NOVENA KING NUAN A BIRHEN MARIA

REYNA NING SANTO ROSARIO

King lagyu ning Ibpa, ampon ning Anak, ampon ning Banal a Espiritu.
Amen.

KAPANISIAN (makasiklaud)
MANUNGGE: O Jesu-Kristo:
MALDA: Guinu ku at mengabus kaku,
makasiklaud ku arapan mu,
mipnung kapanisian king pamikasala ku.
O Dios kung mangaintulid lubus king sablang lugud ku,
king alang-angga mung pakalulu,
panayan kung tanggapan ing kapatawaran
uli ning lugud at lunus mu.

Kaniting novena kang Mariang Indu Mu,

ing Reyna ning Santo Rosario,
Hesus, saupan mu ku
Ban lalung milusuk ing lugud ku keka
at ban asuyuan da ka
king mipnung kalausan a lub.
Dinan mu ku pung grasyang mie
at manatiling susuyu keka at king Ibpa mu
mangga king sepu na ning bie ku.

AMEN.
PANALANGIN ALDO ALDO

MANUNGGE: O mapamakalulung Virgen

O lusuk malugud a Indu
O mayumung Santa Maria
mapamatula karing maliligalig
santungan ding makasalanan
talapamilatan king Dios at karing tau.

MALDA: Ika ing daung nang Noe king albug ning kasalanan.
Ika ing pinan-ari ning karatunan,
ing pamakikasublian mi king Dios.
Ika ing pati-pating magdala
king sanga ning oliva ning kapayapan.
Antimong kaustan ning kekang lugud indu,
binie me king yatu kapamilatan nang Sto. Domingo
ing debosyun king Santo Rosario.
King uli niting debosyun
ding e sasalpantaya, sinalpantaya la;
ding peyinggulut king kasalpantayanan, mibalik la lub;
ding salang ning Santa Iglesia mesambut la,
at ing balayan meuman ya.

Reyna ning Santo Rosario

mamaus ke king kekang kasaupan.
Iligtas me pu ngeni ing kekang balayan
karing silu ning demonyo.

Maragul ing lugud mung pepakit

king gabun ming beitan,
uling iniang ding kasalang ning Santa Iglesia
pignasan deng samsaman ing kekeng kasalpantayanan
ika pu linigtas mu kami
king kapamilatan ning metung a mala,
iti ya pin ing labanan awsan ming “NAVAL”
nung inia naman pengaintuliran mu
ing mayaus kang Reyna at Indu ning Filipinas.

Balikdan mo pu king kekang pakalulu

retang apatuki na ning marok a kasalang
ban gulutan da na ing karelang kamalian
at magbalik nala king pamisanmetung king Santa Iglesia.

Aslaganan mo pu ring manungkulan

king kekaming bansa,
ban lalam ning banal mung pamanayid
panimunan de iting labuad anti mong tune Kristiyano.

Anti ning mayayaus keng bininiagan,

king kekang pamamilatan, pagnasan mi naman
ing mie antimong mangayap mung anak
lalam ning kekang pamananpun.
King kapamilatan ning kekang Santo Rosario,
antimong anak a malugud keka,
manalig keng miras king kayarian banua
a nung nu ika ing Indung Reyna,
at y Kristong anak mu mag-ari ya,
manga man king alang angga.
AMEN.
MEMORARE

MANUNGGE: Keka sa’ng ganakan,

MALDA: O Mariang lubus mipanuanan,
Birheng kasantu-santusan,
a ala ke pang atatandanan
na atin na mo sanang:
linapit ban keka lang ipaglualu’t lingapan;
menigapu king kekang kasaupan;
pigdulapan ing kekang pamamilatan;
a e mu belikdan at sinaupan.

King lubus a kapagtiwalan,

dapal kung lalapit keka,
O Birhen ding sablang birhen, kanakung Indu.
Makatalakad king mal mung arapan,
akung anak mu, ngeni sisisi’t pagkalungkutan
ding kakung kasalanan.

O Indu ning Amanu a mikatawan tau,

e mo sana pisasauilian ding kakung kayadwanan;
nune king lugud mu’t pakalulu,
pakiramdaman mo’t dinan kapakibatan. Amen.

Ngeni adwan tamu ing kekatamung kapagnasan kaniting Nobena.

(Tuki ya ing Panalangin king makatakdang aldo)
MUMUNANG ALDO

MANUNGGE: Reyna ning Santo Rosario, Indung panaligan mi,

MALDA: Tinggap meng mipnung ganaka
ing anyaya ning angel Gabriel
para maging Indu na kang Kristo.
Ika, agad-agad mung pekibat;
“Ani kung alipan ning Guinu
maliari kabud kanaku anti ing gingkas mung amanu.”
Kabud binie mu ing pakibat mu,
ing Dios mikatawan yang tau
at pigmulan na ing pamakisaut kekatamu.

Ibili mu ku lalam ning kayampunan mu,

at saupan mu kung makitulad king kekang kabanalan
ban malagwa ku mu rin sanang tuparan
ing mal Nang kaburian. AMEN.
(Tuki ya ing Gale)
KADUANG ALDO

MANUNGGE: Reyna ning Santo Rosario, Indung panaligan mi,

MALDA: Ika pu delawan me ing pinsan mu y Santa Isabel
at pepaligayan me king panyatang mu.
Ing dangalan mu e na ka gewang matas a lub,
at e mu ginamit ing kekang degulan
para matan mo ring mababa,
bagkus dininan mong kaligayan
kaniting misterio ning tula
ning kekang pamandalo’ng atiu king mal mung atian
y Hesus a Talapangabus.

Saupan mu kung mibie-bie

king espiritu ning pamaniawup.
Saupan mu kung mikalat
king samyu ning ganaka at pakalulu ning Dios
ban ing lugud at kapayapan ning Anak mung Y Jesus
mag-ari la karing pusu ra ding sabla. AMEN.

(Tuki ya ing Gale)

KATLUNG ALDO

MANUNGGE: Reyna ning Santo Rosario, Indung panaligan mi,

MALDA: Uli ning kagalangan mu karing atiu king upaya,
minta ka king Belen at karin beit me ing kekang Anak
ing Guinu ming Jesu-Kristo.
Masakit yang tutu itang delanan mung minta karin
uli ning ke-alan dang balikid keka ring tau.

Tapukanan me pu ing pusu ku

king masampat a kagalangan king Santa Iglesia.
Karetang taung palpimua,
saupan mu kung maging mamu.
Ituru mu kung maging maganaka karing aliwa,
mapanatindi king dapat,
at magalang king pamangamanu.
E mu ku pasupil king marok at king kaibugan munlas.
Lupigan ke sa ing karokan king pamaniapat mayap.
Kambe ra ding pastul at ding ari
makasiklaud siping na nitang lalabangan karin Belen,
abalu ku sa king Anak mung bayung bait
ing katuruan ning kamu at kababan a lub. AMEN.

(Tuki ya ing Gale)

KAPAT A ALDO

MANUNGGE: Reyna ning Santo Rosario, Indung panaligan mi,

MALDA: King templo ning Jerusalem
karin mu minunang tikman ing lasa,
iniang ing profeta Simeon inula na
king ing mismung pusu mu
mitandusan ya king metung a sundang.
Mikaduan iti king pangalili nang Jesus
a ikit mu king Templo mu naman
inyang atlung aldo yu neng panintunan.

Dinan mu ku pung sikanan O Indu

mibata king sablang kasakitan
a kayantabe na ning pamakitulad
kang Kristong Anak mu.
Ituru mu kung maging mapakumbaba
ban nabangnan ke ing kayarian banua,
ing galal ning kekang kapagsubukan
at ing pamailasa ning Anak mung y Jesus. AMEN.

(Tuki ya ing Gale)

KALIMANG ALDO

MANUNGGE: Reyna ning Santo Rosario, Indung panaligan mi,

MALDA: Tatangalan da ka pung makatalakad
lalam ning Krus ning kekang Anak,
at magkakasakit kambe na,
para king kaligtasan ning ketawan.
Binie na ka kekaming Kristo anting Indu mi mu naman
iniang y Kristo ngana kang Juan
“Oyan y Indu mo” at keka naman; “Oyan ing Anak mo.”

O Mariang Indu ku
ing kapigaganakan king makapakung menatbus kanaku
at ing pamibule mu king Kalbaryo
idayu ra ku sa king pamikasala.
King sablang kapagsubukan ku keka ku makalawe.
Indu kung pakamalan, ganakan mu ku
at e mu sa kakawang kapilan man
ing lingap mu kanaku
anggang e ku makapakiabe keka
ketang alang kapupusan a lugud at kanuanan karin
banua. AMEN.

(Tuki ya ing Gale)

KANAM A ALDO

MANUNGGE: Reyna ning Santo Rosario, Indung panaligan mi,

MALDA: Ing pangasubli nang mebie ning Guinu mi

ya ing katibayan ning sarili kung pamaniubling mie,
at ing panalala king maligayang penandit
a makapakiabe kung pasibayu
karing sablang pakamalan ku,
at pati na keka Indu, ampong king Dios,
king alang kapupusan.

Patnubayan na sana ing kakung tantu

a mibie-bie kapilan man antimong tune Kristiyano.
Pakiabutan mu para kanaku, O Indu,
ing sikanan mibata king kasakitan
uli ning lugud ku kang Jesus
at pamanuru ku karing manalipit king mipnung
kapamintuan ban aku man mirakayan ku king tula
ning pamanyubling bie.
AMEN.

(Tuki ya ing Gale)

KAPITUNG ALDO

MANUNGGE: Reyna ning Santo Rosario, Indung panaligan mi,

MALDA: Tatangalan da kang makalibutad karing apostol

inyang ing Banal a Espiritu tinipa ya
king aske ning dilang api
ketang minunang diling Pentekoste.
Uling Indu na kang Jesus, Indu ra ka naman ding apostol,
at ning Santa Iglesia ning Mal mung Anak.

Ipamilatan mu ku ban aku man sa mibayu ku,

At milablab ing pusu ku king upaya ning Banal a Espiritu.
Pakiabutan mu king Diyos
ing dinan na ku sanang sikanan at tetagan
miladlad at mamingua king kasalpantayanan.
Kapilan man sa e ku maging sangkan
ning pamikasala ring aliwa
nune ayagyag kong magkapilit dapat kayapan.
Maging larawan na ku sang mabie
ning Anak mung y Jesus,
kanita maging wagas kung uliran
king panga-aliwa ra pilubluban
ding para kung tau at bininyagan. AMEN.

(Tuki ya ing Gale)

KAWALUNG ALDO

MANUNGGE: Reyna ning Santo Rosario, Indung panaligan mi,

MALDA: King kapupusan ning bie mu keti king yatu
y Kristo dela na ka banua kaladwa’t katawan.
Detang magkasakit kambe nang Jesus
mipaligayan la kambe nang Jesus.
Iting atul ning Dios a malingap metupad ya keka.
Pauli ning meging Indu na kang Jesus
dininan neng sintingan ing mabilug mung pangatau,
e ne pepaburen melaso, at dela ne pa banua.

Alang-alang king maligayang pangadala mu banua

ipaganaka mu pu kanaku kapilan man
king ing bie metung yang pamaglakbe,
at ing kayarian banua makapanaya ya naman kanaku
king tauling aldo.
Saupan mu kung mangilag
king mayan nang dalan ning kasiran
at tuntunan ing maskup a pasbul papunta king Ligaya
banua. Saupan mu kung mika malinis a pusu
ban king katataulian, akit ke ing Dios:
y Jesus a Anak mu at Guinu ku. AMEN.

(Tuki ya ing Gale)

KASIYAM A ALDO

MANUNGGE: Reyna ning Santo Rosario, Indung panaligan mi,

MALDA: Mitutula keng tatangal keka
king pangaputungan mung korona
antimong Reyna ning sablang lelangan ning Dios,
itang kabud inula mu
a “Manibat ngeni ausan da kung nuan ding sablang dai”
mirinan katuparan.
Mitutula keng tatangal keka
antimong Indu ning Santa Iglesia
at talapamilatan karing sablang kalam.
Mitutula kami uling karing balen a pinili ning Dios,
dakal ke tinggap at maragul ke dake
king pamanampun ning kekang pusung Indu
at king uliniti babansagan da kang
kekaming talapanampun,
Reyna at Indu ming panaligan.

Kambe ra ring sablang angel at banal ning banua

at ding sablang tapat mung anak keti king yatu
daralit mi ing kapurian keka,
king libis ning kekang trono,
yampang mi la ring lirios at rosas
at ding pusu ming malinis,
ding panalangin mi,
at iti ya pin ing kekang Sto. Rosario. AMEN.
GALE KING NUAN A VIRGEN
1. MANUNGGE: Ita ning Judeang Labuad
maragul yang tutu palad,
uling karin ya misapuak
ing Indu ning Dios Anak.

King kasalana’ nang Eva,

dit man bakas ala keya
oiti ing alang kalupa
ning kekang bie, O Maria!

Puryan ta ya, puryan taya y Maria, Indu’t Reyna.

MALDA: Kapurian keka, kapurian, O Indu ming maligaya.

2. MANUNGGE: Maria! Indung malam,

miras kekang kamatayan
e uli ning kasalanan
nun’e ning grasya mung sakdal.

Guinung Dios a Ibpa banua

kewilia’ nang kekang grasya
ding angel tinubud na la,
ban banua ra ka idala.

Puryan ta ya, puryan taya y Maria, Indu’t Reyna.

MALDA: Kapurian keka, kapurian O Indu ming maligaya.
3. MANUNGGE: Yatu malati ne man,
king ningning mu ampon linang,
inia ing banuang kayarian
ya pa ing tune mung kakarinan.

Bayu ya minukyat banua

ing Virgen a Maligaya
karing alang metungge pa,
a metung mo sang Reyna ra.

Puryan ta ya, purian taya y Maria Indu’t Reyna.

MALDA: Kapurian keka, kapurian, O Indu ming maligaya.

4. MANUNGGE: Ing Dios keyang pepamintu

ing mipuk ka ketang trono,
ban paralpak king bitis mu
ing banua at ing yatu!

At Reyna ra ka ring Reyna,

Reyna ra ka ring kaladua
at ika ing Reyna banua,
Reyna ka manga man king alang angga.

Puryan ta ya, puryan taya y Maria Indu’t Reyna.

MALDA: Kapurian keka, kapurian O Indu ming maligaya.
5. MANUNGGE: Banua’t yatu magtingangas,
King kaluklukan mung matas,
a mibili’t mitalakad,
siping ning Dios, kekang Anak.

Ngening keti sulip, ika,

anting tau binie mu Ya,
ing Dios inatbana’ na ka,
dela na ka banuang Reyna!

Puryan ta ya, puryan taya y Maria Indu’t Reyna.

MALDA: Kapurian keka, kapurian O Indu ming maligaya.

6. MANUNGGE: Maria, iniang birian mu,

Dios kinuldas Yang meging tau
ban tangalan ing grasya mu
a alimbaua king yatu.

Grasya mu alang kapara,

e ra asulat ding poeta
e na ayapse ning biasa
uling kapilas ning banua!

Puryan ta ya, puryan taya y Maria Indu’t Reyna.

MALDA: Kapurian keka, kapurian O Indu ming maligaya.
7. MANUNGGE: Ing labuad ning Filipinas
ing pibandian na laganas
karing bunduk, ilang malat,
ating guintu, ating perlas.

Dapot kanian matimbang pa

ing metung king pibandian na
e aliwa, ya pin ita
pamanampun nang Maria.

Puryan ta ya, puryan taya y Maria Indu’t Reyna.

MALDA: Kapurian keka, kapurian O Indu ming maligaya.

8. MANUNGGE: Panuanan da sa ing kalinisan mu,

kapilan man, O Indu ku!
pablasang ing kabud Guinu
mewili ya king yubu mu!

King Judea ikang rosa,

Karing bininyagan, ligaya,
maging tala na ka sana
ning melili kung kaladwa!

Puryan ta ya, puryan ta ya y Maria Indu’t Reyna.

MALDA: Kapurian keka, kapurian O Indu ming maligaya.
TAULING PANALANGIN ALDO ALDO

MANUNGGE: Reyna ning Santo Rosario, Indung panaligan mi,

MALDA: Santungan ning mabilug a ketawan

mapakumbaba keng dururup arap ning kekang trono
lubus manalig king tanggap keng pakalulu, grasya,
kasaupan, at kayampunan
e king makuyad ming pangaintuliran
nune bukud mu king maragul nang kayapan
ning pusu mung Indu.
Malunus ka sa pu king makalaganap a kasiran
king kaladua at katawan
at king kasakitan at kalungkutan da
ring e pabilang a tau.

MANUNGGE: Indu ning pakalulu:

MALDA: Pamilatan mu para kekami
ing kayapan ibat king Dios
at tanggapan mi la sana
detang grasyang makasaup king pamagsadia
pamitangka at pamipatibe kaniting kapayapan.
Reyna ning Kapayapan, ipanalangin mu kami
at ibie mu king yatu atking bansa mi,
lalu na king parokya at balen mi
ing kapayapan a pagdulapan ding sabla
ing kapayapan king katutuan at king katuliran
at ing lugud nang Kristong anak mu.
MANUNGGE: Katataulian, Reyna ning Banua:
MALDA: Anti ning Santa Iglesia at ing meto ketauan
king pangatagulaling da
king Sagradong Pusu nang Jesus,
lubus ing kapanaligan da keya.
Makanian mu naman,
ikami magtagulaling ke keka, O Reyna at Indu mi,
ban ing lugud mu at pamanampun
piraplan neng idatang
ing pamagtagumpe ning kayarian ning Dios
at ban ding sablang bansa
king pamisanmetung da king kapayapan
ipasyag da kang NUAN karing sabla.
Kambe mu idalit deng masikan ing Magnificat,
ing alang sukad a dalit
ning ligaya, lugud, at kapasalamatan king Dios
a nung kenu la mu kabud manakit kanuanan at
kapayapan. AMEN.

Manungge: Nuan a Virgen Maria, Reyna ning Santo Rosario, at Indu mi.
Malda: Ipanalangin mu kami king Dios,
at ilapit mu kami kang Kristong Anak mu.

Sabla: King lagyu ning Ibpa, ampon ning Anak,

ampon ning Banal a Espiritu. Amen.