МОЛИТВЫ О ПЛЕНЕННЫХ

Дополнительные прошения на сугубой ектении:

Петра́ от уз и темни́цы изведы́й и невреди́ма Це́ркви Твое́й предста́вивый,
Христе́, и рабо́в Твои́х плене́нных, и́мярек, в заточе́нии су́щих, неизрече́нным
про́мыслом Твои́м свободи́, мо́лимся Тебе́, Всеми́лостивый Спа́се, услы́ши и
поми́луй.
Избавля́яй при́сно, Го́споди, все упова́ние на Тя Еди́наго возлага́ющих, при́зри
милостивно на ско́рбь на́шу, и плене́нных рабо́в Твои́х, и́мярек, от уз, бед и
заточе́ния, яко Всеси́лен, изба́ви, приле́жно мо́лимся Тебе́, ско́ро услы́ши и я́ко
Щедр поми́луй.
Кре́пкою Твое́ю руко́ю ро́д челове́ческий спаса́яй, Го́споди, и любо́вию Твое́ю
вся ко бла́гу направля́яй, Засту́пник и Помо́щник кре́пок бу́ди рабо́м Твои́м
плене́нным, и́мярек, на всеси́льную по́мощь Твою́ упова́ющих, мо́лимся Тебе́,
Всеси́льне Го́споди, услы́ши и ско́ро поми́луй.
Молитва о пленненных
Го́споди Иису́се Христе́ Бо́же наш, и́стинную свобо́ду позна́вшим Тя
дарова́вый, свята́го апо́стола Петра́ от уз и темни́цы без вся́каго вре́да
свободи́вый, смире́нно мо́лим Тя: рабо́в Твои́х плене́нных, и́мярек, в
заточе́нии су́щих, си́лою Твое́ю укрепи́. Се́рдце му́жественное, по́мощь и
заступле́ние Твое́ им да́руй, и неизрече́нным Твои́м про́мыслом от плене́ния
свободи́. Помо́щник кре́пок бу́ди им и нам, все упова́ние свое́ на Тя
возлага́ющим и Твоея́ всеси́льныя по́мощи ве́рно ча́ющым.
Ты бо еси́ кре́пость, и избавле́ние, и мир наш, и Тебе́ сла́ву возсыла́ем со
Безнача́льным Твои́м Отце́м, и Пресвяты́м, и Благи́м, и Животворя́щим Твои́м
Ду́хом, ны́не и при́сно, и во ве́ки веко́в. Ами́нь.