-72 ||

tattvanyAsoditaM siddhaM nAnyatra parikalpayet |

siddhavidyAvidhau devi zrIvidyAyAM mahezvari || 4-73 ||

sarvabhedAkhyatatvAni tritattve nivasanti vai |

tritattvasya parijJAnI zaktipAtAdhipo bhavet || 4-74 ||

p. 55) AlApAddazanAtsarparzA[ddAnA]dyanugrahAdapi |
tatspRSTavastusaMsparzAnmantradAnAjjapAdapi || 4-75 ||

jihvAyAM mantrasaMlekhAttAmbUlocchiSTabhakSaNAt |
gaNDUSAdvastrajalatastvabhimantraNayogataH || 4-76 ||

tannAmasmaraNAtkrozazatAnte smaraNAdapi |
yanniHsRTaM tattathaiva zApAnugrahaNe zive || 4-77 ||

sarvazAstrarahasyajJastathA zrutidharo bhavet |

aSTAdazavidho devi zaktipAto bhavecchive || 4-78 ||

athavA siddhibAhulyaM mayA vaktuM na zakyate |

tatra cet siddhibAhulyamicchAzaktiparo bhavet || 4-79 ||

zaktisaMsargamAtreNa sarvaM pUtaM bhavecchive |

zaktiM vinA na vai muktiH zaktirmokSapradA matA |
iti saMkSepataH proktaM kimanyacchrotumicchasi || 4-80 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyatArAsaMvAde mantraprastAranirNayo nAma caturthaH paTalaH ||
4 ||

paJcamaH paTalaH |

zrIdevyuvAca |

deveza zrotumichAmi pUrvoktaM nirNayaM mahat |

zrIziva uvAca |

rahasyAtirahasyaM ca kathyate zRNu sAmpratam || 5-1 ||

snAnamukhyAH kriyAH sarvAH snAnaM ca daivate bhavet |

prAtaHkAle ca madhyAhne sAyAhne stotrapAThake || 5-2 ||

yadA yadA manoglAnistadaiva snAnamAcaret |

* * * brahmayoge mlecchasparze tathaiva ca || 5-3 ||

bhASaNe patitasyAtha mantrasnAnaM samAcaret |

zrIvidyAyAM catuHkAlaM kAlikAyAM trikAlakam || 5-4 ||

yadaiva manaso glAnistadaiva snAnamAcaret |

vidyoccAraM tu yaH kuryAdasnAtaH kRtabhojanaH || 5-5 ||

tasya vidyA bhavennaSTA rauravaM narakaM vrajet |

azuciH san mahezAni vidyoccAraM tu yazcaret || 5-6 ||

tasya nAzo bhaveddevi vidyA dagdhA bhaveddhruvam |

snAnakAlazca samproktAH snAnabhedAn zRNu priye || 5-7 ||

snAnaM paJcavidhaM proktaM yena devImayo bhavet |

vAruNaM nAbhasaM caiva tRtIyaM bhasmajaM smRtam || 5-8 ||

caturthaM taijasaM devi paJcamaM daivataM bhavet |

brahmA viSNuzca rudrazca Izvarazca sadAzivaH || 5-9 ||

ete paJca mahAdevAH paJcasnAne vyavasthitAH |

parA ca tadatItA ca tatparA tadanantaram || 5-10 ||

citparA tadatItA ca paMcamI parikIrttitAH |

vAruNaM dvividhaM proktaM vaidikaM tAMtrikaM tathA || 5-11 ||

svazAkhoktavidhAnena vaidikaM snAnamIritam |

svasvakalpoktavidhinA tAMtrikaM snAnamAcaret || 5-12 ||

vIrANAM tu kaniSThaM syAtritayaM zRNu pArvati |

uttamaM tu mahezAni sarvatra parikIrttitam || 5-13 ||

p. 57) madhyamaM tu mahezAni prANAyAmapuraHsaram |

RSyAdikaM pravinyasya saptamudrApuraHsaram || 5-14 ||

jalamAnIya devezi sarvAGge mUlamuccaran |

dazadhA saptadhA vApi dehaM saMmArjayecchive || 5-15 ||
kuzena dUrvayA vApi hyathavA taptamudrayA |
tatastu tilakaM devi dazadhA vAgyato'thavA || 5-16 ||

UrdhvapuMDraM triprakAraM tripuMDraM dviprakArakam |

agastipatrAkAraM tu paTTavandhanameva ca || 5-17 ||

agastipatrAkAraM tu sindUrairghusRNena ca |
kucandanena vA devi yogamArgeNa kArayet || 5-18 ||

pUrvoktaM maMtramAtre syAdidaM zrIkAlikAmanau |

sarvadeve'pi kartavyaM svasvayaMtreNa pArvati || 5-19 ||

maNibandhAdadho hastau pAdau gulphAdadhaH priye |

AnanaM kSAlayeddevi tArAcchinnAvidhau zive || 5-20 ||

kArayetsnAnametaddhi paJcAGgazuddhidAyakam |
vAruNaM kathitaM devi nAbhasaM zRNu pArvati || 5-21 ||

aSTAdazavidhaM devi nAbhasaM parikIrttitam |

zuddhA namAtAH svAhAMtAH tarpaNAMtA jayAMtikAH || 5-22 ||

mAlAmanaH paMcavidhaH zivazaktikrameNa ca |

taddvayakramayogena maMtrAH paMcadaza smRtAH || 5-23 ||

sAdhakaH kRSNapratipadityAdi (?) phAlgunAMtakam |

razmikrameNa devezi SaTcakrakramage'pi ca || 5-24 ||

proktamaSTAdazavidhaM snAnaM nAbhasajJakam |

mUlAdhArAdbilAMtaM ca saMbhAvya yAbhavAMtikam || 5-25 ||

razmayo'tra mahezAni trizataM SaSTi kIrttitAH |

varSamAtraM tu jAnhavyAM snAnaM triSavaNaM kRtam || 5-26 ||

tatphalaM prApnuyAddevi nAtra kAryA vicAranA |

RtvAdikramayogena tattadRtubhavairjalaiH || 5-27 ||

p. 58) snAne kRte phalaM yacca sakRdeva bhavecca tat |

razmikrameNa devezi sAkSAcchAmbhavarUpabhAk || 5-28 ||

praticakre mahezAni cakrAntastasya devatAH |

citayetprayato bhUtvA mUlAdhArAdbilAntakam || 5-29 ||

antaHsnAnamidaM proktaM devatAdarzanapradam |

brahmarandhre tu devezi sarveSAM layamAcaret || 5-30 ||
punaH zuddhisvarUpaM tu vibhAvya japamAcaret |
nAbhasaM kathitaM snAnaM bhasmasnAnaM zRNu priye || 5-31 ||

agnirjalaM sthalaM ceti vAyurvyometi sarvataH |

abhrakAbhistribhirdevi smAnaM mRtyujvarApaham || 5-32 ||

zaiva-RkpaMcakenaiva dvitIyaM parikIrttitam |

zrImAlinyAdibhirdevi zrIvidyAyAM tRtIyakam || 5-33 ||

sUryamaMtraM bhasmamadhye tena sarvAGgalepanam |

dhyAnoktaM homakuNDasthaM bhasmanA paMcamaM bhavet || 5-34 ||

anye'pi bahavo bhedAH santi ca prANakoditAH |

taijasamatha vakSyAmi yena sidhyanti siddhayaH || 5-35 ||

gurudaivatamaMtrANAmaikyaM sambhAvayandhiyA |
gurutejo maMtratejo devatejastathaiva ca || 5-36 ||

ekIkRtya tricaitanyaM tanmUrttiM parikalpayet |

hRdaye devatAsthAnaM kaNThe caiva manurmataH || 5-37 ||

sahastrAre guruH proktastricaitanyaM vibhAvayet |

tAM mUrtiM svasya dehe tu yathA svAvayavakramAt || 5-38 ||

sambhAvayenmahezAni devatAdarzanapradam |
taijasaM gaditaM devi daivataM zRNu pArvati || 5-39 ||

mUlAdhAraM samArabhya bilAntaM paramezvari |

devatAM bhAvayeddevi svamukhena mukhaM zive || 5-40 ||

tasyAH sarvAGgakaM devi svadehe sthAnayogataH |

dvAradeze mahezAni gaMgAM ca yamunAM tathA || 5-41 ||

sarvasambhAvanAyAM tu gaMgayA kiM phalaM bhavet |

iDA gaGgeti vikhyAtA suSumNA yamunA nadI || 5-42 ||

p. 59) sarasvatI piGgalA syAtprayAgaM dehamadhyagam |

dehajJAnaM vinA devi bAhyajJAnena kiM phalam || 5-43 ||

gurupaGktiM sahasrAre hyaMgAni bhruvi bhAvayet |

kaNThamUlAMtakaM devi sarvAvaraNadevatAH || 5-44 ||

bhAvayedyatnato devi daivataM snAnamIritam |

anena snAnayogena kiM tadyanna kare sthitam || 5-45 ||

brahmAdyA devatAH siddhAH snAnenAnena pArvati |

iti saMkSepataH proktaM sandhyAkarma zRNu priye || 5-46 ||

sundaryAM tu catuHkAlaM sandhyAvandanamAcaret |

prAtaHkAle ca madhyAhne sAyAhne'pyardharAtrake || 5-47 ||

caturvidhAM tu gAyatrIM japeddyatnena pArvati |

prastArAkRtirUpA ca upasthAnAbhidhA tathA || 5-48 ||

vAMcchAkalpalatA devi caturthI parikIrttitA |

SaSTipArAyaNaM prAtarmadhyAhne nAmasaMjJakam || 5-49 ||

maMtrapArAyaNaM rAtrau nizAyAM cakrasaMjJakam |

tRtIyAmardharAtre tu tUryasaMndhyA samAcaret || 5-50 ||

kAlikAyAmidaM proktamupasthAnavivarjitam |
medhAdIkSAdirAjJItvAtkAlyAM sandhyAcatuSTayam || 5-51 ||

sandhyAtrayaM tu tArAyAM chinnAyAM trividhA bhavet |

etAsAM na hi bhedo'sti bhedabhAGnarakaM vrajet |
iti saMkSepataH proktaM kimanyacchrotumicchasi || 5-52 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde snAnabhedanirNayo nAma paJcamaH
paTalaH || 5 ||

SaSThaH paTalaH |

zrIdevyuvAca |

deveza zrotumicchAmi dIpezAdivinirNayam |

zrIziva uvAca |

baddhapadmAsano mUrdhniM dIpanAthaM prapUjayet || 6-1 ||

vargASTakaM cASTadikSu svaradvandvasamanvitam |

vilikhettatra varge ca mahAnAdAkSaraM bhavet || 6-2 ||

satyabindukaH prathamaM zrIkaNThAdi tataH param |

tadvarNezaM nandanAthaM ca caturthamanantaram || 6-3 ||
atiriktapadasyAnte varNAyeti samuddharet |
raktadvAdazazaktyArdhayuktAyeti padaM vadet || 6-4 ||

asminkSetra imAM pUjAM gRhNayugmamathApi vA |

svAhAntago manurayaM dIpanAthasya kIrttitaH || 6-5 ||

IzAne dIpanAthaM ca pUjayetparamezvari |

ucchiSTo mRdamAnIya nadItIradvayArttathA || 6-6 ||

rUpaM tAlamitaM kRtvA nAmArNAnyasya taddhRdi |

nAmamAyAstradhatturalikhitaM pUritaM bhuvi || 6-7 ||

trisapta japato sArddhaM vazayedurvazImapi |

athAnyadapi devezi rahasyaM kathyate zRNu || 6-8 ||

vAmahaste * * dhRtvA dakSahastena homayet |

mAlAM dattvA zaktihaste gaNanAM kArayecchive || 6-9 ||

dvitrimAsottaraM devi mAlAM saMgrathayecchive |

svayaM saMtruTitA mAlA prAyazcittAya kalpate || 6-10 ||

jIrNasUtraM tu vijJAya mAlAM saMgrathayecchive |

SaNmAsottaragaM devi jIrNasUtrasya mAlikA || 6-11 ||

yaH sthApayenmahezAni tasya nAzo bhaviSyati |

truTitA cetsvayaM mAlAM prAyazcitaM samAcaret || 6-12 ||

p. 61) gajAntakasahasraM tu japahomaM samAcaret |

punaH saMgrathanaM kRtvA prANasthApanapUrvakam || 6-13 ||

tadA mAlA siddhidA syAnnAnyathA zAMkaraM vacaH |

purazcaryAjape home mAlA hastacyutA yadi || 6-14 ||

prAyazcittaM zataM japtvA taddazAMzapravarddhanam |

taddazAMzaM tyajejjApaM prAyazcittakrameNa ca || 6-15 ||

kecidatra samicchanti purazcaryA punarbhavet |

prAyazcittaM zataM japtvA purazcaryAM punazcaret || 6-16 ||

ayutaM homayeddevi pAyasairnArikelajaiH |

trailokyaM ca vazIkuryAnnAtra kAryA vicAraNA || 6-17 ||

tilataNDulahomena prIti saJjanayetpriye |

zrIdevyuvAca |

prasRtistaNDulAH proktAH zatamAtraM tilAH smRtAH || 6-18 ||

kathaM sAmyaM mahAdevi tanme kathaya zaGkara |

ardhaprasRtimAtraM tu taNDulA vA mahezvara || 6-19 ||

paJcAzadvA tilA grAhyAH sandehaM hara me prabho |

zrIziva uvAca |

prasRtizca zataM devi saMyogena tu homayet || 6-20 ||

dakSiNAmUrtidevasya saMmataM parikIrttitam |

ardhaprasRtimAtraM tu taNDulAH paramezvari || 6-21 ||

paJcAzacca tilA grAhyA akSobhya RSisammatam |

yavAnAM ca tilAnAM ca yathA yogena cAhutiH || 6-22 ||

tathaiva tilasaMyogaH kartavyaH kAlasaMmataH |

samatolasame kuNDe homayetkAlikAmate || 6-23 ||

* * * svamukhaM datvA vAmahastena homayet |

devatA varadA tasya nAtra kAryA vicAraNA || 6-24 ||

* * * * devezi homayedavicArayan |
trailokyAdhipatirbhUyAnnAtra kAryA vicAraNA || 6-25 ||

pAtraM SoDazakaM sthApya sampUjya paradevatAm |

tadante homayedrAtrau tadante tarpaNaM bhavet || 6-26 ||

p. 62) devizaMkhamukhaM netre devatAyAH samAcaret |

keralAkhyamate proktaM kAzmIrAkhyamataM zRNu || 6-27 ||

yathA devI tathA devIvizeSAkhyaH prakIrttitaH |

svasAMmukhyena devezi sthApayetpAtrarAzikam || 6-28 ||

caitanyasya mate devi tiryak cakreNa sthApayet |

svasAMmukhye tathA tiryak devatAsaMmukhe'pi ca || 6-29 ||

prAcI nava SaT ca proktA kathamaGgAdikalpanA |

svasya prAcI ca vA devi devatAyA'thavA bhavet || 6-30 ||
zrIziva uvAca |

rahasyAtirahasyaM ca kathyate zRNu sAdaram |

svasAMmukhye sthite pAtre devavaccAMgakalpanam || 6-31 ||

niraMjanamataM proktaM tatsAMmukhye'pi pArvati |

pArvatImatamAkhyAtaM rudravIramataM zRNu || 6-32 ||

devIpAtraM devamukhye aMgAdi svAMgavadbhavet |

tatra prAcIkramaM jJAtvA sarvaM saMsAdhayed dhruvam || 6-33 ||

AsanAdyaM samArabhya bhUtazudhyantagaM zive |

siddhaprAcI tu samproktA tatastu kalpitA bhavet || 6-34 ||

sthityAdipAtrakarmAntaM siddhaprAcI prakIrttitA |

pUjAyAM tu mahezAni kalpitA dik zubhapradA || 6-35 ||

arghyAMta pUjAnyasane kalpitA dik ca zambare |

mahAbhUtabalirdevi svasya prAcIvidhau bhavet || 6-36 ||

devIbaliH svavAme tu svadakSe mRDasammate |

agnIzAsuravAyavye madhye dikSvaGgapUjanam || 6-37 ||

keralasya mataM proktaM cidghanasya mataM zRNu |

agninair-RtavAyavye zaMbhukoNeSu madhyataH || 6-38 ||

caturdikSu mahezAni maNDalAvartaMmArgataH |

agnIzAsuravAyavye madhye pRSThe SaDaMgakam || 6-39 ||

kesareSu ca koNeSu deheSu ca SaDaMgakam |

kAlarudramate devi SaDaGgapUjanaM bhavet || 6-40 ||

kramaduryeNa kathitaM prAcI cAGgaprapUjanam |

caturAvartamArgeNa saMhArAkhyakrameNa ca || 6-41 ||

p. 63) SaDaMgapUjanaM proktaM vizeSaM zRNu sAdaram |

arghapUjAvidhau siddhaprAcI proktA tu pIThake || 6-42 ||

mRDena paramezAni kalpitA tu kvacidbhavet |

kvacitsiddhA mahezAni kalpitA tu kvacidbhavet || 6-43 ||

vAyavyadizi paryantaM gurupaMkti prapUjayet |

vidyApRSThe mahezAni guravaH santi sarvadA || 6-44 ||
kAlyAM tripaMktimArgeNa devIpRSThakrameNa ca |
divyAdikramayogena tadadhaH svagurutrayam || 6-45 ||

dakSodak ca pratIcyAM ca rekhAtritayakaM caret |

divyaugho devatApRSThe tadanyau tatsthaladvaye || 6-46 ||

vidyAyA bhedabhAve tu svaguruM pUjayecchive |

sarvopari mahezAni gurusthAnaM prakIrttitam || 6-47 ||

siddhaprAcIvidhau devi viloke kerala mate |

gauDe kalpitadiGmArgA yathA devI tathaiva te || 6-48 ||

na teSAM mukhyatA devi mukhyA tu devatA bhavet |

zrIdevyuvAca |

atrArthe saMzayo me'sti saMzayaM mama hAraya || 6-49 ||

kalpitakramamArgeNa yadi pUjA bhavecchiva |

teSAM digvyatyaye deva sthAnasya saMcyutirbhavet || 6-50 ||

zrIziva uvAca |

svAmI yatra samAyAti tatraivAGgAdidevatAH |

na cAMge mukhyatA devi tatpUjAyAM tu mukhyatA || 6-51 ||

dazAMzenAMgamaMtrANAM japapUjAM samAcaret |

tena te siddhidA devi nAnyathA siddhirodhakRt || 6-52 ||

kadA ko vA mahAdevaH kA vA prAcI sthitA bhavet |

sUryastu vAruNIM yAti nityAnityaM mahezvari || 6-53 ||

divArAtrivyatyayastu sAdhakasya karesthitaH |

candrasUryavyatyayaM ca sa kartuM bhavati kSamaH || 6-54 ||

sUryasthAne bhaveccandraH candrasthAne tu sUryatA |

evaM krameNa devezi brahmANDAnAM paraMparA || 6-55 ||

p. 64) kadA kA vA sthitA prAcI kati jAtAH puraMdarAH |

ekaikavAraM devezi kITAdyapi puraMdaraH || 6-56 ||

kutra ke vA sthitA devi sarvaM sAdhakagocaram |

yadAzAbhimukho bhUtvA cakrarAjaM samuddharet || 6-57 ||

saiva pUrvA vinirdiSTA sarvatra yojayetkramam |

yadA pUrvamukho bhUtvA cakrezIM paripUjayet || 6-58 ||

tadA pratIcI pUrvA syAddevatAyA mahezvari |

pazcimAbhimukho bhUtvA yadA cakraM samuddharet || 6-59 ||

pUrvaiva pUrvA nirdiSTA dakSiNe zRNu pArvati |

dakSiNAbhimukho bhUtvA yadA cakraM samuddharet || 6-60 ||

tadottarA bhavetpUrvA pratIcI dakSiNA bhavet |

uttarAbhimukho bhUtvA yadA devIM prapUjayet || 6-61 ||

dakSiNaiva bhavetpUrvA saMkSepAtparamezvari |

tathA kAmyavidhau devi vidikSu saMsthito yadi || 6-62 ||

devi svamadhye pUrvA tu saMkSepeNa prakIrttitA |

yathA yathA zivA yAti parivArAstathA tathA || 6-63 ||

yasyAH kRpAkaTAkSeNa sthAnaM labdhaM ca taiH purA |

te sevArthaM samAyAnti devatAyA mahezvari || 6-64 ||

balidAnavidhau devi siddhA vA kalpitA ca vA |

devatAhastadakSAkhyaH svasAMmukhyakrameNa ca || 6-65 ||

prAcI proktA kerale ca gauDe prAgdakSabhAvataH |

devyagradalamArabhya prAdakSiNyakrameNa tu || 6-66 ||

kAzmIrAkhyamate proktaM pUjanaM tatkrameNa tu |

svadehaM ca svadevIM ca svaguruM paramezvari || 6-67 ||

svadehasthitimArgeNa svarUpaM pUjayetpriye |

pUjAvidhau mahezAni svAgre saMciMtya pUjayet || 6-68 ||

atrApi devadevezi svarUpeNa svarUpatA |

tadrUpe svasya rUpaM ca tathaiva ca gurorapi || 6-69 ||

evaM krameNa devezi tritayaM tritayaM triSu |

mArgatrayakrameNaiva sarvaM saMkSepato matam || 6-70 ||

p. 65) balidAnabhavadravyaM devatAgre nivedayet |

svasAMmukhyena vA devi tatsAMmukhyena vA priye || 6-71 ||

keralakramayogena kAzmIrakramayogataH |
gauDamArgakrameNaiva sarvaM saMkSepato matam || 6-72 ||
iti zrIzaktisaGgamamahAtantrarAje uttarabhAge tRtIyakhaNDe
zrImadakSobhyatArAsaMvAde dIpezAdivinirNayo nAma SaSThaH paTalaH || 6 ||

saptamaH paTalaH |

zrIdevyuvAca |

deveza zrotumicchAmi rahasyAtirahasyakam |

zrIziva uvAca |

bhinnAMjanaM samArabhya mA bhairmA bhairmahezvari || 7-1 ||

vRttAnandaM tu devezi dhyAtvA vAJchAmitaM zive |

zikhAgataM smaret vahni zikhAsAdhakarUpiNam || 7-2 ||

khaDgaMtu devyA rasanAM buddhyA dhyAtvA mahezvari |

sAdhyasya jADyarUpatvaM zikhAyAM paramezvari || 7-3 ||

sAdhyasya hRdaye devi devI tiSThati sarvadA |

jADyaM tatraiva devezi rasanA lehabhakSaNA || 7-4 ||

evaM dhyAtvA japedvIrastraikAlyajJAnamApnuyAt |

tArAvidhau mahezAni kAmyadhyAnaM mahezvari || 7-5 ||

pratyAlIDhaM samArabhya paMcamudrAvibhUSitam |

ityetaM cintya yatnena jADyaM nyasya kapAlake || 7-6 ||

kartryA saMkartanaM cintyaM trailokyAdhipatiH kaviH |

rAjyadAtRtvasAmarthyaM nahi tArAM vinA kalau || 7-7 ||

* * * * saktAmAgneyInADikAgatAm |
zavasya hRdaye nyastaM dakSiNaM caraNaM zubham || 7-8 ||

zavasya pAdayugalamanulomAkRtikramAt |
saMnyasya vAmacaraNe pratyAlIDhaM taducyate || 7-9 ||

sAdhanAyAM dakSaziraH prAk pratyak ca ziraH sadA |

zavasvarUpaM kathitaM vAmahastaM hRdi sthitam || 7-10 ||

caturbhujA kAlikA syAt dhanurAyudhadhAriNI |

kapAlaM paJcamaM cetsyAt varahaste vidhArayan || 7-11 ||

muNDarUpaM kapAlaM tu mahAkAlamate matam |

kalau tArA kalau kAlI kalau tArA ca kAlikA || 7-12 ||

zivazaktiprabhedena dehe zaktirupasthitA |

tArA zivastathA kAlI zaktirUpA prakIrttitA || 7-13 ||

p. 67) kAlI zivastathA tArA zaktirUpA prakIrttitA |

aho jJAnavatAM jJAnI kAlItArAparAyaNaH || 7-14 ||

rahasyAtirahasyaM ca proktaM devi tavAgrataH |

dezavyavasthAM devezi kathyate zRNu yatnataH || 7-15 ||

vaidyanAthaM samArabhya bhuvanezAMtagaM zive |

tAvadaMgAbhidho dezo yAtrAyAM na hi duSyati || 7-16 ||

ratnAkaraM samArabhya brahmaputrAMtagaM zive |

baMgadezo mayA proktaH sarvasiddhipradAyakaH || 7-17 ||

jagannAthAtpUrvabhAgAtkRSNAtIrAntagaM zive |
kaliMgadezaH saMprokto vAmamArgaparAyaNaH || 7-18 ||

kaliGgadezamArabhya paMcASTayojanaM zive |

dakSiNasyAM mahezAni kAliMdaH parikIrttitaH || 7-19 ||

subrahmaNyaM samArabhya yAvaddevo janArdanaH |

tAvatkeraladezaH syAttanmadhye siddhikeralam || 7-20 ||

rAmezvaro veMkaTezo haMsakeralabodhakaH |

anaMtazailamArabhya yAvatsyAduDupaM puram || 7-21 ||

tAvatsarvezanAmA tu keralaH parikIrttitaH |

zAradAmaThamArabhya kuMkumAdritaTAntakam || 7-22 ||

tAvatkAzmIradezaH syAtpaMcAzadyojanAntakaH |
kAlezvaraM zvatagiriM tripurAM nIlaparvatam || 7-23 ||

kAmarUpAbhidho devi gaNezagirimUrdhani |

tripaMcakaM sAmArabhya madhye cojjayinI zive || 7-24 ||

mArjAratIrthaM rAjendre kolApuranivAsinam |

tAvaddezo mahArASTraH kArNATasyAbhigocaraH || 7-25 ||
jagannAthAdUrdhvabhAgaM avAk zrIbhramarAmbikA |
tAvadaMdhrAbhidho dezaH saurASTraM zRNu sAdaram || 7-26 ||

p. 68) koMkaNAt pazcimaM tIrtvA samudraprAntagocaraH |

hiMgulAjAntakA devi jantavo janalezataH || 7-27 ||

saurASTradezo devezi nAmnA tu gurjarAbhidhaH |

zrIzailaM tu samArabhya colezAnmadhyabhAgataH || 7-28 ||

tailaMgadezo devezi dhyAnAdhyayanatatparaH |

mUkAmbikAM samArabhya malayAdryantagaM zive || 7-29 ||

malayAlAbhidho dezo maMtrasiddipravartakaH |

rAmanAthaM samArabhya zrIraMgAntaM vilezvari || 7-30 ||

karNATadezo devezi sAmrAjyabhogadAyakaH |

tAmraparNI samArabhya zailArddhAtpurato'rddhataH || 7-31 ||

avaMtIsaMjJako dezaH kAlikA tatra tiSThati |

bhadrakAlI mahatpUrvaM rAmadurgAcca pazcime || 7-32 ||

zrIvidarbhAbhidho dezo vaidarbhAstatra tiSThati |

gurjarAtpUrvabhAge tu dvArakAto hi dakSiNe || 7-33 ||

marudezo mahezAni uSTrotpattiparAyaNaH |

zrIkoMkaNAdadhobhAge tApItaH pazcimottare || 7-34 ||

AbhIradezo devezi vindhyazaile vyavasthitaH |

avaMtItaH pUrvabhAge godAvaryAstathottare || 7-35 ||

mAlavAkhyo mahAdezo dhanadhAnyaparAyaNaH |

draviDatailaMgayormadhye coladezaH prakIrttitaH || 7-36 ||

lambakarNAzca te proktA bhedo hyavAntaro bhavet |

kurukSetrAtpazcime tu tathA cottarabhAgataH || 7-37 ||

indraprasthAnmahezAni dazatriyojanottaram |
pAMcAla dezo devezi saundaryagarvabhUSitaH || 7-38 ||

pAMcAladezamArabhya mlecchAddakSiNapUrvataH |
kAmbojadezo devezi vAjirAziparAyaNaH || 7-39 ||

vaidarbhadezAdUrdhvaM ca indraprasthAcca dakSiNe |

marudezAt pUrvabhAge vairADdezaH prakIrttitaH || 7-40 ||
p. 69) kAmbojAddakSabhAge tu indraprasthAcca pazcime |
pANDyadezo mahezAni mahAzUratvakArakaH || 7-41 ||

gaNDakItIramArabhya campAraNyAntakaM zive |

videhabhUH samAkhyAtA tairabhuktyabhidhaH sa tu || 7-42 ||

kAmbojadezamArabhya mahAmlecchAttu pUrvake |

vAlhIkadezo devezi azvotpattiparAyaNaH || 7-43 ||

taptakuNDaM samArabhya rAmakSetrAMtakaM zive |

kirAtadezo devezi vindhyazaile ca tiSThati || 7-44 ||

karatoyAM samArabhya hiMgulAjAntakaM zive |

baktAnadezo devezi mahAmlecchaparAyaNaH || 7-45 ||

hiMgupIThaM samArabhya markezAMtaM mahezvari |

khurAsanAbhidho dezo mlecchamArgaparAyaNaH || 7-46 ||

tanmadhye cottare devi airAkaH parikIrttitaH |

kAzmIraM tu samArabhya kAmarUpAcca pazcime || 7-47 ||

bhotAMtadezo devezi mAnasezAcca dakSiNe |

mAnasezAddakSapUrve cInadezaH prakIrttitaH || 7-48 ||

kailAsagirimArabhya sarayUyonitaH pare |

AmoMgAMtaM mahezAni mahAcInAbhidho bhavet || 7-49 ||

jaTezvaraM samArabhya yoginyantaM mahezvari |

nepAladezo devezi zilahaTTaM zRNu priye || 7-50 ||

gaNezvaraM samArabhya mahodadhyaMtagaM zive |

zilahaTTAbhidho dezaH parvate tiSThati priye || 7-51 ||

baMgadeze samArabhya bhuvanezAMtagaM zive |

gauDadezaH samAkhyAtaH sarvavidyAvizAradaH || 7-52 ||

gokarNezAtpUrvabhAge AryAvarttAttu cottare |

tairamUktAtpazcime tu mahApuryAzca pUrvataH || 7-53 ||

mahAkozaladezaH syAt sUryavaMzaparAyanaH |

vyAsezvaraM samArabhya taptakuNDAntakaM zive || 7-54 ||

p. 70) magadhAkhyo mahAdezo yAtrAyAM na hi duSyati |

dakSottarakrameNaiva kramAt kIkaTamAgadhau || 7-55 ||

caraNAdri samArabhya gRdhrakUTAMtakaM zive |

tAvatkIkaTadezaH syAttaduttaro mAgadho mataH || 7-56 ||

jagannAthaprAnta dezastvautkalaH parikIrttitaH |

kAmagiriM samArabhya dvArakAntaM mahezvari || 7-57 ||

zrIkuntalAbhidho dezo hUNaM zRNu mahezvari |

kAmagirerdakSabhAge marudezAttathottare || 7-58 ||

hUNadezaH samAkhyAtaH zUrAstatra vasanti hi |

atha ghaTTaM sa mArabhya koTIzasya ca madhyagaH || 7-59 ||

samudraprAntadezo hi koGkaNaH parikIrttitaH |

brahmaputrAtkAmarUpAnmadhyabhAge tu kaikayaH || 7-60 ||

magadhAddakSabhAge tu vindhyAtpazcimataH zive |

zaurasenAbhidho dezaH sUryavaMzaprakAzakaH || 7-61 ||

hastinApuramArabhya kurukSetrAcca dakSiNe |

pAJcAlAtpUrvabhAge tu kurudezaH prakIrttitaH || 7-62 ||

marudezAtpUrvabhAge kAmAdrerdakSiNe zive |

siMhalAkhyo mahAdezaH sarvadezottamottamaH || 7-63 ||

zilahaTTAtpUrvabhAge kAmarUpAttathottare |
pulindadezo devezi naranArAyanaH paraH || 7-64 ||

gaNezvarAtpUrvabhAge samudrAduttare zive |

kacchadezaH samAkhyAtaH sevanaM zRNu sAdaram || 7-65 ||

pulindAduttare bhAge kacchAcca pazcime zive |

matsyadezaH samAkhyAto matsyabAhulyakArakaH || 7-66 ||

vairATapADyayormadhye pUrvadakSakrameNa ca |
madradezaH samAkhyAto mAdrIzastatra tiSThati || 7-67 ||

zUrasenAtpUrvabhAge kaNThakAtpazcime vare |

sauvIradezo devezi sarvadezAdhamodhamaH || 7-68 ||

p. 71) avaMtItaH pazcime tu vaidarbhAddakSiNottare |

lATadezaH samAkhyAto barbaraM zRNu pArvati || 7-69 ||

mAyApuraM samArabhya saptazRMgAttathottare |

barbarAkhyo mahAdezaH saindhavaM zRNu sAdaram || 7-70 ||

laMkApradezamArabhya makkAntaM paramezvari |

saiMdhavAkhyo mahAdezaH parvate tiSThati priye || 7-71 ||
ete SaTpaJcAzaddezA mayA proktAstava priye |
etanmadhye'pi devezi dezabhedAstvanekazaH ||

koTizaH santi devezi ete mukhyAH prakIrttitAH |

rahasyAtirahasyaM ca goptavya pazusaGkaTe |
iti saMkSepataH proktaM kimanyacchrotumicchasi ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde dezavyavasthAniyamo nAma saptamaH
paTalaH || 7 ||

aSTamaH paTalaH |

zrIdevyuvAca |

deveza zrotumicchAmi paJca prasthAni sAmpratam |

zrIziva uvAca |

indraprasthaM yamaprasthaM varuNaprasthameva ca || 8-1 ||

kUrmaprasthaM mahAdevi devaprasthaJca paJcamam |

indraprasthaM mahezAni zRNu vakSye yathAkramam || 8-2 ||

indraprasthaM mahezAni yoginIkoTisaMyutam |

mathurAgokulaM pUrvabhAge tasya prakIrttitam || 8-3 ||

vRndAvanaM koNadeze hastinApuramuttare |

dvArakA pazcimAyAM tu gadAvarttastu dakSiNe || 8-4 ||

indraprasthamadhyabhAge kAlikAmukhagocaram |
vArAhIkSetramuddiSTamindraprasthaM taducyate || 8-5 ||

siMhAsanaM cAzvapatestadeva parikIrttitam |

yamaprasthaM mahezAni dakSiNasyAM vyavasthitam || 8-6 ||

somezvaraH pazcimAyAM saptazRMgI tu pUrvagA |

mAyApuraM vAmabhAge vyaGkaTezastu dakSiNe || 8-7 ||
yamaprasthaM bhavenmadhye kamalAmukhagocaram |
zaGkhAvartto bhavettatra kSetraM mAyAbhidhaM bhavet || 8-8 ||

siMhAsanaM narapatestaddakSe parikIrttitam |

tataH pUrve jagannAthaH prApte kavipatirbhavet || 8-9 ||

vAruNAkhyaM tathA devi kathyate zRNu sAmpratam |

makkezvaraH pazcimAyAmuttare hiGgulA bhavet || 8-10 ||

trailokyavijayA devi dakSabhAge prakIrttitA |

rAjAvarttastatra bhavet zItAmukhagataM ca tat || 8-11 ||

tadante sAgarAH sapta samudrAzca tadantake |

tAvat zrIvAruNAkhyaM tu prasthaM proktaM mayA tava || 8-12 ||

kUrmaprasthaM mahezAni kathyate zRNu pArvati |

gokarNezAddakSabhAge kAmAkhyAtpUrvagocaraH || 8-13 ||

p. 73) uttare mAnasezaH syAt pazcime sAradA bhavet |

triguNAvartametaddhi vajrezyA mukhamIritam || 8-14 ||

SaTpaMcakoTicAmuNDAgaNairvyAptaM tu tadbhavet |
devaprasthaM mahezAni kathyate zRNu sAmpratam || 8-15 ||

zrIraMgo dakSiNe prokto gAyatrI pazcime bhavet |

pUrve caiva jagannAthastUttare'marakaNTakam || 8-16 ||

kAMcIpuraM madhyabhAge mohanAvartameva ca |

lalitAyA mukhaM tacca vidyAgaNavibhUSitam || 8-17 ||

kAmAkhyAkSetramuddiSTaM mahAmantravibhUSitam |
navalakSamahAvidyAsagaNaiH paribhUSita || 8-18 ||

paMca prasthAni devezi kathitAni mayA tava |

kRSNamudraNarAmazca zrIrviSNurvaradezvaraH || 8-19 ||

brahmA viSNuzca rudrazca Izvarazca sadAzivaH |

parAditadatItAntaM tRtaye parivartate || 8-20 ||

viSNorbhedAH smRtA hyete nAviSNuH pRthivIpatiH |

paMcaprasthezvaro bhUyAtkAlItArAparAyaNaH || 8-21 ||

rahasyAtirahasyaM ca kathitaM paramezvari |

gopanIyaM gopanIyaM gopanIyaM svayonivat |
iti saMkSepataH proktaM kimanyacchrotumicchasi || 8-22 ||
iti zrIzaktisaGgamamahAtantrarAje uttarabhAge tRtIyakhaNDe
zrImadakSobhyatArAsaMvAde paMcaprasthakathanaM nAmASTamaH paTalaH ||
8 ||

navamaH paTalaH |

zrIdevyuvAca |

deveza zrotumicchAmi pUrvamuktaM rahasyakam |

zrIziva uvAca |

rahasyAtirahasyaM ca kathyate tava bhaktitaH || 9-1 ||

AnaMdabhuvanaM nAma mahAyogavanaM zRNu |

zaktimAnIya devezi tasyAH saMdIkSaNaM caret || 9-2 ||

dIkSitAM ca suzIlAM ca maMtrayaMtraparAyaNAm |

rAjapatnIM devapatnIM devatAM gururUpiNIm || 9-3 ||

rAjavezyAM brahmavezyAM divyavezyAM kalAparAm |

tIrthavezyAM guptavezyAM nRtyavezyAM ca vA priye || 9-4 ||

samAnIya divArAtrau yathAyogena pArvati |

saMdIkSya yatnato devi trailokyaraJjiMnIM kalAm || 9-5 ||

prasUnamaMce saMsthApya pAdyArghyAcamanIyakam |

dattvA saMpUjya yatnena catuHSaSThyupacArakaH || 9-6 ||

zRMgAraratnAbharaNairnAnA divyairmahezvari |
sveSTadevIM ca saMcitya pUjayet trijaTezvarIm || 9-7 ||

maMtrabhede svalpamaMtre AvRttirbhUyasI yadA |

bindozca paritaH koNe pUjayet tAM ca devatAm || 9-8 ||

sAMgAM sAvaraNAM pUjya yathAkAmavarapradAm |

tAM vilokya japeddevi sarvakAlamataMdritaH || 9-9 ||

tasyAM tu devatAbuddhyA devIM cintya mahotsavaiH |

tatpAdau ciMtya devezi japedyatnena pArvati || 9-10 ||

sarvasiddhIzvaro bhUyAnnAtra kAryA vicAraNA |

tasyAM tu devaM saMpUjya zaktyAlokanatatparaH || 9-11 ||

pUjayetparamezAni trailokyavijayI kaviH |

tasyA mukhaM tu saMcintya devIbuddhyA divA zive || 9-12 ||

trisahasraM japenmAMsaM trikAlajJo naro bhavet |

tasyAH kUTamidaM jJAtvA japellakSaM divA zive || 9-13 ||

p. 75) tasyAH modAyitaM dRSTvA divA paMcAyutaM japet |

paMcakAmasamo bhUyAnnAtra kAryA vicAraNA || 9-14 ||

kaJcukaM tasyAH saMvIkSya divA lakSadvayaM japet |

sarvasiddhIzvaro bhUyAnnAtra kAryA vicAraNA || 9-15 ||

latAyAzcakitaM dRSTvA divA japtvA divAkaraH |

divApazyaJjapettArAM vikArarahitaH zive || 9-16 ||

sarvasiddhIzvaro bhUyAtkAlItulyo naro bhavet |

divA hAsyaratAM vIkSya yoginImelanaM labhet || 9-17 ||

latAM * * divA kRtvA trilakSAt triguNezvaraH |

divA * * tu saMvIkSya devatAdhyAnatatparaH || 9-18 ||

mAsatrayaprayogeNa devatAM pazyati dhruvam |

divA * * * mAsAdya samAliMgya mahezvari || 9-19 ||

prajapet sArdhalakSaM ca zivazaktisamo bhavet |

diva tAM * * * tu kRtvA lakSAnmahIpatiH || 9-20 ||

divA cArdrAM latAM vIkSya caMdrakoTisamaM japet |

divA saurIM ca saMvIkSya trilakSAcca trizaktidhRk || 9-21 ||

latAgraMthIzca saMvIkSya divA japati bhUpatiH |

sthAyIbhAvagatAM vIkSya japellakSamananyadhIH || 9-22 ||

trilakSajapato nUnaM rAjarAjasamo bhavet |

latAM puSpavatIM dRSTvA divA japati suMdarI || 9-23 ||

latAM kAmagatAM vIkSya divA japati zaMkaraH |

latAmaMDalago bhUtvA devatAdhyAnatatparaH || 9-24 ||

divArAtraM japeddevi bhuvanezIsamo bhavet |

latAM gAnaratAM dRSTvA tAmbUladAnamAcaret || 9-25 ||
tAMbUlarAgaM saMvIkSya lakSaM japati nityazaH |
divA nityaM japetkAlIM ziva eva na saMzayaH || 9-26 ||

latAtAmbUlavITIM tu gRhItvA bhakSya saMjapet |

svarodyuktAM tatra devi devatAvaramApnuyAt || 9-27 ||

zayyAbhaMgIlatAhastAddivA kRtvA tu * * |
gaMdharvavezamAsAdya sarvasiddhiM sa viMdati || 9-28 ||

p. 76) aSTamIsandhivelAyAmaSTottaralatAgRham |
vrajandivA japennityaM dinamAtraMmahezvari || 9-29 ||

pratyaSTamyAM carannevaM sarvasiddhIzvaro bhavet |

amAcaturdazIsandhau latAtrizatakAnvitaH || 9-30 ||

puSpaM pratyekaM dattvA tu cInaveSaparAyaNaH |

divA japenmahezAni yAvadanyA caturdazI || 9-31 ||

tAvajjapennirAtaMkaH sarvasiddhisamanvitaH |
nIlavezaM samAsAdya * * pUjanaM caret || 9-32 ||

trimAsaM kurute yastu suratezIM sa vai labhet |

tAM latAM bhogasAmagrIsamudyuktAM ca vIkSya ca || 9-33 ||

tridinaM ca divArAtri japAtsiddhIzvaro bhavet |

tAM nATyasthAM ca saMvIkSya devatAdhyAnatatparaH || 9-34 ||

rAtrau divA japeddevIM trailokyakavitAM labhet |

tAM vINAvAdyaniratAM vIkSya devIM divA japet || 9-35 ||

rAjarAjasamo bhUyAnnAtra kAryA vicAraNA |

mRdaGgavAdanaratAM latAM vIkSya divA japet || 9-36 ||

devatAM varadAM mAsapaMcakaiH pazyati dhruvam |

DiMDIravagatAM vIkSya latAM dinagataM japet || 9-37 ||

sarvasiddhIzvaro bhUtvA trailokyavijayI haraH |

latAM nATyagatAM vIkSya ahorAtraM japecchive || 9-38 ||

tArArUpo naro bhUyAnnAtra kAryA vicAraNA |

muktakezIM latAM dRSTvA divA lakSadvayaM japet || 9-39 ||

kAlItArAsamo bhUtvA chinnAsiddhiM sa vindati |

rahasyAtirahasyaM ca tava prItyA ca kIrttitam || 9-40 ||
AnaMdayogo devezi tava prItyA mayeritaH |
iti saMkSepataH proktaM vizeSAddivase zubhaH || 9-41 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde latAsAdhanakathanaM nAma navamaH
paTalaH || 9 ||

dazamaH paTalaH |

zrIdevyuvAca |

deveza zrotumicchAmi sUcitasya vinirNayam |

zrIziva uvAca |

zaktisaMgamataMtrAdau merusthAne ca sUcitam || 10-1 ||

tadeva kathyate yatnAtsAvadhAnamanA bhava |

sAmAnyatvena kathitaM vizeSaM zRNu sAdaram || 10-2 ||

pauSe mAghe bhAdrapade jyeSThe vA paramezvari |

kRSNe zukle'thavA devi kRSNapakSe vizeSataH || 10-3 ||

saptamyAM vA trayodazyAM navamyAmayudhe tathA |

SaSThyAmamAyAM devezi dhUmrodeti nabhaHsthale || 10-4 ||

pAte bhadrAdine vApi gaMDe zUle'thavA priye |

bharaNyAM kRttikAyAM ca tvArdrAyAM raudrage'pi vA || 10-5 ||

hastacitrA RkSagato dhUmro bhUyAnmahezvari |

adhikAra vihInena yatkRtaM yacca kAritam || 10-6 ||

tena yogena vA devi mahApApavazAdaya |

bhUmibhAravinAzArthaM dhUmraketurbhaviSyati || 10-7 ||

trivarSaM paMcamAsaizca SaSThinADIpalAni ca |

tattvasaMkhyAni devezi madhyadhUmro bhaviSyati || 10-8 ||

caturmAsottaraM devi zakraketurbhaviSyati |

ahiketustato bhUyAtsarpAkAro mahezvari || 10-9 ||
zakraketurloSTranibho ghaTaketustathAparaH |
pAdukAketuraparo hasaMtI saMjJikastataH || 10-10 ||

vyAghrapucchanibhazcaiva sarpapucchanibhastataH |
cinhAnyetAni devezi saMbhavaMti pade pade || 10-11 ||

zrIvidyAmaMDapaM kuryAttadA zAMtirbhaviSyati |

tasmAt tvidaM mahezAni gopanIyaM kalau yuge || 10-12 ||

ardhamadhyapUrNabhedAdbhedabAhulyamIritam |
evaM bhedena devezi trizataM paMca meravaH || 10-13 ||

p. 78) agni merurmahezAni vidhiH siddhipradAyakA |

saMpradAyakrameNaiva kartavyaM merusAdhanam || 10-14 ||

lobhAnmohAdbhayAddambhAdyadi kuryAnnarAdhamaH |
sarvasvaharaNaM kRtvA narake pAtayAmyaham || 10-15 ||

ghaTaketuryadA bhUyAt kuTumbaM tu vinazyati |

dhUmraketurmahezAni sa bhUpAlavinAzakRt || 10-16 ||

dhUmraketuryadA bhUyAt tatkuTumbaM tu varSataH |

yamAlaye praviSTaM syAnnAtra kAryA vicAraNA || 10-17 ||

vedabAhyo yathA devi sarvakarmabahiSkRtaH |

tathAyaM dvijabAhyaH syAnnAtra kAryA vicAraNA || 10-18 ||

kuTumbahA bhavetsohi prAyazcittena zudhyati |

tasya saMsargamAtreNa rAjyabhraSTo bhavedvibhuH || 10-19 ||

tasmAdyatnena devezi prAyazcittaM tu kArayet |

zuddho bhUyAttato devi nAnyathA nArakI dhruvam || 10-20 ||

zrImerurazmivijJAnAt trailokyavijayI bhavet |

ajJAnAtparamezAni yaH karoti narAdhamaH || 10-21 ||

sa pApiSTho durAcArI duHkhabhAgI bhaveddhruvam |

prAjApatyazataM kRtvA godAnAntaM tu viMzatiH || 10-22 ||

sahasraM bhojayedviprAn zuddho bhavati nAnyathA |

anyathA devadevezi saMhartA paramezvaraH || 10-23 ||

pratyaGgirA svayaM zAstA helayA hyAdyanAyikA |

brahmAstramapi devezi tatsaMhArAya nizcitam || 10-24 ||
saptavarSai randhravarSaiH sakezo nazyati dhruvam |
trimAsavedavarSaistu pRthvIpAlo vinazyati || 10-25 ||

varSeNa ca kalatraM ca paJca varSeNa kanyakAm |

svasAM tu Rtu varSeNa tatsaMsargAt RSikramAt || 10-26 ||

dIkSAyuktastu yaH kuryAttatphalaM tu kathaM zive |

vaktrakoTisahasraistu jihvAkoTizatairapi || 10-27 ||

mahimA varNituM zaktiH kathamatra kalau yuge |

kalau pApasamAkIrNe na merusAdhanaM matam || 10-28 ||

p. 79) nyAsameruryaMtrameruH kartavyaH kutracitpriye |

tAmasaM karma caitaddhi na kartavyaM hitecchunA || 10-29 ||

golokena samAlApAtgolokatvaM yathA bhavet |

ajJAtadvijasaMlApAtsa bhavedbrAhmaNAdhamaH || 10-30 ||

gopanIyaM gopanIyaM gopanIyaM niraMtaram |

gopanAtsiddhimApnoti gopanAt zivatAM vrajet || 10-31 ||

na deyaM paraziSyebhyaH kRpaNAyeti sundari |

dIkSAhInAya no dadyAdgopayenmAtRjAravat |
iti saMkSepataH proktaM rahasyaM zRNu cAparam || 10-32 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde ajJAtadurnimittaM nAma dazamaH
paTalaH || 10 ||

ekAdazaH paTalaH |

zrIdevyuvAca |

bhUkampAdikametaddhi sUcitaM tadvadAdhunA |

zrIziva uvAca |

rahasyamiti vijJAya noktaM devi mayA tava || 11-1 ||

idameva mahezAni uktaM koTivinAyake |

aSTAdazasahasraM tu ketusaMkhyA prakIrttitA || 11-2 ||

tanmadhye tu zataM cASTAdazasaMkhyA prakIrttitA |

etanmadhye mahezAni paMcAzatketavaH zive || 11-3 ||

sammArjanasamAkArA vRkSAkArAstathaiva ca |
zikhAkArasamApannAstathA hastakasannibhAH || 11-4 ||

tRNAkArAstathA kambusadRzAH kuTilAH zive |

vRkSamAtrasamAkArA ghaTAkArAstathA priye || 11-5 ||

ekaviMzaddinaM vyApya taddvayaM vA mahezvari |

mAsamAtraM tathA devi taddvayaM paramezvari || 11-6 ||

caturdikSu bhramantyeva divA vA codayo bhavet |

catuHpraharayogena rAtrau tUdayameva ca || 11-7 ||

ekavAraM dvivAraM vA tricatuHpaMcavArakam |

kramaketurmahezAni samudeti nirantaram || 11-8 ||

ekarUpaM ca vA devi bhinnarUpaM ca vA priye |

AbrahmakalpaparyantaM sarvarUpeNa vartate || 11-9 ||

dezabhaMgo bhavedAdau rASTrabhaMgo dvitIyake |

chatrabhaMgastRtIye syAccaturthe sarvapIDanam || 11-10 ||

paMcame devadevezi sarvatra bhUtasaMgamaH |

tritrimAsa krameNaiva paMcaSaDvarSayogataH || 11-11 ||

dhUmraketuryadA bhUyAttadA chatraM vinazyati |

eva vicArya yatnena zAMtikaM ca samAcaret || 11-12 ||

iti saMkSepataH prokto dhUmraketuvinirNayaH |

divA nakSatrapAtastu nakSatradarzanaM tathA || 11-13 ||

ahiketustathA devi divA colkApradarzanam |

paurNimAyAM naSTacandraH kArttikyAM tu vizeSataH || 11-14 ||

p. 81) saptaviMzatinakSatrayoge diGmaNDalaM tathA |

maNDalaM paMcabhUtAnAM saptarSINAM samAgame || 11-15 ||

amAyAM candrasaMdarzaH pralayasya tu kAraNam |

bhUkampaH pratimAhAsaH tadbhaMgastu tathaiva ca || 11-16 ||

ulkApAto divA rAtrau duzcinhAni mahezvari |

cinhAnyetAni dRSTvA tu kArayet svastivAcanam || 11-17 ||
mahotpAtAdikaM bhUyAnnAtra kAryA vicAraNA |
chatrabhaGgo rASTrabhaGgo mahAmArIbhayaM tathA || 11-18 ||

sarvathA saMbhavatyeva yena lakSaNamucyate |

moragaM tu samAsAdya mahAmlecchAMtakaM zive || 11-19 ||

proktastvazvapatirdevi zRNuSva gajanAyakam |

koMkaNAMtaM samAsAdya AgneyAntaM mahezvari || 11-20 ||

prokto gajapatirdevi zRNuSva naranAyakam |

A pUrvapazcima vyApya prokto narapatiH priye || 11-21 ||

sarveSAM lakSaNaM devi kathitaM zaMbhutANDave |

dinahorAbhidhaM cakraM pravakSyAmi samAsataH || 11-22 ||

rahasyAtirahasyaM ca gopyAdgopyataraM zive |

yasya vijJAnamAtreNa traikAlyagocaro bhavet || 11-23 ||

madbhakto'si mahAdevi tasmAttatte vadAmyaham |

kAlakauzalacakraM ca viSNukauzalameva ca || 11-24 ||

buddhakauzala cakraM ca rudrakauzalakaM tathA |

dinakauzalacakrasya kalAM nArhanti SoDazIm || 11-25 ||

dinakauzalacakrasya vijJAnI ziva eva hi |

rekhAH paMca samAsphAlya tato daNDAhatAstathA || 11-26 ||

dikkramaH kathito devi vidiGmArgakrameNa ca |

evamaSTArgalaM cakraM mukhaM prAcyA samAcaret || 11-27 ||

pratIcyAM pAdayugmaM syAdveda hastAbhidhaM tataH |

golavadbhramaNAdeva tattannAmnA mukhaM bhavet || 11-28 ||

nityAH SoDaza devezi pratirekhAgatakramAt |

paMcAzanmAtRkAvarNAH sarvAGge yadi nizcitAH || 11-29 ||

p. 82) yoginInAM catuHSaSTiryathA rekhAkrameNa tu |

SaTpaMcAzadgaNezAzca dIparekhAsamAzritAH || 11-30 ||

kezavAdyA vaiSNavAzca kArake pariniSThitAH |

kArakANAM ca saMkhyA vai bhuvanAkhyA prakIrttitA || 11-31 ||

Adhipatye mahAdevazrIkaNThAH parikIrttitAH |

caturddazagrahAstatra carAcaravibhedataH || 11-32 ||
carAcaravibhedena caturdhA zazibhAskarau |
aSTAviMzati RkSAni parivartakrameNa ca || 11-33 ||

carAcaravibhAgena tatra rAziM samAcaret |

evaM tArtIyayugme tu netrayugmaM prakIrttitam || 11-34 ||

pAdasthAne tu sarvajJaH tridhA bhedaH prakIrttitaH |

sAmmukhyaM vAmadakSazca tridhA bhAgaH prakIrttitaH || 11-35 ||

ahorAtreNa devezi graha-RkSaparikramaH |

dve dve nADImabhivyApya sRSTisaMharaNaiH zive || 11-36 ||

sRSTimArgeNa sUryaH syAtsaMhRtyA candra eva ca |

sthUlakrameNa sarvaze prAtarArabhyate raviH || 11-37 ||

sandhyAmArabhya candraH syAdrAtrau vyatyaya eva ca |

viMzatsAhasrakaM saptazatI SaTtriMzadIritAH || 11-38 ||

dinakauzalakaM vyApya parivartakramAcchive |

phalaM yacchanti vizvezi mamAjJApAlakAH sadA || 11-39 ||

anyeSAM tu mate devi savyamArgeNa vartanam |

athASTAdazasiddhAnta upAdhiH parikIrttitA || 11-40 ||

kvacitkadAcinmilata bhAgyayogAnna saMzayaH |

sUryodaye tu yo vAraH sa grahaH prAtareva tu || 11-41 ||

kerale vyaMkaTezAkhye satAM mataM mayeritam |

zrIdevyuvAca |

deveza zrotumicchAmi rahasyaM pUrvasUcitam || 11-42 ||

zrIziva uvAca |

kSamApAlo bhaveddAsaH kavirmUkastathA bhavet |

dInatvatAM dhanAdhIzo vahniH zaityatvatAM vrajet || 11-43 ||

p. 83) maheMdro'pi virUpaH syAnmedhAgrahaNajaM phalam |

sAmrAjyamedhAdIkSAyAH phalaM proktaM padAntakam || 11-44 ||

naratvaM durlabhaM loke vidyA taMtra sudurlabhA |

vidyAnyAsAccintanAcca brAhmaNatvaM bhavecchive || 11-45 ||

yugAnAM tu sahasraM hi tapasyA yena vai kRtA |

mahAvidyAkrameNaiva paMcaSoDhAkrameNa ca || 11-46 ||

zaktinyAsakrameNaiva nityapUjAkrameNa ca |
evaM tapasyAsaMyuktaH pRthvIpatipadaM labhet || 11-47 ||

SaTpaMcakoTicAmuNDApaMcAzadgaNapairyutam |
gadAvartasamAkrAMtaM vArAhyApi vibhUSitam || 11-48 ||

aSTottarazataM devi vArAhIgaNasaMkulam |

yoginInAM catuHSaSTikulai saMbhUSitaM padam || 11-49 ||

kAlihRdayamadhyasthamindraprasthAbhidhaM padam |
sAmrAjyamedhAdIkSAdyairbhUSito yo yuge yuge || 11-50 ||

tasya hastagataM devi padaM bhavati nAnyathA |

tArkSyagrahe mahezAni sAmrANmedhAyutazcaret || 11-51 ||

manorathamayI siddhiryasya haste virAjate |

icchAsiddhistathA tArA yasya rAjati sarvadA || 11-52 ||

kAlI vA sundarI vApi prasannA yasya cAsti ca |

aMkamaMtraiH patAkAdyaiH kAlIM vindyAtpadAdikaiH || 11-53 ||

pUrvoktarakSakAstasya kSINazcennazyati dhruvam |

pUrvaM kRtayuge devi devadaityapuro gamAH || 11-54 ||

AcAryadvitayaM kRtvA rAjyabhogaM ca cakratuH |

bhaumAcAryo guruH prokto zukro daityaguruH smRtaH || 11-55 ||

mRtasaMjIvinI vidyA parakAyapravezanam |

paravidyAkarSaNaM ca tvastrAMNAM zatakaM tathA || 11-56 ||

trayastriMzatkoTisaMkhyA mAyA yaddhastagAH zive |

tatprItyA tu mahezAni kSaNamekaM tu yAcitaH || 11-57 ||

asminkSaNe jAyamAnAH sarve siddhA bhavanti ca |

iti jJAtvA mahezAni kSaNaM dattaM mayA tadA || 11-58 ||

p. 84) tatkAle ye ca vai jAtAste siddhAH siddhidAyakAH |

caturazIti siddhAzca jAtAstatkAlagocarAH || 11-59 ||

nava nAthAstathA jAtA zukrajanmakSaNe zive |

yasya janmakSaNe devi jAtA ye siddharUpiNaH || 11-60 ||
pratyakSarUpiNastasya kA kathA paramezvari |
tasya nigrahakartA tu bhUmau ko'sti surAlaye || 11-61 ||

nAgAlaye vA devejye trailokyavijayI sa tu |

tasya nigrahakartA tu na ca ko'pyasti bhUtale || 11-62 ||

trailokyavijayAstraM ca yasya haste virAjate |

nAmapArAyaNaM devi maMtrapArAyaNaM tathA || 11-63 ||

khecarIsaMyuto yo hi stambhakaH zazisUryayoH |

kAlAnalAstrasaMpannastasya nigrahakArakaH || 11-64 ||

|| iti zrukraH ||

zivapUjArataH pUrvaM triMzadvarSayugaM zive |

pratyahaM karavIreNa pUjAkArI mahezvari || 11-65 ||

tadA tuSTo mahAdevastvidaM vacanamabravIt |

nidhInAM navakaM dattamindrAdyAstava pUjakAH || 11-66 ||

kuberastvaM surAdhyakSa mama hAri sadA vasa |

nidhinAthasya padavI tadA dattA mayA zive || 11-67 ||

dhanadA kamalA saukhyaM lakSIstatra vasetsadA |

narazAstAstathA yakSA yakSiNyaH kinnarIgaNAH || 11-68 ||

tava sevAM prakurvanti dhanezastvaM bhava priya |

evaM tasya varo datto mayA pUrvaM mahezvari || 11-69 ||

tasya vigrahakartA tu ko vA bhuvanamadhyagaH |

zrIkrodhamaNDalaM devi yasya haste virAjate || 11-70 ||

maMtramaMdalakaM devi mahAmaNDalameva ca |

vidyAmaMDalakaM vApi pArSanmaNDalameva ca || 11-71 ||

SaTzAMbhavayuto yo hi tasya nigrahakArakaH |

mahAkrodhAMkuzenaiva dhanadAM tADayecchive || 11-72 ||

dhanadA tu kuberasya nidhanatvaM kariSyati |

|| iti dhanezaH ||

mahAkAlyA mahezAni tArttIye sthApitastu yaH || 11-73 ||

p. 85) tArtIyanetrarUpastu vahnirityabhidhIyate |

vIrabhadrastathA rudraH krodhaH kAlAntaketi ca || 11-74 ||

pralayAdvastu saMhAraparyAyAH kIrttitA mayA |

yadyatkAryaM samAyAti tattadrUpeNa vartate || 11-75 ||

zrIkAlyAH preryamANastu tattadrUpeNa vartate |

kAlIkrodhAtsamudbhUto devatAmukhavAcakaH || 11-76 ||

tasminhutaM ca dattaM ca sarvaM bhasma bhaviSyati |

sa eva vADavAgnistu tattatkAryavazAdbhavet || 11-77 ||

agniM vinA mahezAni na devi na mahezvaraH |

kITAdbrahmANDaparyantaM vahniH sarvatra tiSThati || 11-78 ||

kAlI zmazAnasaMbhUtaH kAlyA netre niyojitaH |

saMhArasamaye prApte kAlyA saMpreritaH zive || 11-79 ||

brahmANDaM bhasmasAtkRtvA jvAlAmAlAsamAkulaH |

anAdisRSTirUpAyA mahAmAyAdyacaNDikA || 11-80 ||

zrImatsiddhi karAlI yA guhyakAlI tu yA parA |

kAlakAlI tu yA proktA mahAkAma kalA tu yA || 11-81 ||

svarAjadaMte devezi brahmANDaM sthApitaM tayA |

anaMtakoTibrahmANDaM rAjadaMtaM virAjate || 11-82 ||

danteSu rAjate yasmAdrAjadantAviti smRtau |

trailokyacarvakau dantau mama kAryakarAvubhau || 11-83 ||

* * * * * * (?) devi rAjadantau prakIrttitau |

icchAzaktayA tayA devi sRSTirutpAditA punaH || 11-84 ||

tadA vahnirmahezAni svanetre sthApitastadA |

aSTottarazataM vahneH SoDazottaragaM raveH || 11-85 ||

zataM SaTtriMzatsomasya netratritayakaM zive |

etA eva kalA devi zAMbhavAdau prayojitAH || 11-86 ||

IdRgvidho mahezAni vahnirukto mayA tava |

tasya nigrahakartA ca brahmANDe ko'sti vai priye || 11-87 ||

navacakropAsako yaH SaTcakropAsako'pi vA |

sAmrAjyazAMbhavAkrAntaH paMcAstrasAdhane rataH || 11-88 ||

p. 86) dazavidyAmayI yA tu tasyopAsanatatparaH |

divArAtrivyatyayaM tu yaH kartuM bhavati kSamaH || 11-89 ||
sa vahnernigrahe zakto bhavatyeva na cAnyathA |

|| iti vahniH ||

SaTtriMzatkoTidevAnAmIzvaro yastu kIrttitaH || 11-90 ||

sa devendra iti khyAto mahAsAmrAjyadAyakaH |

nikharvavAraM devezi zrIvdyopAstitatparaH || 11-91 ||

tataH zAMbhavasaMpanno medhAdIkSAyutastataH |

razmimaNDalasaMyuktaH sAmrAjyamaNDalAnvitaH || 11-92 ||

cakrapArAyaNAsakto yatrapArAyaNAnvitaH |
kalAyugmasahasrANAM kAdihAdikrameNa ca || 11-93 ||

etadyuktatapasyA tu yena yamayugaM kRtA |

tenedaM prApyate devi padamiMdrAbhidhaM zive || 11-94 ||

paMcaratnaM samAsAdya vIrasAdhanatatparaH |

tasya hastagataM devi padamindrAbhidhaM bhavet || 11-95 ||

navakoTimahAmaMtraiH samAkrAntaM zive padam |

tadrakSakA mahezAni paMcAzatkoTibhairavAH || 11-96 ||

krodharAjastu zarabhastathA pratyaMgirA zive |

anaMtakoTi maMtraizca rakSitaM tatpadaM zive || 11-97 ||

prAptistvindrapadasyAtha nAlpasya tapasaH phalam |

tasya nigrahakartA tu ko'sti kvApi carAcara || 11-98 ||

krUrakarmakaratvAcca rAkSasAH parikIrttitAH |

brahmANDagolake yA ca yA kAcijjagatItale || 11-99 ||

samastAH siddhayo devi yasya hastagatAH sadA |

sa eva nigrahaM kartuM zakto bhavati nAnyathA || 11-100 ||

aJjanakhecarIkhaDgavetAlaguTikAstathA |
candrasUryasahasrANi sAdhako yaH karoti ca || 11-101 ||

sundarIkAlikAtArA yasya gehagatAH sadA |

devendranigrahe zaktistasya vai bhavati dhruvam || 11-102 ||

narAya na prakAzyaM syAt kimanyadbahujalpanam |

iti saMkSepataH proktaM kAlikAsiddhilakSaNam || 11-103 ||
p. 87) kAdihAdimatatvena proktametanmayA tava |
gopanIyaM gopanIyaM svayoniraparA yathA || 11-104 ||

zrIdevyuvAca |

deveza zrotumicchAmi jIvakrIDAvinirNayam |

zrIziva uvAca |

zRNu devi pravakSyAmi jIvanyAsavinirNayam || 11-105 ||

jIvanyAsaH paJcadhA syAt bIjasrodakSasAgarAH |

kAlAnalakrameNaiva proktaH paJcavidhaH zive || 11-106 ||

gauDakeralakAzmIrakramabhedena pArvati |
devadehe ca puttalyAM SaSThI candravinirNayaH || 11-107 ||

gANape caiva puttalyAM zivaliGge ca pArvati |

pArthivAbhidhadurgAyAM yathAliGgena yojayet || 11-108 ||

kAzmIrAkhyakrame devi SaSThI vahnivibhUSitA |

bahutvAdikrame devi krama eSaH prakIrttitaH || 11-109 ||

gauDe dvayaM tu sAmyaM syAdityAgameSu gopitam |

keralAkhyakrame devi SaSThI candreNa yojayet || 11-110 ||

dvitrirudrazatAnte tu grahadoSanivAraNe |
viMzaddinaM pUjayeddhi sarvagrahanivAraNam || 11-111 ||

ekaviMzati saMpUjya sarvapApaiH pramucyate |

zataM saMpUjayennityaM sarvakAmAMllabhecchive || 11-112 ||

sahasrapUjAddevi durbhagaH subhago bhavet |

sahasratritayaM pUjya sarvakAryakSamo bhavet || 11-113 ||

evaM lakSAdi saMpUjya sarvasiddhIzvaro bhavet |

ekadvitrividhau devi koTizo'naMtarUpadhRk || 11-114 ||

zivaH saMvyApya sarvaM tu sadA tiSThati pArvati |

zivasya prANA ityuktvA pArthive prANayojanam || 11-115 ||

ekaH zivo mahezAni prANAstu bahavaH zive |

zivasya prANAH sarvatra saMvyApya santi pArvati || 11-116 ||

pArthiveSu zivaH prANAH SaSThI candrasamAGkite |

kAzmIrAkhyakramo devi kathitaste mayA tava || 11-117 ||

p. 88) zivo dAtA zivo bhoktA zivaH kartA niraMjanaH |

bhasmoddhUlitasarvAGgo rudrAkSabhUSitAGgakaH || 11-118 ||

saptaviMzatirudrAkSAH sandhyAvatparikIrttitAH |
uktasaMkhyA mahezAni snAnavatparikIrttitAH || 11-119 ||

sahasramaNayo devi naimittikavidhau zive |

dvitrivedasahastrANi rudrAkSAndhArayetpriye || 11-120 ||

rudrAkSamaNDalaM kRtvA tUttamAdhamamadhyamaH |

rudrAkSabhUSito bhUtvA rudratulyaH kSaNAdbhavet || 11-121 ||

mastake triguNA dhAryA dviguNA bAhumaNDale |

yathecchayA ca sarvAGge uktasaMkhyA zrutau zive || 11-122 ||

rudrAkSadhAraNe devi vizeSAnniyamadvayam |

strIdviSTaM guruzaptaM ca tatsaMsargaM na kArayet || 11-123 ||

netratrayAtsamutpannA rudrAkSAstrividhAH kalau |

dhanazrIrdakSanetre syAt moraGgo'nyastu cottaraH || 11-124 ||

tRtIyastu malAkI syAnnAgnirdahati tattanum |

rudracakSuH samAkhyAtA rudrAkSAH parikIrttitAH || 11-125 ||

rudrAkSamaMDape sthitvAM yaM yaM maMtraM japecchive |

sa eva siddharupaH syAnnAtra kAryA vicAraNA || 11-126 ||

jIrNe sUtre punaH sUtra kRtvA sthApya japenmanum |

rudrAkSamaNDape devi pUjayet siddhihetave || 11-127 ||

rudrAkSamaNDape devi dvidhA zrIcakrapUjanAt |

zrIvidyArUpamApnoti nAtra kAryA vicAraNA || 11-128 ||

dvividhatvaM pravakSyAmi yena deva mayo bhavet |

catvAri zivacakrANi zakticakrANi paMca ca || 11-129 ||

bhUpuraM guNarekhA ca nAgayugmadalAni ca |

tato nAgadalaM devi zivacakrANi pArvati || 11-130 ||

manvasraM digyugAsraM ca tvaSTAsraM ca trikoNakam |

paMca vai zakticakrANi dakSiNAmUrtisaMmate || 11-131 ||
AnaMdabhairavamate zaktizaivAni saMzRNu |
catuH zrIkaNThasaMyuktaiH zivarAmAdi paMcabhiH || 11-132 ||

p. 89) parasparaprabhinnAbhiH zaMbhoH prakRtibhirnava |

zrIcakrasiddhimetaddhi zivazaktyAtmakaM mahaH || 11-133 ||

aMtargRhaM bahizcaiva gRhaM tu dvividhaM zive |

caturdazAraparyantamantargRhamidaM zive || 11-134 ||

bahirgRhaM tvaSTadalAdbhUpurAntaM prakIrttitam |

caturdazAraparyantaM zrIcakraM parikIrttitam || 11-135 ||

yathA parApUjanAdau bindumadhye gRhe zive |

tathAntargRhamityuktaM sarvadevaprapUjite || 11-136 ||

rudrAkSamaNDape devi cakradvayavicAraNAt |

sarvasiddhIzvaro bhUyAnnAtra kAryA vicAraNA || 11-137 ||

tatra pITakramaM jJAtvA yaMtre zaktiM prapUjayet |

zrIdevyuvAca |

pIThakumbhaM prapUjyaM syAttanme vada mahezvara || 11-138 ||

adho madhye'thavA pUjyaM kutra vA paramezvara |

athavopari pUjyaM vA kutra pUjA vidhIyatAm || 11-139 ||

tanme vada mahezAna yadyahaM tava vallabhA |

zrIziva uvAca |

pIThaM tu pAtramityuktaM pIThopari prapUjayet || 11-140 ||

yantraM caitanyamityuktaM pIThaM cAdhastanaM bhavet |

yaMtrAdhaH pUjayetpIThaM yaMtraM mUrttimayaM zive || 11-141 ||

mUrteravo bhavetpIThaM mUrttiH pIThopari priye |

yaMtrAdhaH pUjayetpIThaM yaMtraM mUrtau nidhApayet || 11-142 ||

atra kecidapIcchanti yaMtramadhye prapUjanam |

zubhayoge zubhadine mahAparvaNi sAdhakaH || 11-143 ||
candrasUryagrahe vApi yaMtrasthApanamAcaret |
yantra saMsthApanaM kAryaM candrasUryagrahe zive || 11-144 ||

tadyaMtrasthA devatA tu sahasA varadAyinI |

candrasUryagrahe devi yadyatkarma karoti ca || 11-145 ||

tattadakSayyamAyAti vidyArAjJIprasAdataH |
pramAdAnmohato vApi pavitrAropaNaM priye || 11-146 ||

p. 90) adhivAsanakaM karma na jAnan pUrvameva cet |

tadA kiMvA mahezAni tatkAryaM vA vilopayet || 11-147 ||

lopane cet mahatpApaM kAryaM yatnena zAMkari |

prathamaprahare devi hyadhivAsanamAcaret || 11-148 ||

tRtIyaprahare devi pavitrAropaNaM caret |

praharadvayabhedena hyadhivAsanamIritam || 11-149 ||

kAryalopo na kartavyaH sarvathA hitamicchatA |

yaMtrAdhivAsanaM kAryamevameva prakIrttitam || 11-150 ||

karmalope kriyamANe devatAzApamApnuyAt |

iti saMkSepataH proktaM saMpradAyatraye zive || 11-151 ||

purazcaryA tridhA devi tatkramaM zRNu pArvati |

dazAMgA kerale proktA kAzmIre vasusaMjJitA || 11-152 ||

paMcAMgA gauDamArge tu sAmrAjyamaNDalaM zRNu |

kAlikAzApamuktistu mahAkAlazca kullukA || 11-153 ||

tadgAyatrI sparzamaNistArA tasyAzca kullukA |

akSobhyavaTukau devi tathA caikAkSarI zive || 11-154 ||

tadgAyatrI tathA bAlA tadgAyatrI tathaiva ca |

kAmavidyAmaNiH kIlAstadvidyA kullukA tathA || 11-155 ||

svarNezaH kSetrapAlazca tathaiva chinnamastakA |

ekArNA tasyA gAyatrI tataH kAmakalA zive || 11-156 ||

tadgAyatrI madhumatI tathA padmAvatI zive |

saMpatsarasvatI caiva navArNA vijayA tathA || 11-157 ||

dvAtriMzadakSarI vidyA trailokyavijayA tathA |

helakA cArdrapaTikA mRta saMjIvanI tathA || 11-158 ||
* * staMbhakarI vidyAH tathA karNapizAcinI |
amarI kuNDalI devi tathA vai kAlasundarI || 11-159 ||

karNacaNDA tathAmogha karNAkhyA tu pizAcinI |

mahAkarNapizAcI ca tathA svapnezvarI zive || 11-160 ||

svapnavArAhikA vidyA dvitIyA mahatI zive |

zrImahAraktacAmuNDA tripurAkarSaNI tathA || 11-161 ||

p. 91) ciTividyA mahezAni kamalAkSI tataH param |

AkarSaNI mahAkAlI zrIvidyAkarSiNI tathA || 11-162 ||

vazIkaraNakAlI ca mahAnIlasarasvatI |
nakulI bagalA vidyA tadgAyatrI ca kullukA || 11-163 ||

vasordhArA ca dhUmezI tathA mAraNakAlikA |

trailokyamohinI caiva zrImahAkulahAriNI || 11-164 ||

suratezI kinnarI ca raMjakI tadanaMtaram |

vazIkaraNatAmbUlA dvitIyA'pi tathaiva ca || 11-165 ||

kSiprakAminikA vidyA kAlI kAmakalA zive |

tAmbUlAkarSiNI vidyAM dvitIyA mukhamArjanI || 11-166 ||

zrIvidyA kullukA caiva dIpinI ca mahezvarI |

kAlikA dIpinI caiva mahAmaNDalameva ca || 11-167 ||

khaDgavAraNavidyA ca bhUtarudramahAMkuzA |
pratyaMgireti devezi sAmrAjyamaMDalaM matam || 11-168 ||

japapUjA japazcaiva dhyAnaM caiva tathA japaH |

punardhyAnaM balizcaiva naivedyaM ca visarjanam || 11-169 ||

kumArIpUjanaM homo balidAnaM ca bhojanam |

punarjapo mahezAni sAmrAjyamaMDalakramaH || 11-170 ||

krUracaMDA krUrajaTA ugraghaMTA tathaiva ca |

ete vijJAya yatnena sAdhayetsiddhisAdhanam || 11-171 ||

japena puTitA pUjA pUjayA puTito japaH |

anyonyapUjanaM kRtvA sAdhayedvIrasAdhanam || 11-172 ||

pUjAyuktaM japenmaMtraM na maMtraM kevalaM japet |

japayuktA bhavetpUjA na pUjA kevalA bhavet || 11-173 ||

iti saMkSepataH proktaM gopanIyaM svayonivat |

zrIdevyuvAca |

deva deva mahAdeva vizvasiddhiparAyaNa || 11-174 ||

carAcaramidaM sarvaM tvanmukhAdvizrutaM mayA |

idAnIM vada sarvajJa bhUtAnAM nigraho mahAn || 11-175 ||

zrIziva uvAca |

rahasyAtirahasyaM ca kathaM tatpravadAmyaham |

tathApi tava saMprItyA kathyate zRNu sAmpratam || 11-176 ||

p. 92) bhUtAH pretAH pizAcAzca rAkSasA brahmarAkSasAH |

bhUtapretagrahAzcaiva tathA bAlagrahAH zive || 11-177 ||

kazmalAzca nivAtAzca DAkinI zAkinI tathA |

yAkinI rAkinI caiva hAkinI lAkinI tathA || 11-178 ||

kAkinI pramukhAzcaiva jhoTiMgA bhairaveritAH |

rudragrahAstathA viSNugrahA brahmagrahAstathA || 11-179 ||

kRtyagrahAstathA devi kuSmANDA yakSiNIgrahAH |

kAmagrahA madonmAdA stathonmattagrahAH zive || 11-180 ||

jalagrahAstathA sarve grahAzca kaTapUtanAH |

skandagrahA mahezAni tathA vainAyikAH zive || 11-181 ||

dhanagrahAstathA devi tathA devagrahA api |

yakSAzca dAnavA daityA vetAlAH kinnarIgaNAH || 11-182 ||

bhUtinyapsarasazcaiva tathaiva nAginIgrahAH |

evamAdigrahAdInAM nAzanaM yena jAyate || 11-183 ||

zUlinI zarabhazcaiva zivapaMcAkSarI tathA |

navadurgA bahirbaMdhastathAntarbandha eva ca || 11-184 ||

subhrUNazca mahezAni tathaiva khaDgavAraNaH |

mahAvidyAmaMDalaM ca mahAmaMDalameva ca || 11-185 ||

hanumAnbhairavazcaiva baTukaH krodhabhairavaH |

pratyaMgirA vIrabhadrastrailokyavijayA tathA || 11-186 ||
nArasiMho mahezAni mahAzarabhazUlinI |
caMDakAlI bhadrakAlI proktA rudramahAMkuzA || 11-187 ||

mahApAzupatAstraM cAghorAstraM ca tathaiva ca |

ete maMtrA mayA proktA zAbaradvayayogataH || 11-188 ||

brahmarAkSasavetAlakRtyAdau khaDgavAraNe |
brahmA viSNustathArudraH pretApasmAranAzane || 11-189 ||

yAtudhAnavinAze tu tathA kiMpuruSAdike |

zarabho hanumAndevi virUpAkSoGgirA api || 11-190 ||

bhUtapretapizAcAdi krUragrahanivAraNe |
zUlinI navadurgA ca tathA paMcAMguliH priye || 11-191 ||

p. 93) kuSmANDaDAkinInAze pretApasmAranAzane |

vIrabhadraH zivaH proktaH sarvanAze tu tadgaNAH || 11-192 ||

sarveSAM nAzane zAntau prItAvapi mahezvari |

mahAvidyAmaNDalaM ca bandhadvayasamanvitam || 11-193 ||

mahAvidyAmaNDalena kiM tadyanna kare sthitam |

gopanIyaM gopanIyaM gopanIyaM prayatnataH || 11-194 ||

rahasyAtirahasyaM ca svayoniraparA yathA |

iti sa.kSeptaH proktaM kimanyacchrotumicchasi || 11-195 ||

zrIdevyuvAca |

deveza zrotumicchAmi rahasyamaparaM vada |

zrIziva uvAca |

AvezaM bhairavAdInAM nigraho yena jAyate || 11-196 ||

tenaiva zakyate kartuM nAnyathA zAMkaraM vacaH |

tanmUlavidyAyogena kiMvA sidhyati pArvati || 11-197 ||

nRsiMhAnAM bhairavANAM tathA hanumadAdike |

zrIvIravAyuputreNa khaDgavAraNataH zamaH || 11-198 ||
raktapabhairavAdInAM zAstA zrIbhairavezvaraH |
dAminInAM tatheSTAnAM maheSTAnAmapi priye || 11-199 ||

nigrahe vIrakAlI tu kimanyacchrotumicchasi |

zrIdevyuvAca |

atha vai kullakotpattiM kathayasva mamAdhunA || 11-200 ||

zrIziva uvAca |

rahasyamapi devezi kathyate zRNu sAmpratam |

kullukA ca tathA seturmahAsetustathaiva ca || 11-201 ||

nirvANaM kuNDalI SaSThI sarvotpatiM zRNu priye |

vidyAnAM kulapUjyatvAtkullukA tena kIrttitA || 11-202 ||

vidyAsaMbaMdhidoSANAM bhakSayitrI yataH zive |

teneyaM kullukA nAma kAlinityA tRtIyakA || 11-203 ||

kullaiva kullukAnAmnI nIlA nIlasarasvatI |

vidyAsiddhyarNave devi yena pAraM pragacchati || 11-204 ||

tena seturmahezAni vidyAmArgaH prakIrttitaH |

mahAvidyApti sandarzI mahAseturmahezvari || 11-205 ||

p. 94) mahAvidyArNavasyAtha caitanyasya pradarzakaH |

mahAseturmahAdevi mahAvidyAsvarUpadhRk || 11-206 ||

devatAyAstu nirvANaM caitanyaM yacca kIrttitam |

nirvANaM kathitaM bhadre vidyAvAkmAtRkArNakaiH || 11-207 ||

nirvANaM paramezAni setuzcaraNarUpadhRk |

nirvANaM tu mahezAni parabrahmAtmatA zive || 11-208 ||

caturthaM kathitaM bhadre vidyAcaraNamIritam |

paMcamI kuNDalI devI yathAvadavadhAraya || 11-209 ||

mUlAdhArAdvilAntaM ca viSatantusvarUpiNIm |
sarvadevasvarUpAJca sarvavarNapradIpinIm || 11-210 ||

mahAkuNDalinIM devImamarI kuNDalIM parAm |

prathamaM kAlikAdevyAH kullukA paJcamI parA || 11-211 ||

kAlI kUrcaM vadhU mAyA phaDaMtA parIkIrttitA |

tArAyAstryakSarI nIlA chinnA cASTAkSarI bhavet || 11-212 ||

vajravairocanI ye ca ante varma prakIrttitam |

haistraM bIjaM tu bhairavyAH kullukA parikIrttitA || 11-213 ||

zrImattripurasundaryAH kullukA dvAdazAkSarI |

vAgbhavaM kAmarAjaM ca lajjAM ca tripurezi ca || 11-214 ||

bhagavati tataH svAhA kullukAM tripurAmanoH |

anyAsAM praNavaM tArA kUrceti tryakSarI matA || 11-215 ||

aghorazca virUpAkSaH chinnAyA dvAradevatAH |

krameNa kullukAdInAM RSayaH parikIrtitAH || 11-216 ||

chandaH svasvadevatAyA bIjazaktyAdikaM tathA |

purazcaryAdikaM devi kartavyaM svasvamUlavat || 11-217 ||

mahAkuNDalinIM vakSye sarvataMtreSu gopitAm |

praNavaM ca tathA jU/ saH kAlamUrtipadaM tataH || 11-218 ||

kAlaprabodhinIpadaM kAlAtItepadaM vadet |

kAladAyinizabdAnte kapAlapAtradhAriNi || 11-219 ||

amarIti kuNDalini jU/ saH vaJcatrayaM tathA |

so'haM svAhA mahezAni mahAkuNDalinI manuH || 11-220 ||

p. 95) ciMtayetkuNDalIM devIM mUlacUlinivAsinIm |

tadadhaH kAmarAjaM ca sA proktA sparzasundarI || 11-221 ||

mahAkAmakalArUpAM kAkinImUrdhni saMsthitAm |

setvAdikaM pUrvamuktaM kiM bhUyaH zrotumicchasi || 11-222 ||

zrIdevyuvAca |

deveza zrotumicchAmi pUrvoktaM yadrahasyakam |

zrIziva uvAca |

kiM tadrahasyaM devezi prakAzaya mamAdhunA || 11-223 ||

zrIdevyuvAca |

mahAkAlAdinityAnAM nirNayadvitayaM vada |

zrIziva uvAca |

mahAkAlaM samArabhya nityAnAM nirNayaM zRNu || 11-224 ||

mahAkAlo mahAbhImaH pralayAnalasannibhaH |

kAlImAyAsamudbhUtaH kAlImAnasikaH zivaH || 11-225 ||

mahAkAlaH parazaMbhuH parAtItaguNAkaraH |

tasya maMtraM pravakSyAmi yena rakSyaM jagattrayam || 11-226 ||

kUrcayugmaM mahAkAla prasIdeti padadvayam |

lajAyugmaM vahnijAyAsaMyuktaH SoDazArNakaH || 11-227 ||

SoDazArNA yathA mukhyA sarvaMzrIcakramaNDale |

tathAyaM sarvakAlISu mahAkAlaH prakIrtitaH || 11-228 ||

kAlikA'sya RSiH prokto virATchandaH prakIrttitam |

devatA tu mahAkAlaH sarvarUpI niraMjanaH || 11-229 ||

kUrcaM bIjaM tathA mAyA zaktiratra prakIrttitA |

svAhA kIlakamuddiSTaM kAlyarthe viniyogatA || 11-230 ||

mAyayA tu SaDaMgAni dhyAnaM zRNu varAnane |

koTikAlAnalAbhAsaM caturbhujaM trilocanam || 11-231 ||

zmazAnASTakamadhyasthaM muNDASTakavibhUSitam |
paMcapretasthitaM devaM trizUlaM DamaruM tathA || 11-232 ||

khaDgaM ca kharparaM caiva vAmadakSiNayogataH |

bibhrataM sundaraM dehaM zmazAnabhasmabhUSitam || 11-233 ||

p. 96) nAnAzavaiH krIDamAnaM kAlikA hRdayasthitam |

lAlayantaM ratAsaktaM ghoracumbanatatparam || 11-234 ||

gRdhragomAyusaMyuktaM pheravIgaNasaMyutam |
jaTApaTalazobhADhyaM sarvazUnyAlayasthitam || 11-235 ||
sarvazUnyaM muNDabhUSaM prasannavadanaM zivam |
bhAvayetparamezAni ratiyaMtraM tu paJca ca || 11-236 ||

trikoNasaMjJA yoniH syAttaccakraM kAlacakrakam |

yonau vA hRdaye bhAle kAminyAH stanamaNDale || 11-237 ||

mahAkAlaM yajeddevaM paJcAvaraNasaMyutam |

trikoNe pUjayeddevi trikoNaM kAlikAdikam || 11-238 ||

SaDdale tu SaDaMgAni nAbhau dikzaktayo matAH |

hRdaye dvAdazAdityAH kaMThe SoDazanityakAH || 11-239 ||

dvipatre paramezAni kAlakAlIM prapUjayet |

* * * devi tAM devIM pUjayedvibhUm || 11-240 ||

zaktiM svAbhimukhIM kRtvA pUjayetkAlikAM parAm |

mUlAdhArAd dvipatrAntaM yathA cakrANi kArayet || 11-241 ||

pUjayetparamezAni gurupUjApuraHsaram |
pAtrAsAdanakaM kRtvA kAlIvat paripUjayet || 11-242 ||

evaM pUjAM vidhAyA'tha lakSasaMkhyaM japecchive |

taddazAMzena havanaM karavIraprasUnakaiH || 11-243 ||

svayaMbhuvAktairvIjAktaiH kAraNAktaizca vA hunet |

nityaM naimittikaM kAmyaM kAlIvat sarvamAcaret || 11-244 ||

antardhAnakarI kAlI vidyAyA vidhirucyate |

mUrttiM dhyAnoditAM dhyAtvA sarvAvayavazobhitAm || 11-245 ||

mUlAdhAre gaNapatiM liGge gaNapavallabhAm |

nAbhau baTukanAthaM ca hRdi baTukavallabhAm || 11-246 ||

kaNThe uDyAnapIThaM ca bhruvi pradIptamaMgalAm |

lalATe karavIraM ca alake kSetrapAlakam || 11-247 ||

mUrdhniM vai kAlikAM caiva caturthyatAM prapUjayet |

mUrdhniM vyomaizvaryAmbAM ca lalATe khecarIM tathA || 11-248 ||

p. 97) bhUmadhye dikcarIM caiva hRdaye gocarIM tathA |

nAbhau ca bhUcarIM caiva liMge ca khagamUrtikAm || 11-249 ||

mUlapatre vicitrAM ca pUjayetsAdhakottamaH |

tathA lalATe sUryaM ca dakSanetre kalAdhipam || 11-250 ||

vaizvAnaraM vAmanetre kaNThe ca kAlikAM tathA |

hRdaye dAsayoniM ca nAbhau ca dAsasiddhakam || 11-251 ||

brAhmI mAhezvarI caiva kaumArI vaiSNavI tathA |

vArAhyaindrI ca cAmuNDA mahAlakSmI parA matA || 11-252 ||

maMthAnabhairavazcaiva SaTcakrabhairavastathA |
phaTkArabhairavazcaiva bibhakSabhairavastathA || 11-253 ||

vIrezabhairavazcaiva zrImantezvarabhairavaH |
haMsagarbhabhairavazca caNDikezvarabharavaH || 11-254 ||

mUrdhni lalATe kaNThe ca hRdaye nAbhimaNDale |

liMge ca mUlAdhAre ca sarvAMge pUjayetsudhIH || 11-255 ||

yathAzakti japedvidyAM baliM dadyAdyathAvidhi |

oM kSe/ ca kSetrapAla imaM baliM padaM vadet || 11-256 ||

gRhNyuk svAhayA yuktaH kSetrapAlabalirmatA |

iti pUjAvidhirdevi zrIkAlIkAlayormatA || 11-257 ||

aMtardhAna vidhau devi * * * rmatA |

mahAkAlaprasaMgena rahasyamapi darzitam || 11-258 ||

gopanIyaM tvayA bhadre rahasyAtirahasyakam |

gopanIyaM gopanIyaM svayoniraparA yathA |
iti saMkSepataH proktaM kimanyacchrotumicchasi || 11-259 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde mahAkAlamantravidhirnAmaikAdazaH
paTalaH || 11 ||

dvAdazaH paTalaH |

zrIdevyuvAca |

deveza zrotumicchAmi rahasyAtirahasyakam |

zrIziva uvAca |
antardhAnavidhiH proktA parakAyapravezanam || 12-1 ||

kathyate devadevezi zRNu sAvahitA bhava |

kulAkulasamudbhUtamamRtAnandamarcayet || 12-2 ||

sUryakoTisamaM maMtraM vAdimadhye vyavasthitam |

japetkulAmRtaM datvA * * * samudbhavam || 12-3 ||

tathA kule * * * kuNDalIdRDhabandhanAt |

AdhAre patramadhye ca dvipatre dvipadAlaye || 12-4 ||

SoDazAre yute liMge dvAdaze maNipUrake |

hRdaye dazapatre ca dvAdazArdhe caturdale || 12-5 ||

kaNThe bhAle yajeddevirjihvAlalanasaMkule |

abalAgAramadhye tu brahmacaryavrato naraH || 12-6 ||

saMkalpairdhavalairvApi zvetavastrAvaguNThitam |
gacchati brahmamArgeNa liGgabhedakrameNa ca || 12-7 ||

visargasthAmRtaM divyaM kSIradhAropamaM dravam |

pItvA kulAmRtaM tatra punareva vizetkulam || 12-8 ||

punarevAkulaM gacched dvAdazAnte nivedayet |

sahasrAre mahAcakre vAgbhavaM pUrNacandrakam || 12-9 ||

brahmagranthiM tato bhitvA pItvA saptASTadhArayA |

lambikAd brahmamArgeNa tAlumUle pravezayet || 12-10 ||

jihvAmApUrya tAM vidyAM mAtRkAvarNarUpiNIm |

bahirgatAM varNarUpAM jihvAgre dIparUpiNIm || 12-11 ||

AmUlAdbrahmaraMdhrAMtaM tathA jihvAgradezagAm |

vAgbhavAdyAM mahAvidyAM dIpAkArAM vicintayet || 12-12 ||

hastayoH pAdayorvidyAM tathA nADItrayeSu ca |

AdhArAttu samutthApya vAgIzIM dvAdaze nayet || 12-13 ||

dvAdazAdhAramAdAya tadgraMthiM paribhedayet |

tasmAjjihvAgramAdAya dIpAkArAM vibhAvayet || 12-14 ||

p. 99) lakSamekaM tatra japtvA sarvapApaM vinirdahet |

tatazcarAcaraM sarvaM jJAtvA sarvajJatAM nayet || 12-15 ||

prANAyAmaprabhAvena japasiddhiH prajAyate |

ekaviMzatisAhasraM SaTzatAdhikameva ca || 12-16 ||
pratyahaM jayate jIvo brahmAnandamayIM parAm |
utpattirjapa AraMbho mRtirasyA nivedanam || 12-17 ||

vinA japena satataM japo bhavati sarvadA |

evaM japaM suvijJAya gaNezAdau nivedayet || 12-18 ||

jIvAtmanaH krameNaiva tathA ca paramAtmanaH |

SaTzatAni sahasrANi SaDeva ca tathA punaH || 12-19 ||

SaT sahasrANi tato sahasraM caitadeva hi |

punaH sahasraM gurave krameNa vinivedayet || 12-20 ||

AdhAre svarNavarNe'sminvAdisAntAni saMsmaret |

vidyutpuJjaprabhAbhAni cintayet maNipUrake || 12-21 ||

mahAnIlaprabhAbhAni DAdiphAntAni cintayet |

piGgavarNamahAvahniM karNikAbhaM vicintayet || 12-22 ||

kAdiThAntAni varNAni caturthenAhate smaret |

vizuddhe dhUmravarNe tu raktavarNAnsvarAn nyaset || 12-23 ||

AjJAyAM vidyudAbhAyAM zubhrau hakSau vicintayet |

karpUradyutisaMrAjatsahasradalapaGkaje || 12-24 ||

nIlAtmakaM brahmarandhre cintayecca tataH param |

phalaM cAsya pravakSyAmi SaDcakreSu yathAkramam || 12-25 ||

AdhAre bhAvanAbhyAsAnmaMtrasiddhiH prajAyate |

* * ca bhAvanAbhyAsAdvidyA vIryavatI bhavet || 12-26 ||

tato dhyAyennAbhicakre vidyAjJAnasya hetave |

dehajJAnaM labhenmaMtrI SaNmAsAbhyaMtareNa ca || 12-27 ||

hRdabje bhAvanAbhyAsAttrikAlajJo naro bhavet |

kaNThe ca bhAvanAbhyAsAddehasiddhiH prajAyate || 12-28 ||

sUryasattvAnmahAyogI trailokye yadbhavatyapi |

jAnAtyaharaho maMtrI trailokye ca na saMzayaH || 12-29 ||

p. 100) zivacaMdrasamAyogAjjApya zukrajJavAnbhavet |

udAnamabhyasennityaM jalastaMbhanahetave || 12-30 ||

samAnAbhyAsato yogI vahninA'pi na dahyate |

tataH sUkSo mahAbhUtaH sUkSmamuttArayedapi || 12-31 ||
manojavo bhavenmaMtrI kAlikAdhyAnayogataH |
dehajJAnaprabhAvena antardhAnamavApnuyAt || 12-32 ||

antardhAnaprabhAvena paradehaM pravezayet |

aNimAdyaSTabhAvezaH koTisiddhIzvaro bhavet || 12-33 ||

alabhyaM labhate yogI mahAmaMtrAnubhAvataH |

ityAdi siddhibhAveSu vairAgyaM yadi jAyate || 12-34 ||

kaivalyaM labhate yogI kAlIvyApakatAmiyAt |

iti saMkSepataH proktaM kimanyacchrotumicchasi || 12-35 ||

zrIdevyuvAca |

deveza zrotumicchAmi kAlInityAvinirNayam |

zrIziva uvAca |

kAlI kapAlinI kullA kurukullA virodhinI || 12-36 ||

vipracittA tathogrograprabhA dIptA'thavA tathA |

nIlA ghanA balAkA ca mAtrA mudrA mitA tathA || 12-37 ||

nityAmaNDalametaddhi tatkramaM zRNu zAMbhavi |

kAlInityA ca tanmantraH kathyate zRNu sAmpratam || 12-38 ||

viSabIjaM tato mAyAM kAlIti yugalaM vadet |

mahAkAli padaM procya kaumArIti padaM vadet || 12-39 ||

mahyaM dehi padaM devi ThaTha yuktA manurmatA |

UnaviMzAkSarI vidyA kAlInityA prakIrttitA || 12-40 ||

parzurAmo RSiH proktaJchando'nuSTup prakIrtitam |

devatA kAlikA proktA mAyA bIjaM prakIrttitam || 12-41 ||

kAlikA ca bhavecchaktiH ThayugmaM kIlakaM bhavet |

kAlikAprINanAdyarthe viniyogaH prakIrttitaH || 12-42 ||

SaDaGgamAcareddevi jAtiyuktena mAyayA |

tato dhyAyenmahezAni citAnirvANamaNDale || 12-43 ||

p. 101) zyAmavarNA mahAbhImA ghorarAvA karAlinI |

muNDamAlAvibhUSADhyA dakSe khaDgaM pravibhratI || 12-44 ||

tarjanIM dhArayan vAme nRtyantI pretabhUmiSu |

evaM dhyAtvA mahezAni tadyantraM zRNu pArvati || 12-45 ||

trikoNayugmaM devezi vRttASTadalabhUpuram |

bindau kAlIM samArAdhya trikoNayugmake punaH || 12-46 ||

guNatrayaM tatpuruSAstacchaktayaH kramAnmatAH |

brAhmyAdimAtarazcASTau lokapAlAH sazastra kAH || 12-47 ||

bhUpure pUjayeddevi dhUpadIpopacArakaiH |

naivedyaM vividhaM khAdyaM paMcakhAdyaM vizeSataH || 12-48 ||

nivedayetkAlikAyai tatastuSTA bhaviSyati |

nIrAjanAntaM kRtvA'tha prajapellakSamAtrakam || 12-49 ||

dazAMzaM pAyasenaiva homaM kuryAdvidhAnataH |

athavA karavIreNa homayetsarvasiddhaye || 12-50 ||

sarvasiddhIzvaro devi bhavatyeva na saMzayaH |

maMtrabhedAnpravakSyAmi yathAvadavadhAraya || 12-51 ||

nAmatrayaM mahezAni pratyekaM praNavakramAt |

maMtratrayaM mahezAni bIjatrayaniyojanAt || 12-52 ||

vidyAtrayaM punardevi dhruvamAyAniyojanAt |

vidyAtrayaM mahezAni pratyekaM navadhA manuH || 12-53 ||

durbhagAnAM ca dInAnAM krUrANAM pApakarmiNAm |

maMtramenaM na kathayetsarvaizvaryamayo bhavet || 12-54 ||

lakSmIvAnkIrtimAndhanyA bhavatyeva na saMzayaH |

sundarIM kAminIM dRSTvA tasyAzcaiva * * vadet || 12-55 ||

* * zabdena tadbhaMgaM sA dAsI maMtrajApataH |

vyAkulA sA bhavatyeva svecchayA bhogameSyati || 12-56 ||

lalATe hRdaye vidyAM yonimadhye yathAkramam |

yasyAH saMcintayedvidyAM tannAmasmRtipUrvakam || 12-57 ||

tAmAkarSayati kSipraM kimanyairbahujalpitaiH |

sAkSAtsa kAlIputraH syAnnAtra kAryA vicAraNA |
iti saMkSepataH proktaM kimanyacchrotumicchasi || 12-59 ||
iti zrIzaktisaGgamamahAtantrarAje uttarabhAge tRtIyakhaNDe
zrImadakSobhyamahogratArAsaMvAde kAlInityAnAma dvAdazaH paTalaH || 12
||

trayodazaH paTalaH |

zrIdevyuvAca |

deveza zrotumicchAmi kapAlinyA vidhiM parAm |

nityA dvitIyA deveza proktA kapAlinI parA || 13-1 ||

tasyA maMtraM mahezAna kathayasva mamAdhunA |

zrIziva uvAca |

devezi kathyate gopyaM yanna kutrA'pi kIrttitam || 13-2 ||

kapAlinI mahAvidyA dvitIyA tanmauM zRNu |

Adau saptakulaM procya kAmaM vahnipade sthitam || 13-3 ||

indirAbindubhUSADhyaM bIjaM kAlIsvarUpakam |

kapAlini mahAkapAlapriyamAnase vadet || 13-4 ||

kapAlasiddhiM me dehi hU/ phaT svAhAntako manuH |

triMzadvarNo'rdhavarNADhyo maMtrarAjo mahottamaH || 13-5 ||

bhairavo'sya RSiH proktastriSTup chaMda udAhRtam |

kapAlinI devatA'tra kAlikA bIjamIritam || 13-6 ||

svAhA zaktiH samAkhyAtA hU/ phaT kIlakamIritam |

kapAlinIsiddhaye'tra viniyogaH prakIrttitaH || 13-7 ||

SaDdIrghabhAjA bIjena kuryAdaGgAni SaTkramAt |

dhyAyedaJjanapuJjAbhAmApInastanayugmakAm || 13-8 ||

candravaktrAM ca bimboSThIM muktakezIM digambarAm |

caturmuMDo parigatAM zaGkhakaGkaNabhUSitAm || 13-9 ||

khaDgatrizUlavaradAbhayAn hastacatuSThaye |
kramAtsaMbibhratIM devIM gItahAsyaparAyaNAm || 13-10 ||
evaM saJcitayeddevi nityAM kapAlinIM parAm |
trikoNatritayaM vRttaM dalASTakavibhUSitam || 13-11 ||

bhUpureNa samAkIrNaM caturdvAropazobhitam |

yaMtraM kapAlinIdevyAH sarvasAmrAjyadAyakam || 13-12 ||

mahAkAlIM mahAlakSmIM mahAsarasvatIM tathA |

ratiM prIti tathA kAMtiM dvitIye tu trikoNake || 13-13 ||

p. 103) IcchAM jJAnaM kriyAM caiva trikoNe tu tRtIyake |

madhye kapAlinIM pUjya dale'STau mAtRkArcanam || 13-14 ||

tato'STau bhairavAMzcaiva digIzAn zastrakAnyajet |

paMcopacAraiH saMpUjya kulAcAraparAyaNaH || 13-15 ||

sAdhakaH prajapellakSaM hayArikusumairhunet |

mAMsena madhunA cApi juhuyAdiSTasiddhaye || 13-16 ||

tadA kapAlinI devI siddhA bhavati nizcitam |

purazcaryAM vinA devi kathaM siddhA kapAlinI || 13-17 ||

muNDAsane naraH sthitvA sadA tadgatamAnasaH |

mahAmAlAM mahApAtraM mahAyaMtrAsanAdikam || 13-18 ||

kRtvA tu vidhivaddevi tadA bhavati sAdhakaH |

athAnyadapi vakSyAmi kapAlinyAH parAkramam || 13-19 ||

raNavIrakapAlAni kujavAre nizAmukhe |

samAhRtya mahezAni paMca paMca samanvitaH || 13-20 ||

digbandhabhUtazuddhAdikapAlAdyupahArakaiH |
sAdhakaH sahito bhUtvA siMdUratilakAGkitaH || 13-21 ||

khaDgahasto dizAvAso muktakezo mudAnvitaH |

IdRzaH sAdhakaH so'haGkRtibhAvasamanvitaH || 13-22 ||

sudUre sAdhakAn sthApya puSpavartyA ghRtAktayA |

dIpaM saMlApayeddevi japettatra kapAlinIm || 13-23 ||

bhAgyAtkapAlinIsiddhiH kadAcitprabhaviSyati |
tathApi kAlikAbhakte bhaviSyati bhaviSyati || 13-24 ||

kapAlaM bhAgyayogena kadAcidyadi labhyate |

tadA kapAlinI siddhiH kajjvalaM taddhi saMgrahet || 13-25 ||
tatkajjvalaM kapAle tu kajjvalaM sthApya vai japet |
saMmohanAJjanaM nAma mahadaJjanamIritam || 13-26 ||

tatkapAle mahezAni kiM tadyanna kare sthitam |

eSA kapAlinI nityA dvitIyA kAlikA bhavet || 13-27 ||

iti saMkSepataH proktaM kullAM zRNu tRtIyakAm |

kAlikA kullukA kullA tridhA nAmnA tu yA matA || 13-28 ||

tasmAtkulleti nAmnA ca kulapUjyatvatAM gatA |

vidyAnAM kulapUjyatvAtkullukA parikIrttitA || 13-29 ||

p. 104) kullukA kulapUjyatvAtkullAnAmnI kulezvarI |

tasyA maMtraM pravakSyAmi yathAvadavadhAraya || 13-30 ||

praNavaM pUrvamuddhRtya kAlikAbIjamuddharet |

kullAyai hRnmanurdevi proktaH saptAkSaro manuH || 13-31 ||

bhairavo'sya RSiH prokto gAyatrI chaMda Iritam |

kullA kAlI devatA'tra kAlikA bIjamIritam || 13-32 ||

kullAzaktiriti khyAtA namaH kIlakamIritam |

sarvArthasAdhane caiva viniyogaH prakIrttitaH || 13-33 ||

kAlikokte yajet pIThe kumArIyaMtrameva hi |

kumAryAH pUjanAddevi kullA siddhA bhaved dhruvam || 13-34 ||

lakSadvayaM japenmaMtraM haviSyAzI divA zuciH |

azucizca tathA rAtrau zrIkullAdarzanotsukaH || 13-35 ||

kadAcidabhrasadRzAM kadAcit jyotisannibhAm |

caturbhujAM trinayanAM mukuTATopamaNDitAm || 13-36 ||

zavAsanagatAM kullAM dazamaNDoparisthitAm |

varAbhayau kare vAme pustasrak dakSiNe kare || 13-37 ||

nAnAvilAsakuzalAM kullAmbAM paricintayet |

evaM ciMtayatastasya dazavidyAmayI kalA || 13-38 ||

bhavatyeva mahezAni kullAmbAyAH prabhAvataH |

karavIrairjapApuSperhunejjapadazAMzataH || 13-39 ||

taddazAMzaM gandhatoyaistarpayenmArjayedapi |
brAhmaNAnbhojayeddevi tadante tu kumArikAm || 13-40 ||

pUjayetparamezAni kullAvidyA prasidhyati |

kullAvidyA mahezAni sarvavidyAprakAzinI || 13-41 ||

yaMtramasyAsti devezi naimitte kAmyakarmaNi |

trikoNadvayamuddhRtva vRttASTadalabhUSitam || 13-42 ||

caturdvArasamAyuktaM bhUpuraikeNa saMyutam |

madhye bIjaM nyasetkAlyA bIjayuktaM mahottamam || 13-43 ||

dhRtiM puSTiM tathA medhAM tuSTiM prajJAM tathA jayAm |

trikoNadvitaye pUjya dale'STamAtRkbhairavAH || 13-44 ||

lokapAlAn zastrayukAn kullukAvaraNe yajet |

athavA devadevezi kAlikAvatsamastakam || 13-45 ||

p. 105) navarAtradvaye candrasUryagrahadvaye tathA |

saMkrame cottame cArthe pUjayedyantramudbhutam || 13-46 ||

yadaiva kAryamuptannaM tadaiva kullukArcanam |

na vidyA siddhimApnoti kullukArcanamantarA || 13-47 ||

AdimAMtyasamAyuktA sA vidyA siddhimApnuyAt |

AdimAMtyamajAnan hi yo guruH sa tu ziSyahA || 13-48 ||

AdimAMtyakriyAyukto nityAmaMtro hi sidhyati |

AdimAMtyavihInasya na syAddevasya darzanam || 13-49 ||

prItirbhayaM dvayamiti dvAbhyAM saMvyApitaM jagat |

ayaM prayogo gotpavyo na kutrApi mayeritaH || 13-50 ||

kullAdevyAdinityAsu japo hi dvitayAvadhiH |

dvitayAbhyAM na siddho'sau sa maMtro na japakSamaH || 13-51 ||

kullA nityA tRtIyoktA yasyAmetatpratiSThitam |

samastajagatIsAraM kullAsaMkSepapUjanam |
iti saMkSepataH proktaM kimanyacchrotumicchasi || 13-52 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde kullAnityAvidhirnAma trayodazaH
paTalaH || 13 ||

caturddazaH paTalaH |

zrIdevyuvAca |
deveza zrotumicchAmi rahasyamaparaM mahat |
kurukullAvidhAnaM ca kathayasva mamAdhunA || 14-1 ||

kurukullA ca kiM nAma kiM vidhA kiM vidho manuH |

sarvaM kathaya deveza yadyahaM tava vallabhA || 14-2 ||

zrIziva uvAca |

zRNu devi pravakSyAmi rahasyAtirahasyakam |

vidyAnAM kulapUjyatvAtkullukA kullukAdhikA || 14-3 ||

kullAyA api pUjyatvAtkurukullA mahodayA |

tasyA maMtro mahezAni sarvamaMtrottamottamaH || 14-4 ||

kAlikArcaM samuddhRtya kurukullepadaM vadet |

kAlIM mAyAM mamapadaM sarvajanapadaM tataH || 14-5 ||

vazamAnaya coccArya kAlIM ca kurukulle ca vai |

padamuddhRtya devezi mAyA svAhAntago manuH || 14-6 ||

saptaviMzatyarNasaMkhyo maMtro'yaM surapAdapaH |

etasyA hRnmanurdevi kurukullA navAkSarI || 14-7 ||

zrIvidyAviSaye bhinnA kurukullA mahezvari |

kAlyaMga vidyA devezi zrIvidyA kurukullikA || 14-8 ||

iyaM bhinnA mahAvidyA kAlInityA caturthikA |

vinA tu hRnmanurdevi kurukullA na sidhyati || 14-9 ||

hRnmanuM kurukullAyA jJAtvA yatnena pArvati |

praNavaM kUrcamuddhRtya kurukullepadam vadet || 14-10 ||

hrI/ svAhAnto manurdevi kurukullA kumArikA |

hRnmanutvena kathitaH sarvamantrottamaottamaH || 14-11 ||

kAlabhairavo RSizcAsya bRhatI chanda Iritam |

devatA kurukullA ca sarvavidyAmayI parA || 14-12 ||

p. 107) krI/ bIjaM hrI/ tathA zaktiH svAhA kIlakamIritam |

kurukullAkumAryAstu bhairavo RSirIritaH || 14-13 ||

virATchando nigaditaM kUrcaM bIjaM prakIrtitam |

svAhA zaktiH samuddiSTA viniyogo yathecchayA || 14-14 ||

kullakullAM mitrakullAM kurukullAM hRdaGgamAm |

kAlIdhruvaH kurukulle krI/ hrI/ ca mama sarvataH || 14-15 ||

janavazaM krI/ kuruyuk kurukulle triviSTape |

svAhAnto'yaM samuddiSTo bhairavo hi virAT tataH || 14-16 ||

hrI/ bIjaM ca tathA svAhA zaktiH krI/ kIlakaM matam |

sarvArthe viniyogaH syAt pUrvavat kvApi kIrttitaH || 14-17 ||

viniyogaH pUrvavatsyAt zRNuSvAGgAdikalpanAm |

SaDdIrghakAlIbIjena SaDaGgAni kramAccaret || 14-18 ||

tato dhyAyenmahAvidyAM kurukullAM kulezvarIm |

zavopari samAsInAM muNDamAlAvibhUSitAm || 14-19 ||

kapAlakartRkAhastAM khaDgakheTakadhAriNIm |
aJjanAdrinibhAM divyAM muktakezIM caturbhujAm || 14-20 ||

pInonnatakucadvaMdvAM pInavakSo nitambinIm |

bhaktAnaMdakarodyuktAM sAdhakAbhISTadAyinIm || 14-21 ||

AsavAghUrNanayanAM kAminIM janamohinIm |

evaM saMciMtayeddevIM kurukullAM mahodayAm || 14-22 ||

evaM dhyAtvA japellakSasaMkhyaM trimadhurAnvitaiH |

homayedbilvapatraizca bilvapuSpairapi priye || 14-23 ||

dazAMzaM tarpaNaM kuryAttaddazAMzena mArjanam |

taddazAMzaM viprabhojyaM tena siddho manurbhavet || 14-24 ||

pUjayetkAlikApIThe trikoNatrayasojjvale |
vRttASTadalabhUSADhye bhUpuradvayazobhite || 14-25 ||

biMdau bIjaM likhetkAlyAstrizaktitrayamarcayet |

kAlIM tArAM chinnamastAM bAlAmbAM bagalAM ramAm || 14-26 ||

ugragarbhAmugrabIjAmugravIryo tRtIyakAm |
trikoNatritaye pUjA krameNa parikIrttitA || 14-27 ||

p. 108) brahmAdyaSTau bhairavAMzca pUjayet dvidalASTake |

lokapAlAstadastrAntAnpUjayetparamezvari || 14-28 ||

zave zmazAne vipine'raNye ca bhUtasaMkule |

pUjayetkurukullAM ca sarvasiddhiM sa vindati || 14-29 ||
yadyatprArthayate citte tattadApnoti sAdhakaH |
samastAn pUjayeddevi brAhmaNAMzca suvAsinIm || 14-30 ||

viprArAdhanamAtreNa kiM tadyanna kare sthitam |

taNDulena jayAvAptirgodhUmena dhanAgamaH || 14-31 ||

mASaiH zatrurmRtiM yAti mudrairmokSaphalaM labhet |

tilataNDulahomena mahAprItiM sa viMdati || 14-32 ||

rAjIlavaNahomena kAminIM karSayed dhruvam |

sarSapairlavaNairdevi kAminImAnabhaJjanam || 14-33 ||

sarpirlavaNahomena kAminImanoraJjanam |
haridrayA daridrANi nazyantyeva na saMzayaH || 14-34 ||

iti saMkSepataH proktaH kurukullAvinirNayaH |

rahasyAtirahasyaM ca kiM bhUyaH zrotumicchasi || 14-35 ||

zrIdevyuvAca |

virodhinIvidhiM brUhi yadyahaM tava vallabhA |

zrIziva uvAca |

rahasyAdatigopyaM hi nityA proktA virodhinI || 14-36 ||

paJcamIsaMjJakA nityA yathAvadavadhAraya |

praNavaM pUrvamuddhRtya kAlIpraNavamudharet || 14-37 ||

mAyAM kAmaM tataH kUrccaM proktvA virodhinIpadam |

zatrUnuccATayapadaM virodhayadvayaM vadet || 14-38 ||

zatrukSayakarI procya hUM phaT svAhAnvito manuH |

dvAtriMzadvarNasaMyukto mantrarAjo mahottamaH || 14-39 ||

mahAmantro'yamAkhyAto RSirbhairava IritaH |

gAyatrI chanda AdiSTaM devatA tu virodhinI || 14-40 ||

p. 109) kAlIbIjaM bIjamasyAH mAyA zaktiH prakIrtitA |

kAmabIjaM kIlakaM syAdviniyogo yathecchayA || 14-41 ||
kAlISaDdIrghabIjena SaDaMgayugmamAcaret |
dhyAyedaJjanagirinibhAM dviraSTavarSadezinIm || 14-42 ||

pInonnatakucadvaMdvAM sarpAsthimAlikAyutAm |
caturbhujAM trinayanAM zavapadmopari sthitAm || 14-43 ||

trizikhaM nAgapAzaM ca ghaNTAM ca DamaruM tathA |

saMbibhratIM mahAdevIM kramAdbhujacatuSTaye || 14-44 ||

dhUmrAmbarAM pItagAtrImISatprahasitAnanAm |
mA bhairvIra varaM brUhi sarvaM tatte dadAmyaham || 14-45 ||

upasthitaM tu yatkAryaM tattatkAryaM karomyaham |

evaM saMvadatIM devIM cAruhAsAM manoharAm || 14-46 ||

virodhakaraNodyuktAM zatrUNAM nAzakAriNIm |

kAlikokte yajetpIThe trikoNatrayazobhite || 14-47 ||

vRttASTadalabhUSADhye bhUpuraikena zobhite |

caturdvAravibhUSADhye zrIbIjojjvalakarNike || 14-48 ||

virodhinIM karNikAyAM trikoNatritaye kramAt |

dhUmrArcirUSma jvAlinIM jvAlinIM visphuliMginIm || 14-49 ||

suzrIM surUpAM kapilAM tato havyavahAM yajet |

virodhinImastake tu tato hi dazamIM yajet || 14-50 ||

dalASTake bhairavyaSTo bhairaveNa samanvitAH |

bhUpure lokapAlAzca tadastrANi ca tadbahiH || 14-51 ||

tato nIrAjanaM kRtvA lakSasaMkhyaM japenmanum |

dazAMzaM juhuyAdvahnau nimba vahnau yathAvidhi || 14-52 ||

ariSTamAlAM kRtvA ca mahAmuNDAsano naraH |

juhuyAdarinAzAya ariSTaphalamAdarAt || 14-53 ||

vibhItakena juhuyAtsarvazatrunibarhaNam |
dhattUrakusumairhomAt zatrUn vidveSayennaraH || 14-54 ||

kAkolUkasya mAMsena zatruM mArayati kSaNAt |

rAjavRkSaprasUnaizca tatkASThAgnau hunetsudhIH || 14-55 ||

p. 110) virodhinI bhavetsiddhA dhUmAvatyAdisaMyutA |

arkAdyAdi samAyuktA zatruvidveSakAriNI || 14-56 ||

vAyavyAbhimukho bhUtvA kaTujIrakajaM jalam |

koSNaM pibenmahezAni zatrurjvarayuto bhavet || 14-57 ||

parAbhicAranAzArthaM svarakSArthaM yathAvidhi |

ekAnte mAtRgehe vA mRtahaTTe zivAlaye || 14-58 ||

virodhinIM japedvidyAM hyayutaM coktamArgataH |

vibhItakasya samidho hunecchatrunivAraNam || 14-59 ||

nAbhimAtrodake gatvA marIcajalayogataH |

tarpayeddevatAM nIraistrailokyadveSaNaM caret || 14-60 ||

athAkarSaNamanvicchanvalmIkamRtsamAnayet |
zmazAnamRtsamAdAya godhUmahiMgujIrakaiH || 14-61 ||

puttalIM sAdhyarUpAM ca kArayetparamezvari |

nAsAyAM DorakaM datvA prANasthApanapUrvakam || 14-62 ||

virodhinIM japettatra karavIraiH samarcayet |

dugdhena puttalIM kRtvA tApayetkhadirAnale || 14-63 ||

anena kramayogena dinAni tu caturdaza |

yaH karoti naraH zreSThaH sarvAkarSaNakArakaH || 14-64 ||

vanitAM madagarvADhyAM samAkarSati yogataH |

vicAryAkaSarNaM kAryaM bhavedvA na bhaviSyati || 14-65 ||

dhyAtvA sAdhyagale pAzaM mastake jvalitAGkuzam |

evaM saMciMtya devezi trailokyAkarSako bhavet |
iti saMkSepataH proktaM kimanyacchrotumicchasi || 14-66 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde virodhinIvidhirnAma caturddazaH
paTalaH || 14 ||

paJcadazaH paTalaH |

zrIdevyuvAca |

deveza zrotumicchAmi vipracittAvidhAnakam |

kathayasya mahAdeva yadyahaM tava vallabhA || 15-1 ||
zrIziva uvAca |

rahasyamapi devezi tava prItyA nigadyate |

vipracittAtiduSTAnAM vadhArthaM pUrvamudyatA || 15-2 ||

vipracitteti vikhyAtA vaipracittavinAzinI |

SaSThI nityA mahAvidyA tanmaMtraM zRNu pArvati || 15-3 ||

praNavaM kamalAM kAmaM cAmuNDepadamuccaret |

vipracitte padaM procyaM duSTaghAtini coccaret || 15-4 ||

zatrUnnAzaya coccArya etaddinAvadhi priye |

siddhiM me dehi coccArya hu/ phaT svAhAMtago manuH || 15-5 ||

catustriMzadvarNayuto vipracittAmanurmahAn |
Izvaro'sya RSirdevi jagatI chaMda Iritam || 15-6 ||

vipracittA devatA hi cAmuNDA bIjamIritam |

kamalA zaktirAkhyAtA kAmabIjaM tu kIlakam || 15-7 ||

SaDdIrghADhyena kAmena SaDaMganyAsamAcaret |

siMhopari samArUDhAM zavapaJjaramadhyagAm || 15-8 ||

caturbhujAM trinayanAM pInonnatapayodharAm |

digaMbarAM muktakezIM lalajjihvAM bhayAnakAm || 15-9 ||

bhImadaMSTrAM karAlAsyAM sRkkiNIraktavAhinIm |

khaDgamuNDakapAlatrizUlahastAM mahodarIm || 15-10 ||

nIlotpalanibhAM zyAmAM bhaktAnugrahakAriNIm |

daityasaMharaNodyuktAM sAdhakAnAmabhItidAm || 15-11 ||

evaM saMciMtya devezi vipracittAM zivapriyAm |

lakSamAtraM japenmaMtraM dazAMzaM kumudairhunet || 15-12 ||

p. 112) athASTagandhanIreNa taddazAMzaM pratarpayet |

mArjanaM taddazAMzena dazAMzenAbhiSecanam || 15-13 ||

taddazAMzaM viprabhojyaM vipracittAsusiddhaye |

trikoNaM vRttaSaTkoNaM vRttASTadalabhUSitam || 15-14 ||

vRttabhUpurasaMyuktaM bindubIjavibhUSitam |
biMdau yajed vipracittAM trikoNe triguNAM yajet || 15-15 ||

SaTkoNe tu SaDaMgAni taddale mAtRbhairavau |

bhUpure lokapAlAzca tadastrANi ca tadbahiH || 15-16 ||

tato nIrAjanaM kRtvA japaM devyai samarpayet |

purazcaryAsamAyuktaH prayogArho na cAnyathA || 15-17 ||

sAkalpairjuhuyAddevi zAMtikarmaNi sAdhakaH |

mAlatyA juhuyAdvazye ketakyA vAgvibhUtaye || 15-18 ||

karavIrairvazIkAraH kiMzukaiH staMbhanaM bhavet |

mohanaM coDrapuSpeNa dhattUrairmAraNaM dizet || 15-19 ||

bRhatyA tu ripUccATo girikarNyA dhanAgamaH |

kAzapuSpai ripUccATo vidveSo karNikArajaiH || 15-20 ||

nIvArairjuhuyAddevi dhAnyasiddhyarthameva hi |
kalAyapuSpairjuhuyAttataH syuH sarvasaMpadaH || 15-21 ||

kausuMbhakusumairdevi kAminIM vAMchitAM labhet |

madhupuSpaizca juhuyAdabhISTasiddhaye dhruvam || 15-22 ||

dhAtakyA juhuyAddevi dhanadhAnyapatirbhavet |

yadroge bheSajaM yacca tena tadroganAzanam || 15-23 ||

iti saMkSepataH prokto vipracittAvinirNayaH |

zrIdevyuvAca |

deveza zrotumicchAmi ugrAnityAvinirNayam || 15-24 ||

zrIziva uvAca |

rahasyAtirahasyaM ca tathApi kathyate zRNu |

praNavaM ca vadhUbIjaM hU/bIjaM bhuvanAM tataH || 15-25 ||

punaH pUrvaM tato hU/ phaT ugrA saptAkSaro manuH |

bhairavo'sya RSiH prokto bRhatI chaMda Iritam || 15-26 ||

p. 113) ugrA tu saptamI nityA devatA parikIrttitA |

kUrca bIjaM ca phaT zaktirvadhUH kIlakamIritam || 15-27 ||

sarvAbhISTAdisiddhyarthe viniyogaH prakIrttitaH |

SaDdIrghADhyena bIjena mAyAkhyena SaDaMgakam || 15-28 ||
tato dhyAyetparAmugrAM pratyAlIDhapadasthitAm |
caturbhujAM trinayanAM muNDamAlAvibhUSitAm || 15-29 ||

digambarAM karAlAsyAM ghoradaMSTrAM bhayAnakAm |

zavotsaMge krIDamAnAM zmazAnAlayavAsinIm || 15-30 ||

zyAmavarNAM muktakezIM khaDgendIvaradhAriNIm |

kapAlakartRkAhastAM varadAnaparAyaNAm || 15-31 ||

ugrAM dhyAyenmahAvidyAM lakSayugmaM japaM caret |

taddazAMzena juhuyAtkamalairghRtasaMyutaiH || 15-32 ||

taddazAMzaM tarpaNaM ca taddazAMzaM ca mArjanam |

viprabhojyaM dazAMzena tenogrA siddhidA dhruvam || 15-33 ||

parvate prAMtare ghore vipine taTinItaTe |

ekaliMge zmazAne vA purazcaraNavAnbhavet || 15-34 ||

athAsyAH pUjAyaMtraM ca yathAvatkathyate zRNu |

trikoNaM vRttASTadalaM vRttabhUpurabhUSitam || 15-35 ||

zUlASTakavibhUSADhyaM kiMvA vajravibhUSitam |

trikoNamadhye vilikhetkUrcabIjaM mahottamam || 15-36 ||

tArAM nIlAmekajaTAM tat trikoNe prapUjayet |

tato dalASTake devi ugrAghorASTakaM yajet || 15-37 ||

vairocanASTakaM pUjya tataH padmAntakAn yajet |

lokapAlAntadastrANi yathAvadvidhinA yajet || 15-38 ||

tato nIrAjanaM kRtvA japaM devyai samarpya ca |

zavAsane vA * * * saMsthitvA sarvadA japet || 15-39 ||

siMdUratilako nityaM saMvidAtavaghUrNitaH |

muktakezo dizAvAso bhaktabhakto jiteMdriyaH || 15-40 ||

mahAcInadrumalatAM saMpAdya paramezvari |

tattrikoNaM ca saMvIkSya sadA tadgatamAnasaH || 15-41 ||

p. 114) lakSamAtraM japenmaMtraM ugrA siddhyati nizcitam |

anyatsarvaM tu tArAvatkIrtitaM jagadIzvari || 15-42 ||

nyAsapUjAdikaM dhyAne purazcaryAvidhAnakam |

mahogratArAvajjJeyaM kiM bhUyaH zrotumicchasi || 15-43 ||
zrIdevyuvAca |

deveza zrotumicchAmi nityAmugraprabhAbhidhAm |

aSTamIM zubhadAM nityAM nityAnaMdakarAM varAm || 15-44 ||

zrIziva uvAca |

praNavaM pUrvamuddhRtya zivabIjaM samuddharet |

vahnyArUDhaM nAdabiMduM SaSThasvaravibhUSitam || 15-45 ||

bIjadvayaM samuccArya ugraprabhesvarUpakam |

devi kAli mahAdevi svarUpaM darzayeti ca || 15-46 ||

hUM phaT svAhAsamAyuktaH proktastUgraprabhAmanuH |

paMcaviMzatitattvADhyaH proktazcogryabhAmanuH || 15-47 ||

mahAkAlo RSiH proktastriSTup chaMdaH prakIrttitam |

ugraprabhAmahAkAlI devatA parikIrttitA || 15-48 ||

hU/ bIjaM oM tathA zaktiH phaT kIlakamudAhRtam |

kAlikAdarzanAdyarthe viniyogaH prakIrttitaH || 15-49 ||

ugraprabhAkhyabIjena SaDdIrgheNa SaDaMgakam |

dhyAyedugraprabhAM divyAM divyanIlotpalaprabhAm || 15-50 ||

caturbhujAM trinayanAM zavapadmoparisthitAm |

digaMbarAM muktakezIM pInonnatapayodharAm || 15-51 ||

suprasannamukhAMbhojAM zavamAMsaprabhojanIm |
zavAnAM karasaMghAtaiH kRtakAMcIM hasanmukhIm || 15-52 ||

khaDgamuNDadharAM vAme dakSe kharparakartRke |

bibhratIM paramAhlAdajananIM kAlavaMcanIm || 15-53 ||

evaM dhyAtvA mahAvidyAM lakSayugmaM japecchive |

kAlikokte yajetpIThe trikoNadvayasojvale || 15-54 ||

vRttASTadalabhUSADhye bhUpuradvayabhUSite |
ugraprabhAbiMdumadhye kAlIM tArAM ca rocanIm || 15-55 ||

p. 115) prathame pUjayeddevIM dvitIye tAriNIgaNAH |

tArAmekajaTAM nIlAM dvitIye tu trikoNake || 15-56 ||
dalASTake mAtRkASTau dalAgre bhairavASTakam |
bhUpure lokapAlAMzca tadastrANi ca tadbahiH || 15-57 ||

tristriH pUjA prakartavyA sarveSAmapi dezikaiH |

evamugraprabhAmiSTAM lakSayugmaM japaM caret || 15-58 ||

dazAMzaM vajrapuSpANi maireyAktAni homayet |

tarpayettaddazAMzena dugdhena madhunAtha vA || 15-59 ||

daghnA cekSurasenApi pIThatoyena vA punaH |

taddazAMzaM mArjanaM ca dazAMzaM viprabhojanam || 15-60 ||

kumArIM pUjayetpazcAcchaktiM cApi prapUjayet |

ugraprabhApatAkAyAM mUrttiM kRtvA vidhArayet || 15-61 ||

raNe devAsurAn jitvA trailokyavijayI bhavet |

duMdubhau phalake khaDge japtvA cograprabhAM zivAm || 15-62 ||

sarvasiddhiM samAsAdya kAlIrUpo naro bhavet |

mAninImaNDalaM dRSTvA japedugraprabhAmanuH || 15-63 ||

kAlikA siddhidA bhUyAnnAtra kAryA vicAraNA |

* * * likhyajapedugraprabhAM parAm || 15-64 ||

tatra saMcintya devezi sAdhakaH kinna sAdhayet |

ugraprabhAkhyAM kAlIM tu bhuktvA mAMsaM japecchive || 15-65 ||

mAsamAtraprayogeNa kAlikA varadA bhavet |

iti saMkSepataH proktaM kimanyacchrotumicchasi || 15-66 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde ugraprabhAnityAvidhirnAma
paJcadazaH paTalaH || 15 ||

SoDazaH paTalaH |

zrIdevyuvAca |

deveza zrotumicchAmi rahasyAtirahasyakam |

tanme kathaya deveza dIptAnityAvidhAnakam || 16-1 ||

zIziva uvAca |
pUrvataMtreSu saMguptA dIptAnityA mahodayA |
navamIsaMkhyakA nityA sArAtsArA mahodayA || 16-2 ||

tasyAM maMtraM pravakSyAmi yathAvadavadhAraya |

praNavaM kAlIkAbIjaM kaulinIbIjameva ca || 16-3 ||

kUrcabIjaM samuddhRtya dIptAyai tadanantaram |

sarvamantraphala procya dAyai zabdaM samuccaret || 16-4 ||

huM phaT svAhAntako maMtrastUnaviMzAkSaraH paraH |

ardhasaMkhyAvihInena vItisaMkhyaH prakIrtitaH || 16-5 ||

mahAdeva RSizcAsya uSNik chandaH prakIrttitam |

dIptAkhyA navamI nityA devatA parikIrtitA || 16-6 ||

kAlIbIjaM bIjamasyAH kaulinI zaktireva hi |

zvAhA kIlakamityuktaM kAlyarthe viniyogatA || 16-7 ||

kAlyAH SaDdIrghayuktena saDaMganyAsamAcaret |

dhyAyeddIptAM mahAnIlamaNiprakhyAM mahodarIm || 16-8 ||

caturbhujAM trinayanAM muNDamAlAvibhUSitAm |

digambarAM muktakezIM ghoradaMSTrAM karAlikAm || 16-9 ||

zavapadme samAsInAM pInonnatapayodharAm |

zavAsthikRtakeyUrazaMkhakaGkaNabhUSitAm || 16-10 ||

lelihAnAM zavaM kvApi prahasantIM madAturAm |

bhaktAnAM varadAM nityAM kAlIkodyotakAriNIm || 16-11 ||

narAntrayogapaTTena bhUSitAM yogamArgagAm |

khaDgamuNDadharAM vAme savye'bhayavarapradAm || 16-12 ||

sudanturAM mahAraudrIM zmazAnAlayavAsinIm |

evaM saMcintya dIptAmbAM lakSamekaM japecchive || 16-13 ||

p. 117) dazAMzaM karavIreNa havanaM samupAcaret |

kadalyA havanaM kAryaM sarvadIptiprasiddhaye || 16-14 ||

dazAMzaM pIThatoyena havanaM samupAcaret |

taddazAMzaM mArjanaM ca gaMdhASTakajalena vai || 16-15 ||

taddazAMzaM viprabhojyaM bhojayeddhi kumArikAm |

tataH siddhamanurmantrI prayogArho na cAnyathA || 16-16 ||
brAhme muhUrte cotthAya gurusmaraNapUrvakam |
guruM dhyAtvA sahasrAre pUrvoktadhyAnayogataH || 16-17 ||

mUlAdhArAtsvajihvAntaM mUlavidyAM parAM smaret |

sarasvatIM dIparUpAM mUlabIjasvarUpiNIm || 16-18 ||

saMpUrNAM mAtRkAM procya mUlavidyAM samuccaret |

punarvai mAtRkAM procya punavidyAM samuccaret || 16-19 ||

tridhAbhimaMtrya toyaM tu krameNAnena sundari |

mUlavidyAM tato dhyAtvA jihvAyAM dIparUpiNIm || 16-20 ||

tejorUpAM sAyudhAM vai tajjalaM tu pibecchive |

yogenAnena devezi trikAlajJo naro bhavet || 16-21 ||

vinA nyAsairvinA dhyAnairvinA pAThAdinA zive |

caturvidhaM tu pANDityaM tasya haste vyavasthitam || 16-22 ||

jAtIpuSpeNa devezi kavitA vazavartinI |

kundapuSpeNa devezi sarvazAstravazIkRtiH || 16-23 ||

dUrvayA zAntiko homo guDucyA mRtyuvAraNam |

surayA mohanaM proktaM jambA stambhanamIritam || 16-24 ||

AmreNa vazyasiddhiH syAdambujena mahodayaH |

uccATanaM karISeNa vidveSaH karkkaTIphalaiH || 16-25 ||

mAraNaM nIla puSpeNa marIcena tu karSaNam |

evamAdikriyAH sarvAH siddhamantrI samAcaret || 16-26 ||

aJjanaM guTikA khaDgo dhAtuvAdo rasAyanam |

carukaM tilakaM vAso dundubhizca kapAlakam || 16-27 ||

evamAdikriyAsiddhirdIptAmantreNa vai bhavet |

iti saMkSepataH proktaM kimanyacchrotumicchasi || 16-28 ||

p. 118) zrIdevyuvAca |

deveza zrotumicchAmi nIlAvidyAvidhAnakam |

nIlA nIlasvarUpA hi mahAnIlasarasvatI || 16-29 ||

tasyA vidhAnaM saMbrUhi yadyahaM tava vallabhA |

zrIziva uvAca |

maMtroddhAraM zRNu prAjJe yena siddhiM sa vindati || 16-30 ||

kUrcayugmaM mahAdevi kAlIbIjadvayaM tathA |

mAyAdvayaM samRddhRtya hasabalamarI svarUpakam || 16-31 ||

atha nIlapatAke ca huM phaDaMtA mahezvari |

nIlA nIlapatAkeyaM sarvasiddhikarI parA || 16-32 ||

ugracaNDA lalajjihvA yA sA siddhikarAlikA |

paMcadhA kathitA nIlA mahAnIlapatAkikA || 16-33 ||

bhairavo'sya RSiH prokto bRhatI chanda Iritam |

devatA dazamI nityA mahAnIlapatAkikA || 16-34 ||

kUrcabIjasvarUpaM hi zaktirityabhidhIyate |
hUM phaT ca kIlakaM bhadre kAlyarthe viniyogatA || 16-35 ||

kAlISaDdIrghabIjena SaDaMganyAsamAcaret |
atha dhyAyenmahAnIlAM nIlAMjanagiriprabhAm || 16-36 ||

caturbhujAM trinayanAM muNDamAlAvibhUSitAm |

zavopari samAsInAM madirAghUrNalocanAm || 16-37 ||

mRgazAvakanetrAM ca prasannavadanAmbujAm |
karakAMcIzobhamAnAM zavakarNAvataMsinIm || 16-38 ||

lalajjihvA karAlAsyAM ghoradaMSTrAM bhayAnakAm |

pApinAM sarvadA nIlAM krUrAM puNyavatAM varAm || 16-39 ||

duSTasaMharaNodyuktAM sAdhakasya varapradAm |

pheruvargairgRdhragaNaizcaturdikSu ninAdinIm || 16-40 ||

IdRzImAdirUpAM tAM nIlAMbhojavanaprabhAm |

japellakSatrayaM devi haviSyAzI jitendriyaH || 16-41 ||

kulAcArakrameNaiva yathoktakramayogataH |
karavIrairjavAbilvairmallikAdyairghRtAnvitaiH || 16-42 ||

p. 119) trikoNakuNDe juhuyAtsupariSkRtabhUtale |

dazAMzaM tarpaNaM kAryaM dugdhena surayA'pi ca || 16-43 ||

mArjayedraktanIraizca brAhmaNAnbhojayettataH |
suvAsinIM kumArIM ca zaktiM vA tritayAM zubhAm || 16-44 ||

purazcaraNasampanno maMtraH sarvArthadAyakaH |

yathAdravyaM nRpAdInAM purazcaryA tu maMtriNAm || 16-45 ||

purazcaraNasaMpannaH prayogArho na cAnyathA |

yaMtramasyAH pravakSyAmi yena siddhIzvaro bhavet || 16-46 ||

biMdumadhye likhetkUrcaM trikoNaM ca tatopari |

vRttaSaTkoNavRttASTadalaM vRttaM ca bhUpuram || 16-47 ||

caturdvAropazobhADhyaM yaMtraM nIlAmanoH zubham |

baTukAdyAzcaturdvAri parito dvAradevatAH || 16-48 ||

tadasrANi ca tadbAhye daleSTau bhairavAH priye |

kesare mAtRkASTau ca vRtte'STasiddhayaH kramAt || 16-49 ||

SaTkoNe tu saDaMgAni trikoNe daivatatrayam |

kAlarAtri mahArAtri moharAtri kramAt trike || 16-50 ||

madhye nIlAM samArAdhya tato naivedyamarpayet |

nIrAjanaM tataH kRtvA stutvA natvA visRjya ca || 16-51 ||

nIlAM saMsAdhya yatnena SaTtriMzadyakSiNIgaNam |

kAlIkUrcavadhUmAyA amukIyakSiNIti ca || 16-52 ||

ante pImAni bIjAni hUM phaT svAhAnvitA gaNAH |

SaTtriMzaccaiva yakSiNyaH krameNa coddhRtAH priye || 16-53 ||

tathaiva balino yakSAH hUM krIM hUM prIM puTena ca |

sarve yakSA huM phaDaMtA caturazIti kIrttitAH || 16-54 ||

yakSiNIsiddhimAsAdya sAdhakaH sukhamApnuyAt |

rAjAbhavati loke'sminvinA rAjyena pArvati || 16-55 ||

alpajJamapi vidvAMsaM mUDhaM ca paNDitaM tathA |

yaH karotyevamAdIni rAjyaratnadhanAnyapi || 16-56 ||

yo vai dadAti sAdhyAyaH sa yakSo nAtra saMzayaH |

devayonirmAnavI ca dvidhA yoniH prakIrttitA || 16-57 ||

p. 120) tattadrUpaM samAsAdya tatsiddhimadhigacchati |

zrIdevyuvAca |
phalaM tu yakSiNIsiddheryakSasiddhezca kiM phalam || 16-58 ||

tanme vada dayApAra parAtpara namo'stu te |

zrIziva uvAca |

dInAraM guTikA khaDgaM vetAlapAdukAJjanAH || 16-59 ||

rasaM rasAyanaM guptistilako'dRzyatA tathA |

kapAlaM ca paTaH saGkhastrizUlaM DamaruM tathA || 16-60 ||

AkarSaNaM vazyatA ca mohanoccATanaM tathA |

mahendrajAlamiMdrAdijAlAnAM racanA tathA || 16-61 ||

urdhvotkramaNakarmAdi khecaryAdyA hi siddhayaH |

gopanIyaM gopanIyaM kimanyacchrotumicchasi || 16-62 ||

proktA nIlAbhidhA nityA zrIvidyAdau patAkikA |

yaMtramaMtrAdiprastArasaMketabhraMzanaM tathA || 16-63 ||

lopAmudrAvidhau kAdau yaduktaM tadvidhau caret |

lopAmudrA kAdihAdi kAmarAje'pi taddvayam || 16-64 ||

tatkAlyAM kAdikAlI ca hAdikalpadrumo yathA |

kAdau nigaditaM devi yakSiNIyakSamaNDalam |
iti saMkSepataH proktaM kimanyacchrotumicchasi || 16-65 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde dIptAnityAvidhirnAma SoDazaH
paTalaH || 16 ||

saptadazaH paTalaH |

zrIdevyuvAca |

deveza zrotumicchAmi ghanAnityAkramArcanam |

udyadghanA ghanAkArA ghanAnityA ghanodayA || 17-1 ||

ghanAlayA ghoSavatI ghaTikodayarUpiNI |

tasyA maMtrArcanaM nityaM vada tvaM karuNAnidhe || 17-2 ||

zrIziva uvAca |

praNavaM pUrvamuddhRtya kAlikAtryakSaraM tathA |

ghanAlaye ghanAghane hrIM hUM phaT ca manurmataH || 17-3 ||

bhuvanAkSaro ghanAyAzca maMtro'yaM surapAdapaH |

aghorabhairava-RSirvirAT chaMdaH prakIrttitam || 17-4 ||

kAlI bIjaM tathA mAyA zaktiH huM phaT ca kIlakam |

kAlikAprItaye devi viniyogaH prakIrttitaH || 17-5 ||

SaDdIrghabhAjA bIjena karpUreNa SaDaMgakam |

ghanAnityAM mahAvidyAM nIlajImUtasannibhAm || 17-6 ||

mattakokilanetrAbhAM pakvajambUphalaprabhAm |
sudIrghaprapadAlaMbi muktAlaMbi kacoccayAm || 17-7 ||

caturbhujAM trinayanAM digambaravinodinIm |

karAlAsyAM ghoradaMSTrAM pInonnatapayodharAm || 17-8 ||

oSThaprAMtagaladraktadhArAviSphuritAnanAm |
vIrANAM karakAMcyA ta bhUSitAM bhImavigrahAm || 17-9 ||

khaDgakheTakapaTTIzamudgarAn bibhratIM kramAt |

dhyAtavyAM satataM vIrairmahAvIraghanAlayA || 17-10 ||

lakSamAtraM japenmaMtraM ghRtAktaiH kamalairhunet |

taddazAMzaM tarpaNaM tu gaMdhadugdhAdibhiH priye || 17-11 ||

taddazAMzaM mArjanaM tu zItalena jalena ca |

taddazAMzaM brAhmaNAnAM bhojanaM samupAcaret || 17-12 ||

evaM kriyAsamAyukto maMtrasiddhiM sa vindati |

ghanAyaMtraM pravakSyAmi pUjanaM yAdRzaM bhavet || 17-13 ||

SaTkoNavRttASTadalaM bhUpureNopazobhitam |
SaTkoNe tu SaDaMgAni SaDdhA tu devatA api || 17-14 ||

p. 122) dalASTake mAtRkASTau tato bhairavapUjanam |

lokapAlAnbhUpureSu tadastrANi ca tadbahiH || 17-15 ||

yathAzakti japitvA tu tato nIrAjayedvibhum |

nIrAjanAnte devezi stutvA natvA visRjya ca || 17-16 ||

iti saMkSepataH proktA ghanAnityA ghanAlayA |

siddhyaSTakasamAkrAMtA kiM punaH zrotumicchasi || 17-17 ||

zrIziva uvAca |

devezi zRNu vakSyAmi balAkApUjanakramam |

balAkA dvAdazI nityA sarvanityAvazaGkarI || 17-18 ||

yajjJAnAtsakalA vidyAH svasvasthAnapadaMgatAH |

tasyA maMtro mahezAni kathyate zRNu sAmpratam || 17-19 ||

praNavaM kAlikAbIjaM kUrcamAye samuddharet |

balAkA kAlizabdAnte atyadbhutaparAkrame || 17-20 ||

abhISTasiddhiM me dehi huM phaT svAhA manurmataH |

kAlikA'syA bhavedbIjaM kUrcaM zaktiH prakIrttitA || 17-21 ||

mAyA kIlakamuddiSTaM kIlakena SaDaMgakam |

SaDaMganyAsamAsAdya dhyAnaM kuryAnmahezvari || 17-22 ||

aJjanAnantasadRzIM koTikAlAnalaprabhAm |
caturbhujAM trinayanAM muNDadurganivAsinIm || 17-23 ||

digambarAM karAlAsyAM pInonnatapayodharAm |

zavAnAM karasaMhatyA kRtakAMcIM zavAsanAm || 17-24 ||

muktakezIM madAghUrNAM prasannamukhapaGkajAm |

sUryakoTisamAbhAsAM muNDamAlAvibhUSitAm || 17-25 ||

khadgamuNDadharAM vAme savye kharparatarjanIm |

saMbibhratIM mahAkAlIM balAkArUpadhAriNIm || 17-26 ||

zmazAnanilayAM devIM bhUtapretasamanvitAm |

zivAbhirghorarUpAbhirveSTitAM ghoranAdinIm || 17-27 ||

p. 123) mA bhairvIravaraM brUhi hRdgataM te karomyaham |

evaM dhyAtvA japellakSaM maMtraH siddho bhaveddhruvam || 17-28 ||

dazAMzaM bilvapatraizca ghRtAktairjuhuyAtsudhIH |

tarpaNaM taddazAMzena taddazAMzena mArjayet || 17-29 ||

taddazAMzaM brAhmaNAnAM bhojanaM parikIrttitam |

viprArAdhanamAtreNa sarvAMgapUrNatAmiyAt || 17-30 ||

padyadaGgaM vihInaM ca tatsAGgaM dvijabhojanam |

anyatsarvaM mahezAni kAlikAvatsamAcaret || 17-31 ||

iti saMkSepataH proktaM kimanyacchrotumicchasi |

zrIdevyuvAca |

deveza zrotumicchAmi rahasyAtirahasyakam || 17-32 ||

mAtrAnityAvidhAnaM tu kathayasva mamAdhunA |

zrIziva uvAca |

mAtrAnityA tu yA proktA sarvanityottamottamA || 17-33 ||

tasyA maMtraM mahezAni yathAvadavadhAraya |

praNavaM kAlikAbIjaM mAyAkUrcaM ca mAtRkAm || 17-34 ||

sabiMdumAtRkAvarNaM caturbIjAni vai punaH |

punazca mAtRkAvarNaM caturbIjaM punazca tat || 17-35 ||

evaM kSAMtA mahezAni mahAmAtrA prakIrttitA |

caturbIjaM mahAmAtre siddhiM me dehi satvaram || 17-36 ||

hU/ phaT svAheti devezi mAtrAmaMtraH paro mataH |

praNavaM kAlikAbIjaM kUrcamAye tataH zive || 17-37 ||

madhye nityA nAma dadyAt saMbudhyantaM ca kevalam |

nityAmaMtrAzca jAyaMte bhinnarUpAzca pArvati || 17-38 ||

punarbIjAni hUM phaT ca svAhAMtAH parikIrttitAH |

AdyayogAtsaMpuTAdvA huM phaDaMtaprayogataH || 17-39 ||

p. 124) evaM navati nityAnAM maMtrabhedA bhavanti ca |

bhairavo'sya RSiH prokto uSNik chaMdaH prakIrttitam || 17-40 ||

mAtrAdevIti vikhyAtA devatA parikIrttitA |

krIM bIjaM hUM tathA zaktiH hrIM kIlakamudAhRtam || 17-41 ||

viniyogo maheSTArthe kAlikArthe prakIrttitaH |

mAyASaDdIrghayuktena SaDaGganyAsamAcaret || 17-42 ||

tathA dhyAyenmahAvidyAM nIlAJjanagiriprabhAm |

caturbhujAM trinayanAM muNDapadmoparisthitAm || 17-43 ||

kapAlakartRkAhastAM khaDgamuNDadharAM parAm |

sudanturAM mahAraudrIM caNDanAdAtibhISaNAm || 17-44 ||

zavavakSaHsamArUDhAM lelihAnAM zavaM zivAm |

evaMvidhAM tAM mAtrAmbAM mahAghoraninAdinIm || 17-45 ||

iti saMcintya devezi lakSamAtraM japaM caret |

dazAMzaM juhuyAdbilvairathavA kadalIphalaiH || 17-46 ||

drAkSAbhiH pAyasairvApi dazAMzaM havanaM caret |

tarpaNaM mArjanaM viprabhojyaM yatnena kArayet || 17-47 ||

yadyadaGgaM vihIyeta tatsaMkhyAdviguNo japaH |

japapUjAprayogAdi kAlIvallipimAtRvat || 17-48 ||

iti saMkSepataH proktaM kimanyacchrotumicchasi |

zrIdevyuvAca |

deveza zrotumicchAmi rahasyAtirahasyakam || 17-49 ||

zrIziva uvAca |

rahasyamapi te devi kathyate zRNu sAMpratam |

mudrAnityAvidhAnaM ca sarvasArottamottamam || 17-50 ||

mudraNI nAmakA nityA zrIvidyAyAM tu mudriNI |

mudriNI daNDinI nAmnI devI sauMdaryavigrahA || 17-51 ||

mahAvidyAdikAdInAM manomudraNakAriNI |
teneyaM mudrAnityAkhyA sarvasiddhiparAmbikA || 17-52 ||

praNavaM kAlikAbIjaM mAyA kUrcaM krameNa ca |

prI/ phre/ bIjayugaM procya mudrAmbApadamuddharet || 17-53 ||

p. 125) mudrAsiddhiM me dehi bhojaganmudrAsvarUpiNI |

hUM phaT svAhAsamAyukto vItivarNo manuH zubhaH || 17-54 ||
mahAdevo RSizcAsya gAyatrI chaMda Iritam |
mudrAnityA mahAdevI devatA parikIrttitA || 17-55 ||

kAlIbIjaM bIjamasyA mAyA zaktiH prakIrtitA |

kUrcaM kIlakamityuktaM kAlyA SaDdIrghayuktayA || 17-56 ||

SaDaGganyAsamAcarya mudrAM dhyAyenmahezvari |

aJjanAdrinibhAM mudrAM muNDamAlAvibhUSitAm || 17-57 ||

digambarAM ghoradaMSTrAM caMDanAdAtibhISaNAm |

dakSiNAM muktakezAlIM digambaravinodinIm || 17-58 ||

piGgAkSIM prajvalajjihvAM ghoraceSTAbhayAnakAm |

zavAnAM karasaMghAtaiH kRtakAMcIM hasanmukhIm || 17-59 ||

sRkkadvayagaladraktadhArAvisphuritAnanAm |
kapAlakartRkA hastAM khaDgakheTakadhAriNIm || 17-60 ||

mahAkAlena ca samaM ratAsaktAM kSudhAturAm |

varaM brUhi varaM brUhi varaM brUhIti vAdinIm || 17-61 ||

evaM saMcintya devezi pUjayedyaMtramAdarAt |

trikoNaM vRttaSaTkoNaM vRttASTadalabhUpuram || 17-62 ||

caturdvAropazobhADhyaM taddvAri gaNapastathA |

yoginIkSetrapAlAzca baTuko hi caturthakaH || 17-63 ||

lokapAlAstralokezA bhUpure kramazo yajet |

daleSTamAtRkAM pUjya kesare bhairavASTakam || 17-64 ||

dalASTAgre tvaSTasiddhiH SaTkoNeSu SaDaGgakam |

rAjyadA bhogadA mokSajayadA'bhayadA tathA || 17-65 ||

SaSThI tu siddhidA proktA SaTkoNeSu kramAdyajet |

icchAM jJAnaM kriyAM caiva trikoNe paripUjayet || 17-66 ||

madhye mudrAM ca saMpUjya sarvapaJcopacArakaiH |

iti pUjAM samAsAdya tato nIrAjanaM caret || 17-67 ||

p. 126) nIrAjanAnte devezi prANAyAmapuraHsaram |

lakSadvayaM japenmaMtraM suzvetaiH karavIrajaiH || 17-68 ||

dazAMzaM havanaM kRtvA taddazAMzena tarpaNam |

mArjanaM brAhmaNAnAM ca bhojanaM samupAcaret || 17-69 ||
evaM siddhamanurmantrI prayogArho na cAnyathA |
yadyaddhRdi samAdhatte tattatkRtyaM karoti hi || 17-70 ||

sarvaM tu kAlivatproktaM vizeSaH kathito mayA |

iti saMkSepataH proktaM kimanyacchrotumicchasi || 17-71 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde mudrAnityAvidhirnAma saptadazaH
paTalaH || 17 ||

aSTAdazaH paTalaH |

zrIdevyuvAca |

deveza zrotumicchAmi mitAnityAvidhikramam |

sarvavidyAvarArohAM mitAM me brUhi sAdaram || 18-1 ||

zrIziva uvAca |

zRNu vakSyAmi devezi rahasyAtirahasyakam |

sarvavidyAmahArAjJI mitAnAmnI mahodayA || 18-2 ||

tasyA maMtraM pravakSyAmi kAlIsarvAGgamadbhutam |

praNavaM pUrvamuddhRtya kAlikAbIjamuddharet || 18-3 ||

kUrcabIjaM tathA mAyAM vAgbhavaM bIjamuddharet |

mitepadaM samuccArya tathA parimite padam || 18-4 ||

parAkramAaya ca padaM punarbIjAni coddharet |

sohaM hUM phaT tataH svAhA saptaviMzativarNavAn || 18-5 ||

maMtro'yaM kathito devi RSichaMdAdikaM zRNu |

mahAkAla RSizcAsya triSTup chaMdaH prakIrttitam || 18-6 ||

mitAnityA devatA ca kAlikA bIjamIritam |

kUrcaM zaktirmahezAni mAyA kIlakamIritam || 18-7 ||

kIlakena SaDaGgAni SaDdIrghADhyena kArayet |

dhyAyennIlAdrisaGkAzAM nIlajImutasannibhAm || 18-8 ||
raktavastrAM zavAsInAM muNDamAlAvibhUSitAm |
pInonnatakucadvaMdvAM pInavakSo nitambinIm || 18-9 ||

dakSiNAM muktakezAlIM digambaravinodinIm |

mahAdevahRdambhojamadhyasthAM zaMkhakaGkaNAm || 18-10 ||

koTikAlAnalaprakhyAM zmazAnAlayavAsinIm |
khaDgamuNDadharAM vAme savye'bhayavarapradAm || 18-11 ||

sAdhakAkAMkSahRdayAM sAdhakasya varapradAm |

mukhasAndrasthitAmodamodinIM madavihvalAm || 18-12 ||

AraktamukhasAndrAbhirnetrAdibhirvirAjitAm |
dakSiNAM sasmitAM divyAM dInanAthAM vibhAvayet || 18-13 ||

p. 128) evaM dhyAtvA mitAM devIM lakSatryaM japaM caret |

kiMzukairhavanaM kAryaM jyotiSMatyAthavA priye || 18-14 ||

jyotiSmatIprasUnena phalaM kiMzukavanmatam |

AraktakaravIreNa juhuyAnmaMtrasiddhaye || 18-15 ||

trikoNakuNDe juhyAtsaMskRte khAdirAnale |

tAmbUlapatrahomena kAlikAM vazamAnayet || 18-16 ||

puSpAktanAgavalyA ca nAginIsiddhimApnuyAt |
vajrapuSpeNa juhuyAt DAkinyA vA mahezvari || 18-17 ||

dhattUreNArinidhanaM kundaizca kavitAM labhet |

jAtIpuSpairjayAvAptistilapuSpairbalonnatiH || 18-18 ||

punnAgaiH puruSArthAya ketakyA kAminIM labhet |

AsuryA ripunAzazca candanena jayI sadA || 18-19 ||

tathaivA'guruNA devi rAjarAjapadaM labhet |

raktacandanahomena sarvamohanamAcaret || 18-20 ||

girikarNyA kanyakAptiH sevaMtyA zivarUpatA |

guDUcyA ripunAzazca marIcenAkRSTiruttamA || 18-21 ||

pUgIphalairmahAbhAgyaM tathA jAtiphalairdhanam |

staMbhanaM campakenaiva jaMvvA janmArtinAzanam || 18-22 ||

evaM nAnA vidhAnena kAmamuddizya sAdhayet |

tato homadazAMzena tarpaNaM pIThanIrataH || 18-23 ||

aSTagandhodakenApi tathA kesaranIrataH |

tarpaNasya dazAMzena mArjanaM samupAcaret || 18-24 ||

taddazAMzaM viprabhojyaM zaktayazca kumArikAH |

pUjayedbhojayeddevi sarvasiddhiM sa viMdati || 18-25 ||

atha pUjAvidhAnasya yaMtraM saMkathyate zRNu |

trikoNatritayaM likhya vRttaM SaTkoNasaMyutam || 18-26 ||

vRttASTadalazobhADhyaM bhUpureNa samanvitam |

caturdvAropazobhADhyaM madhye binduvibhUSitam || 18-27 ||

p. 129) kAlIM karAlinIM ghorAM prathame tu trikoNake |

dvitIye tu trikoNe ca vAmAM jyeSThAM ca raudrikAm || 18-28 ||

tRtIye tu trikoNe tu icchAM jJAnaM kriyAM tathA |

atha vRtte yajeddevi vArtAlIM prathamaM yajet || 18-29 ||

dvitIyabhAge devezi laghuvArAhikAM yajet |

tRtIyabhAge devezi svapnavArAhikAM yajet || 18-30 ||

tiraskaraNikAM pUjya caturthabhAgake zive |

SaTkoNavAme devezi caturdvAraM prapUjayet || 18-31 ||

SaTkoNe tu SaDaMgAni vRtte siddhyaSTakaM tathA |

dale'STau mAtRkAH pUjyAstadante'STau ca bhairavAH || 18-32 ||

bhUpure lokapAlAzca tadastrANi ca tadbahiH |

evamiSTvA mitAM nityAM vidyAmitrAM niraJjanIm || 18-33 ||

evamArAdhanAyukto maMtrasiddhiM labhennaraH |

athavA'nyaprakAreNa dhyAnaM nityAkrame zRNu || 18-34 ||

aJjanAdrinibhAH sarvA muNDamAlAvibhUSaNAH |

dakSahaste devI khaDgaM vAmahaste ca tarjanIm || 18-35 ||

dhArayantyaH zubhAH kAlyA vararAbhayatatkarAH |

etatsAmAnyato dhyAnaM nAmamaMtravidhau smRtam || 18-36 ||

rahasyamatra kathitaM siddhayo'STavidhAH kare |

aJjanaM guTikA khaDgaM vetAlaM yakSiNIgaNam || 18-37 ||

carukaM tilakaM vAsaH kapAlaM pAdukAM tathA |

laguDaH kinnarIsiddhirDAmaryAdi mahAkalA || 18-38 ||

carAcaragatizcaiva tvaNutvaM laghimAdikam |

parakAyapravezazca tatazcaiva rasAyanam || 18-39 ||
sparzazcintApahArazca bhUtasaJcaraNaM tathA |
mRtakotthApanaM divyAH siddhayastatkare sthitAH || 18-40 ||

mahApIThaM samuddhRtya nityA sthApyA yathAkramam |

athavA mUlamaMtreNa yajenmadhye svadevatAm || 18-41 ||

p. 130) yathoktamaMtrasidhyarthaM dhyAyecca kulavastubhiH |

yajetsaMtarpayecchaktiM bhojanAcchAdanAdibhiH || 18-42 ||

dhUpayeddazagaMdhena devatA'vatarettadA |
raktAkSI stabdhanetrAGgI prasannamukhapaMkajA || 18-43 ||

kAcidekA bhavecchaktiritarAstanmukhasthitAH |
tasminkSaNe tatprakRtiM kRtvA mASamayIM zubhAm || 18-44 ||

ghRtapakvA mAMsamayA upabhogAH prakalpayet |

grAse grAse surAM dadyAnmatsyazAkalakAni ca || 18-45 ||

AdyaM bIjaM samuccArya nitye krUramukhe tathA |

krUradaMSTre lalajjihve'mukaste'yaM prakalpitaH || 18-46 ||

AhAro bhakSayayugaM svAhAntaM ThadvayaM punaH |

AdyabIjaM samuccArya mRtaM dhyAyedripuM tadA || 18-47 ||

tatkAlameva harate mitA prANAnsurezvari |

zrUyate'sau mRta iti tAvatsambhojayenmitAm || 18-48 ||

pazcAtpaJcAGgadhUpena dhUpayettAM varapradAm |

hAsaM kRtvA varaM datvA vrajetsA zaktidehataH || 18-49 ||

zmazAne vA'tha sampUjyA vaDavAgnisamaprabhA |

sasainyarAjJo nAzAya nRmAMsaiH kulavastubhiH || 18-50 ||

udyAneSu vazIkartuM uccATe tu nadItaTe |

nAtaH paratarA vidyA sadyaH pratyayakAriNI || 18-51 ||

vikhyAtA uttarAmnAye zatadhA pUjitA mayA |

gopyAdgopyatarApyeSA mayA tubhyaM prakAzitA || 18-52 ||

ataH paraM mahAdevi kimanyacchrotumicchasi |

zrIdevyuvAca |
deveza zrotumicchAmi yazca dhUpastvayoditaH || 18-53 ||

dazagandhapriyastasya kAni dravyANi tatra tu |

zrIziva uvAca |

kAzmIrasya trayo bhAgAstrayo dadyAttathA'guroH || 18-54 ||

p. 131) bhAgAH paMcaiva candrasya mRganAbherdvayaM tathA |

kRSNacandanakAdyaSTau zvetacandanakAzva SaT || 18-55 ||

mahiSAkSasya saptaiva sarjakA dvAdazaiva hi |

mAMsyA bhAgASTakaM kRtvA'jyAdbhAgaikaM samAharet || 18-56 ||

dazagandhastu dhUpo'yaM paJcAGgaM zRNvatha priye |

mUlaM kRSNAgurorbhAgaM patrakaM ca tvacastathA |
svarNapuSpaM jAtipatrI samabhAgena dhUpayet || 18-57 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde mitAnityAvidhirnAmASTAdazaH
paTalaH || 18 ||

ekonaviMzatitamaH paTalaH |

zrIdevyuvAca |

deveza tvatprasAdena mitAyAH saMzruto vidhiH |

tiraskaraNikAM brUhi mahAmohanakAriNIm || 19-1 ||

zrIziva uvAca |

zRNu devi pravakSyAmi mahAmohanakAriNIm |

zrIvidyAyAzca bAlAyA aGgabhUtAM sugopitAm || 19-2 ||

vAgbhavaM kAlikAbIjaM bhuvanezIM haripriyAm |

tiraskaraNizabdAnte tataH sakalajanaM vadet || 19-3 ||

vAgvAdini sakalapadaM pazujanamano vadet |

cakSuH zrotraM tathA jihvAM ghrANaM tiraskaraNaM vadet || 19-4 ||

kurudvayaM ThadvayaM ca svAhAnto'yaM manuH smRtaH |

vAgbhavaM bhuvanAM lakSmIM klIM bhagavato vadet || 19-5 ||

svAhayA tu saMyukto dvitIyo'yaM paro manuH |

mAhezvarI sarvapazujanacakSustiraskara || 19-6 ||

NaM kuruyuk svAhayA tu saMyukto'yaM paro manuH |

trailokyamohinipadaM mahAmAyepadaM tataH || 19-7 ||

sarvajanamanazcakSustatastiraskRtiM vadet |
kuruyuk svAhayA yuktazcaturtho'yaM kramAnmanu || 19-8 ||

vAGmAyA kamalAbIjaM hsauyugakSaramuddharet |

oM namo bhagatipadaM zrImahezari coddharet || 19-9 ||

tataH sarvajanamanazcakSuHpadamudIrayet |
tiraskaraNazabdAnte kuruyuk svAhayAnvitaH || 19-10 ||

paJcamaMtrAH krameNoktAH makArapaJcarakSakAH |

makArapaJcarakSArthaM maMtrapaJcakamuccaret || 19-11 ||

hrIM klI/ namo bhagavati mAhezvaripadaM vadet |

tataH sarvajanapadaM manazcakSuHpadaM vadet || 19-12 ||

tiraskaraNamuccArya kuruyuk svAhayAnvitaH |

samastarakSaNAdyarthe SaSTho yogaH prakIrttitaH || 19-13 ||

p. 133) maMtrasyAsya RSiH zaktirgAyatrI chanda Iritam |

sarvapazujanamanazcakSurAdi tiraskRtaH || 19-14 ||

devatA gaditA devi klIM bIjaM parikIrttitam |

hrIM zaktiH krI/ kIlakaM syAdviniyogastiraskRtau || 19-15 ||

vAGmAyAkamalAkAmairaMguSThAbhyAM namo vadet |

bIjaM bhagavati tatra tarjanyAM vinyasetsudhIH || 19-16 ||

mAhezvarI madhyamAbhyAM sarvA tiraskaraNI tataH |

anAmikAM gaditAbhyAM kaniSThAbhyAM kurudvayam || 19-17 ||

bIjAni tu punaH svAhA karapRSThayuge nyaset |

evaM hi hRdaye nyasya varNanyAsaM samAcaret || 19-18 ||

dakSabAhau dakSapRSThe dakSorau dakSajAnuni |

dakSapAde dakSamaste'pyevaM vAme'pi vinyaset || 19-19 ||
bAhumUlaM pRSThajAnumastake nyasya vai manum |
sampUrNavidyayA devi vyApakanyAsamAcaret || 19-20 ||

tato dhyAyenmahAvidyAM tiraskaraNarUpiNIm |

muktakezIM vivasanAM sarvAlaGkAralaGkRtAm || 19-21 ||

sva * * darzanAnmugdhapazuvargAM namAmi tAm |

nigrahArthaM mahAdhyAnaM yathAvadavadhAraya || 19-22 ||

zyAmavarNAM madAghUrNaraktanetratrayAM zivAm |

kRSNAmbarAM tathA khaDgaM dadhatIM ca bhujadvaye || 19-23 ||

dorbhyAM manoharAbhyAM tu kharjUrIkumbhadhAriNIm |

nIlAzvasthAM puroyAntIM nIlAbharaNabhUSitAm || 19-24 ||

nIlamAlyAdivasanAM nIlagandhAM manoharAm |

nidrAmiSeNa bhuvanaM tirobhAvaM prakurvatIm || 19-25 ||

khadgAyudhAM bhagavatIM bhaktapAlanatatparAm |

pazunirmUlanodyuktAM pazutarjanamudrikAm || 19-26 ||

tiraskaraNikAM proktAM bhUrjapatre likhenmanum |

kumbhAgre sthApayeddevi likhitaM kuGkumAdinA || 19-27 ||

japellakSaM mahAmantraM saMsthAnaikatame zive |

dazAMzaM havanaM kAryaM bilvairmadhughRtaplutaiH || 19-28 ||

taddazAMzaM tarpaNaM ca taddazAMzaM ca mArjanam |

brAhmaNAnAM bhojanaM ca dazAMzena samAcaret || 19-29 ||

evaM siddhamanurmantrI taraskaraNamAcaret |

sarvasAdhyakarI vidyA pazUnAmAndhyakAriNI || 19-30 ||

svapnavArAhivaddevi purazcaryAvizeSakau |
iti saMkSepataH proktaM kimanyacchrotumicchasi || 19-31 ||

zrIdevyuvAca |

deveza zrautumicchAmi kautukAni mahAntyapi |

tanme vada dayApAra yadyahaM tava vallabhA || 19-32 ||

zrIziva uvAca |
rahasyAdatigopyaM ca kathyate zRNu sAmpratam |
svapnavArAhikA vidyA tridhA'tra parikIrttitA || 19-33 ||

Adau paMcadazI vidyA tato'STAdazavarNagA |

caturviMzatitattvADhyA mahatI parikIrttitA || 19-34 ||

sarvazreSThakautukADhyA tanmadhye'STAdazAkSarI |
tasyA maMtravidhAnaM ca kathyate zRNu sAmpratam || 19-35 ||

vAgbhavaM bhuvanAhRdvai vArAhI tu tato vadet |

aghoreti samuddhRtya svapne ca ThacatuSTayam || 19-36 ||

vahnijAyAMtiko maMtro bhaviSyAdipradarzakaH |

aSTAdazAkSaraH prokto RSirIzvara IritaH || 19-37 ||

anuSTup chanda ityuktaM svapnezI devatA matA |

aiM bIjaM hrIM tathA zaktiH ThaTha svAhAMtaSaTkakam || 19-38 ||

hRdaye aiM tathA mAyA namo vArAhi vai ziraH |

aghore ceti ca zikhAM svapne vai kavacaM bhavet || 19-39 ||

ThacatuSkaM bhavennetrai svAhetyastraM bhavetpriye |

kaTikaNThagaNDakarNanetramUrdhasu vinyaset || 19-40 ||

p. 135) nIlAJjanagirizyAmAM maNiratnavibhUSitAm |

azvArUDhAM cakrahastAmapare ca halAyudhAm || 19-41 ||

adhasthayoH kartarIM ca kapAlaM raktapUritam |

pAdAdhaHsthahiraNyAkSaM ratamANAM madoddhatAm || 19-42 ||

nAnAzaktisamAkIrNAM nAnAgaNavirAjitAm |
evaM dhyAtvA viSNuzaktiM tataH pUjanamArabhet || 19-43 ||

ArAdhayedbindumadhye devIM tryasraM tato likhet |

tatra nidrAM suprasannAM DimbhAGgIM ca prapUjayet || 19-44 ||

tataH SaTkoNamadhye tu mahogrAM pretayakSikAm |

zvAsakAlAM bhImavatIM nakhajvAlAM mahodarIm || 19-45 ||

tato'STadalamadhye tu girIzaM caturAnanam |

phaTkAraM baddhamAtaMGgaM kulIraM vAyarAM balim || 19-46 ||

caNDIzvaraM ca saMpUjya tato dvAdazavarNake |

mAtaGgIM vRddhamAtaGgImasitAMgIM kaphotkaTAm || 19-47 ||
mahoddhatAM pretavAhAM jJAnazaktiM kriyAvatIm |
vagalikAM bhAnumatIM somadevIM cirantanIm || 19-48 ||

tataH pUjya SoDazAre saMhAreNaiva pUrvataH |

endrIM saurIM mahezAnIM tArA yakSaprasUM dharAm || 19-49 ||

vAmAM virodhinIM zyAmAM mAtaGgIM surarAkSasIm |

padmAvatIM kAlarAtriM tAmasIM madanAM madAm || 19-50 ||

pItagandhAkSataiH pUjyA tathaiva kulavastubhiH |

saMyuktaH zaktibhiH sArdhalakSamekaM japenmanum || 19-51 ||

hayamArasya kusumairhayAripalalaistathA |
dazAMzaM juhUyAnmantrI tryasre vA yonikuNDake || 19-52 ||

tarpaNaM mArjanaM kuryAdyoginInAM samarcanam |

evaM siddhamanurmantrI prayogAnsAdhayecchubhAn || 19-53 ||

madhvAjyasurasAbhizca homo darzayate harim |

aSTottarasahasreNa sAdhakasyepsitaM vadet || 19-54 ||

p. 136) kadambapuSpairhomastu nidhAnaM nizi darzayet |

nIlotpalakRto homaH striyamAkarSayeddhaThAt || 19-55 ||

javApuSpaiH kAlakhaNDairhomo bhUpaM vazaM nayet |

mArjArAntraiH kRto homastrAsayet sAdhakArthinam || 19-56 ||

putrAjIvakabIjaizca homaH putrakaro bhavet |

yasya pratikRtiM kRttvA mASapiSTamayIM zubhAm || 19-57 ||

juhuyAttasya bhavati sadyo mRtyurna saMzayaH |

sahasratritayaM japtvA svapne vakti zubhAzubham || 19-58 ||

jAGgalaiH palalairhomaH kiM tatkAryaM na sAdhayet |

tAre namo bhagavati vArAhi dvitayaM ThaThaH || 19-59 ||

paJcadazAkSaro maMtraH sadyaH pratyayakArakaH |

akSobhyo bhairavaH proktaH chandastu zakvari matam || 19-60 ||

devatA svapnavArAhI SaDaMgAni padaiH kramAt |

prAgvat pUjAdikaM devi prayogazcApi pUrvavat || 19-61 ||

bIjAnte bhuvanezvaryA aMkuzaM bIjamuddharet |

vArtAlIti padadvandvaM vArAhIdvitayaM tathA || 19-62 ||
svapnazvari yugaM tasmAdaindavIM biMdubhUSitAm |
vAyuM binduyutaM pazcAccaturviMzAkSaro manuH || 19-63 ||

janArdano RSizcAsya chandaH saMskRtirIritam |

devatAM svapnavArAhIM raktavyAghUrNalocanAm || 19-64 ||

smarodbhinnAM trinayanAM khaNDendukRtazekharAm |

daMSTrAkarAlavadanAM ziromAlAvibhUSitAm || 19-65 ||

yajetpUrvodite pIThe sarvakAlaphalapradAm |

atraiva kRSNamAtaGgikautakaM zRNu pArvati || 19-66 ||

praNavaM pUrvamuddhRtya namo bhagavatIti vai |

kRSNamAtaMgini zirovalkaladhAriNI coddharet || 19-67 ||

sarvajanamahaMkari mAyA SaT dIrghayuk tataH |

amukaM padamuddhRtya me vazyAkRSTimuccaret || 19-68 ||

p. 137) kuru svAhAnvito maMtraH sarveSAM surapAdapaH |

RSiH kRSNa iti khyAtaH sarvadevottamottamaH || 19-69 ||

virATcchanda iti khyAtaM mAyayA tu SaDaGgakam |

oM bIjaM bhuvanA zaktiH svAhA kIlakamIritam |
trailokyavazyArthamatha viniyogaH prakIrttitaH || 19-70 ||

vINAvAdanakovidAmbudaghaTA lAvaNyalIlA varA

bimboSThI vanajAkSimaJcitatanU vyAkIrNakezasrajA |
lIlAlolasuvarNakuNDaladharA dharmArthakAmodayA
caNDI caNDaparAkramA bhavatu naH sarvArthasaMsAdhikA || 19-71 ||

evaM dhyAtvA japellakSaM tataH siddho bhavenmanuH |

ucchiSTahastaH prajapet ucchiSTeNa baliM caret || 19-72 ||

evaM prajapatastasya siddhayo janavazyatA |

jAyate devadevezi kiM punaH zrotumicchasi || 19-73 ||

iti zrIzaktisaGgamamahAtantrarAje uttarabhAge tRtIyakhaNDe

zrIimadakSobhyamahogratArAsaMvAde tiraskaraNikAvidhirnAmaikonaviMzaH
paTalaH || 19 ||

viMzatitamaH paTalaH |
zrIziva uvAca |

kAmaM zakrapadArUDhaM ratibindusamanvitam |

vAgbhavaM bIjamuddhRtya parAprAsAdamuddharet || 20-1 ||

anulomavilomena proktA sampatsarasvatI |

SaDakSarI mahAvidyA sarvavidyottamottamA || 20-2 ||

dInAnAM tu daridrANAM gatAdhikAriNAM tathA |

sampatsarasvatI vidyA mahAsampattidAyinI || 20-3 ||

kRSNo RSirmahezAni gAyatrI cchanda Iritam |

sampatsarasvatI devI devatA parikIrtitA || 20-4 ||

a/ bIjaM klIM tathA zaktiH hasauH kIlakamIritam |

sampatyarthe mahezAni viniyogaH prakIrttitaH || 20-5 ||

SaDakSareNa devezi SaDaGganyAsamAcaret |

vyApakaM navadhA kRtvA dhyAyeddevIM manoharAm || 20-6 ||

anekakoTimAtaGgaturaGgarathapattibhiH |
sevitAmaruNAkArAM vande sampatsarasvatIm || 20-7 ||

iti dhyAtvA mahezAni trikoNaM cakramAlikhet |

SaTkoNaM ca tato lekhyaM vRttASTadalabhUSitam || 20-8 ||

bhUpureNa samAyuktaM yaMtraM sampanmanormatam |

sampatsarasvatIM devIM trikoNe paripUjayet || 20-9 ||

daleSTamAtRkAH pUjyA bhairaveNa samanvitAH |

caturasre lokapAlAH tadasrANi ca tadbahiH || 20-10 ||

evamAvaraNAnpUjya japellakSatrayaM zive |

dazAMzena mahezAni pAlAzakusumairhunet || 20-11 ||

purazcaraNasampanno prayogArho na cAnyathA |

lakSamekaM japenmaMtraM dazAMzaM pAyasairhunet || 20-12 ||

azvasAhasrasaMpanno rAjA bhavati bhUtale |

SaTsahasraM japennityaM dazAMzaM kamalairhunet || 20-13 ||

139) mAtaGgarathavRndAzvadhanadhAnyasamanvitaH |
tasya saMvatsarAllakSmIracalA jAyate dhruvam || 20-14 ||

sahasraM juhuyAnnityaM anale zAlitaNDulaiH |

maNDalAnnAtra sandeho bhUpatitvamavApnuyAt || 20-15 ||

bilvamUle japenmantrI nityaM dazasahasrakam |

mAsArddhAtsakalAM lakSmIM prApnoti sAdhakaH || 20-16 ||

hunedbilvasamidbhiryo tanmUle'STottaraM zatam |

tadgRhe mahadaizvaryaM tribhirmAsairbhavedapi || 20-17 ||

dazavAraM spRzedannaM japtvA bhuMkte naro yadi |

tadgRhe'nnasamRddhiH syAdakSayaM nAtra saMzayaH || 20-18 ||

nadItIre japenmantramekAgramanasA zuciH |

dazAMzaM goghRtaM hutvA vazIkuryAjjagattrayam || 20-19 ||

ghRtena juhuyAnnityaM catuHsahasramAdarAt |

aNimAdiguNaizvarya mAsAdApnoti sAdhakaH || 20-20 ||

iti saMkSepataH proktaM zRNu mRtyuJjayaM zive |

praNavaN pUrvamuddhRtya kASThaM SaSThasvarAnvitam || 20-21 ||

binduyuktaM mahezAni candrabindusamanvitam |

ka paMcaviMzatiM pazcAdbinduyuktaM mahezvari || 20-22 ||

nAdyaM dIrgha samAyuktaM zakrabIjaM ca mArutam |

mArutaM dIrghasaMyuktaM mahIM vAyumathoccaret || 20-23 ||

dazArNo'yaM mahAvidyA kAlamRtyuvinAzinI |

vAmadevo RSizcAsya paMktizchandaH prakIrttitam || 20-24 ||

mRtyuJjayo mahArudro devatA parikIrttitA |

praNavaM bIjamityuktaM jUM zaktiH parikIrttitA || 20-25 ||

candracandraM candravahniH punarvahni krameNa ca |

iti maMtrAkSarairnyAsaM kRtvA dhyAyetparaM zivam || 20-26 ||

acchasvacchAravindasthitimubhayakarAGkasthitaM pUrNakumbham
dvAbhyAM vedAkSamAle nijakarakamalAbhyAM ghaTau nityapUrNau |
dvAbhyAM tAvatsravantau zarasi zazikalAM bandhurAM plAvayantau
evaM devaM dadhAnaH pravizati vizadAM kalpajAlazciraM naH || 20-27 ||

p. 140) evaM dhAtvA bAhyapIThe SaTkoNaM vilikhecchive |

dalASTakaM likhettatra vRttaM tatra likhettataH || 20-28 ||

SaTkoNamadhye devezi yajenmRtyuJjayaM zivam |

koNaSaTke ca satyAdi mantrAn paJca sadAzivam || 20-29 ||
tato yajellokapAlAnsAyudhAnparamezvari |
lakSaM japetpurazcaryA tilairhomo dazAMzataH || 20-30 ||

anantaraM japellakSatritayaM paramezvari |

kAlamRtyuvinAzazca bhavatyeva na cAnyathA || 20-31 ||

parvatAgre japeddevi lakSadvAdazakaM zive |

kalpAyuH zatajIvI ca bhavatyeva na cAnyathA || 20-32 ||

ayutaM homayeddevi dUrvayA mRtyunAzane |

iti saMkSepataH proktaM pathiSadrudrakaM zRNu || 20-33 ||

praNavaM natimuccArya rudrAya padamuccaret |

pathiSadpadamuccArya caturthyantasamanvitam || 20-34 ||

svastItyuktvA mAM rakSa ca saMpAlaya padaM tataH |

pathiSadrudravidyeyaM zrutA pathi bhayApahA || 20-35 ||

vAmadevo'sya maMtrasya RSirityucyate budhaiH |

paMktizchanda iti prAhurgAyatramathavA zive || 20-36 ||

devatA pathiSadrudro mArge sakalabhItihA |

praNavaM bIjamityuktaM namaH zaktiritIritA || 20-37 ||

ekAkSareNa dvAbhyAM ca tribhizca caturakSaraiH |

tribhizcaturbhirityukto SaDaGgo'yaM mayA zive || 20-38 ||

zuddhasphaTikasaMGkAzaM caturbAhusamanvitam |
pinAkakArmukopetaM bANaTaGkasamanvitam || 20-39 ||

tribhirmaMtraiH samopetaM eNAGkacandrazekharam |

kailAsagirisaGkAzaM vRSabhArUDhamIzvaram || 20-40 ||

annapUrNezvarI yuktaM pathiSadrudranAmakam |

pathi corAdi bhItighnaM dhyAyeddevaM sadAzivam || 20-41 ||

p. 141) dhyAnametanmayA proktaM yaMtraM vacmi tataH param |

SaTkoNaM vilikhedAdau dalAnyaSTA tato likhet || 20-42 ||

bhUgRhaM vilikhetpazcAddvAropetaM sulakSaNam |

SaDasramadhyame devaM pathiSadrudramarcayet || 20-43 ||

SaTkoNeSu SaDaGgAni tatra mantraiH samarcayet |

nandIkezazca nandI ca bhRGgI ca bhRGgirITi vai || 20-44 ||

mRDazca vIrabhadrazca kumAro gaNapastathA |

aSTapatre yajedetAH prArthayenmama vallabhe || 20-45 ||

dikSvaSTasu mahIgehe dikpAlAnaSTa pUjayet |

evamAvaraNairyuktaM pathiSadrudramIzvaram || 20-46 ||

pUjayitvA japenmaMtraM caturlakSamatandritaH |

dazAMzaM tu tilairhutvA mantraH siddho bhaviSyati || 20-47 ||

siddhenAnena maMtreNa prayogaM kArayedbudhaH |

pathi corabhaye prApte japedaSTottaraM zatam || 20-48 ||

tatazcaurairadRzyaH syAt pumAnayamasaMzayaH |

pipAsAsaMyute mArge vijane sAdhakottamaH || 20-49 ||

japedamuM mahAmaMtraM vasupUrvazatatrayam |

tatraiva labhate sadyo jalaM pIyUSasannibham || 20-50 ||

annena rahito mArge kSudhAsaMpIDito naraH |

japedamuM mahAmaMtramaSTottarasahasrakam || 20-51 ||

miSTAnnaM labhate sadyo brAhmaNAnAM zatasya ca |

rahasyAtirahasyaM ca rahasyAtirahasyakam || 20-52 ||

gopanIyaM kautukaM hi svayoniriva pArvati |

iti saMkSepataH proktaM kimanyacchrotumicchasi || 20-53 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde pathiSadrudravidhirnAma viMzatitamaH
paTalaH || 20 ||

ekaviMzatitamaH paTalaH |

zrIdevyuvAca |

deveza zrotumicchAmi kautukaM zatrunigraham |

zrIziva uvAca |

rahasyAtirahasyaM ca kautukaM kathyate zRNu || 21-1 ||

ArdrapaTezvarI vidyA kathyate zatrunigrahe |
praNavaM pUrvamuddhRtya namo bhagavatIti ca || 21-2 ||

ArdrapaTezvari procya harinIlapadaM vadet |

kAlipadaM tatoccAryaM Ardrajihve padaM vadet || 21-3 ||

caNDalohini coddhRtya rudrANyatha kapAlini |

jvAlAmukhi saptajihve sahasranayane vadet || 21-4 ||

ehiyuk cAmukaM te ca pazuM dadAmi vai vadet |

amuSyajIvamuddhRtya nikRntapadamuddharet || 21-5 ||

athAhitajIvapadamapahAriNi hUM vadet |

phaT bhUrbhuvaH svaH padaM ca phaT svAhA rudhiraM piba || 21-6 ||

mAravAdini coddhRtya mama zatruMpadaM vadet |

chedayadvitayaM procya pibadvandvaM samuddharet || 21-7 ||

zoNitaM ca padaM hUM phaT svAhAnto manurADayam |

vyaJjanatritayAkrAntaM zataM viMzattrayAdhikam || 21-8 ||

durvAsA RSirAkhyAto gAyatrI chanda Iritam |

nikRnta iti bIjaM syAtsvAhA zaktiH samIritA || 21-9 ||

zatrunigrahakAryArthe viniyogaH prakIrttitaH |

hrIM SaTkaistu SaDaGgAni tato dhyAyetparAmbikAm || 21-10 ||

zitogratara daMSTrikA trinayanorddhvakezolvaNA (?)

kapAlaphalasottha saDDamarukartrizUlAGkitA |
ghanAghananibhAruNAruNitakiGkiNImAlikA
bhavedbhavasusiddhaye mama tu bhadrakAlI ciram || 21-11 ||

p. 143) ayutaM prajapenmantraM marubhUmau zmazAnake |

snAnaM kRtvA cArdravAsaH zatrumuddizya yojayet || 21-12 ||

kSaNArdhAcchatrumaraNaM bhavatyeva jape kRte |

kevalaM japamAtreNa mAsAnte zatrumAraNam || 21-13 ||

kRSNASTamI samArabhya yAvatkRSNacaturdazI |

zatrunAmasamAyuktastAvatkAlaM japenmanum || 21-14 ||

yamAlaye vrajecchatrurmukundasadRzo'pi cet |

ArambhadivasAddevi brahmarudrAdayaH surAH || 21-15 ||

na rakSituM prazaktAste mRtyustasya bhaviSyati |

kRSNapratipadArabhya yAvatsyAddazamI tithiH || 21-16 ||

maMtramuccArya devezi zatrudeze jalaM kSipet |

gRhItvAJjalinA nIraM zatrudeze kSipejjalam || 21-17 ||

mArayecchatrusaGghAtaM nAtra kAryA vicAraNA |

zatrunAma samuccArya manunA paradevate || 21-18 ||

aSTottarazataM japtvA zatrunAzo bhaveddhRvam |

devAnAM bRhatIpuSpairmUlena niyatavrataH || 21-19 ||

upacArai SoDazabhirmASanaivedyamarpayet |
kAryaM vijJApya prajapecchatrunAzo bhaviSyati || 21-20 ||

iti saMkSepataH proktaM vArtAyakSIM zRNu priye |

praNavaM vAgbhavaM mAyA zrIbIjaM jyotirbIjakam || 21-21 ||

aGkuzaM bhRgubIjaM ca mukhavRttaM sabindukam |

catRtIyaM binduyuktaM vIramodanamuddharet || 21-22 ||

AgneyI padamuddhRtya mahAvIre padaM vadet |

sarvabhAvapadaM procya darzanIti padaM vadet || 21-23 ||

uktvA nandanavanapadaM vAsinItipadaM vadet |

mahAsuptapadaM procya jAgariNIpadaM vadet || 21-24 ||

mama karNe darzayeti svAhAnto manurADayam |

ravivAre parvaNi vA tailAbhyaGgaM samAcaret || 21-25 ||

p. 144) ayutaM prajapenmantraM tilapuSpeNa homayet |

aparAhNe sahasraM ca tvaSTottarazataM ca vA || 21-26 ||

japtvA supte nare rAtrau sarvaM kathayati priye |

traikAlyajJAnasiddhyarthaM kariSye'haM japaM tava || 21-27 ||

iti saGkalpamAsAdya japAttraikAlyamApnuyAt |

ihAphalaM phalaM caiva parAphalaM ca Aphalam || 21-28 ||

jAnAmi iti samprocya siddhamaMtro naro bhavet |

RSicchandAdikaM dhyAnaM nAsti cAsyAH priyaMvade || 21-29 ||

iti saMkSepataH proktaM pizunasya manuM zRNu |

zrIMbIjaM cAparAM procya zatarudrapadaM vadet || 21-30 ||

sau prastAMgIpadaM procya tataH saphalazabdataH |

vArtAM kahapadaM procya tataH karNapadaM vadet || 21-31 ||
pizunAkhyapadaM procya mAyAsvAhAnvito manuH |
maMtrarAjaH samAkhyAtaH sahasreNa puraskriyA || 21-32 ||

sahadeva RSizcAsya anuSTup cchanda Iritam |

zrImatkarNAkhyapizuno mahAlakSmI ca devatA || 21-33 ||

vAgbhavaM bIjamAkhyAtaM zaktiH syAtkAmabIjakam |

parAbIjaM kIlakaM syAnmama zabdaM samuccaret || 21-34 ||

sakaleti padaM procya rahasyapadamuddharet |

vAgvijJAnArtheti padaM viniyogaH prakIrttitaH || 21-35 ||

hrIM SaTkaizca SaDaGgAni vyAhRtyA digvibandhanam |

anena kramayogena pizunaH sarvasiddhidaH || 21-36 ||

iti saMkSepataH proktaM kirAtapadapUrvikAm |

vArAhIM zRNu devezi sAvadhAnamanA bhava || 21-37 ||

vAgbhavaM bIjamuddhRtya vArAhIbIjamuddharet |

zrIbIjaM ca tatastAraM namo bhagavatIti vai || 21-38 ||

vArAhIpadamuddhRtya varAhamukhi coddharet |

kirAtarUpiNi procya ekarAtripadaM vadet || 21-39 ||

p. 145) prasannepadamuddhRtya varadepadamuddharet |

mama kAryapadaM procya siddhiM kuruyugmaM vadet || 21-40 ||

zrIbIjaM staMbhabIjaM ca vAgbIjaM svAhayAnvitam |

vibhItakaM samAnIya tasya majjAM samAharet || 21-41 ||

tadbhasmAJjanamAsAdya kajjalaM netrayordadet |

rAtrau dhUpaM tato dattvA prajapetparamezvari || 21-42 ||

prasannA bhavati kSipraM nAtra kAryA vicAraNA |

svapnavArAhivatsarvaM zRNuSva kAlavAdinIm || 21-43 ||

praNavaM bhuvanAM lakSmIM vAgbIjaM kAmabIjakam |

saMvartaratisaMyuktaM binduyuktaM samuddharet || 21-44 ||

praNavaM hRdayaM procya tato bhagavati padam |

bhUtamuddhRtya devezi bhaviSyamuddharettataH || 21-45 ||

vartamAnapadaM procya tadante kAlavAdini |

prapaJcapadamuddhRtya zarIriNipadaM vadet || 21-46 ||
sahazabdaM samuddhRtya amukaM me vadettataH |
kAryaM kathayeti procya punarbIjAni coddharet || 21-47 ||

ayutaM prajapenmantraM dazAMzaM havanaM caret |

AkarSaNArthe devezi bhAnuvAre yathAvidhi || 21-48 ||

rAtrau tu zayanAtpUrvaM sahasraM prajapecchive |

aSTottarazataM vApi zayIta tadanantaram || 21-49 ||

tatsvapne ciMtitaM kAryaM devatA kathayeddhruvam |

nAmAdidarzanaM tatra draSTavyaM vidhipUrvakam || 21-50 ||

yasya yA cintitA zaktiH saptadvArA bhaviSyati |

iti saMkSepataH proktaM zRNu dhUmAvatIvidhim || 21-51 ||

dhU/bIja tritayaM procya dhuruyugmaM samuccaret |

dhUmAvatipadaM procya kroM svAhA phaT samanvitaH || 21-52 ||

maMtraH prAthamikaH prokto dvitIyaM zRNu sAdaram |

praNavaM dhUmrabIjaM ca dhUmAvatipadaM vadet || 21-53 ||

p. 146) devadatto dhAvatIti svAhAnto manurADayam |

RSiH kSapaNakaH khyAto gAyatraM cchanda Iritam || 21-54 ||

dhUmAvatI devatA ca dhU/bIjaM bIjamIritam |

svAhA zaktiH samuccATe viniyogaH prakIrttitaH || 21-55 ||

dhU/SaTkaistu SaDaGgAni dhyAnaM zRNu varAnane |

kAkArUDhAtikRSNAbhA bhinnadantA virAgiNI || 21-56 ||

muktakezI sudhUmrAkSI kSuttRSArtA bhayAturA |

caMcalA cAtikAmArtA kliSTA puSTAlasAGgikA || 21-57 ||

malinA zramanIraktA vyaktagarbhA virodhinI |

dhRtasarpAgrahastA ca dhyeyA dhUmAvatI parA || 21-58 ||

lakSaM japenmahezAni jagaduccATanaM caret |

sarvataMtre prayuktattvAdatra saMkSepato matA |
maMtrAMtaratvAtkathitA kimanyacchrotumicchasi || 21-59 ||

iti zrIzaktisaGgamamahAtantrarAje uttarabhAge tRtIyakhaNDe

zrImadakSobhyamahogratArAsaMvAde
dhUmAvatIkautukasaMkSepavidhirnAmaikaviMzatitamaH paTalaH || 21 ||

|| sundarIkhaNDaH ||