В каждый день светый въ церкви по литоргии светой маютъ свещенницы людей ꙋчыти

рꙋкою креститъсѧ, тымъ способомъ маетъсе самъ рꙋкою крестити, до людей ѡвєрнꙋшисе и
имъ тоєжъ казатъ чынити и неразъ тоє побторыти мовечы, Господи Ісꙋсе христэ Сыне
Божий помилꙋй насъ грешныхъ, прытомъ ꙋчыти ихъ ѡтче нашъ, Богородице дѣво, Вѣрꙋю
Воєдиного Бога, и залецати людемъ абы хто то з нихъ ꙋмѣтъ, дрꙋгихъ ꙋчылъ
неꙋмеетныхъ, и не ѡпꙋщати того жадного днѧ светого прытомъ выкладати имъ, што то
єстъ светаѧ Тройца, тымъ способомъ ѧко єстъ въ катехисмикахъ нашыхъ, Што єстъ
христосъ, што пречистаѧ дѣва Марыѧ, ꙋчити и того же дꙋша кождого з насъ по смерти
не ꙋмираетъ, але єстъ несмертелнаѧ, же єстъ дрꙋгий животъ длѧ насъ въ которомъ панъ
Богъ сꙋдитъ справы людискиє, злыхъ на затрачене вѣчноє възказꙋючы, А добрыхъ на
жывотъ вѣчнъный небесный, ꙋчыти ихъ жебы се ѡ ласкꙋ божꙋю старали, презъ животъ
светобливы зъ сего света зъшедшы, могли ѡсегнꙋти жывотъ вечъный ѡный небесный длѧ
которого вси ѡтъ Бога створени сꙋтъ, Наꙋчати теперъ вземли загребаемъ, вестанутъ
ѡтъ мертвыхъ и добрые з дꙋшами и тѣлами пойдꙋтъ до радости небесное, А грешные з
дꙋшами такожъ и стелами пойдꙋтъ на мꙋки пекельные. Еслибы который свещенникъ не
чынилъ того ино на извержениє ѡсꙋждаютъ правила светыє церковные правило
деветнадцатое петдесѧтъ ѡсмое, и Соборꙋ шестого равило деветнадцатое, бо безъ
ведомости тыхъ речей, которые се тꙋтъ ѡписали не можетъ быти збавенъ жаденъ
человѣкъ свѣцъкий. Афанасий светый и симболє мовитъ.