Disusun jari nan sapuluah, ditakuakan kapalo nan satu dihujamkan lutuik nan duo.

Kapado ALLAH Ampun dimintak, sambah dianta dipuhunkan, kapado Panghulu Pamangku
Adat, bilo maulana jo tuanku, Nan manjunjuang soko dalam adat, sarato imam dengan
khatib. Nan mudo pambimbiang dunia Bundo kanduang samo didalam.

Ujuik kato buah rundiangan, sakiro paham dikahandaki bahubuang jo maso nan
ditampuah, musim nan tumbuah iko kini, syariat ado bahakikat, lahia kulik
manganduang isi. Dilua nan tampak nyato, didalam kanduangan ulemu, tiliak nyato
paham mamanjek, dijauah hari simpanan kito. Kalau dipiliah jo ihktiar, jikok aka
dijalankan, jo tanang budi marangkak, kateh nyato taambun jantan, kabawah jaleh
takasiak bulan.

Sampai tabagi dek ulemu, lahia manjadi buah ama, dek enggeran soko nan tatagak,
Malangkah diujuang padang, basilek dipangka karih, kato salalu baumpamo, rundiang
nan banyak bakiasan. Dalam kulik pandanglah isi, dinan lahia bathin tabayang. Kulik
manih ditimpo bathin, bathin ditimpo galo-galo, dalam lahia manganduang bathin,
dalam bathin bahakikat pulo.

Rumah gadang bari bapintu, nak tarang jalan kahalaman, kok dikumpa saleba kuku,
kalau dikambang saleba alam, Talago adat nan indak kariang, sapayah payah manimbo,
walau dalam musim kamarau, mailia taruih aia nan janiah . Latiak latiak tabang ka
pinang, jatuah kapangka salironyo aia satitiak dalam pinang, sinan bamain ikan
rayo.

Didorong dek kandak bana, dielo dek cinto hati, mangingek papatah dalam adat,
bakarih sikati muno, patah lai basimpai alun, ratak sabuah jadi tuah. kok dibukak
pusako lamo, dibangkik tareh nan tarandam, lah banyak ragi nan barubah. Seni budaya
tanah aia, lapuak dizaman panjajahan, kinilah jadi buah pikia, sadang didalam
panggalian. Lapuak lapuak dikajangi, usang usang dibarui. Mamandang gujalo zaman,
edaran maso putaran zaman, lah lanyap zaman panjajahan, lah patuik disalam nan
tabanam.

Ambo nan bukan cadiak pandai, ulemu di TUHAN tasimpannyo, kok senteng tolonglah
bilai, tandonyo kito sa-undiko. Ampun sagalo niniak mamak, nan gadang basa batuah,
kok tasalah maaf pabanyak, nan Qadim hanyo sifat ALLAH.