Тропарь свт. Дионисию, гл.

1
От юности Богу послужи со смирением, душу питавый Святым
Писанием, молитвою усердною и строгим житием соделася обителию
даров Духа Святаго и пастырем достойным бессарабских верных
румын; сего ради святе Дионисие, дерзновение стяжав у Христа Бога,
моли о душах наших.

АКАФИСТ СВЯТИТЕЛЮ ДИОНИСИЮ,

ЕПИСКОПУ БЕЛГОРОДСКОМУ И ИЗМАИЛЬСКОМУ.
Кондак 1
Избраннаго сына Бессарабии и последователя преподобных
подвижников, честнаго иерарха и отца щедраго, милостиваго к
сиротам и любящаго народ, с радостию почтим, сердцем взывающе:
Радуйся, святителю Дионисие, Бессарабии мудрый пастырю.

Икос 1
Тесною стезею подвигов и трудов последовав от юности, святителю
Дионисие, чистотою и молитвою сосуд избранный благодати Божией
содеяся, и яко столп огненный явився, в тяжкия времена упасе народ
свой яко любящий отец. Сего ради достойно есть воспевати тебе:
Радуйся, земли Бессарабския прозябение;
Радуйся, монаше подвижниче.
Радуйся, образе смеренномудрия;
Радуйся, духовный наставниче.
Радуйся, любителю учения;
Радуйся, кроткий пастырю верных.
Радуйся, отче сирых;
Радуйся, покровителю бедных.
Радуйся, защитниче веры правыя;
Радуйся, благоговейный служителю алтаря.
Радуйся, наставниче народа своего;
Радуйся, сосуде даров Духа Святаго.
Радуйся, святителю Дионисие, Бессарабии мудрый пастырю.

1
 Кондак 2
Издетска восприят от родителей твоих любовь к Богу и Церкви,
народу румынскому и языку предков, любовь юже насади в своем
сердце, отче Дионисие, и соделася плодоносною труды твоими,
поющу ти Пресвятей Троице: Аллилуиа.

Икос 2
В отчем дому научися чтению, и бе радость твоя еже приникнути к
Священному Писанию, из негоже познал еси заповеди Евангелия
Христова, и возгореся сердце твое желанием совершенства, еже
восхваляюще поем ти тако:
Радуйся, носивый имя святаго великомученика Димитрия;
Радуйся, последователю святыя ревности Мироточиваго.
Радуйся, духовною пищею воспитанный;
Радуйся, на всяк день слово Писания послушавый.
Радуйся, от негоже о народе румынском услышавый;
Радуйся, величие предков своих уразумевый.
Радуйся, просвещения народа румынскаго возжелавый;
Радуйся, нищий благами земными.
Радуйся, богатый Божественным познанием;
Радуйся, уме полон святых помышлений.
Радуйся, душе освященная небесною благодатию;
Радуйся, наздавый житие твое на камени Евангелия.
Радуйся, святителю Дионисие, Бессарабии мудрый пастырю.

Кондак 3
Возжаждав любви Божией, яко елень на источники водныя, в
возрасте пятнадесяти лет потщася поступити в Суручанский
монастырь, идеже быв прият, сотвори послушание с радостию, служа
всем яко Спасителю Христу и поя Богу со ангелы: Аллилуиа.

Икос 3
Нищета земная твоего монастыря послужи к стяжанию богатства
духовнаго, яко токмо на Бога надеяся и в Его руце предаваше живот
твой, отче Дионисие, ум в небесная имея присно, забываше о пище и
сне, зане Христос бе твоя жизнь и дыхание и радость. Сего ради
почитаем тя, глаголюще:
2
Радуйся, учениче полон смирения;
Радуйся, целомудрие сохранивый.
Радуйся, невинность младенческую соблюдый;
Радуйся, Ангелом Хранителем наставляемый.
Радуйся, любителю трудов;
Радуйся, терпеливый без ропота.
Радуйся, прогонивый страсти целомудрием;
Радуйся, просветивый ум отложением своеволия.
Радуйся, от забот послушанием избавленный;
Радуйся, воистину едино на потребу избравый.
Радуйся, познавый сокровище безценное во глубине сердечней;
Радуйся, последователю преподобных пустынников Молдавских.
Радуйся, святителю Дионисие, Бессарабии мудрый пастырю.

Кондак 4
По седми летех смиреннаго послушания был еси пострижен в
рясофор, по девяти же летех службы пострижеся в мантию, быв
наречен Дионисием в честь святителя провидящаго небесная, ученика
великаго апостола Павла. Того добродетелем последовал еси, ныне
же с ним вкупе поете Богу: Аллилуиа.

Икос 4
Прилежно внимаше Священному Писанию, блаженне отче, ведая
яко Богодухновенно и полезно есть ко учению, обличению,
исправлению, вразумлению еже в правде, яко да человек Божий будет
совершен и готов на всякое благое дело. Мы же восхваляюще тя
глаголем:
Радуйся, имевый пищею слово Божие;
Радуйся, проникнувый во глубину Писания.
Радуйся, почерпавый от него воду живую;
Радуйся, познавый промысел Отца Создателя.
Радуйся, последовавый заповеди Сына Спасителя;
Радуйся, сокровище даров Духа Святаго.
Радуйся, высото небесных поучений;
Радуйся, уме чистый неврежденный смыслом.
Радуйся, познавый слова Христовы, яже суть дух и жизнь;

3
Радуйся, рая Писаний насладивыйся.
Радуйся, известно потрудивыйся в книгах библейских;
Радуйся, проповедниче Божиих словес.
Радуйся, святителю Дионисие, Бессарабии мудрый пастырю.

Кондак 5
Последовав, отче, совету святаго Василия Великаго еже собрати
учения назидательная для души от разных писаний подобно пчелам
собирающим нектар от цветов, чтяше ненасытно книги об истории
народа своего и множество иных писаний, выбирая из них полезная и
поя Богу: Аллилуиа.

Икос 5
Явился еси просветитель Суручанския братии подвижническою
жизнию своею, знанием учения святых и словом премудрым, чего
ради был избран еси игуменом, и добре наставляше монахов, а вкупе
и мирских, от концов Бессарабии стекавшихся к тебе, почитающе тя
сицевыми словесы:
Радуйся, искусный духовниче;
Радуйся, милостивый отче.
Радуйся, кроткий обличителю;
Радуйся, пробуждаяй сном греховным объятых.
Радуйся, от тьмы неведения возставляяй;
Радуйся, унывающия ободряяй.
Радуйся, коегождо еже умножити свои таланты побуждаяй;
Радуйся, юность ко учению наставляяй.
Радуйся, в каждом свое призвание Божие зряй;
Радуйся, милостивому Самарянину последовавый.
Радуйся, одинаково любимый верными иных народов;
Радуйся, звездо в море житейском путеводящая.
Радуйся, святителю Дионисие, Бессарабии мудрый пастырю.

Кондак 6
Мудрым строителем явися своему монастырю, отче, яко обнови той
отвне и изнутри, сотвори из него сердце бодрствующее, любящее
народ, школу языка прадедов и град прибежища для многих нищих и
4
убогих, ихже снабдеваше, тии же хваляху Спасителя Христа, поюще:
Аллилуиа.

Икос 6
Язык прадедов возлюби и на нем совершаше церковное
Богослужение на пользу и утешение народа обремененнаго скорбями,
шестьдесят же братий вашего монастыря научи чести и писати
церковнославянски и румынски. Того ради яко наставника народа и
духовника почитающе тя, глаголем:
Радуйся, о Боге помышляяй учителю;
Радуйся, юных мудрый воспитателю.
Радуйся, монахов светоносный наставниче;
Радуйся, о преуспеянии учеников твоих моливенниче.
Радуйся, к жизни святей направляяй;
Радуйся, веру языком народным возвещаяй.
Радуйся, чтением душеполезным многим путь просветивый;
Радуйся, достойныя и известныя ученики возрастивый.
Радуйся, поколение блистательное воспитавый;
Радуйся, неграмотных и заблудших научивый.
Радуйся, прилежно учащихся помощниче;
Радуйся, о добродетели радеющим споспешниче.
Радуйся, святителю Дионисие, Бессарабии мудрый пастырю.

Кондак 7
Во времена егда сборище противников веры обыдоша Бессарабию,
ты отче, наставляем Духом Святым, предрече яко та свобождена
будет вскоре и вси будут глаголати языком отцев и служити
небоязненно Богу. Увидевше же вернии паче надежды сбытие слова
твоего воспеша Пресвятей Троице: Аллилуиа.

Икос 7
Всех подвигл еси, святе, работати Господеви, усердно молящеся и
пребывающе в мире между собою, ради сплочения во
единомышлении всего румынскаго народа, а через великие деяния
твоих учеников претившие Бессарабии богоборцы обратишася
вспять; сего ради вси возрадовашася, и хваляще тя глаголаша:
Радуйся, своего народа щите молитвенный;
5
 Радуйся, ради мира в отечестве пост и бдение творивый.
Радуйся, духовниче достойных учеников;
Радуйся, любителю языка прадедов.
Радуйся, о единении народа радетелю;
Радуйся, сего ради жизнию своею небрегий.
Радуйся, утесняемых приютивый;
Радуйся, ардельских братий с любовью приявый.
Радуйся, новый Моисее, свой народ от угнетения свободивый;
Радуйся, новый Самуиле, яко праведный судия и служитель
священный.
Радуйся, Духом Святым знамения времен уведевый;
Радуйся, наставниче, небесным промыслом призванный.
Радуйся, святителю Дионисие, Бессарабии мудрый пастырю.

Кондак 8
Приспе время и благоволением Божиим поставлен бысть яко свеща
на свещнице, да светиши всем в дому сущим, возведен быв во
архиерея на Ясскую кафедру на пользу и радость верных Бессарабии,
иже пояху со благодарностию Христу: Аллилуиа.

Икос 8
Велий бысть труд твой в высоком служении, вверенном тебе, святе
Дионисие, зане всегда воинствоваше блага ради Церкви и спасения
пасомых твоих. Обаче подвиги монашеския не сократил еси, но
степень архиерейства виною бысть умножения молитвы и святаго
твоего делания. Мы же чудящеся сему вопием тебе:
Радуйся, Кишиневския кафедры достойный служителю;
Радуйся, Южныя Бессарабии верный пастырю.
Радуйся, во градех и весех проповедавый;
Радуйся, скорбящих утешивый.
Радуйся, неверных ко Христу приведый;
Радуйся, страстьми одержимых к покаянию наставивый.
Радуйся, апостольския проповеди преемниче;
Радуйся, многих от заблуждения изведый.
Радуйся, православие утвердивый;
Радуйся, неправыя учения разоривый.

6
Радуйся, бедных весей попечителю;
Радуйся, святых обителей обновителю.
Радуйся, святителю Дионисие, Бессарабии мудрый пастырю.

Кондак 9
Источник благодати и силы бысть ти служение Божественныя
литургии, в той бо возношаше свой ум в небесныя, глаголя с Богом
несредственне, моляся о своем народе и со ангелы поя Христу в Дусе
Святем: Аллилуиа.

Икос 9
Церковь одушевленну устрояше из камений живых, из душ
любящих Бога, но и храмы рукотворенныя воздвизаше, обновляше и
украшаше, святыя ради жертвы в них непрестанно совершаемыя, да
будет очищен, просвещен и освящен верный народ, иже и ныне поет
тебе сицевая:
Радуйся, святых храмов и часовен устроителю;
Радуйся, по достоинству тех украсителю.
Радуйся, славы ради Божия неустанно работавый;
Радуйся, для поклонения новыя храмы освятивый.
Радуйся, священными сосудами и иконами тыя украсивый;
Радуйся, книгами богослужебными тыя снабдивый.
Радуйся, себе самаго храм святый соделавый;
Радуйся, светом добродетелей осиянный.
Радуйся, пресвитеры наставивый;
Радуйся, многих чрез крещение водою и Духом родивый.
Радуйся, таин Божиих смиренный строителю;
Радуйся, сущих во ограде церковней охранителю.
Радуйся, святителю Дионисие, Бессарабии мудрый пастырю.

Кондак 10
Яко преемник учительскаго достоинства Спаса Христа, святителю
Дионисие, споспешествоваше устроению школ и убеждаше
родителей еже послати чад своих на учение; сам же помогаше
бедным отрокам преуспевати в знаниях полезных, да станут верными
чадами Церкви и Отечества, иже и благодаряху тя и воспеваху Богу:
Аллилуиа.
7
 Икос 10
Избранный народом верным во епископа Белгородскаго и
Измаильскаго, потрудися благовременне и безвременне, обходя
пределы своея епархии, наставляя всех с мудростию и кротостию, во
дни и в нощи, на пути, в храме, в школе, сея слово Евангельское,
плоды пожал еси во время и пение достойное приял:
Радуйся, добрый делателю в винограде Божием;
Радуйся, святителю полон любви и смирения.
Радуйся, пришедый не да послужат тебе, но ты да послужиши;
Радуйся, образе нестяжания и простоты.
Радуйся, языком древних славян проповедниче;
Радуйся, трубо, пробуждающая сознание.
Радуйся, мечу, козни бесовския посецаяй;
Радуйся, пламеню, злыя обычаи попаляяй.
Радуйся, ливане молитвы духовно благоухаяй;
Радуйся, якорю надежды во время испытаний.
Радуйся, на пределех отечества страже неусыпный;
Радуйся, за стадо свое ходатаю неустанный.
Радуйся, святителю Дионисие, Бессарабии мудрый пастырю.

Кондак 11
Родительское милосердие имевый святе к детем сиротам, со многим
трудом воздвигл еси дом для воспитания и роста их христианскаго,
явлей любовь к Богу чрез любовь к ближним, пел еси Отцу
Небесному: Аллилуиа.

Икос 11
Глубокую печаль причини твоему сердцу отторжение Бессарабии
богоборческою властию, и с великою болию покинул еси ю, нашед
себе временное пристанище во дворце Аржеш, идеже местные
христиане окружиша тя любовию и глаголаша ти:
Радуйся, за весь народ сердце болящее;
Радуйся, святителя преподобнаго образе.
Радуйся, молитвы лампадо негасимая;
Радуйся, добродетелей цвете благоуханный.
Радуйся, неводе словесных рыб;

8
Радуйся, духовнаго пения уста.
Радуйся, иконо святости;
Радуйся, чаше полная мудрости.
Радуйся, сосуде смиреннаго помышления;
Радуйся, правыя веры защитниче отважный.
Радуйся, служителю полный истиннаго благоговения;
Радуйся, верою народ оживляяй.
Радуйся, святителю Дионисие, Бессарабии мудрый пастырю.

Кондак 12
Утружден многими подвигами, отставив попечение архиерейское,
возвратися в Суручанский монастырь, радуяся о свобождении
Бессарабии, но огорчися, увидев разорение святых храмов врагами
Креста Христова, обаче со тщанием собрав рассеянную братию, в
смиренной молитве, терпении болезней и тишине готовляшеся к
переходу в вечность, поя Богу: Аллилуиа.

Икос 12
Предузнав свою кончину, написа духовное завещание, и тако предал
еси душу в руце Христу, Емуже всем сердцем и всею крепостию
своею послужи во все житие твое, мощи же твои, положенныя в
твоей обители, прославлены быша от Бога нетлением, сего ради
почитаем тя, глаголюще:
Радуйся, от временнаго в вечное блаженство отшедый;
Радуйся, Богом в чудном образе миру явленный.
Радуйся, егоже мощи по смерти поругание пострадаша;
Радуйся, претерпевый яко невернии твою раку пожгоша.
Радуйся, сих ради светлее явлейся;
Радуйся, края посреде Днестра и Прута славо.
Радуйся, многоценный венец святых народа нашего;
Радуйся вкупе с сонмом молдавских святителей.
Радуйся вкупе с исповедники Христовыми;
Радуйся, любовь к Богу и ближним приумноживый.
Радуйся, целебниче нашим недужным телесем;
Радуйся, споспешниче спасения нашим душам.
Радуйся, святителю Дионисие, Бессарабии мудрый пастырю.

9
 Кондак 13
О прехвальне отче святителю Дионисие, предстояй ныне Пресвятей
Троице, приими моление наше и испроси нам оставление грехов,
умножение веры и добрых дел, с сим же и наследие вечнаго
блаженства, да и мы вкупе с тобою воспоем Богу: Аллилуиа,
Аллилуиа, Аллилуиа.

(Этот кондак читается трижды, затем читается икос 1 и кондак 1)

МОЛИТВА
Святый и премудрый святителю Дионисие, стяжавый
дерзновение к Богу, приими смиренную молитву нашу и избави
нас от всякия беды и напасти. Моли Христа Бога сподобити нас
прияти Его дары: мир и спасение, чистую любовь и силы творити
добро, да сохранит нас от расколов, нужды, брани, болезни,
пагубы и напрасныя смерти. Путешествующих да сохранит от
бед, болящих да исцелит, сирот заступит, старых укрепит, юных
умудрит и просветит их ум к восприятию добраго учения;
наставником да даст терпение, мудрость и разумение; верных да
сохранит от искушений и ложных учений, укрепляя ны в вере;
монахом да возжжет ревность негасимую в хранении святых
обетов, смирении и послушании духовным отцам; священником
да излиет дар духовнаго зрения, непорочнаго и жертвеннаго
служения; всей же Церкви Своей да дарует архипастырей, право
правящих слово истины. Настави, отче святый, верных образом
святаго жития твоего и духовным поучением твоим, и молися
благому Богу, да возставит нам достойных пастырей духовных,
способных умножити и укрепити любовь между братиями, и
разорити злыя начинания возстающих на Церковь. Нам же всем
да дарует единение в правой вере, любви к ближним и добрых
делех, яко да твоим заступлением жительствующе Богу угодно,
возслем славу, благодарение и поклонение Отцу и Сыну и
Святому Духу, ныне и присно и во веки веков. Аминь.

10